MGA KATANGIAN NG ISANG DAKILANG
INA
Para sa isang responsableng ina, wala siyang hindi
gagawin para sa ikabubuti ng kanyang anak.
Lahat ng bagay na inaakala niyang makakatulong para
sa pagkakaroon ng magandang kinabukasan ng mga ito
ay nakahanda niyang harapin, hanapin at ibigay.
Siya ang nakakaalam ng mga activities ng bata sa
school, nakikipag-usap sa mga teachers hinggil sa
kalagayan nito bilang mag-aaral, nagluluto at
naghahanda ng pagkain nito, tumitingin kung maayos
ang hitsura at pananamit ng mga at iba pang
makabuluhang bagay na sa tingin ng iba ay magaan o
mababaw lang.
Kung alam lang nila na ang layunin ng ating mga ina ay
maging ‘the best’, maibigay ang mga bagay na hindi sila
nabigyan ng pagkakataong magkaroon dati o kaya’y
maiiwas ang mga ito sa mga pagkakamaling
pinagdaanan nila noon.
Gayunman, kadalasang sa likod ng pagnanais na
maging ‘perpekto’ sa paningin ng mga anak ay
nakakaligtaan ng mga mommies ang tunay na
kahulugan ng mother & child relationship.
Kahit sabihin pang para sa kapakanan ng mga bata ang
ginagawa nila, hindi nila namamalayang kalaunan pala
ay hindi na pag-aalaga kundi pagpapatakbo na ng buhay
ng mga anak ang pinagtutuunan nila ng pansin.
Kung paanong sa halip na maging manager ay magiging
caregiver bilang tunay na kahulugan ng pagiging ina,
narito ang suhestiyon ng Abante Istayl Atbp. ayon na
rin sa sinulat ni Amy Mutcher para sa
www.reviveyourlife.com:
Marunong makinig
Hindi lang alam kung kailan dapat magsalita, mas
kailangang matutunan ng isang ina kung kailan
niya dapat buksan ang kanyang puso at isipan para
sa nais ipabatid ng mahal niyang anak.
Sa totoo lang kahit sa katahimikan at
pagsasawalang-kibo ng isang anak, ang isang tunay
na ina ay may kakayahan pa ring marinig ang nais
sanang sabihin nito.
At sa halip na makialam at ipilit ang kanyang
opinyon, mas mainam ang maiparamdam sa kanila
na nandiyan ka, na okey lang ang nararamdaman
nila at naiintindihan mo sila.
May paninindigan
Kung magiging consistent ang ina sa kanyang
mga ginagawa, sa paraan ng pagdisiplinang
kanyang pinaniniwalaan at sa iba pang bagay,
tiwala at paninindigan ang magiging kahulugan
nito para sa mga anak.
Sa proseso ay malalaman ng mga anak kung ano
ang dapat niyang asahan sa mga kaso ng paglabag
sa consistencies na nauna nang na-establish sa
buhay nila.
May kakayahang tumawa
Kahanga-hanga ang isang ina na may kakayahang
pagaanin ang mabibigat na pasanin at gawing
madali ang mahirap na mga sitwasyon. Automatic
na reaction ang tumawa sa mga nakakatuwang
bagay ngunit ang katatagan, pagtanggap at
pagpapakita ng kapanatagan sa gitna ng kabiguan
at pagdurusa alang-alang sa mga anak ay isang
kakayahang hindi basta napag-aaralan.
Walang sawang nagmamahal
Hindi lang sa gawa, ang pagsasabi ng ‘I love you’
sa mga anak ay mabisang confirmation na hindi
dapat kaligtaan basta’t may pagkakataon.
Handang magbahagi ng kaalaman
Maliban sa pagiging tutor pagdating sa mga aralin
sa eskuwela, ang isang nanay ay nakahandang
ibahagi ang kanyang mga expertise pagdating sa
mga gawaing buhay at iba pang kaalamang alam
niyang makakatulong sa pagtahak ng mga anak sa
kani-kanilang buhay in the future.
In fact, nakahanda siyang ipursige ang mga bagong
kaalaman upang siya mismo ang magbahagi sa
kanyang anak.
May isang salita
Kung meron mang hindi klik sa mga kabataan
ngayon ay ang mga taong walang ginawa kundi
sabihing ganito o ganyan ang dapat pero sila
mismo ang hindi sumusunod dito.
Matalino na ngayon ang bagong henerasyon kung
kaya ang paninindigan sa bawat sinabi ang
pinakamabisang susi para makuha ang kanilang
trust.
May pagpapahalaga sa oras
Sa kabila ng mabilis na takbo ng panahon at
samu’t saring bagay na umaagaw ng atensyon ng
magkakapamilya sa isa’t isa, ang isang dakilang
ina ay gagawa at gagawa ng paraan upang
makaagaw ng sandali at magugol ito para sa
pagpapatatag ng pamilya.

Hindi takot mag-sorry

Ang mga magulang ay mga tao rin at hindi
perpekto. Hindi kakulangan para sa isang ina ang
umako ng kasalanan at humingi ng paumanhin
kung kinakailangan.

Hindi madali para sa isang ina ang magkaroon ng

matatag at matiwasay na relasyon sa kanyang mga
anak. Pero isa ito sa maituturing na pinakamabigat
niyang papel hindi lamang sa loob ng tahanan
kundi kung saan naroon ang kanyang mga mahal sa
buhay. Dedikasyon, maingat na pagpaplano at
matinding sakripisyo ang katumbas ng lahat.

KATANGIAN NG ISANG INA
Lahat ng ina—saan mang sulok ng mundo
nanggaling at anumang lahi—ay kahanga-hanga
namang talaga.
Hindi madaling maging ina, pero ang kasaysayan,
mga pinagdaanan at kasalukuyang nararanasan ng
mga inang Pinoy ang dahilan kung bakit kahanga-
hanga silang talaga.
1. Una ang pamilya niya, kaysa kahit
ano o sino.
Siya ang tinatawag na “ilaw ng tahanan” dahil
siya ang nagdadala daw ng ilaw sa isang tahanan.
Corny para sa iba, pero para sa milyong
pamilyang Filipino, totoo ito. Si Nanay pa rin ang
inaasahan kapag may problema sa eskwela, sa
bahay, at sa mga anak. Prayoridad ng isa ina ang
kaniyang pamilya, kahit pa sa modernong
panahon ngayon, at kahit pa sa mga modernong
Filipina.
Kahit pa halos lahat na ng mga nanay ay
nagtatrabaho na para matustusan ang
pangangailangan ng mga anak at makatulong sa
asawa, may oras pa rin si Nanay na magluto,
maglaba, at mag-aruga sa mga anak.
Sa panahon ngayon ng realidad ng OFW at
pangingibang bansa para kumita ng mas malaki at
makapagbigay ng mas mabuting kinabukasan sa
mga anak, marami na ang inang nagsasakripisyo
na mawalay sa anak pansamantala. Tinitiis ang
hirap sa ibang bansa, para sa pangarap na maayos
na buhay ng mga anak at pamilya.
Higit sa lahat, sisiguraduhin niyang bawat
miyembro ng pamilya niya ay mabibigyan ng
kailangan—kahit wala na siya, basta meron ang
mga anak at asawa. Hindi siya gagastos para sa
sarili, dahil uunahin muna niya ang iba.
2. Siya ang manager ng lahat.
Kung magaling siyang manager sa opisina, mas
magaling siyang manager sa bahay.
Parang lahat yata ng babaeng Filipina ay
pinalaking marunong mag-aruga at mag-asikaso
sa lahat ng aspeto ng tahanan—pamamalengke,
pagluluto, budget sa baon ng mga bata at lahat ng
bagay tungkol sa eskwela, pati pagbabayad ng
mga bills ng bahay, at marami pang iba.
Lahat na yata ng bagay ay alam niya, kaya’t siya
ang tanungan ng lahat tungkol sa problema man o
pati na sa pamamasyal ng pamilya.
3. Sa pagluluto niya ipapakita at
ipapadama ang pagmamahal niya.
Kahit pa hindi magaling o marunong magluto,
aaralin niya ang paboritong ulam ng anak at asawa
para lang mapagbigyan ang hilig nila.
Lalo na sa mga Pilipinong lumaki na sa ibang
bansa, ang pagluluto ni Nanay ng pagkaing Pinoy
ang paraan niya para hindi makalimot sa kulturang
Filipino ang mga anak.
4. Strikto, pero dahil lang ito sa lubos na
pagmamahal sa mga anak.
Lahat na lang yata ay napapansin—at, oo,
pinapakialaman. Para sa mga anak, lalo na pag
teenager, ito ang pakiramdam.
Hindi ka titigilan sa pagsasabing ayusin ang
kuwarto, magtapon ng basura, maghugas ng
pinggan, tumulong sa bahay, tigilan ang pagse-
cellphone, at kung anu-ano pang makikita niya.
Pero kapag sinuring mabuti, dala lamang ito ng
matinding pagmamahal at pag-aasikaso sa kanila
ng nanay nila. Siguro napanood na ng marami si
Jokoy, ang stand-up comedian na Filipino-
American at laking Amerika, na napakaraming
kuwento tungkol sa nanay niyang Filipina.
Napaka-istrikto, ngunit nakakatawa dahil kung
babalikan nga naman, lahat ng paghihigpit ay
dahil lamang sa gusto ni Nanay na lumaki tayong
maayos, mabait at may respeto sa kapwa.
5. Walang kasing-sayang kasama, at
game na game lalo kapag may
kasiyahan.
Palagi siyang seryoso at busy kapag nag-aasikaso
sa lahat, pero hindi niya nakakalimutang magbiro,
ngumiti at tumawa ng malakas, kahit na
napakaraming iniisip na problema.

Marunong maglibang si Nanay—kumakanta,

sumasayaw, nagsu-Zumba, pati badminton, kaya
niya.

Pagkatapos magluto kapag may party, naka-apron

pa ay sumasabak na sa videoke, o di kaya naman
ay handang sumali sa mga parlor games.

6. Laging tumatawag o nagtatanong

kung kumusta ka.

Kahit walang okasyon, kahit kakatanong lang niya

nung umaga, tatabi pa rin siya sa yo o magtetext
kung kumusta ka na.

Hanggang sa paglaki, ang tanong niya ay:

Kumusta ka na, anak? Okay ka lang ba?

Marahil kailangan lang niya talagang malaman

kung ano na ang nangyayari sa yo, kahit malaki ka
na, kahit may asawa ka na. Kahit araw araw
naman kayo nagkikita.

Likas kay Nanay ang masigurong walang malalim

na problema kang pinagdadaanan, na hindi niya
alam.