Synfo News Service

May 7, 2010 (Zirtawpnii)

MANIPUR- A CHANCHIN THA THLEN KUM 100 TLIN LAWMNA

Manipur-a Chanchin Tha thlen kum 100 tlin lawmna, Southern Manipur Gospel
Centenary Celebration Committee-in a buatsaih, May 4 atanga tan chu zanin hian a
tiak ang.

Manipur hmar lama Kohhran pawl hrang hrang 20 chuang ten Manipur-a Chanchin
Tha thlen kum 100 tlin lawmna ropui tak, May 4 atanga an tan chu zanin (May 7)
hian a kharna hun hman a ni ang. Manipur Gospel Centenary lawmna hi Kohhran
pawl hrang hrangin an nei nual tawh a, April thla khan Independent Church of
India (ICI) leh Evangelical Free Church of India (EFCI) te chuan an lo lawm tawh
a. ICI Kohhran phei chuan Mizoram atang ngeia meichher det tanin Gospel
Centenary lawmna hun hi an hmang tan a ni.

Tun tuma Southern Manipur Gospel Centenary lawmna hi Lamka Public Ground,
Churachandpur-ah nghah a ni a. Sawm an nih angin Mizoram Synod Moderator
Rev. C. Chawngliana, Executive Secretary Rev. Zosangliana Colney, Synfo
Coordinator Upa Zonunmawia leh Mizoram Synod Choir te an kal a. A tan zana
mipui 20,000 (sing hnih) vel kal khawm hmaah Synod Moderator Rev. C.
Chawnglianan Centenary meichher detin, Gospel Centenary lawmna thupui
“Thima ata Engah” (From Darkness to Light) tih a sawi hawng a, May 5 (Nilaini)
chawhma inkhawmah Rev. Zosangliana Colney, Executive Secretary-in thuchah a
sawi bawk.

Inkhawm tan zan hi Churachandpur District Deputy Commissioner Miss Jacintha

Lazarus-in a hmanpui a, inlawmna thu tawi sawiin, Pathian avang chauha hnam ze
hrang hrang leh Kohhran hrang hrang ten Gospel Centenary lawmna an hmangho
thei chu ropui a tih thu a sawi. Synod Moderator Rev. C. Chawngliana chuan
thupui sawihawnna Keynote Address a pekah, “Gospel Centenary lawmna Zaipawl
Intihsiak buatsaih nan Mizoram Synod chuan Rs. 3,00,000/- (cheng nuai thum) a
pek thu puangin hei hian Manipur-a Zo hnahthlak hnam chi hrang hrang leh
Kohhran hrang hrangte inkarah inunauna leh thawhhona tha a thlen ngei a beisei
thu a sawi a, lawm avang mipui au thawm a tha hle. Rev. Zosangliana Colney
chuan, Chanchin Tha lo thlen kum 100-na an lawm mek chu, a tira Chanchin Tha
an dawn ang kha an la vawng nung zel em? Chi leh chi, hnam leh hnam thisen
inchhuahna leh inrunna te, inhmelmakna te paih bovin, hmangaihna te, remna te
leh inngaihdam tawnna nen he Gospel Centenary hi kan lawm em? tiin zawhna a
siam a. A tira kan dawn, Lal Isua Chanchin Tha-ah khan i kir leh ang u, tiin
Centenary lawmtu mipuite a sawm bawk a ni.
Mizoram Synod Choir te hi tum 5 zai tura ruahman lawk an ni a, mipui lam ngenna
avangin inkhawm tum khatah vawi 2 te an zai bawk. Gospel Centenary lawmna hi
Pathian Biak Inkhawm bakah thu zirho nante hman a ni bawk a. Gospel Centenary
lawmna thupui “Thima ata Engah” (From Dakness to Light) sawtu atan hian Dr.
Geoff Tunnicliffe, International Director, World Evangelical Alliance chu ruat a ni
a, Rev. Randall Sizemore, Director, GMC, Evangelical Congreational Church USA
hnen atangin thuchah ngaihthlak a ni bawk.

Tukin zing atang khan Gospel Centenary lawmna ni hnuhnung an hmang tan a,
zing dar 5:00 ah Biak In tinah Centenary dar vawi 100 theuh an khawng a.
Chawhma dar 10:00-ah Centenary Lungphum Inkhawm neih a ni a, Chief Guest
atana sawm Manipur Governor His Exellency Gurbachand Jagat Singh leh Chief
Host atana sawm Manipur Chief Minister Ibobi Singh te chuan State chhung
buaina vangin an hmanpui thei ta lo. Rev. Randall Sizemore, Director, GMC,
Evangelical Congregational Church, USA-in Gospel Centenary Lungphum a
hawng a, Chanchin Tha kum 100 lawmna parva rual leh balloon chhuah a ni a,
Zaipawl infin singkhat rualin Halleluiah Chorus an rem a, lam chi hrang hrang entir
a ni a, Mizoram Synod Choir te an zai bawk. Zanin dar 6:00 hian Gospel Centenary
lawmna puala Pathian Biak Inkhawm hnuhnung ber neih a ni.