Sa tagapagsalita ng Kapulungan ng mga Kinatawan ng Pilipinas at lahat ng
myembro ng Kongreso. Magandang umaga po sa inyong lahat. Bilang kinatawan ng mga kabataan sa aming nasasakupan. Ako po’y buong pusong humaharap dito sa kagalang-galang na kapulungan upang magpahiwatig ng opinion naming mga kabataan ukol sa iminungkahing pagbuwag sa Sangguniang Kabataan sa buong bansa. Akin pong ipapahayag ang kahalagahan ng Sangguniang Kabataan at ng Katipunan ng Kabataan bilang isang kapulungan ng mga kabataan sa bawat barangay, na ang pangunahing layunin ay pahusayin ang panlipunan, pulitikal, ekonomiya, kultura, intelektwal, moral, espirituwal at pisikal na pag-unlad ng mga kabataan sa bansa. Ang panukalang pagbasura sa Sangguniang Kabataan dahil sa pangkalahatang obserbasyon na nawalan na ito ng silbi bilang mekanismo para makibahagi ang kabataan sa pagpapaunlad ng komunidad ay isang masalimuot at maling pag- unawa sa tungkulin ng SK sa komunidad. Ang kasabihang “ang mga kabataan ay ang pag-asa ng Bayan” na nagmula kay Gat Jose rizal ay nananatiling makatotohanan hanggang ngayon. Ang kabataan ang bumubuo sa malaking porsyento ng populasyon ng bansa at ang mga ito ang pinakamasigla at pinakaproduktibong sektor ng lipunan, masasabing ang kabataan ay isa sa mga susi na bahagi sa pag-unlad ng lipunan. Patuloy ang mga miyembrong naihalal sa SK bilang opisyal ng gobyerno sa kanilang mandato na maglunsad ng mga konsultasyon sa mga kabataan ng barangay na kanilang nasasakupan. Patuloy din ang pagbuo ng Comprehensive Barangay Youth Plan upang maging basehan ng taunang Barangay Youth Investment Program kung saan nagiging batayan ng mga paglulunsad ng mga proyekto at programa patungo sa pagpapaunlad ng mga kakayanan ng mga kabataan. Mula’t sapul, nakikita natin ang importanteng gampanin ng SK sa pagrepresenta sa hanay ng kabataan at pangunguna sa mga programa at kampanyang para sa komunidad at pati na rin sa pakiki-isa sa ibang sektor ng lipunan. Kaya naman nasa estriktong posisyon ang SK at ang kabataan upang isulong ang adyenda para sa mga kabataan. Patuloy ang hamon sa SK upang maging kasangkapan sa pagbibigay katuparan sa pangangailangan ng sektor ng kabataan pati na rin ng mas malawak na hanay ng masang Pilipino. Bilang Institusyon Ng Mga Kabataan, ang SK ay isa sa mga nangunguna sa pagsulong ng mga programang sasagot sa mga pangunahing problemang kinakaharap ng sektor ng kabataan. Natugunan din ng karamihan sa amin ang hamon na magbigay serbisyo sa pamamagitan ng pagtugon sa mga programang pangkalusugan at iba pang serbisyong panlipunan pati na rin ang paglalapit sa mga kapwa kabataan sa pag-ahon ng sariling komunidad at ng bayan sa pamamagitan ng mga makabuluhan, aktibo, produktibo at makabayang pakikilahok sa mga panlipunang mga mobilisasyon at boluntirismo na paunlarin ang estado ng mga kabataan. Kasabay din na nagpapataas ng partisipasyon ng mga kabataan sa pagpreserba, pagprotekta at pagpapaunlad at pagsusulong ng makabayan, makamasa at siyentipikong kulturang Pinoy, at nagpapalakas ng pagtutulungan ng mga migranteng kabataang Pilipinong at mga Pilipino sa loob ng bansa. Inyo pong narinig ang pahayag ukol sa tunay na kahalagahan ng Sangguniang Kabataan hindi lamang sa mga kabataan kundi sa buong bansang Pilipinas kaya’t ako po’y nagsusumamo sa lahat ng myembro ng kagalang-galang na kapulungan na ito na isadili-dilihing mabuti ang inyong kapasyahan ukol sa pagbuwag ng Sangguniang Kabataan. Maraming Salamat po.