MIZO HMEICHHIATE LEH PASTOR HNA:

Rev.P.C.Lalropuia

Mizorama Kohhran hrang hrangte dinhmun han thlir hian Pathian hruaina kan chan nasat zia a
lang chiang hle a ni. Tualto kohhran kan tih mai leh pawl anga awm ve nek nek te chu sawi tham
an awm ta meuh lo. Rawngbawlna kawng hrang hrangah hma kan sawn chakin kan thang chak
hle mai a. Hospital te, Theological College te, Secular College leh School bakah Biakin tha tak
tak kan hung ta fur mai. Mission lamah lah nise; khawvel hmun hrang hrangah kan in tirchhuak
ve tawh a, a ropui hle a ni. Hetih lai hian kan mizo hmeichhia te tan pawh rawngbawlna zau tak
inhawng ve bawk mahse, Pastoral ministry ah erawh hi chuan kan la senglut hlei thei chiah lo a
ni awm e. Chuvangin, kan mizo hmeichhia te’n Pastor hna leh rawngbawlna zau zawk an neih ve
theih nana ordination pek hi Mizoram Kohhran te hian kan tihturah kan ngaih a hun ve ta viau
mai.

Hmeichhe nemngheh (Women Ordination) chungchangah hian Kohhran hrang hrangte hian
‘ordain loh tur’ tih hi Dan ah an neih ka ring lo. Kohhran hruaitu lam te hi chuan kan pawm tlang
viau tawh in a lang a. Amaherawhchu, kan society kalphung thlir hian kan la tlin rih lo niin kan
hria a, kan Kohhran mipuite kan la vengthawng deuh niin a lang. Salvation Army chuan
Commanding Officer (Pastor) nupui chu a pasal nihna ang chiah training bakah mawhphurhna
leh chanvo an pe mai a. Serh leh sang pawh an khawih ve vek a, vawiin thlengin a thatlohna sawi
tur a la awm lo. Baptist Kohhran pawhin Kohhran upa atan a pawm thei a nih chuan Pastor atana
a pawm theih lohna tur a awm lo. Pathian thu atang leh khawvel hmun hrang hranga Kohhran
hrang hrangte kal dan han thlir hian hmeichhiate nemngheh (ordain) hi a Pathian thu in, kan tih
ve ngei tur niin a lang ta.

Hmeichhiate nemngheh an nih hian Pastor hna an thawk ngei ngei dawn tihna a ni kher lo a.
Kohhran thenkhatah pawh mipa, theological graduate, Kohhranin a nemngheh, pastor hna thawk
chuang lo an awm a ni. Kohhran ta ni tho siin Theological College ah te leh Pawl dangah te
tangkai takin an thawk mai a ni. Heng mite hi theological graduate an ni a, an zirthiamna leh
inpekna te tangkai zawka an hman theih nan leh rawngbawlna pawimawh tak tak an chelh
avangte in ordination hi pek an ni in a lang. Hmeichhe ordain kan duhlohna chhante hi Pathian
thu atang leh Kohhran changtlung zawk leh ngelnghet zawkte kalphung atanga han zirchian hian
chhuanlam an tling tak tak angem le?

Mizorama Kohhran hrang hrangte hian hmeichhia theological graduate engemawzat kan nei ve
tawh a, rawngbawlna kawngah pawh tangkai tak tak an awm a ni. Tuna a lan dan chuan
hmeichhia, Pathian thu thiamte hi sap ram kohhran (Western church) ten duh takin an lo ordain a,
tangkai takin an hmang chho mek a ni ber a, ordain leh mai tur pawh an awm a ni. North East
India ah pawh hian Kohhran engemawzat te chuan hmeichhiate an ordain daih tawh a,
Kohhranah pawh an tangkai em em a ni. Keini hian kan hmeichhe Pathian thu thiam leh mi inpe
tak tak te hi kan chan mek a ni ber mai.

Tunlai hian Mizoram Presbyterian Kohhran leh Mizoram Baptist Kohhran te pawhin an Kohhran
a hmeichhia, theologiacal graduate te, ordination chungchang an ngaihtuah ve mek bawk a. A
hlawhtlin chhoh ngei pawh beisei ila. Kan hmeichhia, theological graduate, duhawm tak tak kan
neih te hi tangkai zawka rawng an bawl zel theih nan leh Pathian thuin a min zirtirna te hrereng
chunga ordination pek hi a hun tawh reng ni. A tak ram thleng pha tur hian thutlukna an siam thei
angem le? Amaherawhchu, hmeichhia, theological graduate, zawng zawng nemngheh zel tur
tihna ni lovin; a tling leh awm apiangte hi chu ordination pek hi Kohhran mawhphurhna a ni e.

Ka rawngbawlpui, Pastor thenkhat te leh Kohhran upa engemawzat ka lo sawipui ve mai mai
tawh thin te pawh hian thiltih awm takah an ngai a ni. Kohhran mipui te pawh hian kan pawm ta
viau ni pawhin a lang tan ta. Kan society kalphung leh kan tradition te pawh khawvel hun inher
danglam ang zel a siamrem a ngaihna lai a awm a, Pathian thu kan thlir dan pawh sawi danglam a
hun tawh a ni tih hi mizo mipuite hian kan pawm viau tawh a ni. Kohhran mipui leh nu leh pa te
pawh hian kan fanute Pathian thu thiam tak tak leh Pathian tana mi inpe tak tak, sum leh hun tam
tak seng a Pathian thu lo luchilh ve tawhtu te hi ordination pek a, zau zawk leh tangkai zawka an
inhman zel theih nan i tawngtaipui zel ang u.

Send to virthli_lunglei@yahoo.co.in and Baptist Today on August 3, 2009

To Ralvengtu on 5.8.09

4.8.09(Tue) ah Virthliah tihchhuah a ni.