Ang Pagbuo ng Konseptong Papel

Kung nakapagpasya na ng paksang sasaliksikin, maaari nang buuin ang sulating

pananaliksik. Sa tulong ng konseptong papel, na magsisilbing proposal, maihahanda na
ang binabalak na pananaliksik.
Ang konseptong papel ay isang kabuuan ng ideyang nabuo mula sa isang
gawaing balangkas o framework ng paksang bubuuin.
Ang framework ay ang pinaka-estruktura at pinakabuod ng isang ideya na
tumatalakay sa nais patunayan, linawin o tukuyin.

Bahagi ng Konseptong Papel

a. Rasyunal (Rationale)
b. Layunin (Objective)
c. Metodolohiya (Methodology)
d. Inaasahang Bunga/ Resulta (Expected Outcome/ Output)
e. Mga Sanggunian (References)

Rasyunal
Gaya ng natalakay na sa unang bahagi, taglay ng rasyunal ang pinagmulan ng ideya o
kadahilanan kung bakit napili ang isang paksa. Ang kabuluhan at kahalagahan ng
naturang paksa o pag-aaral ay inilalahad din sa puntong ito.

Halimbawa:
Paksa:
Information Technology: Daan sa Makabagong Panahon
Rasyunal:
Bago sumapit ang impormasyon katakut-takot na pasakit at paghihirap ang dinanas
upang makatanggap o makapagpadala ng mensahe. Ilang araw o buwan ang kailangang
lumipas bago matanggap ang liham. Kuntento na rin sa isang beses na makapag-usap
dahil mahal ang overseas long distance. Samakatuwid, mabagal ang paraan ng
komunikasyon.
Sa paglipas ng panahon, tila ang Mindanao ay naging Quiapo at ang Hongkong ay
Divisoria. Kaunting pihit lang sa kompyuter ay konektado ka na sa kabilang bahagi ng
mundo. May pagkakataon pa ngang makausap o makita ang isa’t isa sa screen ng
kompyuter. Ang lahat ng ito ay dahil sa teknolohiya. (ni Julie Ebal-Wika at Lipunan sa
Panahon ng Impornasyon)

Layunin
Ang hangarin o pakay ng pag-aaral na nais matamo ng mapiling paksa. Maaari itong
pangkalahatan (general) o tiyak (specific). Sa pangkalahatang layunin, ipinahayag nito
ang kabuuang layon, nais gawin, mangyari o matamo sa pananaliksik. Sa tiyak na
layunin, ipinahahayag nito ang ispesipikong pakay sa pananaliksik sa paksa.

Halimbawa:
Paksa:
Ang Wikang Filipino sa Larangan ng Text Messaging
Layunin:
Malalaman ang tungkuling ginagampanan ng wikang Filipino sa larangan ng text
messaging.
Mga tiyak na layunin ng papel na ito ay:
1. natutukoy ang lawak at hangganan ng paggamit ng Filipino sa larangan ng text
messaging.
2. naibibigay ang mga paraan ng paggamit ng mensahe sa Filipino gamit ang text
messaging.
3. nailalahad ang implikasyon ng pagpapaikli ng pahayag sa Filipino gamit ang text
messaging.

Metodolohiya
Bahagi ng metodolohiya ay ang paraan (technique) at pamamaraan (method) ginagamit
sa pagkuha ng datos at pagsusuri ng piniling paksa sa pananaliksik.
Maaaring gamitin sa pagkuha ng datos ang sarbey, questionnaire, case study,
obserbasyon, panayam o interbyu at iba pa. Kung magsusuri, magagamit ang paraang
empirical, komparatibo, interpretasyon o pagpapakahulugan. Magagamit ang mga
ito depende sa larangang gagamitin.
Halimbawa:
Paksa:
Mga Dinaranas ng mga Estudyante ng Ikasampung Baitang sa St. Bernadette ng Divine
Life Institute of Cebu sa Pagliban sa Klase
Metodolohiya:
Ang mga mananaliksik ng araling ito ay magpapakalat ng mga talatanungan tungkol sa
pagliban ng mga estudyante. Magkakaroon din ng mga panayam sa mga estudyante at
kanilang mga guro tungkol sa nasabing paksa. Sa pamamagitan ng mga ito, mas
magkakaintindihan ang mga guro at mga estudyante hinggil sa mga dahilan, sitwasyon
at epekto ng pagliban ng mga estudyante sa ika-10 baitang ng St. Bernadette ng Divine
Life Institute of Cebu.

Inaasahang Bunga
Ilalahad sa bahaging ito ang resulta ng isinasagawang pananaliksik. Maaaring banggitin
dito ang mga idinagdag gaya ng apendiks.

Halimbawa:
Paksa:
Mga Dinaranas ng mga Estudyante ng Ikasampung Baitang sa St. Bernadette ng Divine
Life Institute of Cebu sa Pagliban sa Klase
Inaasahang Bunga:
Ang papel na ito ay isang panimulang hakbang pa lamang patungo sa pagpapalalim ng
kaalaman sa mga dinaranas ng mga estudyante sa kanilang pagliban sa klase. Ang papel
na ito ay maglalaman ng mga mahahalagang impormasyon na makatutulong sa
pagbabawas ng bilang ng mga estudyanteng lumiliban sa kanilang klase sa pamamagitan
ng pagsasagawa ng grupo ng mananaliksik ng isang programa o orentasyon tungkol sa
magiging epekto kung ang isang estudyante ay mapapadalas na sa kanyang pagliban sa
klase. Ang lahat ng mahahalagang impormasyong nakalap ay isasaad at ilalathala ng
mga mananaliksik.
Sanggunian
Isinasaad sa bahaging ito ang mga ginamit na sanggunian upang mapalalim ang ideyang
inilagay sa konseptong papel lalong-lalo na sa bahaging rasyunal. Sundin ang pormat na
APA sa pag-credit ng mga ideyang iyong ginamit.

Inihanda ni:
CHARLENE C. GUZMAN
Guro sa Filipino

Pinagkunang Sanggunian:
https://www2.slideshare.net/jakeDsnake/ang-pagbuo-ng-konseptong-papel-3227289
Narito ang isang halimbawang pormat ng konseptong papel.

DIVINE LIFE INSTITUTE OF CEBU, INC.

Yati, Liloan, Cebu

Epekto ng Panonood ng mga Pelikulang Ingles sa Wikang Ginagamit ng mga

Piling Estudyante na Kumukuha ng STEM Strand ng Divine Life Institute of Cebu,
Inc. sa kanilang Pagsagot sa Oral Recitation sa asignaturang Komunikasyon at
Pananaliksik sa Wika at Kulturang Pilipino

Bilang bahaging pangangailangan sa asignaturang Komunikasyon at Pananaliksik sa

Wika at Kulturang Pilipino

Isinumite ni:

Juan Dela Cruz

Grade 11- St. Pedro Calungsod

Isinumite kay:

Bb. Charlene C. Guzman

Disyembre, 2023
 Epekto ng Panonood ng mga Pelikulang Ingles sa Wikang Ginagamit ng mga

Piling Estudyante na Kumukuha ng STEM Strand ng Divine Life Institute of Cebu,

Inc. sa kanilang Pagsagot sa Oral Recitation sa asignaturang Komunikasyon at

Pananaliksik sa Wika at Kulturang Pilipino

Rasyunal

Ang panonood ng mga pelikulang banyaga lalong-lalo na ang mga pelikulang ingles ay

hindi maikakaila na minamahal at kinagigiliwan ng halos lahat ng mga Pilipino. Kaya

naman, hindi maiiwasan na ang mga Pilipino ay talagang marunong magsalita ng Ingles

na dulot ng panonood ng mga pelikula na tiyak na nakakaimpluwensya sa paraan ng

pagsasalita ng mga tao at ang lenggwaheng gagamitin nila sa pakikipagtalastasan.

Ginagawa din ito ng mga estudyante o mga kabataan upang sila ay matutong magsalita

ng Wikang Ingles.

Ayon kay Nath et al. (2017), ang mga nag -aaral ng wika lalong-lalo na ang Wikang Ingles

ay maaaring madaling makakita at makakuha ng mga pelikulang Ingles, at ang aktibidad

na ito ay talagang isa sa mga pinakatanyag na bagay na ginagawa ng mga estudyante

sa kanilang libreng oras. Bukod diyan, natuklasan ng maraming pag-aaral na ang

panonood ng mga pelikula ay maaaring mapahusay ang kasanayan sa wika at iba pang

aspeto ng pag-aaral ng wika. Nagsagawa ng isang pananaliksik sa Japan na kung saan

ang mga undergraduate na estudyante mula sa limang institusyon ang lumahok upang

suriin ang pagiging epektibo ng paraan ng pagtuturo ng Ingles sa pamamagitan ng mga

takdang-aralin sa Reader's Theater at isang pelikulang Ingles. Ayon sa kanilang pag-

aaral, mas nagaganahan ang mga estudyante na matuto ng wika dahil nagustuhan nila

ang pelikula. Ang mga kalahok sa nasabing pag-aaral ay nagpahayag din na ang

pagsasanay na ito ay nakatulong sa kanila na madagdagan ang kanilang bokabularyo at

ma-ensayo ang kanilang pagbigkas ng mga salita. Samakatuwid, kung ipagpapatuloy ng

mga estudyante na manood palagi ng mga pelikulang Ingles, mas nalilinang nila ang

kanilang kasanayan sa Wikang Ingles sa halip na ang kasanayan sa Wikang Filipino.

Bukod pa diyan, ang masyadong pagtangkilik ng mga estudyante sa mga pelikulang

banyaga ay nagpapalimita sa kanilang pagkalantad sa kanilang target na wika o ang

wikang Filipino. Ipinahayag ni Domingo (2020), isa sa mga aspetong maaaring

magkaroon ng epekto sa kasanayan sa wika ng isang estudyante ay ang kanilang

exposure sa target na wika. At saka, ang mga pag-aaral sa pagkamit at pagkatuto ng

isang wika ay nagpakita na ang pagkakalantad sa target na wika ay maaaring

makaapekto sa pag-aaral ng wika. Kaya, kung mas lantad ang mga estudyante sa

Wikang Ingles ay mahihirapan sila sa pagkatuto at pagkasanay sa sariling wika - Wikang

Filipino.

Sa Pilipinas, hindi maiiwasang tumanggap at matuto ng ibang wika dahil sa parehong

heograpikal at kultural na kalagayan nito at likas na din sa ating mga Pilipino ang pagiging

multilingguwal (Napil & San Jose, 2020).

At dahil ang Pilipinas ay isang multilingguwal na bansa na may higit sa isang wika, ang

Filipino at Ingles ay ginagamit bilang mga midyum ng komunikasyon upang ang mga tao

mula sa iba't ibang rehiyon ay magkaintindihan. Dagdag pa rito, dahil ang wikang Filipino

ang pambansang wika, ito ang ginagamit na midyum sa pagtuturo sa ibang nga

asignatura gaya ng Araling Panlipunan, Filipino at iba pa. Ayon sa datos ng Social
Weather Surveys (SWS) na hinango mula sa isang artikulo na inakda ni Mangahas (2016)

ng The Inquirer, 16 porsiyento ng mga tao sa Visayas ang nagsabing matatas silang

magsalita ng Filipino, habang 54 porsiyento ang nagsabing marunong silang magsalita

ng Ingles. Ang mga resulta ng surbey ay nagpapakita lamang na ang Filipino ay hindi

sinasanay sa bahay ng mga residente sa rehiyon ng Visayas, na nagreresulta sa

mababang pag-unawa sa wika. Bukod pa dito, mababa ang akademikong pagganap ng

mga mag-aaral sa mga asignaturang Filipino dahil nahihirapan silang maunawaan ang

midyum (wikang Filipino) na ginagamit sa paksa (Augusto, 2022). Ayon kay Tana (2021),

ang antas ng kasanayan sa wikang Filipino ng mga mag-aaral ay nasa katampatan

lamang.

Sa Divine Life Institute of Cebu, Inc. ay ginagamit din ang wikang Filipino sa pagtuturo

partikular na sa asignaturang Komunikasyon at Pananaliksik sa Wika at Kulturang

Pilipino. Ngunit kapansin-pansin ang kakulangan ng mga estudyante sa kasanayan sa

wikang Filipino sa pasulat man o pakikipagtalastasan. Kaya naman, ang pag-aaral na ito

ay naglalayon na matukoy ang epekto ng panonood ng mga pelikulang Ingles sa wikang

ginagamit ng mga piling mag-aaral sa ika-11 baitang ng STEM sa pagsagot sa oral

recitation.

Layunin ng papel na ito na:

• Matukoy kung anong wika ang ginagamit ng mga estudyante sa pagsagot sa oral

recitation.
 • Matukoy kung may ugnayan ba ang panonood ng pelikulang Ingles sa wikang

ginagamit ng mga estudyante sa pagsagot sa oral recitation sa asignaturang

Komunikasyon at Pananaliksik sa Wika at Kulturang Pilipino.

• Maglahad ng mga posibleng hakbang upang mas tataas ang antas ng kasanayan

ng mga estudyante sa pakikipagtalastasan gamit ang wikang Filipino.

Metodolohiya

Ang mga mananaliksik ng araling ito ay magpapakalat ng mga talatanungan na kung

saan nakalagay dito ang tanong kung ang mga napiling estudyante ay nanonood ng

pelikulang Ingles. Magsasagawa din ng panayam ang mga mananaliksik sa guro ng

napiling mga estudyante sa asignaturang Komunikasyon at Pananaliksik sa Wika at

Kulturang Pilipino upang matukoy kung anong wika ang kadalasang ginagamit ng mga

estudyante sa pagsagot sa oral recitation. Sa pamamagitan nito mas matutukoy kung

nakakaapekto ba ang panonood ng pelikulang Ingles ng mga piling estudyante sa Divine

Life Institute of Cebu, Inc. na nasa ika-11 baitang ng STEM strand sa wikang ginagamit

nila sa pagsagot sa oral recitation.

Inaasahang Bunga

Ang papel na ito ay isang panimulang hakbang pa lamang upang matukoy ang wikang

ginagamit ng mga piling estudyante sa pagsagot sa oral recitation sa asignaturang

Komunikasyon at Pananaliksik sa Wika at Kulturang Pilipino. Ang papel na ito ay

maglalaman ng mga mahahalagang impormasyon tungkol sa epekto ng panonood ng

pelikulang Ingles sa wikang ginagamit ng nga estudyante sa oral recitation ng nasabing

asignatura. Bukod dito, maglalahad din ng mga rekomendasyon ang mga mananaliksik

upang mas maensayo at malinang ng mga estudyante ang kanilang pagkatuto at abilidad

sa pakikipagtalastasan gamit ang Wikang Filipino. Ang lahat ng mahahalagang

impormasyong nakalap ay isasaad at ilalathala ng mga mananaliksik.

Sanggunian

Augusto, W. (2022). Correlation of Students' Level of Reading Comprehension in Filipino

Language And Self-Esteem. Journal of Education Naresuan University, 24(2), 345-359.

Retrieved from

https://so06.tcithaijo.org/index.php/edujournal_nu/article/view/255050/172301

Domingo, P. C. (2020). English Language Exposure Of Students In Visayas State

University. NOBEL: Journal of Literature and Language Teaching, 11(2), 178-187.

https://doi.org/10.15642/NOBEL.2020.11.2.178-187

Napil, M. C. & San Jose, A. E. (2020). Beliefs And Strategies in Filipino Language

Learning and Academic Performance of Indigenous Students. International Journal of

Educational Policy Research and Review, 7(5), 151-163.

https://doi.org/10.15739/IJEPRR.20.017
Nath, P. R., Mohamad, M., & Yamat, H. (2017). The Effects of Movies on the Affective

Filter and English Acquisition of Low-Achieving English Learners. Creative Education, 8,

1357-1378. https://doi.org/10.4236/ce.2017.88096

Tana, N. R. (2021). Factors Influencing The Level of Filipino Language Proficiency

Among Secondary Students. Interdisciplinary Journal of Applied and Basic Subject, 1(12),

1-12. https://identifier.visnav.in/1.0002/ijabs-21j-30001/

PAALALA: Ang ipapasa ninyong konseptong papel ay printed. Short Bondpaper. Arial
12, Double Line Spacing.