IH BIAKINN PUTPIT TE IH KOI CI ZAT HIAM?

1Tim.5:1; Jos. 8:18

 Rev. Pau Mun Thang
(Church Pastor, EBC Laaitui)

Minam dangkhat ii laibu khat ka simkhak leh Pawlpi khat a Pasian' nasem khawm, Pastor
nihte kitotna, kikona, ki engkona, kitaihna, ki kapna bekbek ka sim kha aa, tua tungtawn in ka
phawk thu pawlkhat kong gen nuam hi. Mikim khat te'n Pulpit pen:
1. Thugen siam kidemna in zang uhhi. Pastor nih leh thum omna Pawlpi kimkhat te ah
a Pastor te in kei thugen siam zaw ingh, ci in Pulpit tung kidemna in zang uh aa, Mipi te'n
zong tua pa siam zaw, tua pa siamkei zaw ci in mat na piapia thei uhhi. Tua pen Pulpit
zatzia a man hetlo, a mulkimhuai zatzia ahihi.

2. Hanmual in zang uhhi. Pastor leh Upa kimkhat Pulpit tungpan hangthei uhhi. Mipeuh
koko mai, kuamah inlah dawnglo, Hon tawngtawngte dawngleng ei tawh a kibang,
dawngkei leng aman tangzaw ci in dawnglo uh a, ih pulpit pen hanmual himai ci uhhi.
Tua dan aa Pulpit zatzong ngaihsun theileng mulkim huai mahmah hi.

3. Ak kitu bangin Pastor te' ki tukna mun suaksak uhhi. Akno a kitu sakte sum
kikham uh aa, azo zawzaw in sumngah uh aa, a lel zawzaw sum liau uhhi. Pawlpi
pawlkhat te ah, Upa ut kimkhat ten Pastorte akgawm in gawm aa, Pulpit ah kitu sak aa,
azo zawzaw apu in Upa ngah aa, mipi kikhawm ten Pulpit a kitu Pastorte en zihziah uhhi.
Tua zong Pasian' vai hi hetlo hi.

4. Pawi etna mun suaksak uhhi. Boxing kitumte akhat agum om in, a khat zong agum
om kawikawi hi. Akhat zaw in alawm' natna a tupkhak leh aminlo in pahtawi ziahziah
uhhi. Akhat zong tuabangmah a hihi. A zo zawzaw sum tampi pia uhhi. Pawlpi kimkhat
Pastor nih leh thum a omnate ah Pulpit thugen napan kitum ziahziah uhhi. Akhat a gum
om in, akhatzong agum om veve hi. Ama' gup zaw, a mah abuanpa' natna ding gen aa,
kamkha mahmah a genkhak teh, amah a gumte nui lialua uh aa, tuakal in a khatpa in
athuh kik nading kamkha theithei na kankan in, ama' genkik hunteh amah a gumte nanui
lualua leuleu hi. Azo zawzaw a khasum leh a za khangsak uhhi. Mipi te'n bel biakinn
sung pen pawi etna mun suaksak uhhi. Tuadan zong adah huai mahmah dinmun hi.

5. Galte kapna phualpi suaksak uhhi. Pasian in Joshua aw na ciangkhut Ailam ngat in
ci napi, Pawlpi kimkhatkhat te'n a ciangkhut uh, Pawlpi lam ngat uh aa, Pulpit lam ngat
in, alawm Pastor pih te' lampeuh ngat uhhi. LST tawh mipi a hanthawn ding kimlai, LST
tawh a mau leh a mau Pastor teng hong ki kapkap tadih uhhi. Mipi te'n tua Pastor
kikapkapte ki gal et zihziah mawk thei hi. LST tawh lah kikap thuhoihlo nono tawh lah
kikap, akha nono, a engkona nono tawh pulpit ah ki kap ziahziah uhhi. Pulpit pen Pastor
teng kikapna galphualpi suaksak thei uhhi. Khat in alawm' mawhna LST tawh kap, khat
in alawm' mawhna LST mahtawh kapkik leuleu kikap ziahziah uhhi. Ih galvan, ihthau ih
namsau biakinn sung leh Pulpit lam ngatlo in, galphual lam ngatding a hihi.
Pulpit siangtho bangci zatding:
(1) LST Pasian' thu mantak a genna ding mun ahihi.
 (2) Mite' pianthak nading Lungdamna thu genna ding mun hi.
(3) Piangthak sate Pasian' sungah picin nading, lamman hilh nading mun hi.
(4) Khat leh khat tha kipiak nading mun ahihi.
(5) Khat leh khat thu kingetsak nading mun ahihi.
(6) Pasian' vangliatna leh a hoihna genkhiat nading mun ahihi.
(7) Itna, mawh kimaisakna, ki niamkhiatna-thu gen nading mun ahihi.
(8) Mikap nadingin LST pen thauvui thautang hilo hi.
(9) Mikhat peuh ngimna tawh LST sim ngei kei in.
(10) Tuu ten tuidam luan bek dawn thei uh aa, akhauh luante kihta uhhi.(Note: Thugen ih
siamloh man in,mi koko tawh ih kibat hun om thei hi. Mi kawkkawk tawh kibat hun
omthei hi.thugen ih siamloh man aa genkhelh te phamawh lo hi,lungsim ah a sia ngaihsut
na ngiat tawh,ih genloh ding cihna hi. Ei angai tenzong ei' phattuam nading,bang omhiam
cihding hibek aa,banggen khelh nei hiam ci aa,bildawh aa matlak ding hi zenzen lo hi cih
thupi hi.)
(11) Pasian' deihloh mawhna thu ih genteh, Pasian in adeihloh zia leh a lauhuai zia gending hi
aa, tuanu tuapa mawhna ci in kawklo ding cihna hi.
(12) Mawhna lauhuaite ih gen teh, ih muhdah mikhat tua dan mawhna nei in, bulhlo ding hi
hang.(Note: Ken Pastor te' thugen khempeuh man hiam? Manlo hiam?sia hiam?hoih
hiam? Cih sit zenzen lo in, ka Pastor sepzawh kum 20 sungin tusim lo gennai keng, gen
taktak lah sawm naikeng, ka laibu simna tungtawn aa,kaphawk khak pak bek a hihi.)
Topan' atel siam, azangsiam dingin laisim mimal kim Thupha hongpia hen!
(Thumaan Teci, July, 2020 pan kila kik hi)