VIA LUCIS

DALAN NIN PAGKABUHAY-LIWAT

KAN KAGURANGNAN
 DALAN NIN PAGKABUHAY-LIWAT KAN KAGURANGNAN

RITO SA PAGPOON

PADI: Sa ngaran kan Ama, + asin kan Aki, asin

kan Espiritu Santo.

Gabos: Amen.

PADI: Mapasaindo an pagkamoot nin Dios na pano nin pagkaherak

asin pagtabang sato.

Gabos: Asin sa saimong espiritu.

PADI: Kita nagkatiripon digdi bilang banwaan nin Dios na

nagsasarig sa Saiyang mamomoton na pagkaherak asin man sa
pag-ataman kan satuyang Ina, si Virgen Maria.

Ngonian na panahon nin Pagkabuhay–Liwat, nagmamawot

kita na pakusogon an satuyang pagtubod, paglaom, asin
pagkamoot mantang padagos kitang nagpapasalamat sa mga
balaog na iwinawaras satuya kan Dios. Itinao man satuya an
balaog nin pagdevocion ki Virgen Maria.

Magkasararo kita sa pagpamibi tanganing kaherakan kita nin

huli sa satuyang mga pagkakasala, asin makapagbaklay kita
sa dalan nin Pagkabuhay-liwat nin Kagurangnan nin may
balaog nin pagdevocion ki Ina asin pagsarig sa biyaya ni Jesus.
PAMIBI SA PAGPOON

PADI: MAMIBI KITA…

O DIOS NA MAHEHERAKON,
AN SAMONG MGA KASALAN
HINUGASAN MO SA TUBIG,
TINAWAN MO KAMI
NIN BAGONG PAGKAMUNDAG SA ESPIRITU
ASIN TINUBOS MO KAMI SA DUGO NI CRISTO.
AMANG MAKAKAMHAN SA LANGIT,
BURABOD NIN GABOS NA KATOTOOHAN,
AN BANWAAN NA NASA KADIKLOMAN
NAGHIHIMATE KAN SAIMONG TATARAMON
ASIN NAGSUSUNOD SA SAIMONG AKI
NA NABUHAY-LIWAT.
HINANYOGA AN PAMIBI
KAINING BAGONG MAMUNDAG NA SIMBAHAN
SA PAGSIMBAG SA SAIMONG PANGAPODAN.

Gabos: Amen.
 Enot na Estacion

SI JESUS NABUHAY-LIWAT

Lider: Sinasamba asin inoomaw mi Ika, Kagurangnan.

Gabos: Nin huli sa Pagkabuhay Mo liwat,
tinubos Mo an kinaban. Alleluia!

Lider: Tataramon kan Dios (Mateo 28:5 – 6)

An anghel nagsabi sa mga babae: “Dai kamo matakot. Aram ko na hinahanap

nindo si Jesus na ipinako sa Cruz. Dai na digdi. Nabuhay-liwat, siring sa Saiyang
sinabi.”

Commentator:
Sa enot na aldaw kan semana, pagsirang kan bagong linalang, si Jesus nabuhay-
liwat hale sa kagadanan. Mayo nin nakahiling sa pangyayari, alagad arog kan mga
Apostoles, inaapodan kita na magin mga saksi kaining pangyayari na sentro kan
satong pagtubod. An liwanag asin kapangyarihan kan pagkagadan asin
pagkabuhay-liwat ni Cristo iyo an nagin aarogan kan satuyang pagkabuhay.
Mamidbidan logod niato an pagkagadan asin pagkabuhay-liwat ni Cristo sa tahaw
niato.

Commentator:
Kagurangnan Dios, iyo ini an aldaw na ginibo Mo! Sa pagbuhay Mo liwat ki
Cristo hale sa kagadanan, asin sa pagbuhay Mo liwat samo kaiba ni Cristo, ginibo Mo
para sa Saimong sadiri an sarong bagong banwaan. Mantang naghihinanyog
kamikan tataramon na nagdadara nin kaligtasan, papaglaada an samuyang mga
puso. Sa paagi kan presensya kan lambang katood asin nakikihimanwa, pahilingan
samo an lawog kan Saro na kaipuhan ngunang magsakit, alagad ngonian yaon na sa
kamurawayan, si Jesucristo, an samong Paskwa asin Katoninongan, na nabubuhay
asin naghahade kaiba Mo, sa kapanahonan kan mga panahon. Amen.

Lider: Kamurawayan sa Ama, sa Aki, asin sa Espiritu Santo,

Gabos: Siring sa kapinonan asin ngonian, magdanay man,
asin sa kapanahonan kan mga panahon. Amen.
 Ika-Duwang Estacion

SI SIMON PEDRO ASIN JUAN

NAHILING AN LULUBNGAN NA MAYONG LAOG

Lider: Sinasamba asin inoomaw mi Ika, Kagurangnan.

Gabos: Nin huli sa Pagkabuhay Mo liwat,
tinubos Mo an kinaban. Alleluia!

Lider: Tataramon kan Dios (Juan 20:8)

Dangan naglaog man an disipulo na naenot sa lulubngan; nahiling niya idto

asin nagtubod siya.”

Commentator:

An lulubngan na mayong laog bakong katunayan kan pagkabuhay-liwat,

kundi sarong toninong na saksi kan pinakadakulang pangyayari sa satong pagtubod.
Pagkahiling kan lulubngan na mayong laog, an mga disipulos nasadol na hanapon
an Kagurangnan na Nabuhay-liwat na naghihiro sa tahaw ninda. Nahiling ninda
asin nagtubod sinda sa padagos na presensya kan Kagurangnan nin pagkamoot. An
gabos na mayong laog asin mamondong lugar sa buhay nin tawo iyo nanggad an
lugar kun saen mawot nin Kagurangnan na magtrabaho asin na maipahayag.

Commentator:

Dios na samuyang Ama, Kaglalang kan gabos, ngonian iyo an aldaw nin
dakulang kaogmahan. An Kagurangnan nagpahiling sa mga nawawaran na nin
paglaom asin binuksan an saindang mga mata sa ipinahayag kan Banal na Kasuratan:
na Siya dapat na magadan dangan mabubuhay liwat. Logod an Kagurangnan na
Nabuhay-liwat hangosan man an samuyang isip asin buksan an samong mga mata
tanganing mamidbidan mi Siya sa pagbaak kan tinapay asin makasunod sa Saiyang
binuhay-liwat na pagkabuhay. Ini hinahagad mi huli ki Cristo na samong
Kagurangnan. Amen.

Lider: Kamurawayan sa Ama, sa Aki, asin sa Espiritu Santo,

Gabos: Siring sa kapinonan asin ngonian, magdanay man,
asin sa kapanahonan kan mga panahon. Amen.
 Ika-Tolong Estacion

SI JESUS NAGPAHILING KI MARIA MAGDALENA

Lider: Sinasamba asin inoomaw mi Ika, Kagurangnan.

Gabos: Nin huli sa Pagkabuhay Mo liwat,
tinubos Mo an kinaban. Alleluia!

Lider: Tataramon kan Dios (Juan 20:14b – 18)

Nagsalingoy siya asin nahiling si Jesus na nagtitindog duman; alagad dai niya
aram na si Jesus idto. Hinapot siya ni Jesus, “Babae, tadaw ta nagtatangis ka? Si isay
an hinahanap mo?” Sa paghuna na Siya an hardinero, nagsabi si Maria Saiya, “Kun
kinua mo Siya, sabihi ako kun saen mo Siya ibinugtak ta kukuahon ko Siya.” Nagsabi
si Jesus, “Maria!” Nag-atubang siya ki Jesus dangan nagsabi sa tataramon na Hebreo,
“Rabboni!” (An kahulugan kaini, “Maestro”). Sinabihan siya ni Jesus, “Dai mo Ako
pagkapotan ta dai pa Ako nakakasakat duman sa Sakong Ama. Alagad dumuman
ka sa mga tugang Kosaka sabihan mo sinda na masakat na Ako duman sa Sakong
Ama asin saindong Ama, sa Sakong Dios asin saindong Dios.” Kaya nagduman si
Maria Magdalena dangan sinabihan an mga disipulo na nahiling niya an
Kagurangnan. Inosipan niya sinda na an Kagurangnan iyo an nagsabi saiya kan mga
bagay na ini.

Commentator:
Sa ika-apat na Ebanghelyo, tinawan si Maria Magdalena kan misyon na darahon
an marhay na bareta kan Pagkabuhay-liwat sa mga Apostoles asin mga disipulos. Si
Maria Magdalena kaibahan na ni Jesus asin kan Saiyang mga disipulos, asin tinawan kan
pribilehiyo na ibareta an paglaom nin bagong buhay. Sa halawig nang panahon,
namidbid siya bilang “an apostol kan mga Apostoles.” Inapod siya ni Jesus sa saiyang
pangaran, tinawan siya kan mata nin pagtubod, asin inapod siya tanganing magtao nin
naiibang personal na pagsaksi sa saiyang mga katood sa komunidad nin pagtubod.

Commentator:
Dios na samuyang Ama, kabotan Mo na an gabos na tawo makaligtas asin
makamidbid kan Saimong katotoohan. Magpadara Ka nin mga trabahador sa kadakul
na aanihon tanganing an Ebanghelyo maibalangibog sa lambang linalang. Logod an
Saimong banwaan na nagkakatiripon huli sa tataramon nin buhay asin pinakusog sa
bagsik kan mga Sakramento, magtalubo sa dalan nin kaligtasan. Ini hinahagad mi huli
ki Cristo na samong Kagurangnan. Amen.

Lider: Kamurawayan sa Ama, sa Aki, asin sa Espiritu Santo,

Gabos: Siring sa kapinonan asin ngonian, magdanay man,
asin sa kapanahonan kan mga panahon. Amen.
 Ika-Apat na Estacion
SI JESUS NAGPAHILING SA DALAN PASIRING SA EMAUS

Lider: Sinasamba asin inoomaw mi Ika, Kagurangnan.

Gabos: Nin huli sa Pagkabuhay Mo liwat,
tinubos Mo an kinaban. Alleluia!

Lider: Tataramon kan Dios (Lukas 24:15, 25-27)

Mantangnag-oolay-olay sinda saka nagdidiskutiran, rinanihan sinda ni Jesus

dangan nakisabay sa saindang paglakaw. Dangan sinabihan sinda ni Jesus, “Mga
lolong! Mga kulang sa pagtubod sagabos na sinabi kan mga propeta! Bakong
kaipuhan na magtios nguna an Cristo kan mga bagay na ini bago Siya maglaog sa
kamurawayan?” Dangan ipinaliwanag sainda ni Jesus an sinasabi dapit Saiya
sagabos na kasuratan, magpoon sa mga libro ni Moises sagkod sa mga surat kan
gabos na propeta.

Commentator:
An dalan pasiring sa Emaus iyo an istorya kan Cristianong pagkabuhay. An mga
disipulos naglalakaw parayo sa Jerusalem asin sa komunidad na gikan sa pagtubod kan
mga Apostoles na may pagmati nin kadaogan asin dakulang kamondoan. Nawaran na
sinda nin paglaom. Kita man, igwa nin mga panahon nin pagkadisganar asin pagmondo.
Si Jesus na Nabuhay-liwat pig-iibanhan kita sa dalan dawa na ngani kita naglalakaw sa
salang direksyon. An Kagurangnan sana an makakabukas kan Tataramon tanganing
tabangan kitang masabotan an mga istorya kan satuyang buhay, orog na an kasakitan, asin
basahon sinda sosog sa Banal na Kasuratan. An Kagurangnan sana an makakapalaad
giraray kan satuyang enerhiya asin kan satuyang panuga na itao an sadiri sa kun ano an
orog na mahalaga sa buhay.

Commentator:
Dios na Kagurangnan, bilang mga disipulo na nasa peregrinasyon, nakikimaherak
kami ki Jesucristo: Digdi Ka na samo, Kagurangnan. Buksan Mo an samuyang mga puso
sa tunay na pagbakle asin, siring na namidbid niamo an Kagurangnan sa pagbaak kan
tinapay, giboha man kaming mga saksi kan bagong katawohan, binago, nakipag-olian asin
may katoninongan sa Saimong pagkamoot. Padarhan kami bilang mga tagapamareta kan
pagsolsol asin pagpatawad na idinodolot Mo sa gabos sa ngaran ni Jesucristo, na nabubuhay
asin naghahade na kaiba Mo sa kapanahonan kan mga panahon. Amen.

Lider: Kamurawayan sa Ama, sa Aki, asin sa Espiritu Santo,

Gabos: Siring sa kapinonan asin ngonian, magdanay man, asin sa kapanahonan kan
mga panahon. Amen.
 Ika-Limang Estacion
AN KAGURANGNAN NA NABUHAY-LIWAT NAMIDBID
SA PAGBAAK KAN TINAPAY

Lider: Sinasamba asin inoomaw mi Ika, Kagurangnan.

Gabos: Nin huli sa Pagkabuhay Mo liwat,
tinubos Mo an kinaban. Alleluia!

Lider: Tataramon kan Dios (Luke 24:29-32)

Pinugolan ninda Siya, Dai Ka na magpadagos ta solnop na an aldaw asin

nagdidiklom na.” Kaya nag-iba Siya sainda. Nagtukaw sa pagkakan si Jesus sa
kaibahan ninda; kinua ni Jesus an tinapay, benendisyonan, binaak saka itinao sainda.
Dangan nabuksan an mga mata ninda, asin namidbidan ninda siya; alagad bigla
Siyangnawara sa paghiling ninda. Nag-olay-olay sinda, “Bakong naglaad an satong
puso kan nagtataram Siya sato sa dalan asin nagpapaliwanag kan mga kasuratan?”

Commentator:
An pagkanumpungansa dalan nagdara sa lamesa, sa pagbaak kan tinapay asin sa
bilog na pagtao kan sadiri. An pagmidbid sa Kagurangnan na Nabuhay-Liwat pirming
katakod sa Eucaristia. Sa puso kan satuyang buhay bilang mga Cristiano iyo an kakanon
nin Tataramon asin Eucaristia na satong isineselebrar kada Domingo. An Kagurangnan
na Nabuhay-Liwat iyo an nangengenotan sagabos niatong mga paglakbay,
nagmamawot na palaadon an satuyang mga puso sa matinaong paglingkod sa gabos na
mga nangangaipo, harani o harayo man. An regalo na satuyang inako iyo man an regalo
na satuyang ihiheras. Sa kapakumbabaan, minalakaw kita sa manlaen-laen na dalan nin
satuyang buhay tanganing magsimbag sa mga kagutoman kan katawohan.

Commentator:
Pag-omawon Ka logod, O Dios nin kabanalan: iniibanhan Mo kami nin may
pagkamoot mantang kami naglalakbay sa dalan nin buhay. Pag-omawon man an
Saimong Aki, si Jesucristo, na yaon sa kaibahan niamo asin an pagkamoot na
nagsasararo samuya. Siring kan ginibo Niya kaidto sa Saiyang mga disipulos, ngonian
binuksan Niya an Banal na Kasuratan para samuya asin binaak an tinapay. Logod an
Eucaristia na samong isineselebrar giyahan kami sa kapanoan kan buhay ni Cristo.
Namimibi kami sa kapangyarihan kan Espiritu ni Cristo, sa kapanahonan kan mga
panahon. Amen.

Lider: Kamurawayan sa Ama, sa Aki, asin sa Espiritu Santo,

Gabos: Siring sa kapinonan asin ngonian, magdanay man,
asin sa kapanahonan kan mga panahon. Amen.
 Ika-Anom na Estacion
AN KAGURANGNAN NA NABUHAY-LIWAT NAGPAHILING
SA KOMUNIDAD NIN MGA DISIPULOS

Lider: Sinasamba asin inoomaw mi Ika, Kagurangnan.

Gabos: Nin huli sa Pagkabuhay Mo liwat,
tinubos Mo an kinaban. Alleluia!

Lider: Tataramon kan Dios (Lukas 24:38 – 40)

“Tadaw ta nagkakamurongnan kamo sa takot? Tadaw ta nagdududa kamo?

Hilinga nindo an Sakong mga kamot asin mga bitis. Ako mismo ini! Kapotan nindo
Ako asin hilingon: huli ta an kalag mayong laman asin mayong tulang. Ako igwa,
siring sanahihiling nindo.” Pakasabi Niya kaini, ipinahiling Niya sainda an
Saiyangmga kamot saka mga bitis.

Commentator:
An mga disipulos sa dalan pasiring sa Emaus tulos na nagbalik sa iba pang mga
disipulos sa Jerusalem na “naglalaad an puso.” An saindang kamundoan nasanglean
nin kaogmahan asin disidido sinda na kumbisiron an iba na si Jesus buhay. Si Jesus
na iyo an Cristo danay na maigot na tiriponon an komunidad nin mga disipulos sa
lamesa nin pagtubod asin ipahiling sainda na Siya nabuhay-liwat kaiba an Saiyang
lugad na pinamuraway. An gabos niatong mga lugad papamurawayon pag-abot kan
aldaw. Naghihingowa kitang masabotan kun pano an Kagurangnan na Nabuhay-
Liwat inaalok kitang magin mga “parabulong na may lugad,” pigmimidbid ngonian
na mawot kan Kagurangnan na kita magin mga tagapagdara nin pakikipag-olian,
mantang kita mismo pinapatawad asin pinapa-omayan man.

Commentator:
Dios nin dai nagbabagong kapangyarihan asin liwanag, lilingya nin may
pagkamoot asin pagkaherak an bilog na komunidad kan Saimong Simbahan. Darahan
an nagdadanay na kaligtasan sa pamilya nin mga nasyon, tanganing mahiling kan
kinaban na an mga napapadungkal binabangon, an daan binabago, asin an gabos na
bagay dinadara sa kapanoan, huli Saiya na iyo an samong kapinonan, an samong
Kagurangnan na si Jesucristo, na nabubuhay asin naghahade sa kapanahonan kan mga
panahon. Amen.

Lider: Kamurawayan sa Ama, sa Aki, asin sa Espiritu Santo, Gabos: Siring sa

kapinonan asin ngonian, magdanay man, asin sa kapanahonan kan mga panahon.
Amen.
 Ika-Pitong Estacion
AN KAGURANGNAN NA NABUHAY-LIWAT NAGHANGOS NIN
KATONINONGAN ASIN NAGTAO NIN KAPANGYARIHAN
NA MAGPATAWAD AN MGA DISIPULO

Lider: Sinasamba asin inoomaw mi Ika, Kagurangnan.

Gabos: Nin huli sa Pagkabuhay Mo liwat,
tinubos Mo an kinaban. Alleluia!

Lider: Tataramon kan Dios (Juan 20:19b, 20b-23)

Dangan naglaog si Jesus, puminatahaw sainda saka nagsabi, “Mapasaindo an

katoninongan.” An mga disipulo napano nin kaogmahan pagkahiling ninda sa
Kagurangnan. Nagsabi giraray sainda si Jesus, “Mapasaindo an katoninongan.
Siring na Ako sinugo kan Ama, sinusugo Ko man kamo.” Pakataram kaini,
hinangosan Niya sinda sana sinabihan, “Akoa nindo an Espiritu Santo. An ki isay
man na kasalan na saindong patawadon, napapatawad; an ki isay man na kasalan na
dai nindo patawadon, dai napapatawad.”

Commentator:
Dawa na ngani nakabarat an mga pintoan kan harong na pigdadagosan kan
mga disipulos, an Kagurangnan na Nabuhay-Liwat naglagbas sa gabos na mga may
pagkatakot asin pinagsararo an saindang mga puso kan regalo nin katoninongan. An
hararom na katoninongan sa puso iyo an gamot asin burabod kan katoninongan asin
kaogmahan na dai ikakatao kan kinaban. Inaapod kita kan Kagurangnan na
Nabuhay-Liwat na danay na hanapon an katoninongan sa paagi kan dusay na
paghanap nin solusyon sa dai pagkasinarabotan na mayo nin byolensya o
kariribokan, asin bagohon an kinaban sa satong relasyon sa lambang saro.

Commentator:
Dios kan perpektong katoninongan, mayo nin lugar Saimo an byolensya asin
karatan. Logod idtong igwa nin katoninongan sa lambang saro magdanay an
marahay na boot na nagsasaro sainda; logod an mga magka-iwal lingawan an
saindang pagka-ongis asin maomayan. Hinahagad mi ini huli ki Cristo na samong
Kagurangnan. Amen.

Lider: Kamurawayan sa Ama, sa Aki, asin sa Espiritu Santo,

Gabos: Siring sa kapinonan asin ngonian, magdanay man,
asin sa kapanahonan kan mga panahon. Amen.
 Ika-Walong Estacion
AN KAGURANGNAN NA NABUHAY-LIWAT PINAKUSOG
AN PAGTUBODNI TOMAS

Lider: Sinasamba asin inoomaw mi Ika, Kagurangnan.

Gabos: Nin huli sa Pagkabuhay Mo liwat, tinubos Mo an kinaban. Alleluia!

Lider: Tataramon kan Dios (Juan 20:24 – 29)

Si Tomas (na inaapod Kambal), saro kan doseng disipulo, dai ninda kaiba kan mag-abot si
Jesus. Kaya sinabihan siya kan ibang mga disipulo, “Nahiling mi an Kagurangnan!” Alagad
sinabihan sinda ni Tomas, “Sagkod dai ko nahihiling an labot kan mga pako sa Saiyang mga
kamot asin ikalaog dyan an sakong mga muro, dangan an sakong kamot sa Saiyang hirog, dai
ako matubod.” Pakalihis nin sarong semana, nagtiripon giraray an mga disipulo duman sa laog
kan harong; kaiba na ninda si Tomas. An mga pintoan binaratan, alagad naglaog si Jesus,
puminatahaw sainda saka nagsabi, “Mapasaindo an katoninongan.” Dangan sinabihan Niya si
Tomas, “Hilinga an Sakongmga kamot asin bugtakan digdi an saimong muro; dangan laogan
an kamot mo sa Sakong hirog. Dai ka magduwa-duwa kundi magtubod!” Nagsabi si Tomas,
“Kagurangnan ko asin Dios ko!” Sinabihan siya ni Jesus, Minatubod ka huli ta nahiling mo
Ako? Paladan an mga minatubod maski dainakakahiling Sako!”

Commentator:
Mahalaga an istorya ni Tomas nin huli ta sa paagi kan saiyang halimbawa narealisar
niato na an pagduwa-duwa pwedeng magin parte kan pagtubod. Madalion ta siyang
apodon na “Doubting Thomas,”alagad nakalingaw kita na pakatapos niyang hilingon asin
dutaan an mga lugad kan pinagpakoan, bilog niyang inako an Nabuhay-Liwat bilang
saiyang Kagurangnan asin Paratubos. An pagduwa-duwani Tomas nasanglean nin buhay
na pagtubod. Kita man inaapod na magtubod, aram na an satong pagtubod pwedeng
probaran nin pagduwa-duwa asin pagkatakot. Bilang mga disipulona nagmamawot nin
orog na nagrararom na pagtubod, nagpapasensya kita asin pigsasabot taidtong mga
nasasakitan asin naghahanap asin nagduduwa-duwa arog ni Tomas.

Commentator:
Amang Langitnon asin Dios nin pagkaherak, dai mi na pighahanap si Jesus sa mga
gadan nin huli ta Siya buhay asin nagin Kagurangnan nin buhay. Hale sa tubig nin
kagadanan binuhay Mo kami liwat sa kaibahan Niya asin binago an regalo Mong buhay na
yaon sa samo. Pataluboa sa samuyang mga isip asin puso an bagong buhay na hineras samo
ni Cristo asin tabangi kami na magtalubo bilang Saimong banwaan pasiring sa kapanoan
kan buhay na daing kasagkoran sa kaibahan Mo. Ini hinahagad mi huli ki Cristo na samong
Kagurangnan. Amen.

Lider: Kamurawayan sa Ama, sa Aki asin sa Espiritu Santo.

Gabos: Siring sa kapinonan asin ngonian, magdanay man asin sa kapanahonan kan
mga panahon. Amen.
 Ika-Siyam na Estacion
AN KAGURANGNAN NA NABUHAY-LIWAT NAGKAKAN
KAIBA KAN MGA DISIPULOS SA BAYBAYON KAN TIBERIAS

Lider: Sinasamba asin inoomaw mi Ika, Kagurangnan.

Gabos: Nin huli sa Pagkabuhay Mo liwat,
tinubos Mo an kinaban. Alleluia!

Lider: Tataramon kan Dios (Juan 21:10 – 12)

Sinabihan sinda ni Jesus. “Magdara kamo digdi nin nagkapirang sira na bago
pa sana nindong madakop.” Kaya naglunad si Pedro sa sakayan dangan ginuyod sa
baybayon an hikot na pano nin darakulang sira – syento singkwenta y tres gabos.
Maski kadakul an sira, dai na gisi an hikot. Sinabihan sinda ni Jesus, “Madya asin
pamahaw na kamo.” Mayo nin si isay man sa mga disipulo na nagahas maghapot
kun si isay Siya, nin huli ta aram ninda na Siya an Kagurangnan.

Commentator:
Pakatapos kan pagpakoan ki Jesus sa Krus, an mga apostoles nagbalik sa dati
nindang gawe nin pagkabuhay. Sa pamilyar na dagat kan Galilea, an mga ekspertong
parasira nagngalas ta mayo sinda nin nadakop na sira. Hale sa baybayon, sinabihan
sinda kan Kagurangnan na Nabuhay-Liwat asin giniyahan an saindang mga hikot
sagkod na mapano ini. Mantang nag-andam Siya nin pamahawan para sainda,
binasog Niya an saindang mga puso asin nanuga na papakakanon man sinda sa paagi
nin paggibong mga disipulo sa Ngaran Niya. Inapod Niya sinda sa interong bagong
paagi nin pagsira – an pagsira nin mga tawo.

Commentator:
Amang nasa Langit, Burabod nin gabos na katotoohan, an banwaan na dating
yaon sa kadikloman nagdangog sa Saimong Tataramon asin nagsunod sa Saimong
Aki kan Siya Nabuhay-Liwat. Hinanyoga an pamibi kaining bagong mundag na
banwaan asin pakusoga an Saimong Simbahan sa pagsimbag sa Saimong
pangapodan. Magbangon logod kami asin magluwas sa liwanag kan aldaw
tanganing magtindog sa Saimong presensya sagkod na magbanaag an buhay na
daing kasagkoran. Ini hinahagad mi huli ki Cristo na samong Kagurangnan. Amen.

Lider: Kamurawayan sa Ama, sa Aki asin sa Espiritu Santo.

Gabos: Siring sa kapinonan asin ngonian, magdanay man asin sa kapanahonan
kan mga panahon. Amen.
 Ika-Sampulong Estacion
PINATAWAD KAN KAGURANGNAN NA NABUHAY-LIWAT
SI PEDRO ASIN IPINAGKATIWALA SAIYA AN PAGPAKAKAN
SA SAIYANG MGA KARNERO

Lider: Sinasamba asin inoomaw mi Ika, Kagurangnan.

Gabos: Nin huli sa Pagkabuhay Mo liwat, tinubos Mo an kinaban. Alleluia!

Lider: Tataramon kan Dios (Juan 21:15, 17b, 19b)

Pakapamahaw ninda, naghapot si Jesus ki Simon Pedro, “Simon, aki ni Juan,

namomotan mo Ako labi pa ki sa mga ini?” Nagsimbag siya, “Opo, Kagurangnan, aram
Mo na namomotan taka.” Sinabihan siya ni Jesus, “Pakakana an mga kordero Ko.”
Namondo si Pedro huli ta hinapot siya ni Jesus nin ikatolong beses kun namomotan niya
si Jesus, kaya sinabihan niya si Jesus, “Kagurangnan, aram Mo an gabos; aram Mo na
namomotan taka!” Sinabihay siya ni Jesus, “Pakakana an Sakong mga karnero. Dangan
sinabihan Niya si Pedro, “Sumunod ka Sako!”

Commentator:
Inatubang kan Kagurangnan na Nabuhay-Liwat si Pedro na an makakasusupog
na makatolong pagnegar namamate pa sa saiyang puso. An mga kahapotan ni Jesus
nakatabang ki Pedro tanganing maolian asin na kugoson an saiyang bagong misyon na
atamanon asin pakakanon an mga karnero. An saindang pag-olay nagpapagiromdom
sato na an pagpapatawad pirming yaon, dawa sa pinaka-magabat na kasalan na satong
naginibo. An maimbong na kugos nin pagpapatawad nagpapakusog sa satong
pagmawot na magin mga tagapagdara nin kapatawaran asin kaomayan sa Espiritu ni
Jesucristo. Pagkamoot sana an pwedeng makadaog kan kapurisawan sa kasalan asin
padaya. Pagkamoot asin pagpatawad sana an makakabilog sato.

Commentator:
Ama, panoa an samong mga puso kan init nin Saimong pagkamoot asin kan
kamawotan na makamtan an hustisya para sa samong mga tugang. Sa pagheras kan
mga karahayan na itinao Mo samuya, makamtan logod niamo an hustisya asin
pagkapantay-pantay kan lambang tawo, katapusan kan gabos na pagkabaranga, asin an
sosyedad na pinamugtak sa pagkamoot asin katoninongan. Warasan ini samo huli ki
Cristo na samong Kagurangnan. Amen.

Lider: Kamurawayan sa Ama, sa Aki asin sa Espiritu Santo.

Gabos: Siring sa kapinonan asin ngonian, magdanay man asin sa kapanahonan kan
mga panahon. Amen.
 Ika-Kagsarong Estacion
SINUGO KAN KAGURANGNAN NA NABUHAY-LIWAT
AN MGA DISIPULOS SA KINABAN

Lider: Sinasamba asin inoomaw mi Ika, Kagurangnan.

Gabos: Nin huli sa Pagkabuhay Mo liwat,
tinubos Mo an kinaban. Alleluia!

Lider: Tataramon kan Dios (Mateo 28:19-20)

“Paduman kamo sa gaos na tawo saen man na lugar; gibohon nindo sindang
mga disipulo Ko. Bonyagan nindo siya s ngaran nin Ama, asin nin Aki, asin nin
Espiritu Santo. Tukdoan nindo sindang magkuyog kan gabos na ipinagboboot ko
saindo. Giromdomon nindo ini: danay Akong kaiba nindo sagkod sa kataposan kan
panahon.”

Commentator:
Sa itaas kan bukid itinao kan Kagurangnan na Nabuhay-Liwat an “Dakulang
Kasugoan” sa mga disipulo na magduman sa bilog na kinaban. Marerealisar niato na
kita an mga nag-ako kan misyon na ini na pano nin pagtubod: an satong mga ginikanan
kinugos an pagtubod kan mga Apostoles na iyo an enot na mga saksi kan Pagkabuhay-
Liwat. An pinakadakulang kasimbagan na maitatato niato sa siring na pamana iyo an
satong dedikasyon sa bagong ebanghelisasyon kan satuyang presenteng kultura.
Tugotan niato an Kagurangnan na Nabuhay-Liwat na bagohon an bilog na gawe nin
satong pagkabuhay, tabangan kita na ebalwaron giraray an lambang kabtang kan
satuyang buhay sosog sa mga pinapahalagahan kan Kahadean kan Dios.

Commentator:
Dios kan gabos na linalang, na an orog na kapangyarihan nagbuhay-liwat ki Jesus
sa mga gadan, magdanay Ka sa komunidad kan mga disipulos na ini na inapod Mo sa
paglaom sa mamurawayon na pamana kaiba kan mga banal. Pakusoga kami sa
kapangyarihan kan Espiritu na maglakaw asin gibohon na disipulos an gabos na
katawohan, na sunodon an gabos na ipinagboot samuya ni Jesucristo, asin na maaraman
na danay Siyang yaon sa kaibahan niamo sagkod sa kataposan kan panahon, namimibi
para samo, nabubuhay asin naghahade sa kaibahan Mo sa kapangyarihan kan Espiritu
Santo, ngonian asin sa kapanahonan kan mga panahon. Amen.

Lider: Kamurawayan sa Ama, sa Aki asin sa Espiritu Santo.

Gabos: Siring sa kapinonan asin ngonian, magdanay man asin sa kapanahonan
kan mga panahon. Amen.
 Ika-Kagduwang Estacion
AN KAGURANGNAN NA NABUHAY-LIWAT
NAGSAKAT SA LANGIT

Lider: Sinasamba asin inoomaw mi Ika, Kagurangnan.

Gabos: Nin huli sa Pagkabuhay Mo liwat,
tinubos Mo an kinaban. Alleluia!

Lider: Tataramon kan Dios (Markos 16:19 – 20)

Pakatapos na kaolayon kan Kagurangnan na Jesus an mga disipulo, isinakat

Siya sa langit asin nagtukaw sa too kan Ama. Nagralakaw an mga disipulo asin
naghulit saen man na lugar. Tinabangan sinda kan Kagurangnan asin pinatunayan
na an saindang ipinaghuhulit totoo huli sa mga milagro na saindang ginibo.

Commentator:
Dai pigladawan kan Banal na Kasuratan an Pagsakat sa Langit ni Jesus bilang
aldaw nin kamundoan. Mantang nagtitingkalagsa langit, an mga disipulos naranga
kan nagdadanay na presensya kan Kagurangnan. Nagbalik sinda sa harongna
saindang pigdadagosan, kaiba ni Maria, an ina kan Kagurangnan, tanganing mamibi
bilang pag-andam sa saindang misyon. Sa “orihinal na novena” na ini, padagos
kitang makimaherak sa Kagurangnan na Nabuhay-Liwat na magin sentro kan
satuyang buhay asin na magdanay kita bilang mga maogmang banwaan na
naglalakbay.

Commentator:
Dios na daing kasagkoran, badoi kami kan Saimong kapangyarihan. Sa
pagliwanag kan mata kan samuyang mga puso, masabotan logod niamo an daing
sukol na kadakulaan kan Saimong kapangyarihan na naghihiro samuya na mga
nagtutubod. Sa kusog na ini, maisog logod niamong maibalangibog an Marhay na
Bareta kan samong kaligtasan sa lambang saro. Ini hinahagad mi huli ki Cristo na
samong Kagurangnan. Amen.

Lider: Kamurawayan sa Ama, sa Aki asin sa Espiritu Santo.

Gabos: Siring sa kapinonan asin ngonian, magdanay man asin sa kapanahonan
kan mga panahon. Amen.
 Ika-Kagtolong Estacion
SI MARIA ASIN AN MGA DISIPULOS NAGHALAT
SA KWARTO SA ITAASSA PAG-ABOT KAN ESPIRITU SANTO

Lider: Sinasamba asin inoomaw mi Ika, Kagurangnan.

Gabos: Nin huli sa Pagkabuhay Mo liwat,
tinubos Mo an kinaban. Alleluia!

Lider: Tataramon kan Dios (Gibo 1:13a, 14)

Pag-abot sa harong na pinagdadagosan ninda, naglaog sinda sa kwarto sa itaas.

Nagdanay sinda na sararo sa pagpamibi kaiba an mga babae, asin si Maria na Ina ni
Jesus sagkod an mga tugang na lalaki ni Jesus.

Commentator:
Sa bilog na kasaysayan kan Simbahan, pirming igwa nin mga gibong sa-
Apostolesna dedikado sa pagpamibi asin paghorop-horop asin iba pa, na
nagbubunga nin pagbabago. Sa pagbalyo niato sa pintoan kan bagong millenio,
minatingkalag kita sa “Kwarto sa Itaas” bilang sarong simbolikong lugar kun saen
kita magbabalik-balik tanganing magin kitang mga “contemplatives in action.” Bilang
mga tawo na parehong mapinamibi asin pano nin enerhiya sa paglingkod sa
Ebanghelyo, danay man kitang maghalat para sa pagdatong kan Kagurangnan na
Nabuhay-Liwat, na an kalayo kan Pagtubod dayaday na buhay sa satuyang mga
puso. An Kagurangnan sana an makakapakusog kan satuyang espiritu asin
makakapanibago sato sa mga ministerio na minabulos sa satuyang Bonyag asin
Kumpil.

Commentator:
Amang orog kabanal, lilingya an Saimong Simbahan na nagkakatiripon digdisa
pagsamba na pano nin pagpamibi arog kan enot na mga disipulos asin ni Maria
duman sa Kwarto sa Itaas. Tugoti na maotob niamo, nin may kaogmahan kan
Espiritu Santo, an gabos na itinao Mo samuyang trabaho sa kinaban. Maogma logod
kaming makaheras sa mga kasakitan ni Cristo tanganing makapag-ogma man kun
ipahayag na an Saiyang kamurawayan. Ini hinahagad mi huli ki Cristo na samong
Kagurangnan. Amen.

Lider: Kamurawayan sa Ama, sa Aki asin sa Espiritu Santo.

Gabos: Siring sa kapinonan asin ngonian, magdanay man asin sa kapanahonan
kan mga panahon. Amen.
 Ikakag-Apat na Estacion
AN KAGURANGNAN NA NABUHAY-LIWAT
SINUGO AN ESPIRITU SANTO

Lider: Sinasamba asin inoomaw mi Ika, Kagurangnan.

Gabos: Nin huli sa Pagkabuhay Mo liwat,
tinubos Mo an kinaban. Alleluia!

Lider: Tataramon kan Dios (Gibo 2:2 – 4)

Dangan bigla sanang nagkaigwa nin tanog hale sa langit siring sa hagobohob nin
makusog na doros. Napano kaini an bilog na harog na pinagtitiriponan ninda. Dangan
nahiling ninda an garo mga dilang kalayo na naghugpa sa lambang saro sainda. Sinda
gabos napano kan Espiritu Santo asin nagpoon magtaram sa manlaen-laen na lengwahe
siring sa ipinataram sainda kan Espiritu.

Commentator:
Sa kapangyarihan kan Espiritu Santo nagluwas an mga disipulo hale sa Kwarto sa
Itaas pasiring sa mga tinampo asin sasadan. An Espiritu iyo an nagtulod sainda
tanganing darahon an mensahe saen man na lugar, sa mga lugar na pamilyar man o
bako, dai maontok sagkod na makaabot sinda sagkod sa mga puro kan kinaban.
Binadoan kita kan parehong Espiritu. Inaapod kita na magin tagapagdara kan Marhay
na Bareta asin magin mga saksi, harayo man o harani, saen man kita magduman. An
Espiritu iyo pirmi an nangengenotan sa sato, inaandam an dalan asin pinapakusog an
satuyang mga puso tanganing magin matinaong mga lingkod kan Kagurangan na
Nabuhay-Liwat asin danay na naggigiya satuya. An Pentecostes sarong matagal asin
padagos na pangyayari. Makimaherak kita sa Espiritu Santo na bagohon an lawog kan
kinaban huli kan pagbago sa sato.

Commentator:
Dios Ama sa Langit, huli kaining espiritual na paglakbay, pinagiromdom Mo samuya
an kapanoan kan misterio kan Saimong ipinahayag na pagkamoot. Hilnga an Saimong
banwaan na nagkakatiripon sa pagpamibi, bukas sa pag-ako kan kalayo kan Espiritu. Mag-
erok logod sa samuyang mga puso asin paraon an pagkabaranga kan tataramon asin dila.
Sa sarong tingog asin sarong kanta, omawon logod niamo an Saimong Ngaran sa
kaogmahan asin pasasalamat. Warasan ini samo huli ki Cristo na samong Kagurangnan,
asin sa kapangyarihan kan Espiritu Santo, ngonian asin sa kapanahonan kan mga panahon.
Amen.

Lider: Kamurawayan sa Ama, sa Aki asin sa Espiritu Santo.

Gabos: Siring sa kapinonan asin ngonian, magdanay man asin sa kapanahonan
kan mga panahon. Amen.
HURING PAMIBI

PADI: MAMIBI KITA…

AMA, NAMOOT KA SA KINABAN,
TANGANING SAKAPANOAN NIN MGA PANAHON,
SUGOON MO SAMO AN BUGTONG MONG AKI
NA PARALIGTAS.
ALAGAD TANGANING MAOTOB
AN SAIMONG KAISIPAN,
IPINAUBAYA NIYA AN SADIRI SA KAGADANAN
ASIN SA PAGBANGON HALE SA MGA GADAN,
RINUMPAG NIYA AN KAGADANAN,
ASIN BINAGO AN BUHAY.

ASIN, TANGANING MABUHAY KAMI

BAKO NA PARA SAMUYA MAN SANA,
KUNDI PARA SAIYA NA NAGADAN
ASIN NABUHAY-LIWAT PARA SAMO,
SINUGO NIYA AN ESPIRITU SANTO
GIKAN SAIMO, AMA,
BILANG TINAGBA SA MGA NAGTUTUBOD,
TANGANING SA PAGHAMAN
KAN GIBO NIYA SA KINABAN,
MAUTOB AN LUBOS NA PAGPABANAL.

Banwaan: Amen.

PADI: An Kagurangnan mapa saindo.

Banwaan: Asin sa saimong espiritu.

PADI: Bendicionan man logod kamo kan Dios na makakamhan: an Ama, +

asin an Aki, asin an Espiritu Santo.

Gabos: Amen.

PADI: Tapos na an satuyang selebrasyon, lakaw kamo sa pagsaksi kan

misterio nin pagkamoot ni Jesus satuyang Kagurangnan.

Gabos: Salamat sa Dios.

HURING AWIT