EPIFANIA KAN KAGURANGNAN

INTRODUKSIYON
Dios marhay na ___________ saindo gabos.
Mga tugang, sa Banal na Eukaristiang ini, sinicelebrar niato
an Solemnidad kan Epifaniya, an manifestacion o an pagpahiling
kan Kagurangnan sa gabos na nacion sa bilog na kinaban. An
pagkamundag ni Jesucristo nahiling nin mga tawo sa mata nin
Pagtubod kaya paladan idtong mga nakakahiling asin nagtutubod
siring kan Tolong Hade.
An satong celebracion pangengenotan ni ________.

ENOT NA BABASAHON
An enot na babasahon na ginono sa Libro ni Profeta Isaias,
capitulo 60 versikulo 1 sagkod 6, nagpapahayag na an
Kagurangnan nagpahiling sa mga tawo sa paagi ni Jesucristo na
nagtaong liwanag sa kadikloman kan kamugtakan nin katawohan.
Himateon niato an Babasahon.

SALMO RESPONSORIO
Sasambahon ka, Kagurangnan,
kan gabos na banwaan.
IKADUWANG BABASAHON
Ipinapahayag sa Ikaduwang Babasahon na ginono sa Surat
ni San Pablo sa mga taga-Efeso, capitulo 3, versikulo 2 sagkod 3
asin 5 sagkod 6, na an Dios nagpamidbid kan saiyang sadiri huli
ki Jesucristo bako sanang sa piniling banwaan kundi man sa
gabos na katawohan. Himateon niato an Babasahon.

EVANGELIO
Hinanyogon niato an Evangelio na sinurat ni San Mateo,
capitulo 2, versikulo 1 sagkod 12.

PAGROKYAW
Nahiling mi an saiyang bitoon sa sirangan;
Kami napadigdi sa pagsamba saiya.
 PAMIBI NIN BANWAAN

PADI: Mamibi kita sa satong Ama ta ipinahayag niya an

saiyang Bogtong na Aki, liwanag nin mga
banwaan, tanganing an gabos na mga tawo magin
mga aki nin Dios asin magkamit kan
kamurawayan nin saiyang kahadean. An satuyang
sabihon sa lambang kahagadan:
KAGURANGNAN, HIMATEA KAMI.

1. Na an Santo Papa, mga Obispo asin Kapadian, magin

dakulang inspirasyon sa gabos na katawohan sa pagdara
ninda sa gabos kan liwanag nin Marhay na Bareta ni Cristo.
Mamibi kita.

2. Na an lideres kan mga banwaan, pangenotan an pagprotehir

asin paggalang kan katalingkasan asin dignidad kan
lambang ciudadano orog na an mga dukha, mga maluluya
asin nagheherelang sa paagi kan pagpaotob nin mga
programa na makapagpapauswag kan kalidad nin buhay.
Mamibi kita.
3. Na an gabos na nasa kadikloman nin kasalan, mga daing
pagtubod sa Dios asin an mga may kaanggotan sa puso,
mahiling logod an liwanag nin kaligtasan tanganing
makalakaw sinda pasiring sa Kagurangnan. Mamibi kita.

4. Na an mga tugang niato na nag-aaragi nin kasakitan huli sa

mga kalamidad, kadukhaan, kakurihan nin kapwa, asin kan
pandemya, magin makusog an pagtubod na an anoman na
kasakitan, naagi man sana asin magpapakusog sainda na
makahaw-as sa kasakitan. Mamibi kita.

5. Para sa gabos na mga nagkaerenot nang nagtalikod sa

kinaban na ini, aboton na logod sinda nin liwanag nin
kaligtasan asin katoninongan kan Kagurangnan.

PRESIDER: Dios na makakamhan, danay an Saimong

pagtabang samo. Nakikimaherak kami na an ilaw,
na saimong itinalaga sa pagpahayag sa mga
banwaan, magliwanag sainda tanganing tumubod
an gabos na Ika an tunay na Dios asin sa
Saimong sinugo na si Jesucristong Kagurangnan
niamo. AMEN.
ENOT NA BABASAHON (Isaias 60: 1-6)

Pagbasa sa Libro ni Profeta Isaias

Bumangon ka, Jerusalem, asin lumiwanag; / duminatong na an

saimong ilaw. / An kamurawayan nin Kagurangnan minasirang
saimo minsan ngani an daga natatahuban pa kan banggi, / an
mga banwaan natatahuban pa kan diklom./ Sa saimo minatindog
an Kagurangnan, / sa saimo minapahiling an saiyang
kamurawayan. / An mga banwaan minadolok sa saimong liwanag
/ asin an mga hade sa saimong nagliliwanag na banaag. /
Itingkalag mo an saimong mga mata sa palibot. / An gabos
nagtitiripon asin nagdodorolok saimo: / an saimong mga aking
lalaki hale sa harayo; / an saimong mga aking babae dinadara sa
mga takyag. / Ini mahihiling mo asin saimong ikakaogma;/
magsusup-ay sa kaogmahan, / huli ta an mga kayamanan sa
dagat mapapasaimo / asin mga kayamanan sa banwaan maabot
saimo. / Maabot saimo dakul na mga kamelyo / hale sa Midyan
asin sa Epha. / An gabos sa Seba madatong,/ magdadara nin
bulawan asin kamangyan / asin maawit nin kaomawan sa
Kagurangnan. /

AN TATARAMON KAN KAGURANGNAN.

SALMO RESPONSORIO (72: 1-2. 7-8. 10-11. 12-13)
Sasambahon ka, Kagurangnan,
kan gabos na banwaan.

1. O Dios, itao mo sa hade an kahatolan

sa aki kan hade an saimong katanosan,
nganing matanos na hatolan niya an saimong banwaan,
asin an saimong mga dukha matanos na hatolan.

2. Sa saiyang mga aldaw mamumurak an katanosan

asin katoninongan sagkod sa solnop na an bulan.
Maghahade siya poon sa dagat sagkod sa daga,
poon sa Dakulang Salog sagkod sa poro nin daga.

3. Mga hade hale sa Tarsis asin sa mga baybayon

mabayad nin buhis sa saiya.
Mga hade sa Arabia asin sa Seba
madarang mga dolot saiya.
Sa atubang niya gabos na hade maluhod,
gabos na banwaan malingkod.
IKADUWANG BABASAHON (Efeso 3: 2-3. 5-6)

Pagbasa sa Surat ni San Pablo sa mga taga-Efeso

Sa paghona ko, / aram na nindo an gracia na ipinaniwala nin
Dios sakuya mapadapit saindo. / Sa paagi nin sarong
kapahayagan, / ipinapamidbid sako an misterio na ipinaliwananag
ko pa sana sainda. / An misteriong ini na ngonian ipinahayag sa
tabang kan Espiritu, / sa saiyang mga banal na apostoles asin
profeta; / kaidtong panahon dai ipinamidbid sa kiisay man an
misterio / na an mga pagano mga kapwa tagapagmana, / mga
kabtang nin saro sanang Hawak; / asin kaayon sa saro sanang
panuga, / ki Cristo Jesus, / huli sa Evangelio. /

AN TATARAMON KAN KAGURANGNAN.

EVANGELIO (Mateo 2: 1-12)

+ Pagbasa kan Evangelio na Sinurat ni San

Mateo
Si Jesus namundag sa Belen nin Judea kan
panahon ni hadeng Herodes. Huli kaini, duminatong
sa Jerusalem an mga mago hale sa sirangan asin
naghapot; “Saen namundag an hade kan mga
Judio? Nahiling mi an pagsirang kan saiyang bitoon
asin napadigdi kami sa pagsamba saiya.”
Pakadangog kaini, kinabahan an hadeng si
Herodes asin hinapot kun saen mamumundag an
Mesias. Simbag ninda: “Sa Belen nin Judea, siring
sa nasusurat kan profeta: ‘Asin ika, Belen, daga nin
Juda: sa saimo magikan an lider na iyo an magigin
pastor nin sakong banwaan, Israel’ “
Hilom na ipinaapod ni Herodes an mga Mago
asin naaraman sa sainda kun kasuarin nagsirang an
bitoon Sinubol niya sinda asin sinabihan: “Paduman
kamo asin hanapon nindo an omboy Kun makua
nindo, paisihon nindo ako, ta ako man maduman
asin masamba saiya.” Sa sinabing ini kan hade,
nagralakaw sinda; asin uya an bitoon na nahiling
ninda sa sirangan nangengenotan sainda sagkod na
umontok sa tangod kan kinamumugtakan kan
omboy Paglaog ninda sa harong, nakua an omboy,
kaiba si Maria na saiyang ina. Nagluhod sinda asin
nagsamba; binuksan an mga dara asin nagdolot nin
bulawan, kamangyan asin mira. Sa pangiturugan,
pinatanidan sinda na dai magbalik ki Herodes. Kaya
ibang dalan an saindang inagihan pagpuli ninda sa
saindang banwaan.
AN MARHAY NA BARETA KAN SATONG
KAGURANGNAN.
 EPIFANIA NIN KAGURANGNAN

PAMIBI Mamibi kita

SA PAGPOON
Dios Ama sa langit, sa liwanag nin sarong
bitoon
ipinahayag mo sa banwaan an saimong
Bogtong na Aki.
Sa liwanag nin pagtubod,
daraha kami sa saimong kamurawayan sa
langit.
Ini hinahagad mi huli ki
Jesucristong Kagurangnan niamo,
nabubuhay asin naghahade,
kaiba mo asin nin Espiritu Santo,
Dios sa panahon na daing kasagkoran.
AMEN.
PAMIBI Mamibi kamo mga tugang…
SA PAGDOLOT
Kagurangnan,
akoa an samong mga dolot: bako nang
bulawan, kamangyan asin mira
kundi an samong pagtubod, pamibi asin
pagkamoot.
Huli ki Cristo na samong Kagurangnan.
AMEN.

PAMIBI Mamibi kita.

PAKA-COMUNION
O Dios, danay asin minsan saen,
tabangi kami kan saimong langitnon na
liwanag, tanganing malinaw ming
mahiling asin malodok ming sambahon si
Cristo sa misteriong ini
na kaiba an pagtubod kan mga hade na
magsamba saiya.
Huli man sana ki Cristo
na samong Kagurangnan.
AMEN.