DICIEMBRE 21

COLECTA

Kagurangnan, namimibi kami,

kaheraking hinanyoga an pamibi
kan saimong banwaan,
tanganing an mga nag-oogma sa pagdatong
kan Bogtong mong Aki sa samong laman,
magkamit kan premio nin buhay na daing kasagkoran,
sa pagdatong niya sa kamahalan.
Huli ki Jesu Cristong Kagurangnan niamo,
saimong Aki, na kaiba mong nabubuhay
asin naghahade, sa pagkasaro kan Espiritu Santo,
Dios sa gabos na kapanahonan kan mga panahon.

PAMIBI SA MGA DOLOT

Kagurangnan,
paki-akoa an mga atang kan saimong simbahan,
na maheherakon mong tinawan nin mga idodolot,
asin sa kapangyarihan mo, himoang makadara ini
sa misterio kan samong kaligtasan.
Huli ki Cristo na samong Kagurangnan.

PAMIBI PAKACOMUNION

Kagurangnan, an pakisumaro sa diosnon na misterio

magin danay na kalasag sa saimong banwaan,
tanganing sa lindong nin bilog na kaimbodan
kan saimong kamahalan,
mag-ako nin gabos na kaligtasan sa isip asin hawak.
Huli ki Cristo na samong Kagurangnan.
PREFACIO II SA ADVIENTO
 (Paghalat sa duwang Pagdatong ni Cristo)

ARZOBISPO: An Kagurangnan mapa-saindo.

BANWAAN: Asin sa saimong espiritu.

ARZOBISPO: Iitaas an mga puso.

BANWAAN: Initaas mi na sa Kagurangnan.

ARZOBISPO: Magpasalamat kita sa Kagurangnan satuyang Dios.

BANWAAN: Maninigo asin dapat.

ARZOBISPO: Totoong maninigo asin dapat,

matanos asin nakakaligtas ,
na danay asin minsan saen magpasalamat
kami saimo: Kagurangnan , banal na Ama,
Dios na makakamhan na daing kasagkoran
Huli ki Cristo na samong Kagurangnan:

Ihinarubay siya sa hula kan gabos na profeta,

dinara sa poponan kan Inang Virgen
sa dai masabing pagkamoot,
ipinahayag ni Juan an saiyang pag-abot
asin itinokdo kan siya yaon na.

Ipinapasabong niya samo na maogmang mag-andam

para sa misterio kan saiyang pagkamundag
tanganing maabtan kaming nagpupuka sa pamibi
asin nag-oogma sa saiyang kaomawan.

Kaya kaiba kan mga Angeles asin Arcangeles,

kaiba kan mga Tronos asin Dominaciones,
asin kaiba kan gabos na langitnon na hukbo,
nag-aawit kami kan himno
kan saimong kamurawayan, daing taos na nagsasabi:
DICIEMBRE 21
Magtindog kita asin palakpakan niato an pag-abot kan satong ginagalangan asin
namomotan na Arzobispo, Moy. Reverendo. ROLANDO J. TRIA TIRONA.
OCD.D.D

Matukaw an gabos.

Sa Misang ini ipamibi niato na mapasatuya man an dakulang kaogmahan asin

paglaom na namatean ni Santa. Isabel kan maaraman niya na dinadara ni Virgen
Maria sa saiyang tulak an Aki na magigin Paratubos. Sa Misa man na ini
maipapahayag an ikalimang “O” Antipona: :Madya, O ORIENS, O maliwanag
na kaagahon, banaag nin daing tapos na liwanag, ilaw nin katanosan.
Magbangraw man lugud an saimong ilaw sa mga nasa kadikloman nin
kagadanan.”

An celebracion niato ngonian na ikaanom kan Misa de Aguinaldo pamamayohan

ni Moy. Reverendo. Rolando J. Tria Tirona. OCD. D.D. Arzobispo kaining
Caceres.

Magtindog kita sa pagpoon kan Santa Misa.

PAMIBI KAN BANWAAN

ARZOBISPO: Jesucristong Kagurangnan, pinano mo nin
kaogmahan an katawohan kan bisitahon kan
saimong mahal na Ina si Isabel. Hinanyoga an
pamibi kaining banwaan na naghahalat sa saimo.
An satong simbag:

Simbag: Kagurangnan, bendicioni kami huli ki Virgen Maria.

1. Para sa satuyang Santo Papa, mga Obispo asin kapadean tanganing

magdanay sinda sa Espiritu nin pagkamoot sa banwaan nin Dios, mamibi
kita.

2. Para sa mga namamayo nin banwaan, tanganing sinda magdanay sa pag-

ataman kan katalingkasan nin banwaan. Mamibi kita.

3. Para sa mga nagtitios, naghehelang, inaapi asin nasa balanggoan na huli ki

Cristo magkaigwa man logod sinda nin liwanag asin paglaom sa buhay.
Mamibi kita.

4. Para sa gabos na uya sa misang ini tanganing orog na mapakusog an

satuyang pagtubod sa Dios asin pagkamoot sa lambang saro. Mamibi kita.

ARZOBISPO: Dios na burabod nin kaogmahan asin pagkaherak,

tinawan mo nin paglaom an gabos na tawo huli sa
saimong mahal na Aki. Tabangi kami na
makamtan mi an biyaya na samuyang minamawot
mantang hinahalat mi an pagdatong nin saimong
Aki, si Jesucristo na samong Kagurangnan. Amen.
PAMIBI PARA SA PADI

Sa ngaran kan Ama asin…

Kagurangnan, ipinapamibi niamo saimo si Fr. Jun,

na siya amponon mo huli ta siya para saimo,
an saimong padi na an saiyang buhay inaatang
sa atubang kan saimong banal na altar.
Bantayan mo po siya huli ta siya uya sa kinaban na ini.
Kun sinusugutan man kan mga kinabanon na kaogmahan,
iligtas mo siya asin itago sa saimong Mahal na Puso.

Rangahon mo po siya sa mga panahon

nin kapungawan asin kamundoan,
kasakitan asin kaluyahan,
kun an saiyang pagdusay kan bilog na buhay para sa mga kalag,
garo dae sanang saysay.
Damayan mo po siya Kagurangnan,
asin giromdoma na siya daing iba kundi ika,
asin tawo nangad na an puso maluya.
Papagdanaya siya na daing digta
siring sa Hostia na aro-aldaw niyang ibinabayaw
tanganing an saiyang lambang iniisip asin isinasaboot
asin ano man na ipinapahayag sa tataramon asin sa gibo
magkanigo lugod na pakabanalon mo. Amen.

Sa ngaran kan Ama asin…

PATARA-TARA

Dios marhay na hapon sa saindo gabos!

An Padi biyaya kan mahal na Dios sa saiyang banwaan. Sa pakisumaro niya sa

pagkapadi ni Cristo, siya nagigin dalan kan gracia nin Dios sa paagi kan mga
sacramento na saiyang cenecelebrar, lalong-lalo na an Sacramento nin Eucaristia.
Siya man iyo an minadara kan mga pamibi, pasasalamat asin pakimaherak kan
mga tawo sa Mahal na Dios.

Kun siring, an padi sarong tanda kan danay na pagkamoot nin Dios sa saiyang
banwaan. Ini an ipinapahayag kan satong celebracion ngonian.

Kita ngonian makikisumaro ki Fr. Jun sa pagdolot kaining banal na Misa bilang
pasasalamat sa Mahal na Dios sa pagkamoot asin regalo nin buhay.

Idolot niato ining Santa Misa kan mga minasunod na Intention.

(Babasahon saro-saro an mga madolot nin Misa)

Matindog kita asin awiton an awit sa pagpoon.

SALMO RESPONSORIO Salmo 40;7-8.8-9.10.11

Gabos: UYA AKO, KAGURANGNAN, UYA SA PAG-UTOB KAN SAIMONG KABOTAN

1. Dangan ako nagsabi, “Uya ako; mga katukdoan mo para sako

nasusurat sa libro. O Dios ko, naoogma ako sa pag-utob kan
kabotan mo; an saimong tugon rimpos ko sa sakuyang puso.”

2. O Dios, naoogma ako sa pag-utob kan kabotan mo; an saimong

tugon rimpos ko sa sakuyang puso. “Kagurangnan, sa
katiriponan kan saimong banwaan, ipapahayag ko an marahay
na bareta nin kaligtasan. Aram mong dai ako mauntok sa
pagrokyaw kaiyan.

3. An bareta nin kaligtasan dai ko tinago para sako lamang;

ibinareta ko an saimong pagkamaimbod asin kaligtasan! Dai ko
tinago sa katiriponan an danay mong pagkamoot asin
pagkamaimbod.

4. Hare pagsayumahan sako an saimong pagkamaherak,

Kagurangnan. Ingatan lugod ako kan saimong pagkamaimbod
asin danay na pagkamoot.

PAMIBI NIN BANWAAN

PADI: Mamibi kita sa langitnon na Ama na nagsugo ki Cristo bilang
halangkaw na Padi asin nagtao nin kaomawan asin kaligtasan
sa gabos na tawo. Sa lambang pag-arang, sabihon ta:

SIMBAG: KAGURANGNAN, HINANYOGA AN SAMONG PAMIBI

LIDER: Para sa bilog na Simbahan, an Santo Papa, mga Obispo asin

kapadian, giyahan lugod an saindang mga gibo sa pagdara kan
kaligtasan sa bilog na katawohan, magmaigot sa kabanalan asin
magin tunay na tanda sa kinaban kan presencia ni Cristo, an
halangkaw na padi. Mamibi kita.

LIDER: Para sa gabos na lideres kan banwaan asin sa gabos na may

katungdan sa publico, pasabongan lugod an saindang isip asin
puso sa sincerong pag-utob kan saindang katungdan tanganing an
gabos mabuhay sa katoninongan, katalingkasan asin
kaburunyogan susog sa kabotan ni Cristo, an marahay na Pastor.
Mamibi kita.

LIDER: Para sa mga nangangaipo, an mga dukha, naghehelang asin

nabibilanggo, an mga nagtitios huli sa injusticia, pakusogon lugod
sinda sa saindang kapagalan asin rangahon sa saindang kasakitan
sa pagtubod asin paglaom na kasaro sa saiyang kasakitan,
makakaiba sinda sa kamurawayan ni Cristo, an Kagurangnan na
nabuhay-liwat. Mamibi kita.

LIDER: Para ki Fr. Jun. na ngonian nagpapasalamat sa Mahal na Dios sa

balaog nin pagkapadi asin an regalo nin buhay, padagos logod
siyang magin instrument nin pagkamoot, pagkasinarabotan asin
pagkasararo nin katawohan. Mamibi kita

PADI: Ama, daing sukol an saimong pagkamoot, dangoga an pamibi

na hale sa puso kan lambang saro sa samuya nin huli sa
saimong pag-ampon. Hare pabayae an saimong mga
sorogoon na saimong pinili tanganing ikapahayag an
pagkamoot mo sa kinaban huli ki Cristo samong
Kagurangnan.

BANWAAN: Amen.