BAHAN SERMON HKBP DISTRIK XIII ASLAB MINGGU XIII DUNG TRINITATIS

MINGGU, 11 SEPTEMBER 2022

DIHALOMOHON DEBATA DO HAMUBAON NI ROHA (Lukas 15:1-10)

I. Hatorangan

Parjolo, dipasolhot dirina tu Jesus laho tumangihon hataNa (ayat 1).

Di sada tingki ro ma torop angka sijalo beo dohot sipardosa mandapothon Jesus. Tangkas
digurithon paboa haroro nasida ima laho tumangihon hata ni Jesus. Hatihai dirajumi halak Jahudi
ia ulaon sijalo beo ima ulaon na so denggan ala papungu beo (pajak) sian rakyat sipasahaton tu
panggomgomi Rom. Angka sijalo beo dirajumi songon tangan kanan ni penjajah na manusai
dihatoropan jala bahat do nasida na manambai beo sian na patut (didok ma istilah nuaeng:
korupsi). Asing ni sijalo beo, ro do nang "sipardosa" ninna di ayat 1. Dang apala tangkas ise
"sipardosa" na nidokna, dang apala dipatorang hadosaon nasida ala ni ulaonna do manang ala ni
pelanggaran tu uhum Jahudi. Sandok dua horong ma na ro mandapothon Jesus ima sijalo beo
dohot sipardosa; na dua horong on ima horong na hurang tama mangihuthon hajahudion.
Alai molo tapamanat sian turpuktaon, justru nasida na hurang tama i do nadigombarhon
secara positif di Evangelium Lukas on. Ro do nasida pasolhothon dirina tu Jesus laho
tumangihon hata ni Jesus, Lapatanna, ditanda nasida do dirina na hurang tama, alani rade nasida
laho dipauba hata ni Jesus.
Boha hita na ro marminggu tingki marminggu? Aha do tujuanta ro tu Bagas Joro ni
Tuhan i, tumangihon Hata ni Debata do? Di tingki marende hita digareja (onom ende naung
taendehon, papitu annon dung simpul jamita), adong do tabege Hata ni Debata marhite ende i?
Di tingki maragenda paragenda tangkas do taparrohahon angka hata-hata ni agendai? Adong hita
na manghatai tu Debata na jinahahon ni paragenda, alai laos adong do na Debata manghatai tu
hita marhite paragenda. Tasadari do parasingan ni manang mamolus sambing do songoni? Molo
tutu do songon sijalo beo dohot sipardosa na mandapothon Jesus laho tumangihon HataNa hita.
naeng ma ganup bagian sian liturgi parmingguon taparrohahon ai disi do pajumpang hita dohot
Debata. Molo ido tujuan dohot motivasinta ro tu gareja/ parmingguon/partangiangan/ nang angka
ulaon huria na asing, mulak sian i pasti ma sonang tondinta jala dame rohanta. Paduahon,
marmungutmungut (ayat 2).
Parise dohot sibotosurat ima dua horong ni masyarakat Jahudi na mangaradoti patik ni
Debata Termasuk golongan na terhormat do nasida di hajahudion alai dang songoni ianggo di
Lukas 15 di turpuktaon. "Marmungutmungut" do nasida ala ro angka sijalobeo dohot sipardosa
mandapothon Jesus. Boasa dang las roha nasida ate? Alasan nasida ima: "Dijangkon On
(mandok Jesus) do angka pardosa, pola sapanganan Ibana dohot nasida." Mangihuthon uhum
Jahudi, dang jadi sapanganan dohot halak pardosa hape Jesus rade mangulahonsa.
Atik tung adong lohot "parmungutmungut"on i di hita? So tung di gareja/ parmingguon/
partangiangan/ nang angka ulaon huria na asing gabe parmungutmungut hita; isarana,
paganjanghu jamita ni parjamita, sala paragenda, dang tangkas sijaha tingting, dang denggan
parmusik nang song-leader dohot lan na asing. Dang na membela angka na marhobas di
parmingguon, alai molo tung humurang nasida, gabe ingkon ungutungut ma na ro? Molo songon
sijalo beo dohot sipardosa na di ayat 1 i do hita ima na ro laho tumangihon Hata ni Jesus,
hahurangan ni angka parhobas dang mangambati hita pajumpang dohot Debata. Saulaknari dang
na mandok asa gait angka parhobas Minggu/partangiangan, alai molo marsitutu laho tumangihon
Hata ni Debata do hita, tung boha pe kondisi ni parmingguon/partangiangan i dang pola
terganggu hita, ala na rumingkot ima Hata ni Debata na dijamitahon, manang na diendehon,
manang na dijaha paragenda.
Patoluhon, las ni roha di jolo di banua ginjang (angka surusuruan ni Debata) mida
sahalak sipardosa na paubahon rohana (ay. 7,10). Mangalusi sungutsungut ni Parise dohot siboto
surat, didok Jesus ma umpama taringot tu na mago dungi jumpang ima biru-biru, hupang, dohot
ianakkon, Sude do hita umboto umpama on ima na mago sada birubiru dilului parmahani ma
pola ditadinghon na siapulusia. Dung jumpang, las rohana diontang ma donganna laho rap
manghalashon.
Dos tusi muse sahalak parompuan na agoan sahupang sian sampulu hupang, dilului ibana
gabe jumpang ma na sahupangi. Alani las nirohana. diontang ibana ma nang alealena laho rap
manghalashon. Di ujung ni ganup umpama ondeng, didok Jesus ma lapatanni umpamai, ima las
ni roha ni Debata mida hamumulak pardosa (ayat7, 10).
II. Panimpuli
Ise do pardosa na nidokna di turpuktaon? Di tingki i tontu martudutudu mai tu sijalo beo
dohot sipardosa na ro mandapoton Jesus. Marhite umpama ondeng naeng patuduhonon ni Jesus
tu Parise dohot Sibotosurat balga ni holong ni Debata. Molo di partingkianta sisaonari,
martudutudu tu ise ma pardosai? Tontu, martudutudu tu hita sude. Ai sude do hita mardosa, dang
adong hita na lipe sian dosa. Barita na Uli di turpuktaon ima muba ma nian pardosa i ai nunga ro
Debata mangalului pardosa marhite mudar ni Tuhan Jesus. Dia ma angka dosa na jotjot taula?
Boha rade do hita paubahoni? Molo adong hita na ro tu parmingguon manang partangiangan
holan na marmungut-mungut, muba ma hita. Molo holan angka na hurang do tabereng sian
parmingguon, sian donganta, muba ma hita. Lobi sian i tahe, angka dia ma bangko na roa san
dirinta? Hita marsadasada do na umbotosa. Taongkuhon ma i tu Debata asa dilehon tu hita gogo
laho umbolongkon saluhutnai. Lomo do roha ni Debata mida hamubaonta. Dang dibolongkon
Debata pardosa alai ro do Debata mangalului hita asa mulak hita sian dalan na lilu.
AMEN..
 Bahan Sermon HKBP Distrik XIII Asahan Labuhan Batu Minggu XIV Dung Trinitatis,
18 September 2022

EV: Psalmen 113: 1-9

Topik: Dipatimbul Debata Do Angka Na Dangol

Patujolo
Hinauli panindangion ni parpsalmen marrumang ende pujipujian tu Debata na manjou
angka naposo ni Jahowa laho mamuji goar ni Jahowa. Psalmen 113 ima sada pujipujian ni
parpsalmen na masuk tu horong Hallel na manogihon asa mamuji Jahowa. Dibuhai jala diujungi
do ayat on marhite hata Halleluya na marlapatan Pinuji ma Debata (terpujilah Tuhan). Psalmen
on ima manintinghon asa mamuji Jahowa na mangantoi angka na metmet.

Hatorangan ni turpuk
Dihatindanghon parpsalmen i do songon dia Jahowa ro manopot pardangolan ni angka na
badia siala haunduhon dohot haburjuhon mangoloi tona ni Jahowa. Ndada holan i, dipatupa
Ibana do halonganan tu angka parompuan na hol, na sai tarpaima di parbue ni bortianna. Molo
dijaha angka barita na masa di padan na robi taringot tu parompuan na hol, isara na tumubuhon
ni si Samuel, mansai lungun situtu do panghilalaanna. Andorang so tubu si Samuel, sai ro do si
Hanna manopot Jahowa marsinggang, martangiang tu adopanNa mangido asi ni rohaNa. Nunga
sadia leleng ndang adong ditubuhon ibana, jala molo diida imbangna na margoar Pininna naung
tumubuhon si Elkana, singki do rohana, manetek iluna siala lungun ni panghilalaanna.
Tumimbul do Jahowa sian saluhut ima di ayat 4, dihatindanghon parpsalmen i do
hatimbulon ni Jahowa sian luhut bangso jala di ginjang ni angka langit do hamuliaonna. Haulion
i ndada ala ni dipalohot alai ala sian hadirionna do. Suang songoni haulion ni jolma unang ma ala
adong na dipangke di pamatangna alai na ingkon ruar sian dirina do.
Timbo habangsa ni Jahowa. Panindangion ni parpsalmen ima laho pahothon haporseaon
tu Jahowa. Ndada holan hapeahanna i na timbo na boi manatap angka na di toru alai pabotohon
hagogoonNa sandiri do panindangion i. Sian hatimboon Ibana patupa na ringkot di ngolu ni na
niasianNa. Jahowa do tumimbo sian saluhut jala nasa na gogo ni tano on ingkon unduk di
adopanNa. Songon na tarsurat di ayat 6 "hape dipaserep diriNa manatap na diangka banua
ginjang dohot na di tano on". Lapatan ni pandohan i ima na boi diida di diri ni Tuhan Jesus
naung ro sian banua ginjang tuat tu portibi on laho patimbulhon angka na dangol asa boi
sumuang hamuliaon ni jolma i.
Jahowa Pahehe na metmet dohot patimbul na pogos panindangion ni parpsalmen taringot
tu pambahenan ni Jahowa tu angka na metmet dohot na pogos boi ma tarida sian hadirion ni
patik dohot uhum na mandok ingkon marpanarihon tu angka na pogos. Sian i boi diida songon
dia Jahowa mangondihon parngoluan nasida. Na metmet ima angka na so mardihadiha, na sopot
so marama so marina, na soada arta. Marsiak bagi do parniahapan ni angka na metmet dohot na
pogos dibahen angka na mangalului arta sian dalan na so tama. Alai, Jahowa ndang dipasombu
nasida mangae, marsingkor siala hametmetonna i. Dipatimbul do nasida asa unang sai tungki
dohot tumatangis. Jahowa do na mambahen nasida marsangap, i do umbahen didok parpsalmen
"Ibana paheheon na metmet sian orbuk, dipatimbul do na pogos i sian gambo'. Boasa ingkon sian
orbuk? Ala angka na metmet i dapotan dalan ni ngolu di pinggir dalan pamolusan manehenehe
pangurupion sian angka jolma na mamolus.

Panimpuli
Jotjot do di parngoluon on adong hahurangan jala olo manguhumi angka dongan jolma.
Lupa hita adong do Debata na mandongani angka na metmet jala i do na dihatindanghon ni
parpsalmen ima Dipatimbul Debata do angka na dangol. Raphon angka na metmet jala na dangol
do hita di portibion. Alai tongtong ma hita ingkon mamuji Debata songon pamujian ni
parpsalmen, dibuhai jala diujungi nasida do pamujion nasida di marhite "Halleluya". Amen.

CPdt. Tiovani Iswara Rumapea, S.Th