RITO SA PAGLOBONG KI +GIL

Paglaog sa simbahan, ihahatud si Gil (+) sa atubangan kan altar. Pag ang gabos tiripon na sa
simbahan ang commentator mapoon sa siring na patara-tara.

COMENTARIO:

An satong Eucaristia idodolot sa pagpasalamat sa

Kaguranganan para sa balaog kan buhay na daing kasagkoran na
itinao sa sato na si +Gil.

An hukbo nin mga angeles asin nin mga santos sa langit

naoogma. An Dios naoogma nin huli ta an pinaghanda nya para ki
+Gil mapapa-saiya na. Alagad kita nagmumundo nin huli sa
makuring pangyari nin kagadanan. Alagad ini may natatagong
kagayonan na an kagadanan nagiging agihan pasiring sa buhay na
daing kasagkoran.

An satong paglaom sa buhay na daing kasagkoran minatipon sa

sato ngonian. Ining buhay na daing kasagkoran iyo an satong
pinagcecelebrar sa laog nin Misa.

Matindog an gabos.
PAGPOON

Ang ceremonia poponan sa para-litugico na gigibohon sa atubang kan altar. Pagkatapos kan
para-liturgico, ang padi mapasiring sa altar sa pagpoon kan Misa.

Padi: Sa ngaran kan Ama, asin kan Aki, asin kan Espiritu Santo.
Banw: Amen.
Padi: Pag-omawon an Dios, Ama ni Jesukristong Kagurangnan ta,
Amang maheherakon asin Dios nin gabos na karangahan!
Rinaranga nya kita sa gabos nyatong kasakitan asin
tinatabangan nya kitang makaranga sa mga nagmumundo,
karangahan na gikan sa Saiya man sana.

Banw: Pag-omawon an Dios, Ama ni Jesukristong Kagurangnan ta.

Padi: Olay nin Kagurangnan

Olay nin Kagurangnan:

Madya kamo sa sako na mga nasasakitan,
Mga napapagal asin nagagabatan,
Kamo Ko sakuyang tatawan nin kapahingaloan.

An padi mawirik nin agua bendita sa bangkay asin masabi

Padi: Ining bangkay ni +Gil sakuyang benebendicionan. An agua

bendita nagpapagiromdom kan saiyang bonyag, huli ta sabi
ni San Pablo: “Kita gabos na binonyagan ki Cristo Jesus,
binonyagan sa saiyang kagadanan. Kan kita binonyagan sa
saiyang kagadanan ilinobong kita sa kaibahan nya. Kaya
siring na si Cristo nabuhay liwat sa mga gadan huli sa
kamurawayan nin Ama, kita man mabubuhay liwat. Kun
kita nakasaro saiya sa kagadanan, kita man makakasaro
saiya sa pagkabuhay liwat.”
PAGBUGTAK NIN MGA TANDA NIN CRISTIANO
Ang pamilya nakalinya sa tahaw dara ang mga tanda nin Cristiano. Sa lamabang pag sambit
kan tanda ang kapamilya dara an tanda madolok ki +Gil ibobogtak ang tanda. Dai mahali ang
kapamilya hanggan sa maikaag ang gabos na tanda.Paka pamibi mabalik sinda sa tukawan sabay
sa pagpasiring kan padi sa altar.

Telang Puti

Ang telang puti nakabiklad, ang cruz kan tela susog sa pamayohan ni Gil (+). An kada puro kan
tela kakapotan nina Ninoy, Ching, Rizza asin Jay-r. Mapasiring sa enotan ibubugtak sa
kabaong.

Com: Kan si +Gil binonyagan sya nakisumaro ki Cristo. Sa aldaw

kan pagbalik ni Cristo, magubingan lugod sya nin
kamurawayan.
“Ako an pagkabuhay liwat asin an buhay: an minatuhod
sako minsan gadan na mahubuhay (Jn. 1125).

Cirio Pascual
Ang cirio pascual na may pagkot dara ni Tres mapaenotan. Ibubugtak ang kandila sa kandelero.

Com: Inako ni +Gil an liwanag ni Cristo sa saiyang buhay. Si Cristo

Liwanag nin kinahan, itao lugod saiya an buhay na daing
kasagkoran.

“Kagurangnan tugote na magadan sa katoninongan an

saimong surugoon susug sa saimong panuga, huli ta
nahiling ko na an saimong kaligtasan, na inandam mo para
sa gabos na tawo: sarong ilaw na magliliwanag sa mga
pagano, asin magtatao nin kamurawayan sa Israel na
saimong banwaan.” (Lk. 2:29-32).

Cruz
Ang cruz patindog dadarahon ni Dada ibubugtak sa ibabaw kan kabaong susog sa pamayohan ni
Gil (+).

Com: Kan si +Gil binonyagan inako nya an tanda nin cruz.

Makisumaro man lugod sya ki Cristo na dinaog an kasalan
asin kagadanan.
“An mga katukduan kan cruz daing kahulugan para sa
mga dai nasa dalan nin kaligtasan, alagad ining
kapangyarihan nin Dios sa pagligtas para sa sato na sa
dalan nin kaligtasan.” (I Cor. 1:18)
Biblia
An biblia dadarahon paenotan ni Nene. Bubuksan dangan ipapatong sa kabaong sunod sa cruz.

Com: An banal na kasuratan iyo an tataramon nin Dios. Sa pagbasa

asin paghorop-horop kan Tataramon si +Gil nakanuod na
maglakaw sa dalan ni Cristo.
Si Jesus nagsabi: “ Ako an Dalan, an Katotoohan asin an
Buhay dai nin makakaduman sa Ama, kun bakong hali
sako.” (Jn. 14:6)
Pagkatapos maikaag ang mga tanda, ang padi mapadagos kan para liturgiko sa pamibi.

Padi: Mamibi kita ……

Kagurangnan, hinanyoga an samong pamibi: kaheraki an

kalag nin saimong sorogoon na si +Gil. Binayaan nya an
buhay na ini sa pagkuyog kan saimong pag-apod. Daraha
sya sa liwanag asin katoninongan nin saimong kahadean sa
kaibahan nin saimong mga santos. Ini hinahagad mi huli ki
Cristo na samong Kagurangnan.

Banw: Amen.
Dangan aawiton ang “Ang Kapahingaloan”. An padi mapasiring sa Altar asin an kapamilya
mapasiring sa saindang tutukawan
PAG-ABOT SA ALTAR
An padi mahadok sa altar asin mapamibi.

Padi: Mamibi kita…

O Dios na Kagurangnan,
Amang makakamhan,
kami nagtutubod na an Saimong Aki
nagadan huli sa samo asin nabuhay liwat.
Makamtan man logod nin samuyang tugang
na si +Gil,
an biyaya kan misteryong ini.
Siya nagadan sa pagtubod ki Cristo,
mapasaiya man logod an kaogmahan nin pagkabuhay-liwat.
Ini hinahagad mi huli ki Jesucristong Kagurangnan niamo,
Saimong Aki, na kaiba mo asin nin Espiritu Santo,
nabubuhay asin naghahade,
Dios, sa panahon na daing kasagkoran.

Banw: Amen.
LITURGIA KAN TATARAMON

Enot na Babasahon: Kadunongan 3:19

Ginono sa libro nin Kadonongan

An mga kalag nin mga banal nasa kamot nin Dios, asin dai sinda
mararanihan nin ano man na kasakitan. Sa mata nin mga
mangmang sinda garong mga gadan na: an saindang pagkagadan
pinaghona na sarong kasakitan, an saindang paghale pinaghona
na sarong karatan. Alagad sinda nasa katoninongan, minsan ngani
na pinaghona na sinda dapat padusahan, alagad sinda naglalaom
na mabubuhay sagkod pa man. Nagtios na kadikit alagad
dakulaon an saindang balos, huli ta pinagprobaran sinda nin Dios,
asin nahiling na sinda maninigo sa saiya. Pinagprobaran sinda
siring sa bulawan. Inako sinda siring sa dolot na atang. An mga
naglalaom saiya makakasabot kan katotoohan; asin an mga
maimbod magdadanay sa saiyang pagkamoot; huli ta an byaya
asin an pagkaherak yaon sa saiyang mga banal, asin an saiyang
pangataman yaon sa saiyang mga pinili.

Tataramon nin Kagurangnan.

Banw: Salamat sa Dios

Salmo Responsorio:

Banw: Minsan ako maglakaw sa tahaw nin kadikloman, dai ako nin
matatakotan, huli ta ika uya sako.

An Kagurangnan sakong Pastor:

dai nin anoman na magkukulang sako.
Dinadara nya ako sa mga verdeng sabsaban,
sa tampi nin mga tubig na malinaw.
Pinapakusog nya an sakuyang kalag.

Banw: Minsan ako maglakaw sa tahaw nin kadikloman, dai ako nin
matatakotan, huli ta ika uya sako.

Dinadara nya ako sa dalan nin katanosan

huli kan saiyang ngaran;
Minsan ako maglakaw sa tahaw nin kadikloman;
dai ako nin matatakotan huli ta ika uya sako.

Banw: Minsan ako maglakaw sa tahaw nin kadikloman, dai ako nin
matatakotan, huli ta ika uya sako.

Karahayan asin pagkaherak iwawaras mo sako

sa gabos na aldaw nin sakuyang pagkabuhay;
Mag-eerok ako sa harong nin Kagurangnan
sa panahon na daing kasagkoran.
IKADU WANG BABASAHON: Roma 6:3-9

Ginono sa Surat ni San Pablo sa mga taga-Roma

Dai nindo aram na kita gabos binonyagan ki Cristo Jesus

binonyagan sa saiyang kagadanan? Kan kita binoyagan sa saiyang
kagadanan, ilinubong kita sa kaibahan nya. Kaya, siring na si
Cristo binuhay liwat sa mga gadan, huli sa kamurawayan nin
Ama, kita man mabubuhay liwat. Kun kita nakasaro saiya sa
kagadanan, kita man makakasaro saiya sa pagkabuhay liwat. Ini
an aram nyato. An satong dating pagkatawo ipinako sa cruz
kaibahan nya, tanganing an hawak na parakasala matunaw asin
dai maging oripon nin kasalan. An gadan dai na nagkakasala. Kun
kita nagadan sa kaibahan ni Cristo, kita minatubod na kita
mabubuhay sa kaibahan nya. Aram nyato na si Cristo binuhay-
liwat sa mga gadan asin dai na sagkod pa man magagadan: an
kagadanan dai na nin kapangyarihan sa saiya.

Tataramon nin Kagurangnan.

Banw: Salamat sa Dios.

Padi: An Kagurangnan mapa-saindo.
Banw: Asin sa saimong espiritu.
Padi: Pagbasa kan banal na Evangelio sosog ki San Mateo.
Banw: Kamurawayan saimo, Kagurangnan.

Kan mahiling ni Jesus an katawohan tuminukad sya sa bukid.

Nagtukaw sya duman asin dinolok kan saiyang mga disipulo.
Dangan nagpoon sya pagtaram: ini an mga sinabi nya:
“Paladan an mga dukha sa Espiritu,
huli ta sa sainda an kahadean nin langit.
Paladan an mga maboot,
huli ta mapapasainda an daga.
Paladan an mga nagtatangis,
huli ta sinda rarangahon.
Paladan an mga nagugutom asin napapaha sa katanosan,
huli ta sinda pakababasogon.
Paladan an mga maheherakon,
huli ta sinda maheherakan.
Paladan an mga malinig an puso,
huli ta sinda makakahihing sa Dios.
Paladan an mga parapatoninong,
huli ta sinda aapodon na mga aki nin Dios.
Paladan an mga pinapasakitan dahil sa katanosan,
huli ta sainda an kahadean nin langit.
Paladan kamo, kun dahil sako kamo pagrawayan,
pasakitan asin pakaraoton nin mga tawo:
Ipag-ogma nindo, huli ta dakulaon an balos saindo
duman sa langit.

Padi: Marahay na Bareta kan Kagurangnan.

Banw: Pag-omaw saimo, Cristo.

PAMIBI NIN BANWAAN

Padi: Mga tugang, mamibi kita sa Dios Amang makakamhan na

nagbuhay liwat ki Cristo sa mga gadan. Hagadon ta Saiya
na iligtas niya an saiyang banwaan huli ki Cristo, an
kaligtasan nin mga buhay asin mga gadan.

Banw: KAGURANGNAN, HINANYOGA AN SAMONG PAMIBI.

Lector: Si +Gil tinawan mo nin banhi nin buhay na daing kasagkoran kan
siya binonyagan. Itao mo saiya an grasya na makaayon sa mga
santos sa langit sagkod pa man. Ipamibi nyato sa Kagurangnan.

Lector: Si +Gil nagkakan kan Hawak ni Cristo, tinapay nin buhay na

daing kasagkoran. Siya bubuhayon mo sa huring aldaw. Ipamibi
nyato sa Kagurangnan.

Lector: An satong mga tugang, mga kadugo asin mga katood. Tanganing
balsan sinda nin Dios huli sa mga karahayan na saindang
naginibo. Ipamibi nyato sa Kagurangnan.

Lector: An gabos na mga nagadan sa paglaom na sinda mabubuhay-liwat.

Tanganing akoon sinda nin Dios sa liwanag nin Saiyang
kamurawayan. Ipamibi nyato sa Kagurangnan.

Lector: Tangani na kita gabos na uya digdi, pano nin pagtubod asin
paglaom, tiponon nin Dios sa kahadean nin Saiyang
kamurawayan. Ipamibi nyato sa Kagurangnan.

Padi: Kaguranganan, hinanyoga an samong pamibi para sa mga

tugang nyamong gadan orog nang gayo si +Gil. Patawada
an saindang mga kasalan asin daraha sinda sa liwanag nin
Saimong kamurawayan. Huli ki Cristo na samong
Kagurangnan.

Banw: Amen.
 Liturgia kan Eucaristia
Padi: Inoomaw ka, Kagurangnan, Dios nin gabos na linalang,
huli ta sa saimong pagkamatinao nag-ako kami nin tinapay,
na idinodolot mi saimo,
bunga kan daga asin kan gibo kan mga kamot nin mga tawo:
ini magigin para samo tinapay nin buhay.

Banw: Pag-omawon an Dios sagkod pa man.

Padi: Huli sa misterio kaining tubig asin arak

magi man lugod kaming kahiras sa pagka-Dios niya,
na nagpakumbabang magin kahiras sa samong pagka-tawo.

Inoomaw ka, Kagurangnan, Dios nin gabos na linalang,

huli ta sa saimong pagkamatinao nag-ako kami nin arak,
na idinodolot mi saimo,
bunga kan balagon asin kan gibo kan mga kamot nin mga
tawo: ini magigin para samo inomon nin kalag.

Banw: Pag-omawon an Dios sagkod pa man.

Padi: Sa kapakumbabaan asin pagsolsol

maako mo man lugod kami, Kagurangnan;
asin lugod an samuyang atang sa atubang mo ngonian,
maoyonan mo, Kagurangnan na Dios.

Hugasi ako, Kagurangnan, sa sakuyang karatan,

asin linigi ako sa sakuyang kasâlan.

Padi: Magpamibi kamo, mga tugang:

tanganing an sako asin an saindong atang
maako man lugod kan Dios Amang makakamhan.

Banw: Akoon man lugod kan Kagurangnan an atang sa saimong mga

kamot para sa kaomawan asin kamurawayan kan saiyang
ngaran, para man sa pakinabang niato asin kan bilog niyang
banal na Simbahan.
PAMIBI SA PAGDOLOT

Padi: Kagurangnan,
kaheraki an kalag nin saimong sorogoon
na si + Gil.
Para saiya samong dinodolot
ining sakripisyo nin pag-omaw.
Ipinakikimaherak nyamo Saimo
na itao mo saiya an kapahingaloan
huli kaining atang na samong idinodolot
sa kabayaran nin kasalan.
Huli ki Cristo na samong Kagurangnan.

Banw: Amen.
 PREFACIO I SA MGA GADAN
P. An Kagurangnan mapa-saindo.
S. Asin sa saimong espiritu.

P. Iitaas an mga puso.

S. Initaas mi na sa Kagurangnan.

P. Magpasalamat kita sa Kagurangnan satuyang Dios.

S. Maninigo asin dapat.

Totoong maninigo asin dapat, matanos asin nakakaligtas,

na danay asin minsan saen magpasalamat kami saimo:
Kagurangnan, banal na Ama,
Dios na makakamhan na daing kasagkoran
huli ki Cristo na samong Kagurangnan:

Sa saiya nagtingraw samo an paglaom

nin paladan na pagkabuhay-liwat
tanganing, an mga napapamundo huli ta nanggad magagadan,
maranga kan panuga kan maabot
na buhay na daing kasagkoran.
Ta sa mga maimbod saimo Kagurangnan
an buhay sinasanglean, dai pinapara,
asin pagkatunaw kaining eerokan sa daga,
naaandam an harong na daing kasagkoran sa kalangitan.

Kaya kaiba kan mga Angeles asin Arcangeles,

kaiba kan mga Tronos asin Dominaciones,
asin kaiba kan gabos na langitnon na hukbo,
nag-aawit kami kan himno kan saimong kamurawayan,
daing tapos na nagsasabi:

Banal, banal, banal …

Padi: Kagurangnan, ika nanggad an Banal, burabod nin gabos
na kabanalan.

Kaya ining mga atang, namimibi kami,

pabanala kan ambon kan saimong Espiritu,
tanganing para samo magin Hawak asin † Dugo
kan samong Kagurangnan na si Jesu-Cristo.

Siya, na sa rogaring na boot nagpaubaya sa Pasion,

nagkua nin tinapay, asin pagpasalamat, binaak ini,
asin itinao sa saiyang mga disipulos, na an sabi:

MAG-AKO KAMO GABOS ASIN MAGKAKAN KAINI:

TA INI AN SAKUYANG HAWAK,
NA IDODOLOT PARA SA SAINDO.
Siring man, pakapamanggi,
pagkua man niya kan caliz, asin giraray pagpasalamat saimo,
itinao sa saiyang mga disipulos, na an sabi:

MAG-AKO KAMO GABOS ASIN MAG-INOM KAINI:

TA INI AN CALIZ KAN SAKUYANG DUGO
KAN BÂGO ASIN DANAY NA TIPAN,
NA PAPABOLOSON PARA SAINDO
ASIN PARA SA DAKUL
SA PAGPATAWAD KAN MGA KASALAN.
INI PAGGIBOHON NINDO SA PAGROMDOM SAKO.

Misterio kan pagtubod.

Banw: An pagkagadan mo, Kagurangnan, ipinamareta niamo,

an pagkabuhay mo liwat ipinapahayag,
sagkod na ika magdatong.
Padi: Kaya kami nagroromdom
kan saiyang pagkagadan asin pagkabuhay-liwat,
nagdodolot saimo, Kagurangnan,
kan tinapay nin buhay asin caliz nin kaligtasan,
nagpapasalamat ta pinapagkanigo mo
na mag-atubang asin maglingkod saimo.

Asin nakikimaherak kaming nag-aarang,

na kaming nagpapakinabang kan Hawak asin Dugo ni Cristo
pagsararoon kan Espiritu Santo.

Giromdoma, Kagurangnan,
an saimong Simbahan na nakalakop sa bilog na kinaban,
tanganing malubos mo siya sa pagkamoot
kaiba kan samong Papa si Francisco
asin kan samong Obispo, si Joel asin kan gabos na clero.

Giromdoma an saimong sorogoon, si +Gil

na inapod mo saimo hale sa kinaban na ini.
Itugot mo, na an katubò sa pag-arog
sa kagadanan kan saimong Aki,
makisumaro sa saiya man sanang pagkabuhay liwat.

Siring man giromdoma sa saimong pagkaherak,

an samong mga tugang na nagturog sa paglaom
kan pagkabuhay-liwat,
asin an gabos na mga gadan,
dangan akoa sinda sa liwanag kan saimong lalawgon.
Kaheraki kami gabos, namimibi kami,
tanganing kaiba ni Santa Maria, Virgin na Ina kan Dios, si
San Jose, mga banal na Apostoles asin gabos na Santos
na kaidto pa nakapagaya-gaya saimo,
magkanigong magin kahiras kan buhay ba daing
kasagkoran, mag-omaw asin magpamuraway saimo siring
man. Huli sa Aki mong si Jesu-Cristo.
Padi: Huli saiya, asin sa kaiba niya, asin sa saiya,
saimo Dios Amang makakamhan
sa pagksararô kan Espiritu Santo,
an gabos na kagalangan asin kamurawayan,
sa gabos na kapanahonan kan mga panahon.

Banw: Amen.

RITO SA PAGCOMUNION

Padi: Natukdoan kan mga nakakaligtas na tugon,

asin pinatood kan diosnon na kaugalian,
nangangahas kitang magsabi:

Ama niamo, na yaon sa langit:

pabanalon an ngaran mo;
magdatong an kahadean mo;
mangyari an boot mo sa daga nin siring sa langit.
An samong kakanon sa aroaldaw itao mo samuya ngonian,
asin patawadon mo kami sa samong mga kasâlan,
siring na pinapatawad niamo an mga nagkakasâla samuya;
asin hare kami pagdaraha sa sugot;
kundi agawa kami sa maraot.

Padi: Agawa kami sa gabos na maraot,

namimibi kami Kagurangnan;
warasan sa mga aldaw niamo an katoninongan,
tanganing kaming natabangan kan saimong pagkaherak
magin danay na talingkas sa kasâlan
asin man ligtas sa gabos na kapurisawan:
mantang kami naghahalat kan maogmang paglaom
asin pagdatong kan samong Paraligtas na si Jesu-Cristo.

Banw: Huli ta saimo an kahadean,

asin an kapangyarihan, siring man an kamurawayan
sa mga kapanahonan.
Padi: Jesu-Cristong Kagurangnan,
ika na nagsabi sa saimong mga Apostoles:
Katoninongan iwinawalat ko saindo,
an sakong katoninongan itinatao ko saindo:
hare paghilinga an samong mga kasalân,
kundi an pagtubod kan saimong Simbahan;
asin papagkanigoa na siya mapatoninong asin
magkaboronyog sosog sa saimong kabotan.
Ika na nabubuhay asin naghahade sa kapanahonan
kan mga panahon.
Banw: Amen.
Padi: An katoninongan kan Kagurangnan danay na mapa-saindo.
Banw: Asin sa saimong espiritu.
Padi: Magpatinaraohan kamo nin katoninongan.
Ining pagsalak kan Hawak asin Dugo
kan Kagurangnan niatong si Jesu-Cristo
magdara sato na mga nag-aako kaini
sa buhay na daing kasagkoran.
Cordero kan Dios, na nagpapara kan mga kasâlan kan
kinaban: kaheraki kami.
Cordero kan Dios, na nagpapara kan mga kasâlan kan
kinaban: kaheraki kami.
Cordero kan Dios, na nagpapara kan mga kasâlan kan
kinaban: tawi kami nin katoninongan.
An pag-ako kan saimong Hawak asin Dugo,
Jesu-Cristong Kagurangnan,
dai man lugod magin hukom asin padusa sako:
kundi huli kan saimong pagkaherak,
magin kalasag ko sa isip asin hawak,
asin bulong na nakakapa-omay.
Padi: Uya an Cordero kan Dios, uya an nagpapara
 kan mga kasâlan kan kinaban.
Paladan an mga inapod sa pamanggi kan Cordero.

Banw: Kagurangnan, bako akong maninigo

na ika magdagos sa sakuyang harong:
algad magtaram ka sana, asin an sakong kalag maoomayan.
Atamanon man lugod ako kan Hawak ni Cristo
sagkod sa buhay na daing kasagkoran.
Atamanon man lugod ako kan Dugo ni Cristo
sagkod sa buhay na daing kasagkoran.
Padi: An Hawak ni Cristo.
Banw: Amen.
An inako kan samong ngoso, Kagurangnan,
mapakinabangan man lugod niamo sa malinig na kalag,
asin ining inako niamo digdi sa kinaban
magi ming bulong na daing kasagkoran.
PAMIBI PAKA-COMUNION
Padi: Mamibi kita...

O Dios na makakamhan,
an atang na ini makalinig logod kan kalag
nin Saimong sorogoon na si +Gil,
na ngonyan tuminalikod na sa buhay na ini
sa pagsunod sa Saimong pag-apod.
Patawada an saiyang mga kasalan
asin daraha siya sa kapahingaloan na daing kasagkoran
sa liwanag nin Saimong kamurawayan.
Huli ki Cristo na samong Kagurangnan.
Banw: Amen.
Paka pamibi paka communion, ang celebrante mapasiring sa atubang kan altar. Duman
gigibohon ang rito nin paghumale hanggan sa huring bendicion.
PAGPAHUMALE
Padi: Sa ngaran asin sa katoninongan ni Cristo satuyang ihahatod sa
lolobngan an bangkay kan satong tugang na si +Gil. Kita may
pagtubod asin paglaom sa buhay na daing kasagkoran. Ipamibi
nyato siya sa satuyang Dios na maheherakon. Siya nagin aki nin
Dios huli sa Bonyag. Siya nag-ako kan tinapay nin buhay sa
lamesa nin Kagurangnan. Akoon man logod siya nin
Kagurangnan sa lamesa kan mga aki nin Dios duman sa langit.
Sa kaibahan nin gabos na mga santos, mapasaiya logod an
panuga na iyo an buhay na daing kasagkoran. Hagadon nyato sa
Kagurangnan na kitang mga nawawalat, kitang mga
nagmumundo magkatiripon giraray sa kaibahan nin satuyang
tugang duman sa kamurawayan.

AWIT NIN PAGPAHUMALE

Padi: Mga santos nin Dios, madya kamo sa pagtabang saiya!

Mga angheles nin Kagurangnan, magsabat kamo saiya!

Banw: An saiyang kalag daraha asin idolot nindo sa Kagurangnan.

Padi: Ibanhan ka logod ni Cristo na nag-apod saimo.

Ibanhan ka kan mga angheles sa kataed ni Abraham.

Banw: An saiyang kalag daraha asin idolot nindo sa Kagurangnan.

Padi: Kagurangnan, mapasaiya an kapahingaloan na daing

kasagkoran sa bangraw nin Saimong liwanag.

Banw: An saiyang kalag daraha asin idolot nindo sa Kagurangnan.

Ang celebrante madolok ki Gil (+) makaag nin inceinso isusunod ang pagwirik nin agua bendita
dangan maincienso.

RESPONSORIO
Padi: Aram ko na an sakong kagtubos buhay asin sa huring aldaw ako
mabubuhay-liwat; sa sakong hawak mahihiling ko an sakong
kagtubos.
Banw: Sa sakong hawak mahihiling ko an sakong kagtubos.
Padi: Mahihiling ko siya, mahihiling kan sakong mga mata.
Banw: Sa sakong hawak mahihiling ko an sakong kagtubos.
Padi: Ini an paglaom na rinirimpos ko sa sakong puso.
Banw: Sa sakong hawak mahihiling ko an sakong kagtubos.
Padi: Aram ko na an sakong kagtubos buhay asin sa huring aldaw ako
mabubuhay-liwat; sa sakong hawak mahihiling ko an sakong
kagtubos.

HURING PAMIBI
Padi: Kagurangnan, pinabulos mo an saimong dugo huli ki +Gil;
mapasaiya an kapahingaloan na daing kasagkoran.
Banw: Sa liwanag nin saimong kamurawayan.
Padi: Bago siya namundag, midbid mo na siya, Kagurangnan, asin
siya linalang mo na kabaing saimo; mapasaiya an
kapahingaloan na daing kasagkoran.
Banw: Sa liwanag nin saimong kamurawayan.
Padi: Pinagsolsolan niya an kasalan na saiyang naginibo laban saimo;
mapasaiya an kapahingaloan na daing kasagkoran.
Banw: Sa liwanag nin saimong kamurawayan.
Padi: Sa saimo, Kagurangnan, ibinalik niya an saiyang
kalag;mapasaiya an kapahingaloan na daing kasagkoran.
Banw: Sa liwanag nin saimong kamurawayan.
Padi: Siya itinalaan mo na mabubuhay-liwat asin makakahiling
saimo, saiyang Dios asin Kagtubos; mapasaiya an
kapahingaloan na daing kasagkoran.
Banw: Sa liwanag nin saimong kamurawayan.
Padi: Mamibi kita…
Maugayon na Ama, sa Saimong kamot idinodolot mi an kalag
nin samuyang tugang na si +Gil. Bilog an samuyang pagsarig na
siya mabubuhay-liwat sa huring aldaw kaiba an gabos na mga
nagadan sa grasya asin pagkamoot ni Cristo. Nagpapasalamat
kami Saimo huli kan gabos na mga karahayan na itinao mo sa
Saimong sorogoon mantang nabubuhay pa siya digdi sa ibabaw
nin daga. Kagurangnan, kaheraking akoa an samong pamibi na
an mga pintoan nin paraiso mabuksan para sa Saimong
sorogoon. Ikinakaranga nyamo an pagtubod asin paglaom sa
Saimong pagkaherak sagkod na kami makaayon sa kahadean
mo kaiba nin samuyang tugang sa panahon na daing
kasagkoran. Huli ki Cristo na samong Kagurangnan.
Banw: Amen.
Padi: Kagurangnan, mapasaiya an kapahingaloan na daing
kasagkoran.
Banw: Sa liwanag nin Saimong kamurawayan.
BENDISYON
Padi: An Kagurangnan mapasaindo.
Banw: Asin sa saimong espiritu.
Padi: Bendisyonan kamo kan Dios na Makakamhan, Ama, asin Aki,
asin Espiritu Santo.
Banw: Amen.
Padi: Lakaw kamo sa katoninongan.
Banw: Salamat sa Dios.
Ang pamilya ni +Gil hahaleon ang telang puti, krus asin bibliya, dangan mawirik nin agua bendita.