Dapat bang alisin na ang

asignaturang Filipino sa
mga kolehiyo at
unibersidad?
Published June 24, 2014 4:23pm
By ni AMANDA FERNANDEZ, GMA News

Tinutulan ng ilang guro ang desisyon ng Commission on Education (CHED)

na alisin na ang asignaturang Filipino sa kurikulum ng mga kolehiyo at
unibersidad sa Pilipinas.

Binuo nitong Sabado ang "Tanggol Wika," isang alyansang binubuo ng mga
guro at indibidwal na umaalma sa pag-aalis ng asignaturang Filipino.

Sa isang panayam, inihayag ni David Michael San Juan, propesor sa

departamento ng Filipino sa De La Salle University, at isa sa mga pinuno ng
alyansa, nanganganib na bumaba ang kalidad ng wikang pambansa kapag
inalis ang asignaturang Filipino sa mas mataas na antas ng edukasyon.

"Bata pa ang wikang pambansa at hindi pa ito ganap na intelektwalisado o

nagagamit sa iba’t ibang larangan," ani San Juan.

"Upang maging ganap ang intelektwalisasyon nito, nararapat lamang na

pagbutihin at palawakin pa ang pagtuturo nito sa lahat ng antas, lalo na sa
kolehiyo," dagdag niya.

Ayon pa sa propesor, kinakailangang gawing mandatory ang pagkakaroon ng

asignaturang Filipino sa mga kolehiyo at unibersidad dahil "kung iaasa sa
mga unibersidad ang opsiyonal na pagkakaroon nito, malabong magkaroon
ito ng espasyo sa kurikulum."
Kinakailangan rin umanong magkaroon ng matibay na wikang pambansa,
kultura at pagkakakilanlan ang bansa para sa napipintong ASEAN integration.

"Mahalagang ambag sa edukasyong sosyo-kultural ng maraming

estudyanteng inaasahang darating at mag-aaral sa Pilipinas mula sa mga
kasapi ng ASEAN, ang asignatura sa wika, kultura at identidad ng Pilipinas,"
aniya.

Senior high school

Sa hiwalay na panayam, nilinaw ni CHED executive director Atty. Julito

Vitriolo na hindi umano tuluyang aalisin ang asignaturang Filipino sa
edukasyon dahil inililipat lamang ito sa senior high school.

"Yung pag-aaral ng Filipino, nandoon na sa senior high school, kasi kung

titingnan natin, kalahati ng general education, dinownload [download] sa K to
12," paliwanag niya.

Inihayag rin ng opisyal na maaaring lumipat ang ilang guro sa senior high
school upang maipagpatuloy ang pagtuturo.

"Sa mga pagtuturo, kung ang worry nila yung mawawalan sila ng gagawin, I'm
sure malilipat ang competencies nila sa pagtuturo sa senior high school," ani
Vitriolo. "Kasi kung titingnan natin, maraming na-download sa senior high
school, halos kalahati. Yung ibang apektado sa college, malamang doon rin
pupunta kasi ganoon nga ang nagiging trend."

Subalit, para kay San Juan, hindi mabuting solusyon ang paglilipat ng mga
guro sa senior high school. Aniya, may posibilidad na bumaba ang suweldo
ng mga ito, kumpara sa kasalukuyang tinatanggap nila.

Mahalaga rin umanong ipagpatuloy ang pagtuturo sa kolehiyo ng wikang

Filipino upang magkaroon ng mas intelektwal na talakayan, dagdag niya.
Gayunpaman, iginiit ni Vitriolo na kapag maitatag na ang pundasyon ng
wikang Filipino sa senior high school pa lamang, maitataguyod na ito
hanggang sa paglaki.

"Dapat ang importante diyan, maging bihasa ka, mahalin mo, itaguyod at
tangkilikin mo," aniya. Iyong pag-aaral kasi at pagtataguyod, nasa kahit anong
level kasi," paliwanag niya.

"Kung sanay na sanay ka na sa lower years, kung all your life, natuto ka na...
Dapat naka-focus na sa major subjects, professional subjects kasi iyan na
ang specialization, iyan na ang pagtanggap ng mga bagong pamamaraan,
pagdagdag sa kwalipikasyon ng estudyante, lalo kung alam mo na ang
basics," dagdag niya.

Samantala, siniguro rin niyang maaari pa umanong mabago ang utos kapag
natapos na nilang dinggin ang panig ng mga tutol.

"Magkakaroon ng diskusyon diyan, sa ngayon, wala pang final na pag-uusap

diyan at resolution," ani Vitriolo. -- Amanda Fernandez/FRJ, GMA News

Pag-aalis ng Filipino sa Kurikulum ng

kolehiyo tinutulan
By
Tomas U. Santos
-
August 21, 2014
1
13512
TAHASANG tinutulan ng Unibersidad ang kautusan ng Commission on Higher Education
(CHEd) na tanggalin ang Filipino sa kolehiyo bilang pakiki-ayon sa bagong curriculum ng K-
12.

Bilang pagtugon sa kinakaharap na suliraning pangwika ng bansa hinggil sa pagtanggal ng

Filipino sa kolehiyo, nakiisa ang Unibersidad sa pangunguna ng Department of Filipino sa
pagdiriwang ng “Buwan ng Wikang Pambansa: Wika ng Pagkakaisa” sa pamamagitan ng
pagdaos nito ng Saliksikan 2014 at Tanggol Wika noong ika-4 at ika-6 ng Agosto sa AMV
College of Accountancy Multi-Purpose Hall.

Isang libreng simposyum ang Saliksikan na itinaguyod ng Pambansang Samahan sa

Linggwistika at Literaturang Filipino (PSLLF) na naglalayong tipunin at hikayatin ang mga
guro, propesor, mag-aaral, iskolar at manunulat sa Filipino na makiisa at makialam sa mga
pananaliksik ng iba’t ibang dalubhasa tungkol sa mga pagbabago at ebolusyon ng wikang
Filipino.

Sa kabilang banda, isang kilusan naman ang Tanggol Wika na may paksang “Tomasino
para sa Wikang Filipino at Makabayang Edukasyon” na naglalayong ipaunawa sa lahat ang
kasalukuyang isyung pangwika kaugnay ng K-12.

Naging pangunahing paksa sa dalawang talakayan ang pagtutol ng mga dalubwika sa

ipinalabas na kautusan ng CHEd na tanggalin ang pagtuturo ng Filipino sa kolehiyo upang
magbigay daan sa pagpapaigting ng kaalaman ng mga mag-aaral sa agham, matematika at
maging sa teknolohiya. Isa itong paghahanda para sa darating na integrasyon ng mga
bansa na kabilang sa Association of Southeast Asian Nations sa 2015.

Paliwanag ng CHEd, isa itong hakbangin na kinakailangan upang madaling makasabay sa

ragasa ng globalisasyon ang mga Filipino.

Tutol naman ni Melania Abad-Flores, propesor ng Filipino sa University of the Philippines-

Diliman (UP-Diliman), dapat alalahanin na hindi lamang pulos mabuti ang dulot ng
globalisasyon sapagkat nagdudulot ito ng pagkawala ng sariling pagkakakilanlan ng isang
bansa sa pamamagitan ng pag-usbong ng ideyolohiyang dayuhan.
“Ang liit na nga ng Filipinas, kalat-kalat pa tayo. Wala na rin tayong konsepto ng ‘bansa’,
tapos lalamunin pa tayo ng konseptong globalisasyon,” ani Flores.

Inamin rin niya na mula pa noong 1987, wala pang batas na nagtatalaga sa wikang Filipino
na gamitin itong wika ng pagtuturo at ng pagkatuto upang maging isa ang bansa.

“Ang wikang ito ang magbibigay sa atin ng talino, tapang, at lakas na magsisilbing
panimulang-puhunan natin bilang isang bansa,” giit niya.

Ayon naman kay Ramon Guillermo, propesor rin ng Filipino sa UP-Diliman, kung sa tingin
ng mga Pilipino na wikang Ingles talaga ang wikang magsusulong sa ekonomiya ng bansa
at magdudulot ng kaunlaran at kasaganaan sa pamumuhay ng bawat Filipino, dapat noon
pa ma’y maunlad na tayo tulad ng ibang bansa.

“Noon pang 1990’s nagsimulang mag-Ingles ang mga Filipino. Sabi raw, Ingles ang wika
para sa globalisayon, kung gayon, nasaan na ba dapat ang Filipinas ngayon kung matagal
na tayong nag-i-Ingles?” aniya.

Dagdag pa ni Guillermo, napapanatili ng mga mauunlad na bansa ang pag-aaral ng

kanilang wika hanggang sa kolehiyo lalo na sa Europa, isang kongkretong patunay na hindi
balakid sa pag-unlad ang sariling wika.

“Hindi naging hadlang para sa ibang bansa ang sarili nilang wika upang maging progresibo,
kaya dapat maisip nating mga Filipino na ang wikang Filipino ay hindi dapat maging
sagabal sa pag-unlad,” aniya.

Para naman kay Aurora Batnag, pangulo ng PSLLF, mahalaga na matalos at maunawaan
ng lahat na hindi lamang pakikipagtalastasan ang gamit ng wika sapagkat ang pagkakaisa
at pag-iisa sa damdaming Filipino ang higit na mahalagang tungkulin nito.

“Huwag nating sayangin ang nakamit na tagumpay ng wikang Filipino sa nakalipas na mga
dekada. Patuloy tayong mag-isip, magsulat, maglathala, magsaliksik, makipagtalakayan
gamit ang Filipino sa lahat ng antas ng pagkatuto,” aniya.
Pag-sang-ayon ni Michael David San Juan, propesor ng Filipino sa DLSU, kay Batnag,
ipinahayag niya na sa wikang pambansa lubos na nakikilala ang mga mamamayan na
gumagamit at tumatangkilik dito.

“Ito ang wika ng pambansang diskurso, wika ng mga ordinaryong mamamayan, wika ng
demokratisasyong pampulitika, at obra maestra ng mga wikang rehiyonal sa Filipinas.
Samakatuwid, ito ang salamin ng ating kolektibong identidad,” aniya.