Kanu Hpe Jahtau Ai Ten

Jahpawt shagu Nu jasu, N jasu yang n rawt yu; Yup rawt hpang hkrat ai hpa lai, Tan laika sh'kut na mi rai? Hkum rai m'yu dam Nu kasha, Korea sumla yu di nga; Hkying lahkawng tim n-yup ai, Hkying mali she du mat sai; Shana shagu dai hku rai? Jahpawt shagu yupbuk tai. Galoi laika hti na rai? Sanpoi hkrat na n tsang ai; Nu jawp shagu pawt mayu, Gumgai ni jawp g'lu ai ngu; Htingbu nta sa yup mat, Jahpawt shagu jawng hpang hkrat. Jawng n sa ai kade lang, Nu hpe m'su ai lang hte lang; Jawng hprawng hprawng ai ten nau law, Jawng kaw na laika shapraw; Shaloi she Nu mau kajawng, Nu kayet ai she grau sawng. Jawng mung n lung mayu sai, Nta mung n nga mayu ai; Dam mat ai Wa hpe tam na, Nu n mu ai pru hkawm sa; Yinjang du yang Wa manang, Miwala lauban chyalang; Ningwa a anum kaji, Woi sa de ga nga dingsi;

Tsawm tsawm san ai Miwanum, Grai tsaw ra ai zawn hkap shum; Labu p'lawng ni mari ya, Ningwa hpang de sa ga nga; Hk'rangleng mawdaw ni woi jawn, Mali manga ya zawn nawn. Grai kaba ai mare mu, Hotel kaba kaw me du; Hka shin woi na shat seng sa, Shara mi de Phone shaga; Ningwa du wa sana re, Nang kaw naw la nga u e; Sa tau ai zawn shinggan de, Yuptung tung tim n gale. Pu ba majaw yup pyaw mat, Yupmang kaw Wa hte hkrum hkat; Jan law yang she yup hprang hprang, Makau yup lawm la manang; Shaloi mi she mau kajawng, Shi a hkum hkrang yawng malawng; Kaning di s'na Nu kasha, Myit m'lai hpang hkrat mat sahka! Dut sha hkrum ai ngu rai sai, "Hkye la rit law! Nu shingtai." Shanglawt Tsing (19.5.2012, 6:00 AM) * Dawt (Shanglawt Tsing) September 2010 No.3. Amyu Shayi Magazin