AN SANTA MISA

PARA SA CELEBRASYON KAN

Dios Marhay na ____________ saindo gabos mga tugang ki Jesus Nazareno!

Ngonian ipinagcecelebrar ta an ika-trenta y dos na taon kan Kafiestahan ni

Amang Nazareno, digdi sa satuyang Arkidiyosesis.

An Tema ta po sa taong ini iyo an: “DAI KAMO MATAKOT, SI HESUS INI”

Nin huli sa nagdadakol na deboto kan Itom na Nazareno sa Manila dinara

an debosyon sa Itom na Nazareno digdi sa satuyag ciudad Trenta y dos ng
taon na ang nakakaagi asin an satuyang celebracion digdi sa Ciudad nin
Naga, Camarines Sur, pigbibisto kan Basilica Minore kan Itom na Nazareno
sa Quiapo, Manila. Kita gabos namomoot sa magayon na simbolo kan
imahen kan Itom na Nazareno, minsan kita nadapla sa kasakitan asin
kasalan, matindog kita giraray kaiba kan satuyang Kagurangnan, an Jesus
Nazareno.

An pagpapakumbaba ni Jesus, bilang sarong Dios, kan inako niya an

matagom na Kruz nagpapasabot na Siya bakong harayo satuya asin siya
kaiba ta na nagsasakit asin iiba man kita Niya sa kamurawayan.

An satuyang celebrante ngunian sa misang ini iyo si Reverendo

Padre___________, __________ kan ___________. Matindog po an gabos asin
mamuraway niatong pag-awiton an awit sa pagpoon.

Awit
RITO SA PAGPOON:

PADI: Sa ngáran kan  Amâ, asín kan Ákì,

asín kan Espíritu Sánto.

Banwaan: Amen.

PADI: An gracia ni Jesu Cristong Kagurangnan ta,

an pagkamoot kan Dios, asin an pakisumaro kan
Espiritu Santo mapasaindo gabos.

Banwaan: Asin sa saimong espiritu.

o an masunod na formulario

PADI: An Kagurangnan mapa-saindo.

Banwaan: Asin sa saimong espiritu.

Gawe nin Pagsolsol

PADI: Mga túgang,

akóon ta an satóng mga kasâlan,
tangáning magkánigò
kitáng magcelebrár
kan mga banál na mistéryo.
Gabos: Nagkúkumpisál ako sa Dios na makákamhan,
asín saindó, mga túgang,
ta nagkasálà ako nin makúrì
sa ísip, sa tatarámon, sa gíbo,
asín sa kapábayaán:

asin tinotombok an daghan, sinda nagsasabi:

sálà ko, sálà ko, makúring sálà ko.

Dangan sinda minapadagos:

Kayâ nangángadyì ako ki Santa Maria,

dánay na Vírgen,
sa gabós na Ángeles asin Sántos,
asín saindó, mga túgang,
na ako ipamîbì sa Kagurangnán tang Dios.

PADI: Mahérak man lugód satô

an Dios na makákamhán asin,
pakapatawáda an satóng mga kasâlan,
darahón kita sa búhay
na daíng kasagkóran.

Banwaan: Amen.
Kyrie

PADI: Kagurangnán, mahérak ka.

Banwaan: Kagurangnan, maherak ka.

PADI: Crísto, mahérak ka.

Banwaan: Cristo, maherak ka.

PADI: Kagurangnán, mahérak ka.

Banwaan: Kagurangnan, maherak ka.

Gloria

Kamurawáyan sa Dios sa kaitaásan

asin sa dagâ katoninóngan
sa mga táwong maraháy an boót.

Inoómaw mi iká, rinórokyáw mi iká,

sinásambá mi iká, pinápamuráway mi iká.
Pinápasalamátan mi iká
huli kan dakúlà mong kamurawáyan,
Kagurangnán na Dios, Hádeng langitnón,
Dios Amáng makákamhán.
Kagurangnán Áking Bogtóng, Jesu Crísto,
Kagurangnán na Dios, Cordéro kan Dios,
Áki kan Amâ,
 iká na nagpapárà kan mga kasâlan kan kinâban,kaheráki
kamí;
iká na nagpapárà kan mga kasâlan kan kinâban, akóa an
samóng pakimahérak.
Iká na nagtutúkaw sa toó kan Amâ,
kaheráki kami.

Ta iká saná an Banál, iká saná an Kagurangnán,

iká saná an Oróg Kahalangkáw,
Jesu-Crísto, kaibá kan Espíritu Sánto:
sa kamurawáyan kan Dios Amâ. Amén.

COLECTA

PADI: Mamibi kita…

Dios na samuyang Ama, sa pagkoyog sa

Saimong kabotan inako nin saimong bugtong
na Aki an kagadanan duman sa Cruz tanganing
iligtas an katawohan, namimidbid niamo an
misterio kan Cruz digdi sa kinaban. Maako mi
lugod an balaog nin kaligtasan duman sa
langit.

Ini inahagad mi hui ki Jesukristo na samong

Kagurangnan, na nabubuhay asin naghahade
kaiba mo asin nin Espiritu Santo, sarong Dios
sa panahon na daing kasagkoran.

Banwaan: Amen.
LITURHIYA KAN TATARAMON

Enot na Babasahon Numero 21:4-9

Pagbasa sa Libro nin mga Numero

Hale sa bukid nin Hor, naglakaw an mga Israelita pasiring sa Dagat

na Pula, tanganing mag-agi sa palibot kan daga nin Edom. Alagad sa dalan,
nawaraan nin pasencia an mga tawo asin nagtataram sinda tumang sa Dios
saka ki Moises. Naggurumod-gumod sinda, “Tadaw ta ilinuwas mo kami
sa Egipto taganing magadan sa desiertong ini na mayo ning pagkakan asin
tubig? Nauuyam na kami sa mayong halagang pagkakan na ini!” Huli kaini,
nagpadara an Kagurangan nin mga mararang halas asin siningot kan mga
ini an mga tawo kaya dakul sa sainda an nagadan. Nagduman an mga tawo
ki Moises asin nagsabi, “Nagkasala kami kan magtaram kami tumang sa
Kagurangnan asin saimo. Mamibi ka saiya na haleon an mga halas na ini,”
Kaya namibi si Moises para sa mga tawo. Tinaraman nin Kagurangnan si
Moises, “Gumibo ka nin sarong halas na bronse asin ibugtak mo sa sarong
palo; an lambang masingot na humiling kaiyan, mauumayan.” Kaya
naggibo si Moises nin sarong halas na bronse asin ibinugtak sa sarong palo.
An siisay man na nasingot minahiling sa halas na bronse asin nauumayan.

Tataramon kan Kagurangnan

Banwaan: Salamat sa Dios

Salmo Responsorio Salmo 78:1-2,34-35,36-37,38

Simbag: Dai paglingawan an mga gibo nin Kagurangnan.

1. Banwaan ko, dangoga an sakong katukdoan, asin hinanyoga an

sakong itataram. Bubuksan ko an sakong ngoso sa parabola,
asin ipapahayag ko an mga suanoy na kasabihan.

2. Kan gadanon niya an nagkapira sainda, nagbalik saiya an mga

natadang buhay; nagbakle asin tudok sa puso an namibi saiya.
Nagiromdoman ninda na an Dios iyo an saindang parasurog,
na an Kahorohalangkaweng Dios iyo an saindang kagtubos.

3. Alagad gabos kaputikan an saindang sinabi ; an saindang

itinaram bakong tudok sa boot. An saindang puso bakong
dayupot sa saiya ; bako sindang maimbod sa saiyang tipan.

4. Alagad maheherakon an Dios sa saiyang banwaan. Pinatawad

niya an saindang kasalan asin dai niya sinda ginadan. Dakul na
beses niyang pinugolan an saiyang kaanggotan, asin dai niya
pinukaw an saiyang labi-labing kaanggotan.
IkaduwangBabasahon ` Filipos 2:6-11

Pagbasa sa Surat ni San Pablo sa mga taga-Filipos

Danay na nasa saiya an pagkani-Dios, alagad dai siya nagdayupot na

pantayan an Dios, kundi nagpakadai siya sa sadiri, inako an kamugtakan
nin sarong oripon, ipinangaki siring sa tawo. Kan siya nagin tawo,
nagpakumbaba siya asin nagmakinuyog-kuyog sagkod sa kagadanan,
sagkod sa kagadanan nin cruz. Huli kaini, initaas siya nin Dios dangan
tinawan nin ngaran na orog sa gabos na ngaran. Kaya sa ngaran ni Jesus,
maluhod an gabos sa langit, sa daga saka sa irarom kan daga, tanganing an
gabos magpahayag na si Jesucristo iyo an Kagurangnan, sa kamurawayan
nin Dios Ama.

Tataramon kan Kagurangnan.

Banwaan: Salamat sa Dios

Banwaan: Matindog an gabos sa pagrokyaw kan Evangelio.

Evangelio Juan 3 :13-17

+ Pagbasa kan Evangelio na Sinurat ni San Juan

Mayo pa nin nakasakat sa langit kundi an Aki nin Tawo na naghilig

hale sa langit. Siring na initaas ni Moises an bronseng halas sa sarong
palo duman sa kalangtadan, siring man kaipohan na iitaas an Aki nin
Tawo, tanganing an siisay man na magtubod saiya magkamit nin buhay
na daing kataposan. Huli ta namoot na gayo an Dios sa kinaban kaya
itinao niya an saiyang bogtong na Aki, tanganing an siisay man na
magtubod saiya dai magadan kundi magkamit nin buhay na daing
kataposan. Huli ta dai sinugo nin Dios sa kinaban an saiyang Aki
tanganing hukoman an kinaban, kundi tanganing ikaligtas ini sa paagi
niya.

An Marahay na Bareta nin satong Kagurangnan.

Homilia

Pamibi nin Banwaan

Padi: MAMIBI KITA SA DIOS AMA, PANO NIN PAGSARIG, HULI TA

SIYA UROG NA NAMOMOOT SA SATO .SA LAMBANG
KAHAGADAN AN SATUYANG SABIHON:

JESUS NAZARENO, KAHERAKI KAMI.

1. Para sa satuyang Santo Papa, gabos na mga Obispo, kapadian, diakono, asin mga
religioso, tanganing sa tahaw kan mga pagsakit asin kadificilan sa pagataman kan
kahalagahan kan buhay asin Familia, mapakusog asin padagos na manindogan
sa katotoohan. Ipamibi niato sa Kagurangnan.

2. Para sa gabos na namamayo kan satuyang banwaan, local asin nacional, tanganing
magin dayupot sa pag-ataman asin pagpapahalaga sa buhay nin katawohan asin
papagdanayon an justicia asin katoninongan. Ipamibi niato sa Kagurangnan.

3. Para sagabos na Familia, tanganing mag-danay na sararo sa tabang asin

pagkamoot nin Dios. Ipamibi niato sa Kagurangnan.

4. Para sa gabos na mga magurang; an mga mag-aragom padagos na magin dayupot

sa lambang saro asin padakulaon an saindang mga aki sa pagkamoot asin
pagkamaimbod sa mahal na Dios. Ipamibi niato sa Kagurangnan.

5. Para sa gabos na idtoon na sa ikaduwang buhay, an satuyang mga ka-pamilya asin

mga katood asin an gabos na mga gadan, tanganing magkatiripon liwat sa harong
na nakatagama sainda sa langit. Ipamibi niato sa Kagurangnan.

Padi: JESUS NAZARENO, SAMONG KAGURANGNAN, AN

SAMUYANG MGA PUSO NAGSUSUPAY NIN KAOGMAHAN
SA SAIMONG KADAKULAAN. BENDICIONI KAMI NIN
TUNAY NA PAGROKYAW SA PAG-AKO MI KAN MGA
BIYAYA NA IKA SANA AN MAKAKATAO. HINAHAGAD MI
INI HULI KI CRISTO NA SAMUYANG KAGURANGNAN.
Banwaan: Amen.
LITURHIYA KAN EUCHARISTIA
Pinoponan an awit sa ofertorio. Tamang gayo kun an mga tawo makapagpahiling kan saindang pakisumaro sa
pagdolot kan atang, o dinadara sa atubang an hostia asin arak para sa celebracion kan Eucharistia, o iba pang mga
atang na makakatabang sa mga pangangaipo kan Simbahan o kan mga dukha

Pagdolot

PADI: Inoómaw ka, Kagurangnán,

Diós nin gabós na linaláng,
húli ta sa saímong pagká-matináo
nag-ákò kamí nin tinápay,
na idinodólot mi saímo,
búnga kan dagâ asín kan gíbo
kan mga kamót nin mga táwo:
iní magígin pára samô
tinápay nin búhay.

Banwaan: Pag-omawon an Dios sagkod pa man.

PADI: Inoómaw ka, Kagurangnán,

Diós nin gabós na linaláng,
húli kan saímong pagká-matináo
nag-áko kamí nin árak,
na idinodólot mi saímo,
búnga kan balágon asín kan gíbo
kan mga kamót nin mga táwo,
iní magígin pára samô
inómon nin kalág.

Banwaan: Pag-omawon an Dios sagkod pa man.

PADI: Magpamîbì kamó, mga túgang:
tangáning an sakô
asin an saindóng átang
maákò man lugód
kan Dios Amáng makákamhán.

Banwaan: Akoon man lugod kan Kagurangnan

an atang sa saimong mga kamot
para sa kaomawan asin kamurawayan kan saiyang
ngaran, para man sa pakinabang niato asin kan bilog
niyang banal na Simbahan.

Pamibi sa mga Dolot

PADI: Kagurangnan, lugod an sacrificio na an

inatang duman sa Cruz na nakapara an
kasalan nin kinaban, ngonian makaligtas
man samo sa samong mga kasalan.
Hinahagad mi ini huli ki Cristo na samong
Kagurangnan.

Banwaan: Amen
PREFACIO
PADI: An Kagurangnán mápa-saindó.

Banwaan: Asin sa saimong espiritu.

PADI: Iitáas an mga púsò.

Banwaan: Initaas mi na sa Kagurangnan.

PADI: Magpasalámat kitá sa Kagurangnán

satúyang Dios.

Banwaan: Maninigo asin dapat.

Mahal na Cruz

PADI: Totoong maninigo asin dapat,

matanos asin nakakaligtas,
na danay asin minsan saen
magpasalamat kami saimo:
Kagurangnan, banal na Ama,
Dios na makakamhan
na daing kasagkoran:

Binoot mo na an tawo makaligtas

Huli sa kahoy nin banal na cruz.
An kahoy kan kapadaogan nin tawo
nagin kahoy nin saiyang kapangganahan.
Kun saen an buhay nawara,
Duman man nagka-igwa nin buhay
Huli ki Cristo na samong Kagurangnan.
 Kaya an hukbo nin mga Angeles
nagsasamba kan saimong kamahalan,
nag-oogma sa atubang mo sangkod pa man.

Nag-aarang kami na ipagboot mo

na makasanong sainda
an samong mga tingog
sa kaogmahan nin mga magkairiba
na nagsasabi:

Sanctus: Banál, banál an Kagurangnan

Dios nin mga Hukbô.
An langit asin daga
pano kan Saimong kamurawayan.
Hosánna sa kaitaasan.
Paladan an minadigdi
sa ngaran kan Kagurangnan.
Hosánna sa kaitaasan.
PAMIBI SA EUCARISTIA II

Kagurangnán, iká nanggád an Banál,

burábod nin gabós na kabanálan.

Benebendito an mga kamot, dangan laob an mga ini sa

ibabaw kan mga atang, siya nagsasabi:

Kayâ iníng mga átang, namímîbì kamí,

pabanalá kan ambón kan saimong Espíritu,

benebendito an mga kamot asin durongan na benebendicionan an

hostia asin caliz na nagsasabi:

tangáning pára samô

magín Háwak asín Dugô
kan samóng Kagurangnán na si Jesu Crísto.

Benebendito an mga kamot.

Sa mga minasunod na formula, an mga tataramon nin Kagurangnan

sinasabing malinaw asin sayod, sosog sa hinahagad kan siring na mga
tataramon.
 Kan siyá, sa rogáring niyáng boót
pinasaluiban sagkod sa Pasión,

kinukua an tinapay, asin iniitaas nin kadikit sa ibabaw kan altar, asin
nagpapadagos:

nagkuá siya nin tinápay, asin pagpasalámat,

bináak iní,asín itinaó sa saíyang mga disípulos, na
an sábi:

minaduko nin kadikit

An sagradong hostia ibinabayaw sa banwaan, ibinabalik sa

patena, asin an padi, nakaiuhod an sarong tuhod, nagsasamba... Pakatapos
an padi nagpapadagos.

Síring man, pakápamanggí,

kinukua an caliz, iniitaas nin kadikit sa ibabaw kan altar,

nagpapadagos:

pagkuá niyá man nin cáliz,

asín giráray pagpasalámat saímo,
itinaó sa saíyang mga disípulos,
na an sábi:
 minaduko nin kadikit

PADI: Mistério kan pagtubód.

Gabos: An págkagadán mo, Kagurangnán,

ipínapamaréta niámò,
an pagkabuhay mo liwat ipinapahayag,
sagkod na ika magdatong.
Dangan nakabuka an mga takyag, an padi nagsasabi:

Kayâ kami na nagróromdóm

kan saíyang pagkagadán
asín pagkabúhay-liwát,
nagdodólot saímo, Kagurangnán,
kan tinápay nin búhay
asín cáliz nin kaligtásan,
nagpápasalámat ta pinápagkánigò mo
na mag-atúbang asín maglingkód saímo.

Asín nakíkimahérak kamíng nag-áarang,

na kamíng nagpápa-kinábang
kan Háwak asin Dugô ni Crísto
págsararoón kan Espíritu Sánto.

Concelebrante 1:

Giromdomá, Kagurangnán,
an saímong Simbáhan
na nakalakóp sa bílog na kinâban,
tangáning malubós mo siyá sa pagkámoot
kaibá kan samóng Pápa si Francisco
asín kan samóng Obíspo, si Rolando
asín kan gabós na cléro.
Concelebrante 2:
Síring mán giromdomá sa saímong pagkahérak, an
samóng mga túgang na nagtúrog sa pagláom kan
pagkabúhay-liwát, asín an gabós na mga gadán,
dángan akóa sindá sa liwánag
kan saímong lalawgón.
Kaheráki kamí gabós, namímìbì kamí,
tangáning kaibá ni Sánta María,
Vírgen na Inâ kan Diós,
kan mga banál na Apóstoles
asín gabós na Sántos
na kaidtó pa nakápagayá-gáya saímo,
magkánigong mágin kahirás
kan búhay na daíng kasagkóran,
mag-ómaw asín magpamuráway saímo
síring man
benebendito an mga kamot

húli sa Áki mong, si Jesu Crísto.

PADI: Húli saíya, asín kaibá niyá, asín sa saíya,

saímo Dios Amáng makákamhán sa
pagkásarô kan Espíritu Sánto, an gabós na
kagalángan asín kamurawáyan, sa gabós na
kapanahónan kan mga panahón.

Banwaan: Amen.
RITO SA PAGCOMUNION

AMA NIAMO

PADI: Natukdoán
kan mga nakákaligtás na túgon,
asin pinatoód
kan diosnón na kaugalián,
nangangáhas kitáng magsábi:

Gabos: Amâ niámò, na yáon sa lángit:

pabanalón an ngáran mo;
magdatóng an kahadéan mo;
mangyári an boót mo sa dagâ
nin síring sa lángit.

An samóng kakánon sa aróaldáw

itaó mo samúyà ngonián,
asín patawádon mo kamí
sa samóng mga kasâlan,
síring na pinápatáwad niámò
an mga nagkákasálà samúyà;
asín haré kamí pagdarahá sa sugót;
kundî agáwa kamí sa maráot.
PADI: Agáwa kamí sa gabós na maráot,
namímîbì kamí Kagurangnán;
warásan sa mga aldáw niámò
an katoninóngan,
tangáning kamíng natabángan
kan saímong pagkahérak
magín dánay na talingkás sa kasâlan
asín man ligtás
sa gabós na kapurisáwan:
mantáng kamí nagháhalat
kan maogmáng pagláom asín pagdatóng
kan samóng Paraligtás na si Jesu Crísto.

Banwaan: Huli ta saimo an kahadean, asin an kapangyarihan,

siring man an kamurawayan sa mga kapanahonan.

PADI: Jesu Crístong Kagurangnán,

iká na nagsábi sa saimong mga Apóstoles:
Katoninóngan iwinawálat ko saindó,
an sakóng katoninóngan
itinátao ko saindó:
haré paghilingá an samóng mga kasâlan,
kundî an pagtubód
kan saímong Simbáhan;
asín papag-kánigoá na siyá mapa-tonínong
asín magká-boronyóg
sósog sa saímong kabôtan.
Iká na nabubúhay asín naghahádè
sa kapanahónan kan mga panahón.
Banwaan: Amen.

PADI: An katoninóngan kan Kagurangnán

dánay na mápa-saindó.

Banwaan: Asin sa saimong espiritu.

PADI: Magpá-tinaraóhan kamó nin katoninóngan.

Sosog sa kinaugalian, an gabos nagpapahayag kan

katoninongan, pagkasararo asin pagkamoot sa lambang saro.

Gabos: Cordero kan Dios, na nagpapara kan mga kasâlan

kan kinaban: kaheraki kami.
Cordero kan Dios, na nagpapara kan mga kasâlan
kan kinaban: kaheraki kami.
Cordero kan Dios, na nagpapara kan mga kasâlan
kan kinaban: tawi kami nin katoninongan.

PADI: Úya an Cordéro kan Diós,

úya an nagpapárà
kan mga kasâlan kan kinâban.
Paládan an mga inapód
sa pamanggí kan Cordéro.

Banwaan: Kagurangnán, bako akong maninigo

na ika magdagos sa sakuyang harong:
alagad magtaram ka sana, asin an sakong kalag
maoomayan.
Antipona sa Comunion

Huli ta nahiling niya an kapakumbabaan nin saiyang oripon, poon ngonian aapodon
akong paladan kan gabos na kapag-arakian. (Lk 1 :48)

Pamibi Pakacomunion

PADI: Mamîbì kitá…

Jesucristong Kagurangnan, ika an banal na

tinapay nin buhay, darahon mo sa kamurawayan nin
saimong pagkabuhay-liwat an banwaan na saimong
tinubos Huli kan kahoy nin Cruz. Ini Samong
minamawot ngonian asin sagkod nuarin pa man.

Banwaan: Amen.
 PAMIBI KI JESUS NAZARENO
Makakamhan na Dios, itinao Mo an Saimong
bugtong na Aki sa kinaban tanganing maging
panalmingan nin pagkamoot asin kabanalan. An
saiyang pagsakit, pagkagadan asin giraray na
pagkabuhay iyo an ginikanan kan samuyang
pagtubod asin kan simbahan. An sakripisyo sa
Kalbaryo liwat ming ginigiromdom sa Eukaristiya
na Saiyang tinugdas tanganing sa paglihis nin
panahon kaming mga bagong disipulos niya igwa
nin tungkusan asin rimposon sa samuyang mga
puso. Sa paagi man lugod kaining banal na
sakramento kan Saiyang hawak asin dugo,
papagkanigoon kami na magin maimbod sa
pagtubod asin dayaday sa pagkamoot. Makasunod
lugod kami sa Saiyang dalan pa-Kalbaryo asin
makaheras sa mamurawayon na pagkabuhay-liwat.
Si Jesus Nazareno lugod an maging sentro kan
samuyang pagtubod asin panalmingan nin
Kristiyanong pagkabuhay. Amen.
BENDISYON NIN KAGAMITAN SA PAGDEBOSYON
ASIN SA PAGPAMIBI

PADI: KAGURANGNAN, IPAHILING MO SAMO AN

SAIMONG PAGKAHERAK ASIN PAGKAMOOT

Banwaan ASIN ITAO MO SAMO AN SAIMONG KALIGTASAN.

PADI: NAMOMOTAN KONG MGA TUGANG: MAMIBI KITA SA

DIOS NA MAKAKAMHAN NA MABAGO KITA ASIN

MAKABAING KI CRISTO HULI SA MAIMBOD NA
PAGGAMIT KAINING MGA TANDA ASIN TABANG SA
PAGPAMIBI.

SA SAIYANG PAGKAMOOT ASIN PAGKAHERAK, +

BENDISYONAN LOGOD NIN KAGURANGNAN ASIN
PAKABANALON INING SAINDONG MGA GAMIT SA
PAGPAMIBI ASIN PAGDEBOSYON TANGANING SA
AROALDAW NINDONG PAGKABUHAY DAI KAMO
MAKARAOT, KUNDI MAKATABANG LOGOD SA
KAPWA, SAGKOD NA MAKAMTAN NINDO AN BUHAY
NA DAING KASAGKORAN. HULI KI CRISTO, SAMONG
KAGURANGNAN.

Banwaan: AMEN.
AN PADI MAWIRIK KAN BENDITADONG TUBIG SA BANWAAN
SOLEMNENG PAGBENDICION

PADI: An Kagurangnan mapa-saindo.

Banwaan: Asin sa saimong espiritu

PADI: Iduko an mga payo sa paghagad kan

biyaya sa mahal na Dios.

PADI: Irayo kamo nin Makapangyarihang Dios sa

gabos na pag-alaman asin warasan kamo kan
mga biyaya.

Banwaan: Amen.

PADI: Itanom niya an saiyang Tataramon sa saindong

puso asin panoon kamo nin kaogmahan na daing
katapusan.

Banwaan: Amen.

PADI: Maglakaw kamo sosog sa saiyang kabotan,

nagmamangno kun ano an tama asin marahay
hanggang makaabot kamo sa kamurawayan nin
langit.

Banwaan: Amen.
PADI: Bendicionán man lugód kamó
kan Dios na makákamhán:
an Amâ, asín an Ákì,
asín  an Espíritu Sánto.

Banwaan: Amen

PADI: Lakáw kamó asín iharúbay an Evangélio.

Banwaan: Salamat sa Dios!

VIVA JESUS NAZARENO!

Huring Awit: NUESTRO PADRE JESUS NAZARENO

