HOMILETIKA

PREPARA HUSI :

Natercia Agostinho dos Santos

Eskola

Centro Formação Teologia,

Igreja Protestante Iha Timor Lorosa’e

(CFT-IPTL)

Tinan Akademiku

2023
Sarani sira mak Nain Jezús hadomi, mai ita hare hamutuk Na’i Maromak Nia
liafuan, ba iha dader ida ne’e, hau sei foti husi Antigo Testamento iha Salmo
23:1-6 ne’ebé mak ita sei aprende oinsa mak lalaok Nai Maromak nian hanesa
bibi atan diak iha ita nia moris.
Mai ita le’e hamutuk iha Salmo 23:1-6

Ho esperiensia ida ne’e mak ita nia liurai David hasoru iha nia situasaun moris, (1)
Liurai David hatete katak Nai Maromak maka sai hanesan bibi atan diak ida ba iha
ita nia moris no la iha buat ida mak falta ba ita.

(2) Liurai David mos fo hatene ba ita hotu katak Nai Maromak mak bibi atan diak ida
ne’ebé nunka husik nia bibi sira la’o mesak, Nia sempre lori nia bibi sira toba iha dut
matak, iha be lihun no fatin ne’ebé mak hakmatek. Hanesan ita hatene ona katak
bibi atan diak maka Nai Maromak, no bibi sira maka ita hotu ne’ebé maka agora
dadaun hamutuk hela iha fatin ida ne’e no rona hela Maromak Nia liafuan.

(3) Liurai David fo hatene ona ba ita hotu katak Nai Maromak ne’ebé mak sai
hanesan ita nia bibi atan Nia fo moris fali mai ita, no Nia sempre kuidadu ita, Nia tau
matan ba ita, no Nia sei nunka husik ita hotu nia moris ida ne’e, iha situasaun saida
de’it maka ita hasoru, Nai Maromak sempre akompaña nafatin ita hotu-hotu nia
moris, tuir dalan ne’ebé los tamba Nia naran.

(4) Liurai David hatete ba ita hotu katak lalika tauk, no lalika hakfodak maske ita la’o
iha foho let, ka nakukun laran ka iha situasaun saida deit, ita hotu lalika tauk ba buat
at sira, ita fiar katak ita nia Nai Maromak ne’ebé sai hanesan bibi atan Nia sempre
akompaña nafatin ita, no lao hamutuk ho ita hotu-hotu iha fatin ne’ebé de’it no sei la
husik ita la’o mesak, no Nia sei lidera no kuidadu nafatin ita iha ita nia lao fatin no
moris tomak.

(5) No Nai Maromak ne’ebé ita nia bibi atan Nia mos sei prepara meja ida ba ita, iha
ita nia inimigu sira nia oin, no kose mina ba ita nia ulun no ita nia kopu nakonu res-
resin.

(6) Liurai David nia liafuan ne’e fo hatene ona katak tebes se ita hotu ne’ebé mak
moris nu’udar ema fiar nain, ne’ebé hatene ona katak Nai Maromak mak sai
hanesan bibi atan diak ida ba ita hotu nia moris, tamba ne’e mai ita hotu hamutuk
nafatin, hodi tau fiar nafatin ba Nai Maromak Nia liafuan ida ne’e hodi halo tuir iha ita
hotu nia moris tomak, no ita hotu fiar katak Nai Maromak sei fó moris diak no domin
ba ita hotu nia moris tomak, ita hotu nia moris ida ne’e sei hela hamutuk ho Na’i
Maromak iha Nai Nia uma to’o rohan la’ek.

Ida ne’e mak Nai Maromak Nia liafuan ba ita hotu iha dader ida ne’e, no mos ba
maluk sira hotu mak Nain Jezús hadomi keta haluha iha pontu importante rua mak
presiza ita hotu halo tuir nafatin iha ita nia moris:

1). Labele tauk no labele hakfodak ba iha situasaun saida de’it maka ita hasoru iha
ita nia moris, ita nafatin fiar metin ba Nai Maromak no moris tuir nafatin Nai Nia lia
los.
2). Entrega ita nia moris tomak, ita nia preokupasaun hotu ba iha Nai Maromak no
fiar katak Nai Maromak sei fó bensaun ba ita nia moris tomak.