Diana Romero

Fil. 14 - L
Dr. Christine S. Bellen
Marso 2, 2017
“Ang Pag-iral ng mga Tradisyunal at Modernong Elemento”
Ang dulang Si Janus Silang at ang Tiyanak ng Tabon ay isang interesanteng dula
dahil bagamat taglay nito ang mga elementong tradisyunal at moderno ay hindi
nagtutunggalian ang mga ito. Sa halip ay makikita kung paano magsasama ang dalawang
elemento na ito sa buhay ni Janus. Kahit na mapapansing ang pagsasama ng dalawang
elemento na ito ang dahilan ng tunggalian sa buhay ni Janus, naging epektibo lamang ito
dahil sa buong pagtanggap na ang tradisyunal na mga paniniwala ay nanatili pa rin sa
modernong panahon.
Si Janus ay nabubuhay sa isang modernong kapaligiran kung saan ang kaniyang
buhay ay umiikot sa teknolohiya partikular na sa mga kompyuter. Ngunit makikitang isa pa sa
katangi-tanging katangian ng kaniyang buhay ay ang pagkakaroon ng integrasyon ng mga
tradisyunal na elemento sa kabila ng pamumuhay sa isang modernong panahon. Unang
mapapansin na ang mga tradisyunal na impluwensiya ay manggagaling sa kuwento ng
kaniyang lola at ito ay lubusang mapapalagom sa pamamagitan ng larong Tala.
Ang larong tala ang ehemplo ng pagtutugma ng dalawang elemento dahil ang larong
ito ay gumagamit ng mga diwata, nuno, tiyanak, atbp. Sa gayon ang isang modernong
imbensyon ay gumagamit ng mga tradisyunal na tauhan. Kaya naman naging sentral din ang
larong ito upang lubusang maiugnay ang espektakulo ng mga mitolohikal na nilalang at ng
teknolohiya. Kung titingnan sa isang praktikal na pananaw kung bakit kinailangan paikutin
ng tiyanak ang buhay ni Janus sa pamamagitan ng larong tala ay dahil mas angkop ito dahil
sa kaniyang edad at panahon na kinabibilangan. Naging mahalaga rin ito upang ipakita ang
kahalagahan ng paglahok ng kabataan sa problemang ikinahaharap ng lipunan ni Janus.
Ngunit kung susuriin ng mabuti ang paggamit ng online game na ito bilang isang
instrumento, mapapansing ito ay isang paraan ng pagbibigay ng ahensiya sa kabataan. Dahil
sa pamamagitan ng larong ito ay nauudyok ang mga kabataan na makibahagi sa problemang
ikinahaharap ng lipunang kanilang kinabibilangan. Maari itong ihambing sa kasalukuyang
panahon kung saan ang kabataan ay isang malaking bahagi sa mga suliraning panlipunan, at
maari rin silang makilahok sa pamamagitan ng teknolohiya, ang isang halimbawa ay ang
pagpapahayag ng kanilang saloobin at pagsisimula ng mga kilusan sa pamamagitan ng mga
social networking sites.
Kung sa gayon ang isa sa makikitang isang implikasyon ng dula ang na mahalaga pa
rin ang mga tradisyunal na paniniwala kahit na nabibilang na tayo sa isang modernong
panahon. Ito ay dahil ang mga tradisyunal na paniniwala ay bahagi ng ating kultura at hindi
dapat ito kalimutan. Mapapansin din na ipinapakita ng dula na ang kabataan ang may
kapangyarihan upang lubusang ipalaganap ang ganitong kaisipan dahil sila lamang ang tunay
na makakaintindi ng importansiya ng pagsasama ng dalawang elemento na ito. Sa kabuuan,
ang dulang Si Janus Silang at ang Tiyanak ng Tabon ay isang malikhaing representasyon ng
kasalukuyang panahon kung saan ang mga moderno at tradisyunal na elemento ay parehong
umiiral at pati na rin ang malaking bahagi ng kabataan at teknolohiya sa mga suliraning
panlipunan.