BATU KUDO

Dulu ado kisah dari sabuah nagari nan mambuek urang banyak takuik, tapi ado juo urang
nan indak picayo pado kisah-kisah urang lamo. Awal mulo carito nan datang dari nagari antah
barantah, Adri salah surang urang kampuang nagari antah barantah nan baru ka gadang, dari dulu
jikok parangai kaciak kagadang-gadangan kini lah gadang indak namuah di kecek an urang.
Suatu katiko adri nio pai manjalajah ka subarang nagari, tapi sabalun adri pai, adri mancubo
batanyo kapado surang dunsanak nyo nan biaso lai mangecekan parangainyo juo, mungkin
karano lai punyo raso takuik juo dek karano ka bajalan surang.

Di tangah jalan sadang bapikia basoboklah adri jo angku Dati, iolah angku nan lai
namuah juo mangecekan parangai adri jikok salah, batanyolah angku dek mancaiak adri mode
bapikia panjang “ha.. dak nampak den dek ang do dri? Apo nan ang pikian kok takah itu bana
karuik kaniang ang?.” Takajuik lah adri dek angku dati, dijawek nyo dek adri “iko ngku aa..,
denai pasai di kampuang sajo, nak macubo bajalan-jalan jauah rencana tapi dek denai alum
pernah pai kalua nak batanyo ka angku lai ndk ka bagai juo denai di jalan bako.” Batanyo pulo
lah angku dek mandanga adri mangecek sarupo itu, “kok nak bajalan-jalan surang ang? Kok ka
sabagai juo di jalan tantu lai ndk ado masalah, cuman ang ko nio pai kama dulu sabek awak
urang nagari ko ado pantangan untuak pai ka sabuah nagari.” Mandanga angku mangecek ado
pantangan menarik malahan dek adri iko, sambari bajalan juo sambia babincang hinggo sampai
di rumah angku dati batanyo lah baliak si adri ka angku dati “Ooo…ngku, ka nagari mano awak
ado pantangan? Kok sampai ado pulo awak pantangan ka nagari itu?.”

Lah naiak angku dati ka dalam rumah bagitupun si Adri, lah duduak mangecek lah angku
Dati “nio tau ang jo carito kok sampai ado pantangan lo urang nagari awak ka nagari nan den
makasuik itu?. “iyo ngku, caritoan lah ka denai nak tau lo sakatiak.” Jo capek di jawek nyo dek
Adri. Bacaritolah angku Dati “jadi dulu di nagari awak ko ado duo batu gadang nan manyarupoi
kudo tagak dakek sungai gadang di kampuang awak ko, batu ko kironyo indak sembarang batu
tapi ado pauni nyo, nan ciek lai elok nan ciek lai jaek, jadi nan jaek ko acok manggaduah urang
nagari awak, manggaduah nyo sampai bisa mati urang dek nyo, urang kampuang bangih katiko
lah ndk sakali urang mati di bueknyo hanyo karano lalu dakek batu itu, urang mulai tau kalau
batu itu nan baulah katiko mak gaek nan tingga dakek batu itu mangecekan ka urang, mak gaek
tangah malam ni karayia disungai itu, indak sangajo nampak dek mak gaek roh urang nan mati
ko di jujuik nyo ka dalam batu saisuak nyo lansuang mak gaek mandanga jikok urang nan
nampak rohnyo tadi malam inyolah urang nan mati hari itu. Dek lah tau urang banyak kalau
panghuni batu itu nan manyalah, berencana lah urang nio mamindahan batu itu dari nagari antah
barantah, di panggia lah urang pandai untuak mamindah an batu itu, di pindah an lah batu nan
manyarupoi kudo ko jo salawek dulang di tangah malam jo syarek” nan lah di kumpuan. Sadang
proses mamindahan mangecek lah panghuni batu nan elok, keceknyo inyo ndk nio di pindahan
dari nagari awak ko, inyo ndk ka manggaduah urang nan kecuali urang itu babuek buruak. Tantu
urang lai satuju, tapi nan jaek indak ado alasan ndk di pindahan, jadi di anyuik an lah batu nan
jaek ko jo syarek-syarek nan lah ado sambia basilawek dulang. Kabanyo batu itu anyuik sampai
k nagari biluluak, jadi kini panghuni batu jaek itu bangih ka urang nagari awak sampai urang
nagari awak indak buliah lalu dakek inyo pulo, jikok awak langgar lansuang awak mati di
bueknyo.” Mandanga carito angku Dati bapikialah si Adri urang nan indak tantu kabanran, alah
di caritoan sarupo itu nan inyo malah bapikia nio mancubo pai mancaliak batu itu.

“Ooo…. Jadi indak buliah awak lalu dakek batu itu jikok nio pai ka nagari Biluluak yo
ngku”. kecek si Adri “ indak yuang, jadi jaan sampai lalu ka situ ang jikok nio bajalan juo ang ka
nagari urang.” Kecek angku Dati maingek an si Adri. Sapulang dari rumah angku Dati barangkek
lah Adri barisuak harinyo, urang nan indak namuah di kecek an, pangana inyo malah nio
mancubo mancari batu itu dan indak mandangaan nasihat angku Dati, nasib elok di tangah
perjalanan pai ka nagari Biluluak aman-aman sajo hinggo Adri berhasil sampai di sungai nan ado
batu kudo itu, sampai di situ Adri maraso itu hanyo batu biaso, duduak lah Adri di ateh batu
kudo itu sambia mangecek, “ndk pacayo denai ka angku Dati do, mungkin ka mati lo urang dek
lalu dakek batu ko, kini sajo denai duduak diatehnyo.” Jo raso picayo diri Adri lansuang pulang
ka nagari antah barantah nio manyombongkan diri ka angku Dati jikok indak ado tajadi apo-apo
ka diri inyo pulang dari nagari Biluluak. Sasampainyo Adri di rumah nyo tibo-tibo adri maraso
angek dingin, paluah bacucuran, sadang maraso sasak indak takao tagak tibolah angku Dati
sambia takajuik mancaliak Adri nan alah pucek dek manahan sakik, mangeceklah Adri ka angku
Dati apo nan tajadi sampai Adri maningga sasudah manyalasaian caritonyo ka angku Dati.