Bahan Sermon Evangelium Parhalado HKBP Ressort Panai Hilir

Minggu XII Dung Trintatis, 04 September 2022

Patar Do Saluhutnna Di Adopan Ni Tuhan i
Psalmen 139 : 1 - 6
I.Patujolo
Sian Psalm 139 on, dihatindangkon par-Psalmen do panindangionna di Debata sian tolu hal di turpukon ima :
Allah Maha Tahu / Omni Scince, Allah Maha Kuasa / Omni Poten, dohot Allah Maha Hadir / Omni Present, ima
laho patuduhon na so hea Debata so mangaramoti ngoluna. Ido umbahen boi ma nidok par-Psalm on ia tung so
habilangan do torop ni holong ni Debata tu ibana. Namartangiang do si David ima ala masa do hatiha i panombaon
ni bangso tu akka debata sileban, naeng dohononna nasinomba nasida, ima na so mangolu, na so marpinggol jala
na so marsimalolong, alai anggo Debata nasasadai Debata namartinangi. Ido umbahen didok par-Psalm 139 on
didok ma disi “Parbinoto Na Sun Do Jahowa”. Songoni ma nuaeng na niadopan ni par-Pslam, dipajojor ibana do
songon dia huaso ni Debata dohot panandaion nang pangaramotion ni Debata di ngoluna.
II.Hatorangan ni turpuk
1.Disulingkit jala ditanda Ho do Ahu.
Bagas situtu panulingkiton ni Debata tu hita jolma, ido umbahen dipeakhon ibana do panindangion i tu bagasan
dirina, atik pe diboto ibana do mandok disulingkit jala ditanda Ho do nasa na adong. Ingkon parjolo do
hasintongan i ampe tu bagasan dirinta sandiri (pengenalan diri secara pribadi), ipe asa tuk hita manindangi tu duru
ni dirinta. Jala mansai nadenggan situtu do molo tangkas dipamotoanta na diboto Debata do sandok gulmit ni
ngolunta. Ndang holan mamboto sian duru, alai sahat do tu bagasan roha dohot pingkiran. Ringkot do di Debata
data na akurat. Asa marhite data na ampit i, lam tangkas jala akurat ma songon dia patupaon ni Debatana ringkot tu
haporluan ni halak na porsea i. Marhite i, tandaonta ma, ia Debatanta i tung holong do rohaNa tu hita jolma.
2.Diboto jala ditanda do hita
Ndang adong na buni angka pambahenanta di adopan ni Debata. Sadihari hita hundul manang jongjong, diboto jala
dipamamat Debata. Boi dohonon gerakan na dua on do na rumingkit mulakulak taulahi ganup ari jala ala na
diparenta pingkiran do umbahen na manggulmit pamatangta i. Asa ndada holan gerakan ni pamatang dohot do
nang gerakan ni pingkiran, luhutna diboto Debata. Didok, gari sian na dao diantusi Ho do pingkiranku, ninna
parpsalmen on, Lapatanna, atik pe ndang boi haidaon isi ni pingkiranta, jala tung pe so apala bagas dope
tapingkiri, alai sian nadao nunga jumolo diboto Debata songon dia isi ni pingkiranta, haroroni pingkiranta, tahi ni
pingkiranta, rodi hasil ni pingkiranta.
3.Diparuhumon masa panegeon.
Diuduti ma muse na disege Debata hita uju dungo, mardalan dohot modom. Ndang sai dohonon boi taingot Debata
uju modom hita. Alai didok tung so ditadingkon Ibana do hita di podomanta. Ndang holan diramoti, dohot do
disege, dipais do hita. Molo adong monis dohot lapung di bagasan handurinta, dipaias Ibana do hitasian angka i.
Ndang hea sala Ibana manirang na denggan sian na roa na dibagasan dirinta. Diboto Ibana do tangkas angka
dalanta, atik pe adong dalanta na buni, manang dalan na so taantusi, rodi angka dalan na kebetulan na nidok ni hita
si nuaeng, jala godang do halak na malo manabunihon isi ni pingkirannatu bagasan rumang ni angka hata (ay.4)
gabe so tarida pingkiranna marhite isi ni pangkataionna. Molo di Jahowa tangkas do saluhutna dalan i dohot nang
na manabunihon isi ni pingkiranna. Alani ndang boi manimbil langkanta, manirpang tu siamun manang tu
hambirang na sohinalomohon ni Jahowa.
4.Suman ni halak na tarhurung do hita (ay.5), dihaliangi Jahowa. Adong do Jahowa namamilangi dohot manurati
nasa dosadosanta, jala di bagasan asi ni rohaNa na manesa nasa dosanta. Diboto Ibana sian adopanNa nasa
pambahenanta, jala naparadehon nasa na ringkot di hita. Ndada holan diida Ibana hita alai dohot do nang
dihaliangi. Lapatanna, ndang boi marbalik hita laho pasiding Ibana, ndang joloanta Ibana ai nunga adong Ibana
andorang so adong hita. Alani pola sahat tu na tubu tu rohanta laho maporus sian Ibana, jala ndang boi tubutu
pngkiranta na mandok dao dope Ibana sian hita, ai tung tangkas do dilinggom tanggaNa do hita ganup ari. Ndang
hadodoan hita parbinotoanNa, habadiaonNa, hasongkalanNa. Ndang tuk pingkiranta laho mandodo na manontong
si saleleng ni lelengna i. Jolma na pogos do hita tarlumobi di angka hatauon.
III.Panimpuli
Donok do Debata tu hita ala Ibana nampuna hita jala diboto Ibana do bilangan ni obuk na adong di simajunjungta,
songon i nang roha dohot pingkiranta ido umbahen na tangkas do diboto Ibana hita, sude nataula dohot nasa na
tahatahon, ro diangka na buni di bagasan pingkiranta be. Raphon hita do Ibana. Ndang holang Ibana sian hita.
Diida Ibana do hita sian habangsaanna disude pangulmitonta. Atik pe ninna rohanta sai hira na boi hita buni sian
Ibana songon si Adam dohot si Hawa dung madabu tu bangasan dosa sai martabuni do nasida unang dibereng
Debata, alai tung pe marsimaloaan halak manabunihon angka hahuranganna alai anggo diadopan ni Debata ndang
adong na holip diadopanNa nang hita pe songon i do sai tangkas do ditatap Ibana hita. Nang hita pe molo tung sai
adong dope na sai malo manabunihon hahurangan jala molo so diboto nang dongan jolma di angka hahurangannta
hombar tu tema ni turpukon disuarahon do ndang adong na buni diadopan ni Debata.

Pdt.P.Manurung, S.Th

Sermon Minggu XIII Dung Trinitatis, 11 September 2022

DIHALOMOHON DEBATA DO HAMUBAON NI ROHA (Lukas 15:1-10)
I. Patujolo
Aha do sasintongna tujuan ta laho tu gareja/ marminggu? Pasti do sude mangalusi laho mamuji Tuhan, laho
mambege Hata ni Debata. Alai, praktekna tutu do i na taula? Molo husungkun tu hita nuaeng, aha ma somalna na
tahatahon tu donganta dung mulak sian gareja/ parmingguan? Nda jotjot hahurangan ni parjamita, paragenda,
sijaha tingting manang song-leader do na tahatahon? Molo ido na marsigorgor di rohanta dung mulak minggu,
sintong dope na laho mamuji Tuhan dohot mambege Hata ni Debata hita? Ido na naeng ondolhonon ni turpuk
jamita on tu hita.
II. Hatorangan
Parjolo, dipasolhot dirina tu Jesus laho tumangihon hataNa (ayat 1)
Di sada tingki ro ma torop angka sijalo beo dohot sipardosa mandapothon Jesus. Tangkas digurithon paboa
haroro nasida ima laho tumangihon hata ni Jesus. Hatihai dirajumi halak Jahudi ia ulaon sijalo beo ima ulaon na so
denggan ala papungu beo (pajak) sian rakyat sipasahaton tu panggomgomi Rom. Angka sijalo beo dirajumi songon
tangan kanan ni penjajah na manusai dihatoropan jala bahat do nasida na manambai beo sian na patut (didok ma
istilah nuaeng: korupsi). Asing ni sijalo beo, ro do nang "sipardosa" ninna di ayat 1. Dang apala tangkas ise
"sipardosa" na nidokna, dang apala dipatorang hadosaon nasida ala ni ulaonna do manang ala ni pelanggaran tu
uhum Jahudi. Sandok dua horong ma na ro mandapothon Jesus ima sijalo beo dohot sipardosa; na dua horong on
ima horong na hurang tama mangihuthon hajahudion.
Alai molo tapamanat sian turpuktaon, justru nasida na hurang tama i do nadigombarhon secara positif di
Evangelium Lukas on. Ro do nasida pasolhothon dirina tu Jesus laho tumangihon hata ni Jesus, Lapatanna, ditanda
nasida do dirina na hurang tama, alani rade nasida laho dipauba hata ni Jesus.
Boha hita na ro marminggu tingki marminggu? Aha do tujuanta ro tu Bagas Joro ni Tuhan i, tumangihon
Hata ni Debata do? Di tingki marende hita digareja (onom ende naung taendehon, papitu annon dung simpul
jamita), adong do tabege Hata ni Debata marhite ende i? Di tingki maragenda paragenda tangkas do taparrohahon
angka hata-hata ni agendai? Adong hita na manghatai tu Debata na jinahahon ni paragenda, alai laos adong do na
Debata manghatai tu hita marhite paragenda. Tasadari do parasingan ni manang mamolus sambing do songoni?
Molo tutu do songon sijalo beo dohot sipardosa na mandapothon Jesus laho tumangihon HataNa hita. naeng ma
ganup bagian sian liturgi parmingguon taparrohahon ai disi do pajumpang hita dohot Debata. Molo ido tujuan
dohot motivasinta ro tu gareja/ parmingguon/partangiangan/ nang angka ulaon huria na asing, mulak sian i pasti
ma sonang tondinta jala dame rohanta.
Paduahon, marmungutmungut (ayat 2)
Parise dohot sibotosurat ima dua horong ni masyarakat Jahudi na mangaradoti patik ni Debata mansai risik.
Termasuk golongan na terhormat do nasida di hajahudion alai dang songoni ianggo di Lukas 15 di turpuktaon.
“Marmungutmungut" do nasida ala ro angka sijalobeo dohot sipardosa mandapothon Jesus. Boasa dang las roha
nasida ate? Alasan nasida ima: "Dijangkon On (mandok Jesus) do angka pardosa, pola sapanganan Ibana dohot
nasida." Mangihuthon uhum Jahudi, dang jadi sapanganan dohot halak pardosa hape Jesus rade mangulahonsa.
Atik tung adong lohot "parmungutmungut"'on i di hita? So tung di gareja/ parmingguon/ partangiangan/
nang angka ulaon huria na asing gabe parmungutmungut hita; isarana, paganjanghu jamita ni parjamita, sala
paragenda, dang tangkas sijaha tingting, dang denggan parmusik nang song-leader dohot lan na asing. Dang na
membela angka na marhobas di parmingguon, alai molo tung humurang nasida, gabe ingkon ungutungut ma na ro?
Molo songon sijalo beo dohot sipardosa na di ayat 1 i do hita ima na ro laho tumangihon Hata ni Jesus, hahurangan
ni angka parhobas dang mangambati hita pajumpang dohot Debata. Saulaknari dang na mandok asa gait angka
parhobas Minggu/partangiangan, alai molo marsitutu laho tumangihon Hata ni Debata do hita, tung boha pe
kondisi ni parmingguon/partangiangan i dang pola terganggu hita, alam na rumingkot ima Hata ni Debata na
dijamitahon, manang na diendehon, manang na fijaha paragenda.
Patoluhon, las ni roha di jolo di banua ginjang (angka surusuruan ni Debata) mida sahalak sipardosa na
paubahon rohana (ay.7,10)
Mangalusi sungutsungut ni Parise dohot siboto surat , didok Jesus ma tolu umpama taringot tu na mago
dungi jumpang ima biru-biru, hupang, dohot ianakkon, alai ianggona gabe turpukta holan dua na parjolo do. Sude
do hita umboto umpama on ima na mago sada birubiru dilului parmahani ma pola ditadinghon na siapulusia. Dung
jumpang, las rohana diontang ma donganna laho rap manghalashon. Dos tusi muse sahalak parompuan na agoan
sahupang sian sampulu hupang, dilului ibana gabe jumpang ma na sahupangi. Alani las nirohana. diontang ibana
ma nang alealena laho rap manghalashon. Di ujung ni ganup umpama ondeng, didok Jesus ma lapatanni umpamai,
ima las ni roha ni Debata mida hamumulak pardosa (ayat7, 10).
III. Panimpuli
Ise do pardosa na nidokna di turpuktaon? Di tingki i tontu martudutudu mai tu sijalo beo dohot sipardosa
na ro mandapoton Jesus. Marhite umpama ondeng naeng patuduhonon ni Jesus tu Parise dohot Sibotosurat balga
ni holong ni Debata. Molo di partingkianta sisaonari, martudutudu tu ise ma pardosai? Tontu, martudutudu tu hita
sude. Ai sude do hita mardosa, dang adong hita na lipe sian dosa. Barita na Uli di turpuktaon ima muba ma nian
pardosa i ai nunga ro Debata mangalului pardosa marhite mudar ni Tuhan Jesus. Dia ma angka dosa na jotjot
taula? Boha rade do hita paubahoni? Molo adong hita na ro tu parmingguon manang partangiangan holan na
marmungut-mungut, muba ma hita. Molo holan angka na hurang do tabereng sian parmingguon, sian donganta,
muba ma hita. Lobi sian i tahe, angka dia ma bangko na roa san dirinta? Hita marsadasada do na umbotosa.
Taongkuhon ma i tu Debata asa dilehon tu hita gogo laho umbolongkon saluhutnai. Lomo do roha ni Debata mida
hamubaonta. Dang dibolongkon Debata pardosa alai ro do Debata mangalului hita asa mulak hita sian dalan na
lilu.
Cal.Pdt. Frido Juniper Nainggolan S.Th

Bahan Sermon Jamita Minggu XIV Dung Trinitatis, 18 September 2022

HKBP Ressort Panai Hilir
“DIPATIMBUL DEBATA DO ANGKA NA DANGOL”
(Psalmen 113: 1-9)
Patujolo
Psalmen Haleluya on ima parmulaan sian angka psalmen Hallel, na jotjot dipatudos tu angka pesta
parningotan halak Jahudi, lumobi mai tu pesta paskah. Dibuhai jala diujungi do psalmen on dohot hata Haleluya,
ala sarupa songon angka psalmen na deba, na digurithon laho pamajuhon manang patamba ulaon na denggan jala
na mansai uli, ima mamuji Debata. Marhite psalmen on, diajari do halak na porsea asa mambaen prioritas utama
pamujionna tu Debata di ngoluna. Jala di bindu on dipatuduhon do tu hita ima angka pokok-pokok manang
habalgaon ni Debata na pinuji ni par psalmen on. Di ontang do hita asa hatop ro mamuji Debata, jala Reformator
gereja pe, ima Marthin Luther, dionjaronjar ibana do angka halak na porsea asa tongtong mamuji Debata di ganup
tingki. Antong boasa disosoi hita mamuji Debata, tontu ingkon botoonta do jumolo aha do pambahenan ni Debata
tu hita, ala haruar do pamujion sian halak na mananda dohot manghilala pambahenan ni Debata di ngoluna.
Hatorangan
Memuji Tuhan merupakan kewajiban yang penting dan paling baik, ima na manghalashon roha ni Debata,
lapatanna ingkon adong do di dirinta ngolu pamujion i, na ingkon sai jotjot do i taulahon, udut ni angka halak na
mamuji Debata, sai togihononna do donganna asa parsidohot di ulaonna i, boi mai alani na borat siulaonna, jala
lumobi ma i ala na marlas ni roha ibana. Pamujion na sisongoni nungga tarida di turpukta on, on ma sada ontangan
tu bangso ni Debata, didok di ayat 1 i, “Mamuji ma hamu ala angka naposo ni Debata”, naposo ni Debata na
ginoaranna dison ima angka bangso ni Debata, angka ruas ni huria, ontangan on di pasahat par psalmen on ala
songon sahalak naposo ni Debata ibana naung mananda Debata, naung mananda pambahenanNa, jala naung
mangida jala mandai denggan basa ni Debata di ngoluna, marhite sian i do diontang ibana bangso ni Debata asa
mamuji Debata. Tutu nunga ulaon ni par psalmen i mamuji Debata songon naposo ni Debata ibana, alai tung dohot
do diontang ibana sude bangso i.
Sadalan do tujuan ni ayat 1 dohot ayat 2, didok di ayat 2 “Pinuji ma goar ni Jahowa olat ni on ro di
salelenglelengna”, lapatanna unang ma ulaon mamuji Debata mate raphon hita, alai ingkon do torus ulahononta
saleleng di portibion hita, asa angka halak na taontang i, manang angka halak na tapabotohon i, songoni ma nang
pabotohononna nang ontangonna ganup halak asa mamuji Debata di ngoluna. Di hata na asing boi ma dohonon,
asa ndang be sumurut (merosot) pamujion ni angka pinomparta manang angka generasi mendatang. Jala tongtong
ma sude generasi mamuji Debata, ndada holan generasi nuaeng, ingkon pujionta do Debata di ngolunta songon na
nidok ni par psalmen on ma dohononta “Pinuji ma goar ni Jahowa olat ni on ro di salelenglelengna”.
 Ayat 3 pataridahon mamuji Debata dari segala tempat, “Sian habinsaran ni mataniari ro di hasundutan” ima
di sude angka inganan ni jolma. Jala di ayat 4 didok tumimbo Ibana sian angka na di portibi on, lapatanna dao
sumurung do Debata sian angka raja-raja, sian angka pamarenta dohot angka rakyat na godang. Jala dang holan
timbo mangatasi sandok bangso Debata, Ibana do nang na mangatasi langit, na marlapatan do i tung pe timbo
langit, alai tumimbo do nang Debata sian i, tung pe marsangap angka surusuruan, jala marsinondang nasida, alai
sumangap do ianggo Debata jala dang adong na umbalga sian sinondangNa. Marhite i do didok par psalmen on
nang boi dohononta, “Tung ise ma songon Jahowa, Debatanta i?” ndang adong ianggo tudosanNa, ingkon pujion
do Ibana songon Debata na mangatasi saluhutna, ai mian do Ibana di inganan na timbo.
Pujion do Debata nang ala ni angka pambahenanNa di portibi on, atik pe timbo Ibana marhabangsa, alai
dipaserep do diriNa manatap tu langit nang tu tano on, Allah tak hanya mencipta, tetapi Ia juga memelihara langit
dan bumi ini, lapatanna di patutoru/dipaserep do diriNa laho marnida angka na tinompaNa i, tarida doi di tukpukta
on, dipaserep Ibana do diriNa marhite na diparrohahon ngolu ni angka na so mararga di jolma/portibi on. Jala
tarida ma pambahenan ni Debata di angka halak na gale i, didok di ayat 7 “Ibana pahehehon na metmet sian orbuk
dst…laho pahundulonna raphon angka raja ni bangsona”. Ima sada dalan ni Debata laho patuduhon pamujionta tu
Ibana, lapatanna dibereng Debata do angka parsorion ni bangsoNa jala dilehon do asi ni roha tu nasida (ayat 7-9),
jala jotjot do dibahen Debata angka na so boi mangulahon di rohani na torop, asa lam timbul ma ulaon dohot
hasangapon ni Debata.

Panimpuli
Tingting mandokhon mamuji Debata ido na disoarahon di turpukta on, songon na tinompaNa hita,
diparorot jala diparrohahon Debata do hita sian habangsaNa. Asa ido sihalashononhon angka na porsea i, jala ido
na so boi mago sian ngolu ni jolma na di portibi on, metmet pe itahilala dirinta nuaeng, gale jala dangol, alai di
tingkina dipatimbul Debata do angka halak si songoni, Tuhan akan menegakkan orang yang hina dan meninggikan
orang yang rendah. Alani pinuji ma goar ni Jahowa olat ni on ro di salelenglelengna, Haleluya.
C.Gr. Jerri Sinambela

Bahan Sermon Parhalado HKBP Ressort Panai Hilir

Minggu XV Dung Trinitatis, 25 September 2022
Hadaulaton Mardongan Sabam Ni Roha
1 Timoteus 6:6-10
I. Patujolo ni Turpuk
Turpuk Jamita di minggu on ima surat Apostel Paulus na tinongos na tu si Timotius anak haporseaonna (anak
rohani) na tongon marhobas di huria Efesus. Digoari do surat on Surat Parmahanion, parmahanion Apostel Paulus
tu si Timoteus asa marogo jala marbisuk si Timotius laho marmahani huria i. Lumobi uju I ala dibagasan haposoon
dope si Tmotius. Tontu ndang apala godang dope pengalaman taringot tu huria. Mansai gomos do dipodahon si
Paulus nang pe bajar dope ibana alai ingkon boi gabe tiruan tu angka rusa I (1 Tim. 4:12) asa unang adong na
marneang roha tu ibana ala haposoonna i. Uju manghosai ibana di Efesus, godang do angka parpoda na lipe na boi
manegai haporseaon ni ruas ni huria. Disurathon Apostel Paulus do surat on tu dongan saulaonna ala nunga masa
be ngolu na so marimpola, hagunturon binahen ni halak sipaotooto, parbarita na holan paburnang dirina.Alani do,
mansai ringkot situtu do di roha ni Apostel Paulus laho mambohali siTimotius di ulaonna asa unang manimbil
ibana sian Barita Nauli dohot ruas ni huria i. Molo dung gabe tiruan jala boi diantusi ibana ruhutruhut ni huria,
ndada be gabe partuktuhon ibana. Secara khusus ma dibagasan turpuk on, ima poda ni Apostel Paulus tu si
Timotius taringot tu hadaulaton/ibadah. Hadaulaton na uli jala denggan diadopan ni Debata , ima hadaulaton na
dibagasan hamauliateon. Lapatanna, hadaulaton na sintong ima hadaulaton na mardongan sabam ni roha. Tung so
marlapatan do hadaulaton/ibadah molo sai dibagasan ungutungut dohot roha na sai ahut di arta, hepeng, marisuang
do hadaulaton na songon i. Alani I, marhite turpuk on, naeng parsiajaranta songon dia do hadaulaton mardongan
sabam ni roha na ima na hinalomohon ni roha ni Debata molo dipahombar tu arta manang sinadongan.
II. Hatorangan ni Turpuk
1) Urat ni hajahaton ima holongan dihepeng. Salah do molo godang arta ta diportibion. Salah do molo
godang hepengta? Alus na daong. Alai di ondolhon ni turpuk on ima halak na holongan di hepeng/ cinta akan
uang. Dipangke Jesus dohot angka siseanNa i do hepeng, dipangke apostel Paulus do hepeng jala laos sude do hita
mamangke jala ringkot dihepeng. Alai laos disi do dipaingot Jesus mara ni roha na holongan di hepeng. Na boi do
tahilala panarihon ni Debata tu hita molo adong hepengta. Ala didok do Poda 10:22 “pasupasu ni Jahowa do
mambahen mamora jala ndang mardongan hangaluton I dibahen”. Sude do ngolunta on marharoroan sian Debata
do. Alai ditingki suksuk pasupasu ni Debata tajalo laos I do mambahen hita gabe lupa diri manang gabe paburnang
dirina. Jotjot do angka hamoraon I mambahen hita lupa na marTuhan i. Hape molo taingot di na tubu pe hita tu
hasiangon so adong na taboan jala molo dung ro ajal hasiangan on, ndang adong na boi taboan. Lapatanna disi,
ima ndang guru lomota hape angka hamaoran na adong di hita sinuaeng on. Ala saluhutna i, ragam ni angka
pasupasu ni Debata do i. Alani do, didok di ayat 9, “ ia angka na naeng gabe mamora madabu do tu bagasan
pangunjunan…” Ketika tujuan utama dalam pelayanan adalah untuk menghasilkan uang, maka hal itu aakn
membuat kita jatuh ke dalam dosa dan melupakn tujuan utama dari pelayanan. Boasa didok Apostel Paulus songon
i, asa unang gabe roha hepeng si Timotius laho mangulahon ulaonna songon parbarita nauli. Ala molo adong
sangkap ni halak gabe mamora boi do mambahen ibana madabu tu bagasan dosa. Ihut tu si do didok diayat 10: “Ai
urat ni na sa hajaton do roha na holongan dihepeng”. Ai adong jolma mameakhon kepuasan/kenikmatan ni ngolu
marhitehite na papungupunguhon, ndada las ni roha mamangke na adong i tu nasa na hasea. Ido umbahen ni na
pisatar mandok ima Snthony de Mello tu halak na botak na mansai loja mandiori jala papunguhon suri hape so na
laho pangkeonna nanggo sada sian i. jala dumangol i ma molo marmokmok puro alai marpengpeng haporseaon.
Laos songon do na hinirim ni A.Paulus sian si Timoteus asa unang marroha hepeng manang impolan ni perak.
Suang songon I do nang hita dipaingot do hita asa unang holongan dihepeng ai holongan dihepeng marpanghorhon
tu hasesega parsoaranta dohot dongan jolma nang dohot Debata.
2) Hadaulaton Mardongan Sabam Ni Roha
Torang do diondolhon apostel Paulus: pangomoan godang do tutu hadaulaton i, anggo mardongan sabam ni
roha. Sintong situtu do pandohan on; sidua sada ihot na so tarsirang do haporseaon dohot sabam ni roha. Jala
nunga mansai patar on dipangajarion ni Jesus di tangiang Ale Amanami: “Lehon ma tu hami sadari on hangoluan
siapari’. Na marlapatan do i, diajari Tuhan Jesus do hita asa ganup ari mangido sian Ibana na ringkot di hita, tanda
ni haporseaonta di Ibana na tuk jala olo mangalehon na ringkot di hita ganup ari. Laos udut do I patuduhon
haronsotan ni parsaoranta tu Ibana ganup ari, na so boi sirang hita sian Ibana. Ketergantungan manusia kepada
Allah akan mengarahkan manusia untuk membangun persekutuan dengan Allah itu sendiri. Mansai tangkas do
dipatorang Apostel Paulus parsaoran ni jolma dohot Debata ingkon do sadalan I dohot manghangoluhon sabam ni
roha. Hadaulaton mardongan sabam ni roha ima parsaoran na polin dohot Tuhan i. Rasa cukup yang ada pada kita
akan mendorong kita untuk tetap bersyukur. Ido umbahen didok Apostel Paulus diayat 8 “Umbahen molo adong di
hita sipanganon dohot parabiton tahasabamhon ma I”. Roha na manghasabamhon I do apala na ringkot di ngolu on
asa unang madabu hita tu hamongkuson/ keserakahan. Alani dipaingot do hita marhite turpuk on taringot tu
parsaoranta dohot Tuhan i. Boha do hita marsaor dohot Tuhan i? Manang holan ditingki na adong do
sipangidoanta umbahen na ro hita tu Tuhan i? Jotjot do hita marsaor dohot Tuhan I holan alani laho mangalului
pangomoan. Alai gabe lupa hita manghamauliatehon angka ragam ni pasupasu naung dilehon tu hita. Songon
tangiang ni raja Salomo “Sai padao ma sian ahu neang ni roha dohot hapogosan manang hamoraon unang lehon
tu ahu; sai loas ma panganonhu bohal na tinurpukhonMi tu ahu (Poda 30:8). Manghasabamhon I do parhitean
laho pataluhon hisaphisap ni daging ni hajolmaon di portibion. Asa ingkon mulak do songon pangauhonon ni
Apostel Paulus, “Kristus do na mangolu dibagasan au”. Tuk do Tuhanta manguras jala paimbaruhon sihol ni roha
ni hita jolma, asa gabe roha na uasan i di hataNa sipanogu tu hangoluan ndada na uasan di arta portibi on.
III. Panimpuli
Halak na so mamboto mandok mauliate ido halak na mangolu holan diparsaoran na rutinitas sambing tu
Debata. Diulahon do nian na marsaor dohot Tuhan I jala ringgas do tu parmingguon. Alai saluhut na I diulahon
holan laho mangalului pangomoan sambing sian Tuhan i. Holan asa dipasupasu do ngolu umbahen mrasaor dohot
Debata alai gabe lupa manghamauliatehon pasupasu naung jinalona sian Tuhan i. Gabe maol ma rohana mandok
mauliate alai baliksa do na diulahon ima sai na hurangan dibagasan rohana, hurangan diarta, hurangan dipasupasu,
hurangan di las ni roha . Asa marhite I naeng sunggulhon ni turpuk on tu hita asa boi hita marsabam ni roha. Tutu
do ndang adong na singkop di ngolu on, alai marhite sabam ni roha I tubu ma roha na mangargahon dohot
manghamauliatehon pasupasu ni Tuhan i dibagasan ngolunta, tarlumobi tubu ma pos ni roha tu Tuhan i. Asa
dibagasan sabam ni roha dohot roha mauliate dapotan pangomoan godang ma hita sian Tuhan I, ai loasan ni Tuhan
I ma hita marnida jala mandai denggan basaNa dingolunta. Amen.
Cal. Bvr. Irma Gultom