"Balaki ko Day Samtang Gasakay Tag Habalhabal"

by Adonis G. Durado
Balaki ko day
Samtang gasakay tag habalhabal.
Idat-ol og samut
Kanang imong dughan
Nganhi sa akong bukobuko
Aron mas mabatyag ko ang hinagubtob
Sa imong kasingkasing.
Sa mga libaong nga atong malabyan.
Gaksa ko paghugot
Sama sa lastikong
Mipungpong sa imong buhok.
Ug sa kainit sa imong ginhawa
Gitika kining akong dughan.
Ang mga balili unya
Nga naghalok sa tong bitiis
Isipon tang kaugaligong mga dila.
Dayon samtang nagkaatulin
Kining atong dagan,
Maminyong tag maghangad
Ngadto sa kawanangan
Aron sugaton ang taligsik
Sa uwan, dahon, ug bulak.
Usa ka Gabiing way Sud-an ug way Bituon ug sa akong nasabtan
Ang Angay basulon mao ang kulafung gilaklak ni papa
-Adonis Durado
nagmirida na daan ang kagabhion
naghikog ang iro sa kaugalingon
niyang paghot
si papa miuli nga hubog
si mama galagot
sa bag-o niyang buhok
animal tong bayuta
gihungkab ni papa ang mga kaldero
mga plato
ang nahabilin nga kan-on dukot
ug higot na lay nahabilin sa soriso
napungot si papa
ug misid-ok ang buwan
milapos sa bintana ang kaldero
basotasakutsaraplato
extra large ang t-shirt ni mama
apan gapanti ra
dihang migawas sa kuwarto
naunsa gud ka
nganong high-blood man ka
pistekolera wa kay nada
gigutom ta wa kay giluto
ang tingog ni papa
miabot sa ikatulong bungtod
sa kanturatoy
gihiwi-an ni mama si papa
ngano unsa guy ipalamoy nako nimo
naa diay kay gideposito
mouli ra man gani kag mokayat
unsay labot sa pagkayat nako nimo
inataya ka
gitarget ni papa og kutsilyo si mama
ug kalit lang morag namabdos si mama
kay misurok ang iyang dugo
ug nangala siya og kutsilyo
giibot ni mama ang kutsilyong mitapsing
sa patik nga danny forever
sa iyang bukton ug giataki si papa
blag tsak tsak
tsug tsak bug bug ugh
tsak tsak tsak tsak
ugh tsak
blag tsak tsak tsak tsak tsak
tsaktsaktsaktsaktsaktsaktsaktsaktsak
ug sa kalagot ni mama
gitagud-tagod niya si papa kinilo
ug gibutang sa freezer
pagka-lunes gisugba ni mama
ang bukton ni papa
pagka-martes gituwa ni mama
ang paa ni papa
pagka-miyerkules giiskabitse ni mama
ang lawas ni papa
pagka-huybes gipaklay ni mama
ang ginhawaan ni papa
pagka-biyernes giputsero ni mama
ang ulo ni papa
pagka-sabado gilansiao ni mama
ang otin ug itlog ni papa
ug pagka-dominggo
dihang wala na miy sud-an
nanghanting og laing bana
ang akong mama
Sulat sa sugarol
Adonis Durado
parts, musta na? nakabuno
kuno atong hiniktang ugis?
idublada akong parte
ugaling itari ni joker
iyang sinyalang buwanting.
debuynason gyud lagi nang
naay gasabak sa panimalay, no?
uy, ni-tip nako si jack
nga kwadro karon iyang chicks.
gisyapulan gyud diay niya
ang kalasera nga sauna
gisuwayan sad nimog dega?
hapit baya to nimo ma-kang,
kung wa pa ka hisakpi
sa financer nimos mahjongan.
pustaanay, matutyo ra na siya?
lisod man nang upat imentin,
labi nag gamay ra kag stopper,
ug imong alas imo rang hitsura.
ang sikreto gud sa pagpangabit
kay naa sa pilde-gana:
dakung dimal kung daghag dama.
maong tagsa-tagsaa og pug-ok
ang baraha aron di dali hisakpan.
likayi sad ang queen diamond
kay ang selosong bana gadalag atsa.
taym pa, niantog kuno nimo
ang ulcer? tabla na diay ta ani:
may lunggong sa kutokuto
kung ugaling masul-an.
barawa na -- imni pirmig gatas --
mao nay hirit ni doktora.
mao na nay dibidendo, parts,
kung kita magkatiguwang na.
p.s. damgo nako gabii:
gaturotot nga rayna natikangkang --
4-1-7. irambol lang.