I ROKIAN OM TOMBOLOG KOLUMPISAU

(Mohamad Syawafi Aidil Bin Redzuan)

Kopiwosian kumaa oinsanan ngawi. Yoku I Mohamad Syawafi Aidil Bin Redzuan. Uhu nopo
do tangon ku nga I ROKIAN OM TOMBOLOG KOLUMPISAU.
I pogulu po kaka, haro songulun kusai pinungaranan do I Rokian. Ontok muli mantad id
tumo, kokito di Rokion o turu kolumpisou suminondot id iso liwotung. Lisok no I Rokian id
guas do kayu. Sigog ka soliwan no kosumandakan I molong-kolong kinolumiso mantad id
talad.

Pomorulan-rulan no I Rokian minongoi panganu di iso talad. Uli no I Rokian om potonomo

no I talad id ropuhan. Guli no kawagu isio nga songulun sumandak poirikau aiso sinokot om
mingut-singut do mihad. Tahako di Rokian I sigar dau om angatai no minuli. Au no alaid,
pisasawo nodi yolo.

Insan tadau mantad tindohuon I Rokian, okito dau do obongkung po mato di tanak. Tuduko
no di tanak I ropuhan om titigaon.
“Atukoi, minoggidu no I sawo ku ti!” ka di Rokian do tumongob. Pongokorui I Rokian, bobo’
I tanak dau om tangkus no isio.

Alampas tomod I Rokian manangkus, sonulu nga langaan nopo dau. Kokulapai nuluhon om
kosorut id kogoutan, kolintuhun kawagu id kubong. Kobontol isio tangaanak do
mogoriumon.
“Nunu maan dikoyu?” ka di Rokian. Insamakai no di Rokian nga mamatai yolo do tagantor.
“Tuk, kada patayo ino! Kosisian do mamatai nung aiso kasalaan, bolion ku sagantang
wonod do kapur,” ka dau minogodu di tangaanak.
Tangkus no kawagu I Rokian, kokito kawagu dau tangaanak mamatai do tobinduk.
“ Tuk, kada patayo ilo tobinduk, bolion ku sagantang wonod do kapur!” ka kawagu di
Rokian do mogodu. Ingkaa nogi pinowonsoi di Rokian soira nokokito I Rokian tangaanak
mamatai do ninipot.
Sigog ka koimpa I Rokian do mogulinau tomod kawalayan. Korikot isio id iso walai. Suang I
Rokian om kagagang isio tu ogumu tongondu, maamaso mangawol. Ingkurus tomod I tanak
dau minongoi gapus di songulun tondu.Tanud daa I Rokian nga tinalaban di molohing di
tondu.
“Haro no moti poingandad diti tanak ku ti, I Tomburan,” ka di molohing. Sigog ka, kohino I
Tomburan. Awantang tomod I Tomburan.
“Onuan ku ikoyu do pialaan, kumoiso angayan oku do tua lugus. Isai kapanahak dilo tua
owiton nopo I tanak ku muli”, ka di molohing. Kolimunduk do tawan I tuntu do lugus.
“Kada ponokisaap doho, agaras oku moti diti,” ka di Tomburan do oondos. Au po
nokopitanga mindakod nga koilob no do raha I Tomburan.
“Aduuuu…kumuro oku no diti, mogot kosorou I tagantor doho!” ka di Rokian. Sigog kaa
kohino I tagantor. Salakoi I tagantor om kotopo no I tua lugus.

“Koduo nopo, isai koogulu katagad dilo guas kayu nga owiton nopo I tanak ku muli,” ka
kagu di molohing.
Gisom sumodop tadau nga au po nokopiintanga I Rokian do managad tu agayo guas dilo
kayu. I Tomburan nopo nga oruhai no kopongo managad.
“Atuk… alaa oku no baino om au ku dii owit sawo ku muli,” ka di Rokian. Kosorou no dau I
tobinduk om sigog ka kohino I tobinduk. Kokoto di tobinduk om kahaba nopo I kayu. Tumigir
nodi I Tomburan tu aala nopo.

“Id tohuri no isai koihum di tanak ku owiton nopo muli,” ka di molohing. Ontok tangatuong
pisoko no di molohing I sumbu. Sopiihawor-hawor nopo yolo mogihum di tondu. Nousuk no
ngawi no diolo mogihum id pisuk-pisuk do walai.
“Korikot nopo kosuabon, duo-duo dikoyu nga au kaanu di tanak ku”, ka di molohing
poposorou diolo.
“Kosorou nopo daa I ninipot di”, kaa tosorou di Rokian. Sigog kaa om kohino I ninipot om
sako no id timpurulu di tondu. Intangai di Rokian nga posingguun di molohing miampai I
tondu.
“Tomod no do yokoyu piniontok dino,” ka di molohing popolintuhun di tanak dau. Otood
ginawo di Rokian. Mongunsikou nogitomod I Rokian di tongotayam ii minonguhup dau.

Tambalut ku ngawi, osonong tokou nopo kumaa wokon nga osulian tokou di tongosonong
tohuri tadau.

Ponsikou.