LAMPI TAWH KIPATNA

1962 kum pan Galkap kumpi hong khan ciangin Tedim gam nitum na gungal lam
ah motor lampi thak khat om ding hi cih thu om hi. Tua motor lampi in Tedim pan
Lamzang ah, tua pan in Losau lui ah, tua pan in Kaptel Lei ah, tua pan in Thawizang ah,
tua pan in Kaptel ah, tua pan in Tuitawh ah, tua pan in Lentang ah cih bang in kizik ding
hi ci in tungsiah pan in thukipna nei hi.

1963-1965 kum sung in Tedim pan in Lam tawh kipan in 1966 kiim naipawl in
Lamzang khua kitun hi. Lamzang khua a tun ciangin Kaptel lam ah to lo in, Laaitui lam
ah lampi tawh ding vai kikupna kinei a, tungsiah ah a gen dingin anuai aa teng kiseh hi.

1. Pu Thuam Kam
2. Pu Thawng Khua Vungh
3. Pu Tun Za Nang
4. Pu Vungh Kham
5. Pu Pau Za En te ahi hi.
Hih a tung a mi 5 teng Tedim tungsiah zum ah 20.10.1966 kum in va pai in ulian
te kiangah ‘Ko Laaitui te in zong motor lampi deih ka hih manun Lamzang pan in
Mansuang gunlei ah, Laaitui dong ah to nuam ka hih manun Lamzang thangsiah Kaptel
lampi hong tawhpih zo nawnlo ding ka hih manun kumpi thunial hilo hi ung’ ci in va gen
uh hi. Tedim ulian te in “No kumpi thunial! Na khut-ngawng uah sikkhau hong kikhih
ding, thong taak ding hi uh teh” na ci hi. Tua ciangin amau zong “Laaitui khua zang tat
nading thong-inn na lam phot un” ci in hong ciah uh hi.
Hih Tedim aa pai te’hong ciah zawh a ni 7 ni ciangin Lamzang pan in Laaitui
lamah lamtawh kipan in khuazang in eimau anguai tek guang in, tu leh hei tawh kithawi
in Lamzang pan in Gun dong kisem in kum khat sungin kizo hi. 1967 April tha in Gun ah
Lam kong hon pawi Gun ah kibawl a, Sial 2 kigo in, U Hau Khua Pau in hong honsak hi.
Tua lai aa hausa Pu Khup Za Thang ahi hi. Hih a tung aa tawh kisai in a masapen Lam
kong honna ahi hi. 1968 kum in Mansuang gunlei motor lei kibawl hi.

1969 December tha panin Gun pan Laaitui dong khuazang mah in eimau anguai
mah tawh kisem to in, 1970 kum in Sialthah ciang kitun hi. 1971 ciangin Khua kitun a,
Lam kong honna in Sial 4 ki go hi. Motor 7 hong pai a, motor hong pai ciilna ahi hi. Tua
akipan khua ah motor hong pai tawntung hi.

1976 kum in Laaitui pan in Lentang dong khuazang in motor lam kito leuleu in
kum khat sung mah in kizo leuleu hi. Tungsiah pan in Phuan Phiu Zii sum Ks.4500 hong
pia hi. Tua laitak khua hausa Pu Vungh Khua Lian ahi hi.