SIMEIKHU KARTIN CHHUAK THINGSULTHLIAH

Dt. 18 May 2013 (INRINNI) PHEK- 2

editorial :

PASS LAWM HI Jt. Editor Sawmtea Pu, H/A Kan hriat angin Thingsulthliah Teachers Association leh V.C. tangkawp chuan kumina HSLC leh HSSLC pass te leh hmundanga zir, Top ten a lang phate lawmpuina leh chawimawina hun an hmang dawn a, a lawmawmin zirlaite fuih tangtu tha tak a ni ngei ang. Hetih lai hian Pass lawm kan tih dawn chuan ngaihtuah kim erawh a ngai hle dawnin a hriat theih thung. A hmasa berah chuan Pass lawm hi Kumtin buatsaih nise a duhawm hle mai. Tuna a lan danah chuan kan pass that kum leh Mizoram huapa langpha kan chhuah kum deuh chauhin kan buatsaih niin a lang a, Kan pass chhiat deuh kumah pawh buatsaih ni thei se, Zirlaite inthlahdah deuh kumah pawh Nu leh pate chu kan tang mar reng tihna a ni dawn a. Tuna kan kal danah hi chuan Pass chhiat deuh kuma pass awm chhunte kan ti hrilhhai deuh a ni. Pahnihna atan chuan, khawdanga kal chu Top ten a langpha chauh kan chawimawi a, hei hi a fuh hlel deuh mai thei. Kan khawchhunga zirna In kan neihte kan hlutpui vang pawh a ni mai thei a. Chutih laiin chhungkaw khawsak danin a zir loh vang emaw, engvang pawhin mahni khuaa kal chak em em hmundanga kal lo thei lo an awm thei, chung mite chu kan khaw mi leh sa tho an ni a, hetiang kan buatsaih dawn a nih chuan kan huam tel ngei hi a tha awm e. Pathumna atan chuan Zirna kan hlutpui a hlawhtlingte kan chawimawi chuan HSSLC mai bakah a chunglam, B.A., M.A., etc. te hi thlauhthlak loh a tha hle ang. An zavai a kan ti thei lo a nih pawhin rampum huapa mi hmingtha tal chu tih ve thin nise. Hun kal tawhah khan B.Sc(Chemistry) ah Mizoram University pumpuia Topper kan nei tawh a, mahse, ama tawngkam angin A va lawmawm ve tih tawngkam tha bak a hlawh tlat lo, MZP hruaitu thenkhatin an inah kalin an chibai a, chu zawng chu lawmpuina a dawn a ni, a lainat thlak khawp mai. Hetiang hi thil thleng thei a nih avangin zirna lama mihlawhtling te kan lawmpui rual hian mi rilru natna kan siam palh thei tih hriaa ngaihtuahna kan tihzauh a pawimawh tak zet a ni. A tawp berah chuan, Khawtlang huapa pass lawm kan tih chuan, Kumtin i buatsaih ang u, Tin, kan khawtlang mi leh sa an nih chuan i lawr kim hram hram ang u. Zirna hmun ramri kan kham hian thiltha aiin thalo leh inremlohna a hring thei a ni. Kan khawchhunga zirna In kan neih bak chunglamah rampum huapa mi hmingtha kan neih chuan i telh ve ang u.

VC LEH KHAP TLAT VC Information Mike atangin chumi khami chu khap tlat a ni tih thu, thil chi hrang hrang kan hre thin a. A Sawt leh sawt loh chu mipui ten kan hriaiin a rinawm. Khap tlat thu khauh taka puan hi endik zui a ngaih bakah mi ten thil an khap tawh dan atanga a sawt leh sawt loh zir nachang pawh hria ila. Mizoram sorkarin Krismas leh Kumthar laia Halpuah hal a khap khan a hma daih, sumdawngte pawhin vairam atanga an lak hmain hrilh lawk a ni a. A sawt zia kan hria. Chutianga khap hlawhtlin kan duh tak tak a nih chuan entirna pakhat tarlang ila, Kum kalta khan Rawtuai khawrh fe hnuah Khap thu puan a ni a. Kumin-ah pawh kan Khap tlat leh dawn a nih chuan, (Rawtuai thar a hla tawh lova) tun atang hian puan lawk nise, Bazar Association hnenah an member tumah rawtuai khar lo tur te, Bus & Maxi cab Association te hnenah tumah rawtuai phur lo tur leh a khar leh phur te chu hrem tur thu sawi lawk nise. Nikum a puan ringawt ang ai chuan Khap duh tak tak kan nih chuan a sawt zawk a beisei awm.
Mipuite pawh nakin a mau duh leh tho si, vang khawpa rawtuai khawrh hi sim a tha hle. Rawtuai khawrh a pawisa hmuh tum ai chuan, kumtirah Huan/Lo ram, chhungkaw chawm theihna tur inbuatsaih lawk nachang hriat hi a mipuitling hna in a changkang zawk in a rinawm.
Chutiang zelin, zirlai naupang ten Ruihhlo- Damdawi an tih lohna turin hmalakna tam tak a awm laiin Damdawi zuartu ten naupang hnena an hralh loh nan tun aia ruahmanna felfai tak a siam theihin a rinawm bawk a ni.

CONTINUOUS UPDATION OF ELECTORAL ROLL Electoral Roll-a hming thunluh(addition), paih(deletion), siamthat (correction) leh 9-Tawi A/C huam chhunga mahni awmna Polling Station thlak(transposition) dil duh tan mahni bialtu BLO hnenah Form hman lai mek hmangin ni 29/5/2013(nilaini) thleng dil theih a ni. Heng dilna lut te hi AERO (BDO) hmaah Hearing neih tur a ni ang a, Hearing hun hi ni 10 & 11 June 2013-ah BDO Office-ah neih a ni ang. Thingsulthliah, Tlangnuam, Seling leh Tuikhurhlu te tan ni 10/6/2013 Dar 10:00 am-ah BDO Office-ah Hearing hi neih tura ruahman a ni.
TRUCK ACCIDENT Ni 12/5/2013(sun) chhun dar 1:00 vel khan Seling Aizawl Road Pu Runluaia leh Pu Thangseia te In inkarah Truck Ashok Leyland AS 09- DD 1344, A.Bhola, Silchar motor, Champhai pana kal, DAP phur chu chesualin kawng-thlangah Ft 200 lai a lum a, Driver leh Handleman te vanneih thlak takin an na lutuk lo hlauh. Motor chetsual chhan hi kawng laia 207 motor chhia ding a helna lamah kawngsir lei chhuat nem lai a rah avanga accident a ni. Motor lum hian Pu Thangseia In(Assam-type) ban pakhat pawh a hrut tel a, motor pawh a chhe nasain a thil phurh pawh a darh nasa hle. A tuk lamah mi tlawmngai ten motor bungraw phurh hi an thiarchhuah sak a, motor pawh lakchhuah a ni.