Novena sa Mamurawayon na Birhen Maria,

Nuestra Señora De la Anunciacion

Pataratara
Inoomaw niamo ika O Maria, Uya kami na mga aki sa atubang kan saiyang Ina, Aram
mi na naghihinanyog ka asin sinisimbag kami, Nakikisumaro kami saimo sa
kaogmahan, O Maria , iyan nin huli ta an Kagurangnan, an Samong Tagapagligtas,
Yaon saimo.
Pagsolsol nin Kasalan
Kagurangnan niamong Jesucristo, Dios na totoo asin tawong totoo na iyo an kaglalang
asin kagtubos samo. Nakaluhod kami sa atubang kan Saimong Diosnon na Kahadean,
nagmumundo kami nin huli ta nagkasala kaimo saimo, samuyang Dios, na iyong
nararapat kan gabos na pagkamoot. Nagtutubod asin nagtitiwala kami sa saimong
daing sagkod na pagkaherak. Ika an samong Kagurangnan asin Dios na samong
namomotan sa gabos. Huli kan tabang kan saimong diosnon na grasya, nangangako
ako na magsosolsol kan sakong mga kasalan, asin maghihingowa ako sa abot kan
sakong makakaya na iiwasan an mga pagkakataon na magkasala ako liwat. Ini
hinahagad niamo huli kan saimong pagsakit, pagkagadan asin pagkabuhay liwat, na
kami saimong papatawadon.
Pag- Arang
Nuestra Señora de la Anunciacion, pinili kan Dios, an orog kalinig na Ina nin Dios, nag-
oogma an gabos huli kan pinaka orog na regalo na itinao saimo bilang tagapag dara kan
Dios, na nanitawo sa saimong poponan. Orog kapalad na pagtubod asin pailihan nin
kaligtasan! An Ina nin Dios iyo man an samong Ina. An Ina kan samong iyo iyong
paglaom asin man an iyo iyong samong kinakatakutan.
O paladan na Babae, ika an ina nin kaligtasan asin kan gabos na ilinigtas. Ika an samong
Ina nin katanosan asin kan mga matanos. Magi ka lugod niamong inspirasyon huli kan
saimong pusog na pagtubod sa Dios tanganing an samong masarig na pagtubod
magdara samo pasiring sa buhay na daing kasagkoran. Buhayon mo an maluya
niamong kalag sa paagi kan saimong mapag arugang paglaom para sa Simbahan
tangganing padagos niamong manumpungan an paglaom na itinao ni Kristo sa bilog na
katawohan huli kan misterio nin pagkanitawo. Samo man lugod na maarog an totoong
pagdusay kan sadiri sa Dios sa gawe nin kaligtasan tanganing magi man kaming
matinaong Cristiano na andam magtabang.
O Ina, pano nin pagtubod, paglaom asin karahayang boot, ipinagkakatiwala niamo an
bilog niamong sadiri, tanganing dai kami magin oripon kan demonyo sa paagi nin
kasalan, asin lugod mamuhay kaming mahuyo asin malinig sa samong pagkabuhay.
Huli kan saimong tabang, idinudusay niamo an samong sadiri sa saimong Diosnon na
aking si Jesus. Amen.

Pamibi sa Aro-aldaw
Enot na Aldaw
Maria, pano nin Grasya
(Lukas 1: 26: 28)
Amang Makakamhan, orog na makapangyarihan, asin daing kasagkoran na Dios,
nagpapasalamat kami sa pagtao samo nin orog na piniling babae na pano nin grasya na
maging Ina kan saimong Aki asin magi man Ina niamo gabos. Nagpapasalamat kami sa
pagpadara sa samo kan saimong Aking si Jesucristo tanganing iyo an samong
tagapaglistas. Salamat sa pagtao samo kan hinangos nin buhay asin an kagayonan kan
saimong linalang. Nagpapasalamat kami Ama, na samuyang Kagurangnan asin Dios
huli kan saimong daing sagkod na karahayan asin pagkaherak. Orog kang karahay sa
samo na mga aki mo. Inoomaw ka niamo, sinasamba ka niamo, an saimong aking si
Jesucristo asin an saiyang Ina na si Maria an samong taga tabang. Sa saimo utang niamo
an gabos. Mapakumbaba niamong inaako na kun mayo ka, dai man kami nin saysay.
Akoa an samong pasasalamat asin an samong daing katapusang pag omaw asin pag
debosyon. Hihingowahon niamo na mahiling samo an saimong karahayan sa paagi nin
pagsunod kan saimong tugon, pagkamoot sa samong kapwa asin paghingowa na
maging siring sa Aki mo. Padagos niamong mimidbidon an saimong pagka Dios asin
ipagrorokyaw an saimong karahayan asin kabootan sa gabos na aldaw kan samong
buhay. Amen.
Ama Niamo
Ave Maria
Kamurawayan

IKA DUWANG ALDAW

Maria, Dahilan kan samong pag ogma, Mag ogma!
(Lukas 1:28)
Mamibi kita: Kagurangnan niamong Dios, ikinakaogma mo na magdara nin kaogmahan
sa kinaban sa pagkanitawo kan Aki mo. Isinakripisyo mo an saimong Aki, tanganing
maligtas an samong kalag asin mag-ogma kan buhay na daing kasagkoran. Tabangi
kami, na an sisay man na nag oomaw sa saiyang Ina, na iyo an dahilan kan samong
pag ogma, danay na maglakaw sa dalan kan saimong tugon na kun saen an samong
mga puso nakapagtugmad sa totoo asin daing sagkod na kaogmahan. Siring man,
tawan samo an biyaya na maiheras niamo an ogma na nakua niamo sa tataramon asin
gibo ni Maria sa gabos niamong mabibisto. Ipahiling mo samo an totoong kaogmahan
sa pagsabuhay kan marhay na bareta kan buhay, minsan kami man nasa dakulang
kamunduan, alagad yaon samo si Maria an tabang sa mga nagmomondo. Ama nin
pagkaherak asin Dios nin gabos na konsolasyon, tawan samo huli kan saimong
pagkamoot asin karahayan na kaming maogmang nag-oomaw ki Maria, bilang samong
kaalingan, makamtan man lugod an daing sagkod na kaogmahan sa langit na kaibahan
siya. Huli ki Cristo na samong Kagurangnan. Amen.
Ama Niamo
Ave Maria
Kamurawayan

IKATOLONG ALDAW
Maria, Pararanga nin mga Nagmomondo
(Lukas 1: 29)
Mamibi Kita: Sa tabang kan Ina kan Tataramon na nanitawo, tawan samo an saimong
pagkaherak asin pagranga tanganing gumian an samong kagabatan asin tawan samo an
kaalingan asin kusog sa gabos na nagsasakit ngunyan. Kagurangnan, hinahagad niamo
na tukduan kami kan Banal na Ina na maging mamomoton. Tukdoe an saimong
kaakian, huli kan kapangyarihan kan Espiritu Santo, na tumangon an padagka kan
demonyo asin kasalan asin an gabos na padaya kaini. Huli sa pamibi ni Nuestra Señora
dela Anunciacion, nag-aarang kami na tabangan na padaguson an Tataramon sa
kinaban tanganing maka experiensya man kami nin pagkamundag giraray. Huli ki
Maria, an saimong kahadean nagsirang, an kahadean nin pagkamoot asin pagkaherak,
namundag gikan sa Tataramon na nanitawo. Amen
Ama Niamo
Ave Maria
Kamurawayan

IKAAPAT NA ALDAW
Maria, Reyna nin Katoninongan
Luke 1:30
Mamibi kita: Mamomoton na Ama, huli kan samong Ina, Birhen Maria, tukduan mo
kaming maging kalmado asin toninong mantang samong namamatean an saimong
presensya ngunyan, namimibi kami para sa samong pangangaipo asin kamawotan.
Tukduan mo kaming makanuod maghagad para sa sainda. Amang Makakamhan, huli
sa pamibi ni Maria, Reyna nin Katoninongan, lugod tawan mo kami nin katoninongan
sa samong puso na siring sa itinao mo saiya duman kan pagbaretaan siya kan anghel,
asin tugutan mo kami na hanapon an samong kamawotan sa saimo man sana Ama,
lugod an paladan na Virgen tukduan kami, na lugod magpamibi kami nin may
pagtubod asin kun iyan tugot sa saimong kabotan, makamtan man lugod niamo an
samong hinahagad huli saiya. Amen
Ama Niamo
Ave Maria
Kamurawayan

IKALIMANG ALDAW
Maria, Ina nin Katanosan
(Luke 1: 31-32)
Mamibi kita: Amang Makakamhan itinao mo samo si Birhen Maria, an Ina kan
Tagapagligtas bilang samong pangarogan. Siya an nagtukdo samo na danay na
makisumaro sa kapwa. Inaapodan na mangenotan sa pangangaipo kan mga tawong
nakapalibot samo, mahiling an agrangay kan saindang mga puso, makisumaro sa
saindang pagkatakot asin pagkabaranga, asin magtaong paglaom sa mga mayo ng
nilalaoman asin pinapasipara. Tukduan mo kami Kagurangnan kun paano, saarin asin
sain kami makakaheras sa mga nagmamawot matabangan asin nasasakitan. Lugod an
samong puso mapano kan saimong pagkamoot, danay na nagmamawot na
paglingkodan ka sa paagi kan kapwa na mayong hinahalat na balos. Ini hinahagad
niamo sa ngaran ni Jesus huli sa pamibi ni Nuestra Señora dela Anunciacion. Amen.
Ama Niamo
Ave Maria
Kamurawayan

IKAANOM NA ALDAW
Maria, Ina nin Liwanag
(Lukas 1: 36-37)
Mamibi kita: Ama, ika naging totoo sa saimong panuga, na ipapadara mo an Espiritu
Santo na mag erok sa samuya asin tanganing apodon kami hale sa diklom pasiring sa
magaya gayang liwanag. Tabangi kaming marumduman ini, anuman an mga kasakitan
asin pagtios na samong masabatan. Panoa kami nin paglaom asin pagtubod huli kan
saimong tabang. Mantang kami nagpapadagos sa samong paglakbay sa dalan nin
buhay, tawan mo kami nin kusog tanganing maisog na atubangon an anuman na
kasakitan na samong masabatan. Padarhan samo an saimong pagkamoot asin
pagkaherak kun kami harani ng magsuko asin maghabo. Tabangan mo kaming
masabutan na an saimong kahadean maabot asin magdadara samo nin katapusan sa
kasakitan. Lahidan mo kami kan Espiritu tanganing kami magin maninigo na
tagapagdara kan Marahay na Bareta sa samong mga tugang na namumundo asin
nasasakitan. Ini hinahagad niamo huli ki Cristo na samong Kagurangnan, asin huli sa
pamibi ni Nuestra Señora dela Anunciacion, an Ina nin Liwanag. Amen.
Ama Niamo
Ave Maria
Kamurawayan

IKAPITONG ALDAW
Maria, Tabang kan mga Cristiano
(Lukas 1: 36: 37)
Mamibi Kita: Dios na samuyang Ama, minadulok kami saimo na may kusog boot na
kami saimong liliwanagan kan saimong grasya asin pagkamoot. Mantang kami
ngunyan nagagamo manungod sa kasakitan kan kinaban, na kun saen an pagkamoot
luway luway ng nawawara sa pamilya asin sa kapwa, na kun saen mayo na nin
pagkasararo, asin an pagkamoot asin paggalang sa aki mong si Jesucristo dai na
nahihiling, minahagad kami kan tabang kan paladan na Ina na lugod mahanap man
niamo an liwanag asin kapangtyarihan saimo. Mamomoton na Ama, hinahagad niamo
na liwanagan an mga inabandona, asin mga may kapansanan asin idtong pinagkaitan
nin totoong pagkamoot na gikan sa saindang ama asin ina. Huli kan saimong
pagkaherak makamtan man lugod ninda an katoninongan, paglaom asin pagkasararo.
Ini hinahagad niamo na kami saimong tabangan na magin siring ki Maria na dai
nalilingwan an saiyang mga aki, padagos na inaataman, tinatabangan asin padagos na
naka-antabay samo. Naglalaom kaming magian an samong kagabatan asin mga
kasakitan. Tabangan mo kaming mga aki mo na mamatean an pagkamoot asin
pagkasararo na mawot mo sa kada harong. Magi man lugod kaming mga pangarungan
nin kabootan sa pagpahiling niamo nin marahay na pakikipagkapwa, na sarong
magayon na paagi sa pagpapalakop nin pagkasararo. O daing kasagkoran na Ama,
inoomaw asin pinapasalamatan mi ika huli kan mga biyaya na samong nakamtan, orog
ng gayo an Paladan na Virgen Maria. Nagtutubod sa saimong pagkamoot asin
pagkaherak, naglalaom kaming makakamtan an samong mga hinahagad sa paagi niya,
an biyaya na mamoot asin magadan huli kan saimong pagkamoot. Amen
Ama Niamo
Ave Maria
Kamurawayan

IKAWALONG ALDAW
Maria, Oripon kan Kagurangan
(Lukas 1: 38)
Mamibi kita: O Dios, samong mamomoton na Ama, pinano mo an samong mga puso
kan regalo nin paglingkod, pagkamoot asin bokasyon. Mapakumbaba kaming
minadulok saimo, Tawan samo an espiritu nin diosnon na pagkamoot tanganing
samong maarog an Paladan na Virgen Maria. Tukdoan mo kami nin totoong
paglingkod, daing kondisyon sa pagtabang asin orog na pagkamoot sa samong pamilya
asin kapwa. Tabangan mo kaming makanood magsimbag sa saimong pangapodan,
tanganing magin maninigo kaming instrumento kan Diosnon na gibo. Dios Ama, aram
mi na maski pa kaidto bago mi sinimbag an saimong pangapudan, igwa ka na nin
plano sa samo. Tabangan mo kaming masabutan na ika an dapat na enoton sa samong
buhay. Tawan mo kami nin pusong danay na nagmamawot nin pagkamoot, pag alaga
asin pag lingkod. Ini gabos pinapamibi niamo huli kan makapangyarihan na ngaran ni
Jesucristo na samong Kagurangnan asin huli kan pamibi ni Nuetra Señora dela
Anunciacion. Amen
Ama Niamo
Ave Maria
Kamurawayan

IKASIYAM NA ALDAW
Maria, Babae nin Pagtubod
(Lukas 1: 38)
Mamibi kita: Amang Makapangyarihan, kami saimong mga aki. Inaapod mi ika sa
saimong ngaran asin nagsusunod kami sa dalan ni Jesus, na saimong Aki. Tawan mo
kami nin biyaya na magkaigwa asin mabuhay sa pagtubod siring ki Maria, tanganing
maninigo kami kan buhay na daing kasagkoran na saimong pinanuga. Ama, mapano
man lugod an samong mga puso nin pagtubod, tanganing bulanos na akoon niamo an
saimong kabotan sa samo na mayong pag duwa duwa. Tabangan mo kaming haleon an
mga kakundian asin salang pakasabot na kaulangan sa samong pag-iisip sa pag
atubang niamo sa mga kasakitan asin problema sa samong buhay. Dai man lugod
magluya an samong pagtubod. Ama, apodon mo kami na saimong mga Aki. Ampona
asin kaherakan, mantang samong pinarorokyaw an Mahal na Virgen Maria, na iyo an
Ina ni Cristo asin an Ina nin Simbahan, lugod an samong pakikisumaro sa saiyang Aki
magdara samo sa kaligtasan. An gabos na pag-oaw asin kamurawayan mapasaiya.
Amen
Ama Niamo
Ave Maria
Kamurawayan

PAMIBI KI NUESTRA SEŇORA DE LA ANUNCIACION

Lugod an gabos na kapag arakian ipagrokyaw kang Paladan , O Maria, ika nagtubod sa
ki San Gabriel Arkanghel, asin sa saimo naotob an darakulang mga bagay na binareta
saimo.
An sakong kalag, an bilog kong pagkatawo inoomaw ka, O Maria, igwa ka nin
pagtubod sa pagkanitawo sa Aki nin Dios sa saimong poponan, asin ika an nagin Ina
nin Dios.
Asin an pinakamaogmang aldaw sa kasaysayan kan katawohan nangyari. an
katawohan inako an Diosnon na Kagurangnan, an iyo iyong halangkaw na Padi, an
Ostia kan pagbayad sala, an Hade kan gabos.
Pagtubod biyaya na gikan sa Dios asin an ugat kan gabos na karahayan.
O Maria, tawan samo siring man an buhay, masarig asin aktibong pagtubod na iyong
nagligtas, nagkaigwa nin mga banal, pagtubod sa Simbahan, sa Evangelio asin sa buhay
na daing kasagkoran.
Mapag hurop huropan lugod niamo an tataramon kan saimong Aki, na saimong
pinadanay sa saimong puso asin pinaghurop huropan nin maninigo.
Lugod an evangelio mairokyaw sa gabos asin akoon nin maninigo.
lugod an mga babae asin lalaki, huli ki Jesucristo, magin mga aki nin Dios. Amen.