Naglahong Paraiso

Ako’y nanabik sa mga huning kay lambing

Ng mga maya sa umaga sa akin ay gumigising
' di ko na masaksihan ang paghalik ng paru-paro
Sa mga rosas na kay ganda at kay bango

Ako’y nanabik na umidlip sa ilalim

Ng punong narra na malabay na dati-rati'y kapiling
'di ko na maramdaman sariwang ihip ng hangin
Mula sa kinagisnang bukirin

Nais kong manumbalik

Ang dating makulay na paligid
Sa puso ay muling pausbungin
Ang luntiang daigdig

Ako’y nanabik sa hiyaw at halakhak

Ng mga batang naglalaro sa damuhan
Pagka’t pumanaw na ang sigla nila’t galak
Sa pagkasira ng paraisong kinagisnan

Nais kong diligin ng pag-ibig

Ang nalalanta ng kalikasan
Ipamana sa kabataan
Ang kanyang mga biyaya’y kagandahan

Nais kong manumbalik

Ang dating makulay na paligid
Sa puso ay muling pausbungin
Ang luntiang daigdig