1. Mga Tauhan ng Pelikula (Papel na ginampanan ng bawat artista/tauhan at
katangian ng bawat isa)
Iyah Mina bilang Mamu- isang transgender na sa kabila ng kanyang edad na 40
ay nangangarap na magpadagdag ng dibdib upang kahit papaano ay makatulong sa kanyang trabaho bilang isang sex worker lalo na't ang kanyang mga kasabayan ay 'di hamak na mas bata sa kanya. Subalit ang kagustuhan niyang ito ay naudlot nang mamatay ang kanyang kapatid at mapunta sa kanyang pangangalaga ang anak nitong si Bona na tulad niya ay parte rin ng LGBTQ community. Sa kabila ng kanyang trabaho na para sa nakararami ay marumi at hindi marangal ay mabait siya at matulungin sa kanyang kapwa kung kaya’t bagamat hindi naging madali para sa kanya ay nagawa niya pa ring gampanan ang pagiging ina kay Bona. Pagdating naman sa relasyon nila ng kasintahang si Vincent, laging siya ang nasusunod. Lagi niyang sinasabing ang mga desisyon niya ay para rin naman sa ikabubuti nito. Hindi niya naisip na pakinggan ito at alamin ang nararamdaman nito na sa huli ay pinagsisihan niya rin naman.
Arron Villaflor bilang Vincent- ang kasintahan ni Mamu na nagnanais na
mahalin rin siya tulad ng pagmamahal niya rito. Minsan niya ng pinagbintangan si Bona sa kasalanang siya ang may gawa, bagay na agad niya rin namang pinagsisihan. Nagawa lang naman kasi niya ito dahil sa bugso ng kanyang damdamin. Hindi kasi siya pinapayagan ni Mamu na magtrabaho sa malayo para makatulong rito na siyang kinasama ng loob niya. Pakiramdam niya ay sobrang liit ng tingin sa kanya nito at sa ilang taong pagsasama nila ay hindi pa rin siya nito nagagawang pagkatiwalaan. Gusto niyang mapatunayan rito na hindi lang siya palamunin tulad ng sinasabi ng ibang tao kung kaya’t nagpasya siyang mangibang-bansa nang hindi hinihingi ang pagsang-ayon ni Mamu na sa huli ay nalaman rin naman nito.
EJ Jallorina bilang Bona- ang pamangkin ni Mamu na napunta sa kanyang
pangangalaga nang mamatay ang ina nito. Dahil sa naging trato ng kanyang ina sa kanya noong nabubuhay pa ito ay hindi naging madali para sa kanya ang magtiwala kay Mamu na siyang kumupkop sa kanya. Sa katunayan, may mga pagkakataong pakiramdam niya ay hindi siya gusto nito at napipilitan lamang itong kupkupin siya. Ang pagdududa niya sa pagmamahal sa kanya nito ay mas lalo pang lumala no’ng minsang pinagbintangan siya ng kasintahan nitong magnanakaw na pinaniwalaan naman nito. Idagdag mo pa ‘yong panahong kinailangan niya ng makakausap ngunit hindi siya napagbigyan nito. Dahil dito ay nagrebelde siya’t imbes na mag-aral, sa murang edad ay tumulad rito’t naging sex worker dulot na rin siguro ng panloloko sa kanya ng kanyang kasintahang si Franco hanggang sa umabot sa puntong magkasakit siya.
Markus Paterson bilang Kiko- naging kaibigan at nagkaroon ng pagtingin kay
Bona kahit na pareho sila ng seksuwalidad. Sa kabila ng pambabalewala nito sa kanyang nararamdaman at sa nangyari rito ay hindi nagbago ang pagtingin niya rito. Nanatili siya sa tabi nito hanggang sa makita rin nito at masuklian ang nararamdaman niya. Sa huli ay naging mabuti siyang impluwensiya kay Bona. Malaki ang naging ambag niya sa paghikayat rito na magpatuloy sa pag-aaral. Sa katunayan, sinabi niya pa kay Bona na kung ang problema lang naman nito kung ba’t ayaw nitong bumalik sa pag-aaral ay ang pagpapagupit ng buhok, huwag raw itong mag-alala dahil wala naman daw sa haba ng buhok ang pagiging maganda.
2. Paano inilarawan ng Pelikula ang mga pangyayari sa totoong buhay?
Inilarawan ng pelikula ang mga pangyayari sa totoong buhay sa paraang hindi tulad ng mga nakikita natin sa madalas nating panooring mga fancy love stories na pelikula. Kahit na hindi ka bahagi ng LGBTQ community ay masasabi mong bawat eksena ay may pinaghugutan o batayan sa totoong buhay at hindi lang basta bahagi ng imahinasyon ng may-akda.
3. Paano nito iprinesinta ang realidad?
Iprinesinta ang realidad sa pelikula sa pamamagitan ng pagpapakita ng mga pangyayaring tunay na nangyayari sa totoong buhay. Hindi lamang ito umiikot sa buhay ng isang transgender sex worker, sa batang nagsisimula pa lang tuklasin ang kanyang seksuwalidad at sa lalaking nagnanais na mabago ang tingin sa kanya ng mga taong malalapit sa kanya at makatulong lalo na sa taong mahal niya, tinatalakay rin nito ang kahirapan na hanggang ngayon ay isa pa rin sa mga suliranin ng lipunan. Sa pagpapalawak, ipinapakita sa pelikula ang epekto ng kahirapan sa mga taong dumaranas nito sa totoong buhay tulad na lang ng pagtatrabaho ni Mamu bilang isang sex worker para kumita at mapunan hindi lamang ang mga pangangailangan niya kundi pati na rin ng kanyang kasintahan at pamangking si Bona. Ang trabahong ito bagamat marumi sa pangingin ng lipunan ang siya ring naging daan para kumita siya ng pera para sa pagpapagamot ni Bona nang magkasakit ito. Kumbaga, napasubo lamang si Mamu sa trabahong ito dahil sa kahirapan ng buhay na makikita sa realidad.