PAGTANGGAP

Aking panimula, ang bagay na pilit nating iniiwasan

Kung paano, bakit at kelan
Paano kung ganito?
Sa dinami-dami ng tao bakit ako?
At kelan ko ba dapat ihanda ang aking sarili
sa pagsubok at dilim na ito?

Naaalala ko, palaging sambit ng aking ina

“Anak, ang dilim ay parte ng buhay
Kapalit nito ay liwanag, pagkatapos ay kalungkutan,
Kaya huwag kang mananatili sa paghihintay.

Kalungkutan at pagsubok
Dilim at pagkadurog
Ako’y minsang nalugmok.

Musmos noong kami’y iniwan,

Haligi ng tahana’y naging marupok
At ilaw ng tahana’y minsang nabalot ng lungkot.
Mga bibig na sa pagkabuka ay galit,
laman ay mga salitang ‘di ‘ko na kayang ipilit
at tanggapin
ng aking puso at damdamin.

Mga salitang minsan akong inilarawan

at binigyan ng dahilan
para maging mahina at mahirapang lumaban
Pinilit kong ituring na ito’y pansamantala lamang,
Ngunit sa paglipas ng panahon
Ang aking araw-araw ay nanatiling isang malaking laban
Na dapat ‘kong malampasan.

Pamilya ang aking naging sandalan,

Sa bawat gabing mata’y luhaan,
Poot, sakit at mga bakit ang laman
Ng aking puso at isipan.
“Anak, huwag kang magalit sa kanya,
Manatili kang matapang sa hirap niyang dinala
 Dahil dito ka pinagtitibay ng panahon,
Sa mga karanasang minsan kang winasak,
iniwang walang lakas at puro pabagsak.

Liwanag ang aking hiniling,

Sa Diyos ako’y humiling,
Na sana bukas sa aking paggising,
Mga mata’y magkaroon ng saya
Pamilya’y magka-isa.

Poot ay aming malampasan at manatiling matatag

Ang minsang nawasak at minsang nabuwag
Ay unti-unti ding babangon at malalampasan ang minsang hirap na naranasan kasabay ng alon
Na minsang nanira ng magandang dagat at nagpahirap sa mga pusong tanging gusto lamang ay maging payapa,
minsang naging kalmado,
Sa pampang ng dagat,
Ako’y nanalig, nanalangin,
At humingi ng paumanhin
Na dahil minsang naging mahina,
Sa pagsubok na itinuring kong katapusan
Ng aking masalimuot na yugto at heto pa rin,
Nanatiling masaya
Kinalimutan ang nakaraan na kailan ma’y di na maibabalik
Hindi na siya babalik
Titigilan ang pananabik
Upang tumahimik
Ang puso naming minsan ding umasang siya’y babalik.