LEYVA, Jessiah Jade B.

3rd yr BSED Filipino

Mga Natatanging Diskurso sa Wika at Panitikan
CN 5384

Isyu

Pagtugon ng Tao sa mga Hamon ng Buhay

Totoo na ang buhay ng tao ay hindi nauubusan ng problema. Ang isyu ay nasa kanyang sarili
kung paano niya haharapin ang mga hamon, sa pamamagitan ng paggawa ng paraan at matimbang
na pagpili ng desisyon. Maiiuugnay dito ang kasabihan na mula kay John C. Maxwell - "Most of the
time we don't choose our adversity, but all the time we can choose our response to it."

Diskurso

Naisip mo na ba kung ano ang buhay na walang problema? Ang buhay na purong tawa at
saya? Mga timplang tasa ng walang pag-aalala?

Marahil minsan sa buhay mo ay ninanais mong matikman ang walang humpay na

kaginhawaan sa mundong ibabaw, ngunit, hindi ganoon ang realidad. Walang buhay na perpekto.
Ang pagsubok ay pangkaraniwang bahagi na ng buhay ng tao, sa ayaw at sa gusto mo. Mahirap o
mayaman, bata o matanda, may ngipin o wala; walang pinipili ang problema. Sa totoo lang kahit
hindi mo na imbitahin ang mga hamon sa buhay ay kusa silang nagsisidatingan. Ang mga ito ay
minsan magaan, minsan mabigat o kaya’y kung minsan naman ay katamtaman lang.

Pagtugon ng Tao sa mga Hamon ng Buhay

Ang bawat tao ay may iba’t ibang paraan sa pagtugon at pagharap ng kani-kanilang mga
hamon sa buhay. Hindi rin maipagkakaila na kung minsan ay nakakaramdam ang tao ng
kapighatian bunsod ng mga suliraning kinakaharap at nahahantong pa sa paggawa ng kamalian.

Tulad ni Kathy Buckley kung saan isinalaysay niya sa bidyo ang kanyang naging karanasan
at kung paano niya hinarap ang mga problemang ito. Noong una pinili niya ang magpakamatay
dahil naramdaman niya ang kawalan ng pag-asa at kawalan ng pagkalinga ng kanyang pamilya. Sa
sunod-sunod pa niyang mga matitinding problema ay hindi niya hinayaan ang sarili na madaig pa
nito. Paano niya ito hinarap? Alam niya na sa bawat pagkakadapa, mararamdaman niya ang iba’t
ibang pasakit, pait, at kabiguan. Tanging ang mga luha, kasabay ng pagtanggap sa kamalian at
positibong pagtanaw sa problema, ang kanyang sandata para sa panibagong hamon.

Ibinilin ni Buckley na sa buhay maraming pagpipilian, nasa iyong mga kamay lamang kung
alin ang pipiliin mo roon at kapag hindi gumana ang una ay subukin mo naman ang isa. Subukin mo
nang subukin hanggang sa iyong makamtan ang iyong minimithi. Maaangkla rito ang sikat na
kasabihan ni Thomas Edison na “I have not failed. I've just found 10000 ways that won't work.”
Nangahuhulugan lamang na kahit ilang beses man tayo madapa at mabigo ay huwag agad mawalan
ng pag-asa. Isipin natin na ito ay bahagi ng proseso upang malampasan ang hamon at matatamasa
ang kaginhawaan.

Kailangan lamang ng tao na tatagan ang kanyang loob at may pananalig sa Diyos . Hindi ko
layong ipahiwatig na kailangan ang tao ay hindi dapat madapa at lumuha at iasa nalang sa Diyos
bagkus sa kabila ng mga galos at sugat ay patuloy pa ring babangon, aaksyon at haharap sa buhay
na may baong aral. Ang baong aral ay natutunan pagkatapos malampasan ang problema at
humahasa sa buong pagkatao ng isang nilalang kung kaya dapat bukas lagi ang isipan at puso ng tao
para rito.

Positibong Pagtanaw sa Pagsubok

Bawat pagsubok ay may aral at may asal na matutunan. Kaya huwag natin isipin na ang
problema ay isang nakakatakot na nilalang sa halip tingnan natin ito ng positibo, na nagbibigay
oportunidad na mapabuti ang ating sarili at itama ang mga pagkakamali. Sa pamamagitan ng mga
problema, natuto tayong gumawa ng paraan at magtimbang sa pagpili ng mga desisyon. Dahil sa
mga pagsubok, hindi nakakalimot ang tao na tumawag sa Poong-Maykapal at humingi ng
karunungan sa paglutas ng mga suliraning ito. Mas naging matibay ang ugnayan ng tao sa kanyang
Panginoon. Kaya sa puntong ito ang problema ay naging isang biyaya sa buhay ng tao.

Ang Lahat ay Panandalian

Hindi ko ibig sabihin na pagkatapos ng isang pagsubok ay wala na, tapos na. Bagaman
walang problema ang nananatili ng matagal, natatapos at natatapos din iyan ngunit hangga’t may
hinihinga may bagong problema. Sa kabila nito, mas higit namang mayroong pag-asa. Sabi nga ni
Buckley, ang mga mapapait na karanasan at pagsubok ay panandalian lamang gayundin ang mga
saglit na kasiyahan at kaginhawaan sa buhay.

Ang bawat pagsubok ay may katapat na lunas at solusyon. Kailangan lang ng tao na harapin
at gawing hamon ang hamon sapagkat kung mas nanaisin niyang maging duwag at takot madapa,
ay marka ng isang talunan at walang umaga na haharapin kinabukasan.

Ngayon mas nanaisin mo ba ang buhay na walang problema? Ang buhay na purong tawa at
saya? Mga timplang tasa ng walang pag-aalala? Pag-isipan mong mabuti ang iyong sagot dahil malay
mo, nakatago sa mga problema ang mga bagay na tuluyang makapagpabago sa iyong buhay at
huhubog sa iyong buong pagkatao na maging matapang at matatag.