NOBENA SA INMACULADA CONCEPCION

PANIMULA

N: Sa ngalan ng Ama, at ng Anak, at ng Espiritu Santo.

B: Amen.

N: Purihin si Maria, Ina ng Diyos at Ina natin,

B: Na ipinaglihing walang kasalanang mana.

PANALANGIN SA NOBENA

O Mariang Kalinis-linisan, Liryo ng Kadalisayan, ikaw ay napupuno ng grasya mula pa sa unang

sandali ng paglilihi sa iyo. Pinasasalamatan at sinasamba ko ang Kabanal banalang Santatlo sa
pagbibigay sa iyo ng mga dakilang kaloob, tulad ng paggawad sa iyo ng dakilang karangalang ito.
Naninikluhod ako sa iyong harapan at nagmamakaawang bahaginan mo ako ng iyong mga
biyaya. Sa iyo, O Pinagpalang Ina, ipinapaubaya ko ang aking sarili at hinihiling kong ipagtanggol
mo ako laban sa mga panganib sa katawan at kaluluwa, lalung-lalo na ang mga tukso laban sa
kalinisan. Huwag mo akong pabayaan, Pinagpalang Ina, sapagkat ang aking kaligtasan ay
mapapasapanganib kung ako ay hindi mo ipagsasanggalang. Nangangako akong iingatan ang
aking sarili sa isang buhay ng grasya sa pamamagitan ng pagtulad sa iyong mga kabutihan. At sa
pamamagitan rin ng iyong Inmaculada Concepcion, pakumbaba kong isinasamo sa iyo na
ipagkamit mo ako ng natatanging biyayang ito (sa katahimikan ay banggitin dito ang iyong
kahilingan) na inaasahan kong makakamit sa nobenang ito. Amen.
PANALANGIN PARA SA BAWAT ARAW
 UNANG ARAW (Nobyembre 29)

O Mariang Kalinis-linisan, pakumbabang hinihiling ko sa iyo na ipagkamit mo ako ng kaloob na

magpapatibay sa aking pananampalataya araw-araw at ng liwanag ng Diyos para sa mga
nahulog sa kasalanan katulad ko. Ingatan mo ako sa kaharian ng Diyos at tulungan mo akong
huwag mahulog sa kasalanan, at ipagkaloob mong ang aking pamilya at ang buong lipunan ay
laging magtaglay ng matatag na pananampalataya sa iyong Kabanal-banalang Anak. Ipagkaloob
mo na sa iyong pamamagitan, ang Banal na Simbahang Katolika ay magkaroon ng ibayong lakas
at buhay sa kabila ng mga unos at panganib sa makabagong panahon. Sa pamamagitan ni
Hesukristong ating Panginoon. Amen.

IKALAWANG ARAW (Nobyembre 30)

O Maria, aking Ina, na dahil sa buhay, kamatayan at pagkabuhay na mag-uli ng iyong Anak na si
Hesukristo ay natamo para sa amin ang buhay na walang hanggan. Ipagkaloob mo sa akin, sa
pamamagitan ng panalanging ito, ang lakas upang paglabanan ang mga tukso sa pamamagitan
ng pagninilay sa mga misteryo ng Kabanal-banalan mong Rosaryo, at upang matuklasan at
makamit ang walang hanggang kaligtasan. Sa pamamagitan ni Hesukristong ating Panginoon.
Amen.

IKATLONG ARAW (Disyembre 1)

O aking Reyna at Ina, iniaalay ko sa iyo nang buong pagpapakumbaba at buong puso ang aking
sarili; nang lahat ng aking mga minimithi at ninanais ay maging naayon sa iyong banal na
kalooban. Upang ipamalas sa iyo ang aking debosyon, ipinangangako ko na lahat ng aking mga
salita, isip at gawa ay maayon sa iyong kalooban tulad ng isang anak na buong-buo ang
pagtitiwala sa kanyang ina. O aking Ina, ingatan at ipagtanggol mo ako sa lahat ng panganib
kung paanong ipagsasanggalang mo ang iyong sariling Anak. Sa pamamagitan ni Hesukristong
ating Panginoon. Amen.

IKAAPAT NA ARAW (Disyembre 2)

O aking Ina, dahil sa karangalan mo bilang ipinaglihing walang kasalanang mana, inihanda ka
para sa pagkakatawang-tao ng ating Panginoong Heuskristo.
Idinadalangin kong kung paanong ikaw ay ipinag-adya mula sa kasalanan, ako rin ay maligtas
mula sa bahid ng kasalanan sa pamamagitan ng iyong maluwalhating kalinisan. At matapos
dalisayin mula sa aking mga kasalanan, maging marapat nawa akong makabahagi sa walang
hanggang kaluwalhatian sa langit kasama mo at ng iyong Anak. Tanggapin ko nawang lagi ang
iyong pagpapala, O Pinagpalang Birhen. Sa pamamagitan ni Hesukristong ating Panginoon.
Amen.
 IKALIMANG ARAW (Disyembre 3)

O aking Reyna at aking Ina, ipinapaubaya ko sa iyo ang aking sarili, at ako ay habambuhay na
magpapasalamat para sa lahat ng mga kaloob na aking tinanggap sa iyong pamamagitan.
Patatagin mo, O aking Ina, ang aking kalooban at dalisayin mo ang aking mga pagnanasa upang
ako ay laging maging tunay na anak sa isang malinis na Ina at maawaing Reyna. Ipagkaloob mo
na sa pamamagitan ng aking mga panalangin at buhay Kristiyano, maging marapat akong
makasama mo sa langit na siyang tunay na kapalaran ng lahat ng tinubos. Sa pamamagitan ni
Kristong ating Panginoon. Amen.

IKAANIM NA ARAW (Disyembre 4)

O Ina ng matamis na pag-ibig at banal na pag-asa, sa iyong paanan ako’y nagpapatirapa.

Magdalang-habag ka sa aming mga makasalanan, at liwanagan mo ang aming mga isipan upang
kami’y makabalik sa maka-Kristiyanong pamamaraan, at upang lahat ng karangalan, tuwa at
hapis na napaloob sa iyong buhay ay magbunga sa amin. Aking Ina, manatili nawa ako tuwina sa
iyong pag-ibig. Sa pamamagitan ni Hesukristong ating Panginoon. Amen.

IKAPITONG ARAW (Disyembre 5)

Kabanal-banalang Birhen, ipinasasailalim ko sa iyong pagkakandili ang aking sarili dahil sa mga
alalahaning mula sa mga kasamaan sa sanlibutan. Tulungan mo ako at ilingon mo sa akin ang
mga mata mong maawain upang manaig ako mula sa lahat ng kahirapan sa katawan, puso at
kaluluwa. Ipagkaloob mong ako’y maging marapat sa
biyayang aking ninanais matamo sa nobenang ito. O aking Ina, ipahintulot mong huwag akong
mawalay sa landas ng kabanalan. Ingatan mong ako ay laging maging banal na anak ng isang
banal na Ina. Sa pamamagitan ni Hesukristong ating Panginoon. Amen.

IKAWALONG ARAW (Disyembre 6)

O Pinagpalang Birhen, aking tagapamagitan at tagapagtangkilik sa harap ng trono ng Diyos,

ngayong nalalapit na ang wakas ng nobenang ito, idinudulog at hinihiling ko sa iyo na maganap
ang banal na kalooban mo sa aking buhay. Pinagsisisihan kong tunay ang aking mga kasalanan
at ikukumpisal ko ang lahat ng iyon upang ako’y maging marapat sa iyong mga biyaya, lalo’t
higit ang biyaya na makapiling ka sa langit magpakailanman. Sa iyong pamamagitan, O Ina, lagi
ko nawang sundin ang mga batas ng Diyos at ng Banal na Simbahan. Sa pamamagitan ni
Hesukristong ating Panginoon. Amen.

IKASIYAM NA ARAW (Disyembre 7)

O Mariang Kalinis-linisan, idinadalangin ko sa huling araw ng aking nobena na ako ay makasalo
sa iyong kalinisan, kapakumbabaan at kagandahan ng kaluluwa. Ipagkaloob mong aking
tanggapin ang iyong Anak na si Heuskristo sa Banal na Komunyon, upang ito ay maging tanda ng
walang hanggang gantimpala. Huwag mo akong iwaglit, O aking Ina, sa iyong paningin. O aking
Ina, manatili nawa akong lagi sa iyong pag-ibig, awa, at biyaya. Sa pamamagitan ni Hesukristong
Panginoon. Amen.

LITANIYA NG MAHAL NA BIRHENG MARIA

N: Panginoon, maawa ka sa amin.

B: Panginoon, maawa ka sa amin.
N: Kristo, maawa ka sa amin.
B: Kristo, maawa ka sa amin.
N: Panginoon, maawa ka sa amin.
B: Panginoon, maawa ka sa amin.
N: Kristo, pakinggan mo kami.
B: Kristo, pakapakinggan mo kami.
N: Diyos Ama sa langit,
B: Maawa ka sa amin.
N: Diyos Anak na tumubos sa sanlibutan,
B: Maawa ka sa amin.
N: Diyos Espiritu Santo,
B: Maawa ka sa amin.
N: Santisima Trinidad na iisang Diyos,
B: Maawa ka sa amin.

N: Santa Maria, B: Ipanalangin mo kami.

Santang Ina ng Diyos,

Santang Birhen ng mga birhen,
Ina ni Kristo,
Ina ng Simbahan,
Ina ng awa,
Ina ng grasya ng Diyos,
Ina ng pag-asa,
Inang tunay na dalisay,
Inang walang malay sa kahalayan,
Inang laging Birhen,
Inang di malapitan ng masama,
Inang kaibig-ibig,
Inang kahanga-hanga,
Ina ng mabuting kahatulan,
Ina ng Maylikha,
Ina ng ating Tagapagligtas,
Birheng kapaham-pahaman,
Birheng dapat igalang,
Birheng pinakatanyag,
Birheng makapangyarihan,
Birheng maawain,
Birheng may matibay na pananampalataya,
Salamin ng katarungan,
Luklukan ng karunungan,
Sanhi ng tuwa namin,
Sisidlan ng kabanalan,
Sisidlan ng karangalan,
Bukod-tanging sisidlan ng kataimtiman,
Mistikal na rosas,
Tore ni David,
Toreng garing,
Bahay na Ginto,
Kaban ng Tipan,
Pinto ng langit,
Tala sa umaga,
Kalusugan ng mga maysakit,
Sandigan ng mga makasalanan,
Kaaliwan ng mga nangingibang-bayan,
Tuwa ng mga nagdadalamhati,
Karamay ng mga Kristiyano,
Reyna ng mga Anghel,
Reyna ng mga Patriyarka,
Reyna ng mga Propeta,
Reyna ng mga Apostol,
Reyna ng mga Martir,
Reyna ng mga Kumpesor,
Reyna ng mga Birhen,
Reyna ng lahat ng mga banal,
Reynang ipinaglihi nang walang manang kasalanan,
Reynang iniakyat sa langit,
Reyna ng Santo Rosaryo,
 Reyna ng Kapayapaan,
Reyna ng Pamilya,

N: Kordero ng Diyos na nag-aalis ng mga kasalanan ng sanlibutan,

B: Patawarin mo kami, Panginoon.

N: Kordero ng Diyos na nag-aalis ng mga kasalanan ng sanlibutan,

B: Pakapakinggan mo kami, Panginoon.

N: Kordero ng Diyos na nag-aalis ng mga kasalanan ng sanlibutan, B: Maawa

ka sa amin, Panginoon.

ANG MEMORARE

N&B: Alalahanin mo, O lubhang mahabaging Birheng Maria, na kailan man ay hindi napakinggan
ng sinuman na lumapit sa iyong pagkakandili na tumatawag ng iyong pangangalaga at
humihingi ng iyong tulong ay pinababayaan mo. Dala ng ganitong pag-asa sa iyo, ako ay
lumalapit, O Inang Birhen ng mga Birhen; at sa paghibik ko sa ilalim ng bigat ng aking
mga kasalanan ay nangahas akong lumapit sa iyong mahal na harapan. Huwag mong
siphayuin ang aking mga panalangin, O Ina ng Diyos, kung di bagkus iyong kahabagan.
Amen.

PANGWAKAS NA PANALANGIN

N&B: O pinagpalang Birheng Maria, ikaw na iniligtas sa bahid ng kasalanang mana, O kaibig-ibig
at makapangyarihang patrona ng Pilipinas, sa iyo’y iyukod ang walang hanggang papuri,
paggalang at pasasalamat alang-alang kay Kristo Jesus.

O Kalinis-linisang Ina, ang aming Kaibig-ibig na Ina, ang aming Kahanga hangang Reyna,
taglay ang buong pasasalamat, ipinagbubunyi ka namin ng iyong mga awa at dumudulog
kami sa iyong pag-aampon.

O pinagpalang Ina, ikaw na binihag ang mga puso ng mga tao sa bisa ng kalinisan. Ikaw
na bumihag sa puso ng aming mga kababayan.

Itinatag mo, kinupkop at pinalakas ang batayan ng pananampalataya sa aming mahal na

bayan sa pamamagitan ng pagtangkilik mo katulad ng napupuna sa
maraming katibayang tanda ng mga biyaya mo. O Ina, ikaw ang mahal namin, na
yumuyurak sa ulo ng ahas, iligtas mo ang aming bayan sa kamandag ng masasamang tao
at mga erehe. Ikaw na ipinag-adya at tinuruan ang aming bayan sa pananampalataya na
 galing sa iyong Anak, ipagsanggalang at ipagtanggol din kami.

Kami ay iyong-iyo, nais naming maging iyo. Ipakita mong ikaw ang aming Ina at Patrona;
ingatan mo kami sa bisa ng iyong malakas na panalangin.

Amen.

N: O Mariang ipinaglihing walang sala,

B: Ipanalangin mo kaming dumudulog sa iyo.

N: Sa ngalan ng Ama at ng Anak at ng Espiritu Santo.

B: Amen.

Isinalin sa Tagalog mula sa Novena to the Immaculate Conception 2020 ng Katedral ng Maynila

CORE GROUP OF MARIAN ORGANIZATIONS

Parroquia de Santa Maria Magdalena
Disyembre 2020