Isang alien (kalaunang nakilala sa pangalang PK), na may katawang tulad ng sa
ating mga tao, ang dumating sa daigdig upang magsagawa ng pananaliksik tungkol sa sibilisasayon sa mundo. Subalit, makalipas lamang ang ilang sandali ng kanyang pagdating ay naagaw sa kanya ang “remote control” ng kanyang spaceship dahilan kung bakit hindi siya makabalik sa kanyang sariling planeta. Sa paghahanap ng kanyang remote control ay naharap siya sa maraming pagsubok dahil sa kakulangan nya sa kaalaman tungkol sa mga bagay-bagay sa mundo lalong-lalo na sa lingguahe ginagamit ng mga tao.
Mabuti na lang at may nakilala siyang lalaki na may mabuting kalooban na
tumulong sa kanya upang matuto siya ng lingguahe ng tao at makapunta siya sa Delhi, na sinasabing karaniwang pinagbebentahan ng mga bagay na nanakaw. Sa pagtatanong-tanong niya kung nasaan ang kanyang remote control, ang laging tugon sa kanya ng mga tao ay ang Diyos lamang ang nakakaalam at makakatulong sa kanya. Dahil wala siyang ideya sa konsepto ng Diyos, tinatak niya sa isipan niya na hahanapin niya ito. Sa paghahanap niya ay nalaman niya ang tungkol sa iba’t-ibang uri ng relihiyon na may magkakaibang kinikilalang Diyos at magkakaibang paraan ng pananampalataya na nagbunga ng kalituhan sa kanyang isipan.
Gayunpaman, isinagawa niya ang bawat bagay na iniuutos ng bawat relihiyon
alang-alang sa paghahahanap niya ng kanyang remote control. Subalit, wala ni isa sa mga relihiyong kanyang sinalihan ang nakapagturo sa kinalalagyang ng kanyang remote- control. Dahil dito ay kinuwestiyon niya ang mga walang-kabuluhang gawain at tradisyon base sa kanyang obserbasyon ng mga organisadong relihiyon na tinawag niyang "wrong numbers" at sinabing ginagamit lamang ito ng mga pinuno nito na tinawag niyang "managers" upang manipulahin at maabuso ang mga inosente at kung saan, nakakalimutan na ang tunay na mensahe at mabuting aral ng Diyos.
Sa pananatili niya sa mundo ay nakilala niya si Jaggu, isang babaeng TV reporter
at natatanging may alam sa pagiging alien niya at kalaunan ay ang nakatulong sa kanya upang makuha niya muli ang kanyang remote control mula sa isang maimpluwensyang lider ng isang organisadong relihiyon at makabalik siya sa kung saan man siya nanggaling. Sa pangkalahatan, ang palabas na ito ay kwento ng pananamplataya, pagkakaibigan at pagmamahal.
REAKSYON
Para sa akin, ang PK ay isang natatanging palabas na naglakas loob na
talakayin ang isa sa pinaka-sensitibong usapin sa mundo, ang relihiyon. Bagama’t hindi nito kinuwestiyon ang kahalagahan ng relihiyon at ang pagkakaroon ng Diyos, tinalakay nito ang mga tila walang-kabuluhan at makamundong tradisyon ng pananampalataya na kasalukuyang maoobserbahan sa mga organisadong relihiyon at mga kasapi nito.
Sa kabilang banda, kahit seryoso ang pangunahing usapin na tinalakay ng
palabas, inilahad ito sa komedyang paraan kung kaya’t hindi mawawala ang ngiti mo habang pinapanood ito. Dagdag pa rito, nagiwan ito ng mga aral sa mga nanonood. Tinuruan tayo nito na dapat matuto tayong kwestiyunin ang mga bagay-bagay na nakikita nating mali at hindi dapat nating hayaan na maabuso tayo ng mga taong gumagamit ng pangalan ng Diyos upang makalamang sa iba. Tinuruan rin tayo nito ng halaga ng pagtitiwala, pagkakaibigan at pagmamahal. Tumatak sa akin ang huling huling parte ng palabas kung saan sinabi ni Jaggu na masyadong malalim ang pagmamahal ni PK kung kaya’t nagawa siya nitong magparaya.