SIMEIKHU KARTIN CHHUAK THINGSULTHLIAH

Dt. 13 April 2013 (INRINNI) PHEK- 2

editorial : TUNLAI VAWK NATNA HI Tunlaia Mizoram puma vawk natna leng hian kan sub-town pawh a tuam tih kan hria. Vawk damlo enkawlin Department thawktute pawh an buai hle. An enkawl dam tawh pawhin he hrileng hi an tuar nawn thei tih thawhktu ten an sawi. A chhan chu he hri hi boruaka leng a nih vang a ni a, Mihringin boruaka leng chu kan kai a, Mihring tan hlauhawm lo mahse, he natna hrik pu darhtu kan ni ve thei a ni. Vawk Ina kan kalin kan kaichhawng thei zel tih hriat a ni. Chuvangin, kan him lehzual nan mahni vawk In-ah midang kaltir loh te, keimahni ngei pawh mi vawk Inah kal loh te a himthlak tih hria ila, a neitute rawn hmasa lova mi ran in tlawh chawt te hi ching lo ila a duhawm hle. Hei bakah hmundang atanga vawk lakluh loh a him tih pawm thiam ila a duhawm hle bawk. Tun ang khaw sangah hian mihring leh ran tan hrileng a nasa bik tih hria ila, theihtawpin fimkhur tum ila a tha awm e.
SUB-TOWN LIRTHEI CHUNGCHANG

CASUAL TRAINER/MRP LAK THAR TE

Extension Training Centre(SIRD), Thingsulthliah hnuaiah Master Resource Person(MRP) / Casual Trainer mi 5, part-time a thawk turin lak thar an ni a, chungte chu: 1. H. Lalremruata(L-Ray) S/o H. Zalenthanga, C/A 2. J. Lalremruata S/o K. Vanlalrenga D/A 3. K. Lalnunkimi D/o K. Lalduha D/A 4. H. Lalrinmawii D/o H. Vanlalliana(L) C/A 5. Marina Ramdingliani D/o H. Lalremruata C/A

NAUPANG HUMHALH NAN VEC Right of Children to Free and Compulsory Education Act 2009 Section 32 in naupangte chanvo humhalhna kawnga lungawi lohna nei ten Complaint an thehluhna tur Local Authority atan khaw tin a Village Edication Committee(VEC) a ruat a, VEC te mawhphurhna pawh hetiang hian a duang nghal bawk: 1. Naupangte dikna chanvo humhalhna kawnga lungawi lohna neite chuan ziakin an lungawi lohna chu VEC-ah an thehlut thei ang. 2. Thuneitute hian Complaint an dawn atanga thla thum chhungin a leh lamte thu ngaihthlak hnuah thutlukna a siam tur a ni. 3. Thutlukna-a lungawi lote chuan an lungawi lohna chu thuneitu sang zawk, State Commission emaw Right to Education Protect Authority(REPA) hnenah a thehlut leh thei ang. 4. State Commission emaw REPA in emaw, heng lungawi lohna thehluh hi, Section 31 sub-section(1), clause(c) of RTE ACT 2009 in thuneihna a pek angin thutlukna an siam ang. S.A. DIVISION COUNCIL KARLEHAH Karleh Inrinni hian Salvation Army, Central South Division Council Thingsulthliah Corps-ah neih a ni dawn a. Zirtawp zanah Council member te lo thlengin Inrinni-ah nilengin Rorel a ni ang a, tlaiah chawhlui an kilho nghal ang. Council member te hi Pathianni zan thleng an cham ang a, College Veng Corps Band pawh Pathianni hmang turin Inrinni-ah an lo thleng ang. Pathianni chawhma inkhawmah India Eastern Territorry Chief Secretary, Lt. Col. Lalramhlunan Thuchah a sawi ang a, chawhnuah Maj. Lalhminglianan hun hmangin zanah Col. Lalngaihawmi, T.C. in thuchah a sawi ang. Inkhawm apiangin College Veng Band leh Tst Corps Songter ten item an nei ang. KANPUR LAMAH Thingsul-Tlangnuam Vety Doctor Dr. Ch.Lalthafamkima chu kar kalta Zirtawpni a NLUP Bawng la tura Kanpur(U.P.State) a kal chu a la thang mek a. Kan chanchin lakkhawm ni Ningani chhuna kan palaiin a phone-in Punjab State atanga Bawng lo thleng kan nghak mek a, ka lo haw hun tur a hriat theih rih loh a ti a. Mipuiten Vety Doctor rawn a remchang rih lo tih hria ila a tha ang e. TUIRINI-AH PICNIC Tunkar Ningani khan Tuirial ral Maxi-cub & Bus Owners Association te Tuirini Saitual kaiah picnic-in hun an hmang. TST P/S ZONAL SPORTS Tunkar Ningani khan Tst Primary School Zonal Sports chu Tst Playground-ah neiin, Athletic chauh hmanga intihsiakna buatsaih a ni. Hemi ni hian zawh nghal a ni a, School tih that dan indawt chu hetiang hi a ni. 1-na : Lalhnam Sikul 2-na : Tst P/S-II 3-na : Tlangnuam P/S 4-na : Tst P/S-I 5-na : Tst P/S-III Tst Zone Middle School Sports Committee pawh neih a ni tawh a, M/S Sports chu kumin kumtawp lam, boruak daih deuh hunah neih an tum. FIELD VISIT NEI DAWN Pu Zolura Chhangte, Thingsul-Tlangnuam V.C Treasurer WRC President ni bawk chu tun April thla tawp lam emaw May thla tir emaw hian Agriculture Programme, Field Visit nei turin Sikkim-ah a kal dawn niin thu kan lo dawng. Hetah hian Tlangram leilet neih dan chungchang an zir ang.

Kan sub-town-ah lirthei a pung zel a, hmasawnna chi khat pawh a ni a, a lawmawm hle. Lirthei, Two-wheeler leh a chunglam nei tharte hi kan rawn tarlang thin a, amaherawhchu hriat kim te a lo har bawk nen chhuah hmaih te kan nei palh thin a. Hetih laiin tihchhuah duh lem lote kan lo awm bawk nen, chhuah dan hriatthiam a har duh khawp mai. Chuvangin, tlem lai atang khan Lirthei nei tharte hi kan rawn tichhuak ta lova, chutih laiin tihchhuah duh emaw, advertise duhte tan erawh englai pawhin kan tichhuak thei reng a ni. LIRTHEI HLAU LO? Naupang chauh an nilo, Motor kawngpuia lirthei lokal kan hmuhin fimkhur taka motor kenna chang hrelo puitling pawh kan awm leh tlat thin. Tunlaiah, lirthei khalhtu, hriat chian mang loh, Licence a nei nge neilo tih pawh hriat loh, Driver fimkhur lo tak khalh anih phei chuan a hlauhawm hle tih kan hriat a tha. Driving leh Traffic Rules hre lem lo, motor khalh thiam lah kan tam em em zel mai a. Chuvangin, kawng kal te kan fimkhur tlan a tha khawp mai. Motor Horn pek pawha kawng kian tha duh lo an awm laiin upa lam deuh motor ri hre lem lote pawh an awm thei tih hriain lirthei khalhtute pawh fimkhur leh zual a tha khawp mai.