PARTORDING NI ACARA BONA TAON 2023

IBADAH (Bahasa Batak)

01. Pangaradeon …….. hohom (Martangiang dibagasan roha)

02. Joujou tu Parsaoran dohot Debata
U : Punguan na marlas ni roha dibagasan goar ni Tuhan Jesus Kristus, nunga masuk hita tu
taon na imbaru na binasabasahon ni Debata tu hita. Tahilala do denggan basa dohot
panogunoguon ni Tuhanta manipat ari dohot bulan, boi hita tolhas sahat tu sadarion.
Antong, SELAMAT TAON BARU MA DI HITA SALUHUTNA!
H : SELAMAT TAON BARU!
U : Ala ni i, marlas ni roha ma hita jala mandok mauliate tu Debatanta na mangalehon ari
na denggan tu hita, boi hita marpungu di acara Bona Taon ni punguan na tahaholongi
on.
H : Mauliate ma ale Tuhan, disude denggan basa na nilehonMu tu hami, ala ni i, hupuji
hami ma goarMu na badia i.
U : Songon tanda las ni rohanta, taparade ma pujipujian tu Ibana, marende ma hita.

03. Marende BE.No.361 : 1 – 2 ”Na denggan situtu” BL. 15

1. Na denggan situtu do, mamuji Debata
Jahowa na tumimbo, na sai tongtong basa,
denggan do paboahon manogot asiMi,
bodari mangendehon burjuM nang sintongMi

2. Mardongan sipilliton na denggan situtu,

naeng ma tongtong pujion ni nasa na burju.
Ho, Tuhan Debatangku, ai las ni rohangki
do na tongtong binaenMu dipambahenanMi.
04. Molo partohonan na manguluhon:
U : Marhitehite goar ni Debata Ama, dohot goar ni AnakNa Tuhan Jesus Kristus, dohot
goar ni Tondi Porbadia, na tumompa langit dohot tano on.
H : Amen
Molo na so partohonan na manguluhon:
U : Tapungka ma Acara Bona Taon ni punguanta on, dibagasan haporseaon na togu
di Debata na manompa hita.
H : Amen
U : On ma pos ni rohangku, Kristus do naung umpungka ulaon na denggan dibagasan
hamu, jala patuluson ni i do i, sahat ro di ari ni Kristus Jesus.
H : Debata do na mamuhai, jala Debata do na paujunghonsa, mauliate ma di
Debata.
U : Jahowa do panondangi di ahu dohot hatuaonku, tung ise ma habiaranku?
H : Nang pe marhoronhoron parangan anngka na manungkun ahu, ndang dihabiari
rohangku.
U : Sada do naung hupangidohon tu Jahowa saleleng mangolu ahu paidaidaonku
hinadenggan ni Jahowa dohot manghalomohonsa.
H : Tahaposi ma Jahowa, tapagomos jala tapatogu rohanta jala taparhanalom
Jahowa. Haleluya!
U : Martangiang ma hita! Ale Amanami jala Debatanami! Na mandok mauliate do hami tu
Ho sian nasa rohanami, ala dilehon Ho do ari na denggan di hami, marhite i, boi hami
marpungu di inganan on di bagasan acara Bona Taon di taon 2023 on. Na mangido do
hami nuaeng diadopanMu, sai lam pahot ma haporseaonnami, asa lam togu
panghirimonnami, patuduhon holong ni rohaM dohot asi ni rohaM, tarlumobi di na laho
mandalani saluhut ari nami di taon 2023 on na so huboto hami dope haujunganna. Sai
dongani ma hami, asa lam marpos ni roha hami di Hata ni AnakMu, Tuhan Jesus Kristus
Tuhannami. Amen.
05. Marende BE. No. 690 : 1 – 2 “Hibul Rohangku”
1. Hibul rohangku tu Tuhan Jesus,
sude ngolungku di Tuhan Jesus.
Ihuthononku do Tuhan Jesus,
ndang olo au sumurut be.

2. Beta ihuthon ma Tuhan Jesus,

ho na dijou do roham patulus.
Beta ihuthon ma Tuhan Jesus,
sai unang ho sumurut be.
06. 2022 Na Gabe Sejarah
U :Dongan sahaporseaon, molo tarimangi pardalanan ni ngolunta dibagasan taon 2022
naung salpu, godang do na masa ditongatonga ni punguanta suang songon i nang
ditongatonga ni parngoluonta siganupari.
H :Sai parroha i ma hami mamilangi angka ariarinami, asa dapotan roha na bisuk hami.
U :Gabe sejarah ma taon 2022 naung salpu. Dipardalanan ni punguanta, tung mansai godang
do na mambahen hita masuk tu las ni roha na sian Debata, alai ndada holan i, masa do
nang arsak ni roha, godang do tantangan na ingkon taadopi dipardalanan ni ngolunta, na
laho paingothon hita ”Debata do nampuna ngolunta” ala ni i, lam tapasolhot ma tu Ibana.
H :Ale Tuhan, guru di Ho do saluhutna, sai togu jala parrohai ma hami asa unang mabiar
rohanami marnida saluhut angka na masa i. Sai togu jala dongani ma hami dipardalanan
ni ngolunami. Asa lam pos rohanami tu Ho marhitehite haporseaonnami tu AnakMu,
Tuhan Jesus Kristus Tuhan Nami.
U :Gabe sejarah ma taon 2022 naung salpu. Dipardalanan ni punguanta, tung mansai godang
do na mambahen hita masuk tu las ni roha na sian Debata, alai ndada holan i, alai masa do
nang parsahiton, ditongatonga ni ngolunta nang parianakhon.Saluhutna i laho
paingothon hita do ”Ibana do mandongani hita”, ala ni i, lam tapasolhot ma tu Ibana.
H :Ale Tuhan, guru di Ho do saluhutna, sai paingot hami asa marpangunsandean tu Ho hami,
ndada tu pingkirannami sandiri. Asa lam pos rohanami tu Ho marhitehite
haporseaonnami tu AnakMu Tuhan Jesus Kristus Tuhannami.
U :Gabe sejarah ma taon 2022 naung salpu. Dipardalanan ni punguanta, tung mansai godang
do na mambahen hita masuk tu las ni roha na sian Debata, alai ndada holan i, masa do
nang arsak ni roha, ditongatonga ni ngolunta nang parianakhon. Sipata sugkunsungkun
rohanami taringot tu pardalanan ni masa depan ni saluhut ianakhonta, tarlumobi laho
mangadopi parngoluon na mansai maol di tano parserahan on.
H :Ale Tuhan, guru di Ho do saluhutna, sai paingot hami asa unang dirinami sandiri na
hupingkiri hami, alai asa lam margogo hami laho patupahon na ringkot tu di tongatonga
ni keluarga nang pasahathon poda dohot hata hangoluan tu ianakhonnami. Asa lam pos
rohanami tu Ho marhitehite haporseaonnami tu AnakMu Tuhan Jesus Kristus
Tuhannami. Amen.
07.Marende BE. No. 707 : 1 “Hagogoon dohot apulapul”
1. Hagogoon dohot apulapul do dilehon Tuhan i tu au.
Ganup ari au ditogutogu, ganup tingki di ondingi au.
Ai hombar tu lomo ni rohaNa do dilehon Tuhan i tu au.
Ro marsorin arsak las ni roha, haporseaonku di patau.
2. Ganup tingki Tuhan raphon ahu jala sai dipasupasu au.
Sai ditogu au molo madabu, talu musu jala monang au.
Ai pargogo na so hatudosan, Debatangku salelengna i.
Mangalehon dame dohot tua, tu angka na bojok roha i.
08.Panghirimon di taon 2023
U :Debata do na mamuhai ulaon na denggan ditongatonganta, ndang paloasonNa hita
tartuktuk. Molo dilehon Debata dope sada taon na imbaru tu hita, i ma taon 2023 on, lam
tapareahi ma na denggan, songon i nang hasadaon ni roha, asa lam margogo hita
dibagasan hasadaon laho mandalani gulmit ni ngolunta na so binoto dope di taon 2023 on.
H :On do na hupangido hami, naeng ma lam sumurung holong ni rohanta, marurat
diparbinotoan, dohot di nasa panimbangion partondion laho manangkasi narumingkot,
asa polin hami, tanpar sian partuktuhan. Asa ramos marparbuehon hatigoran bahen
hasangapon jala pujipuji di Debata.
U :Debata do na mamuhai ulaon na denggan ditongatonganta, ndang paloasonNa hita
tartuktuk. Molo nunga salpu taon 2022 sian ngolunta, ndang tagamon be boi hita mulak,
molo boi tasalpuhon saluhut hahurangan nang hasalaan ni donganta, ndang tagamon be
hita tarurak, molo boi tatinggalhon saluhut hahurangan ni dirinta, ndang tagamon be ro
mara. Ala ni i, lam tu hembangna ma panghobasion di tongatonga ni punguanta, lam tu
raratna ma ulaon parasinirohaon. Asa taon na gok las ni roha ma taon on ditongatonganta.
H :Tangkas do huboto hami marhitehite haporseaonnami tu Debata, na dipaimbaru Debata
do saluhutna, ai didok do: Ida ma, saluhutna do hupaimbaru! I ma tutu, asa salpu ma na
leleng i, soluk ma haimbaruon i dibagasan ngolu nang parsaorannami.
U : Antong, sangap ma di Debata na marmulia!
H : Amen!
09. Marende BE. No. 309 : 1, 3 “Raphon Tuhan Jesus i”
1. Raphon Tuhan Jesus i pungka ulaonmu.
Ingkon tu Ibana i parguruhononmu.
Baen Ibana donganmi, hehe dohot modom.
Dege ma bogasNa i, rohami pahohom.
3. Molo Jesus donganmi, ndang tarbaen ho mago.
Nang bisuk sibolis i, Jesus do gumogo.
Asal dihaposi ho Jesus i Tuhanmu,
ingkon sai maporus do na niarsakhonmu.
10. Sijahaon: Epesus 4 : 22 – 24
U : Hata ni Debata, turpuk patujolo ni Jamita dihita, i ma na tarsurat di Epesus 4 : 22 – 24,
songon on ma didok disi, jala marsorinsorin ma hita manjahasa: ”Tanggali hamu ma
jolma na buruk i, isara dipangalaho na jolo, ai laho mago do i hinorhon ni angka
hisaphisap sipaotooto.
H : Alai dipaimbaru hamu ma dirimuna dibagasan tondi ni rohamuna.
U : Jala solukhon hamu ma jolma na imbaru, na tinompa suman tu Debata, dibagasan
hatigoran dohot hapolinon na marhasintongan. I do sahat na. Martua do halak na
tumangihon hata ni Debata, jala na umpeopsa.
S : Amen!

11. Tangiang Pangondianon

12. Marende BE. No. 69 : 1, 3 “Ungkap Bahal na ummuli”
1. Jesus sai urupi hami dohot di taon baru on. / Paimbaru gogonami mangihuthon Ho
tongtong. / Pasupapsu ma muse na porsea sasude.
3. Taon parasinirohaon baen di au sandok taon on. / Lam pahot ma hasesaan ni dosangku di
au on. / Holan Ho do Jesuski, tuk pasaehon dosangki.
13. Jamita manang Renungan
14. Marende BE. No. 706 : 1 – “Godang ni pasupasu i”
Huhut Papungu Pelean
1. Godang ni pasupasu i dilehon Tuhanhi,
tarlobi asiasiMi marhite AnakMi.

Reff. Jalo ma pujianhi, Jesus sipalua i.

Boi au bongot tu surgo i, marnida
hasangaponMi.

2. Tondong nang aleale i palashon rohangki.

Alai na umuli i boi au anakMi.
3. Ndang dung mansohot basaMi saleleng ngolungki.
Ho ma tongtong pujionhi, sangap di goarMi.

15. Panutup
U : Antong, tapaujung ma partangianganta on, martangiang ma hita!
Ale Tuhan Debata, Amanami na di banua ginjang, mauliate rohanami ala
dilehon Ho do tu hami bohal ni hangoluan Nami. Saluhut basabasa naung hujalo
hami, hulehon hami gabe pelean tu adopanMu. Pasupasu ma i, asa gabe pelean
halomoan diadopanMu, patuduhon ulaon parasinirohaon ditongatonga ni
punguan naung pinadomuM dibagasan AnakMu, Tuhan Jesus Kristus,
Tuhannami. Amen.
Antong, rap mangido ma hita di Tangiang Ale Amanami.

H: Ale Amanami na di Banua Ginjang ……. D.u. Amen.

Molo partohonan na manguluhon didok ma pasupasu