Nueva Ecija Universty of Science and Technology

Cabanatuan city

Pagsusuri sa Penikulang

SEKLUSYON

Ipinasa ni:

Yango, Jeric C.

BSCE 2-I

Ipinasa kay:

Kassandra Mae Salipsip

Filipino Teacher
  A. Pamagat: Seklusyon

Ito ang pelikula na naglalayong subukin ang pananampalataya hindi lamang ng mga
tagapaglingkod sa simbahang Katoliko, maging ang mga ordinaryong mamamayan at ang mga
diakono na nagnanais na maging pari. Ang seklusyon ay isang gawain bago maging pari ang
isang seminarista o diakono. Ipinakita sa pelikula kung paano hinaharap ng apat na diakono ang
mga araw ng pananatili nila sa loob ng seklusyon. Sa pamamagitan ng seklusyon ay nasusukat
ang pananampalataya ng bawat isa. Habang isinasagawa ang seklusyon ay mayroon silang batas
na dapat sundin upang maging maayos ang kanilang pananatili sa loob ng seklusyon. Sa mga
panahong iyon nasasabing malakas ang pwersa ng demonyo upang guluhin ang mga
mananampalatayang seminarista o diakono sa kanilang pagsasagawa ng seklusyon.

Ang seklusyon ay tumatalakay sa kung paano ang kasamaan ay nangibabaw sa kabutihan.

Pinapakita ang reyalidad ng buhay na mas pipiliin ng tao ang kung ano ang mas masarap o
madali kaysa sa kung ano ang makakabuti sa kanila.

B. Direktor

Erik Matti - Siya ay pinanganak noong December 21, 1970, isa sa mga tanyag na gumagawa ng
pelikula. Siya ay kilala sa kanyang pagdidirekta sa ilang pelikula tulad na lamang ng On the Job
(2013), Honor Thy Father (2015), Seklusyon (2016), at BuyBust (2018). Sinama din ang
kanyang kakayahan sa pagdidirekta sa pelikulang Ekis (1999), Mano Po 2 (2003), Gagamboy
(2004), Tiktik:The Aswang Chronicles (2012) at Kubot:The Aswang Chronicles 2 (2014). at isa
sa nag pundar ng isang production company na Reality Entertainment kasama sina Dondon was
at Lily Monteverde.

Siya ay ginawaran ng iba’t-ibang paranagal tulad na lamang ng Best Original Story at

Best Screenplay sa pelikulang Magic Temple kasama sina Peque Gallaga, at Lore Reyes taong
1996 sa 22nd Metro Manila Film Festival, Movie Cinematographer of the Year at Movie
Director of the Year sa pelikulang On The Job taong 2014 sa 30th PMPC Star Awards for
Movies, Best Director at Best Original Story sa pelikulang Honor Thy Father kasama si Michiko
Yamamoto taong 2015 sa 41st Metro Manila Film Festival, at Best Director sa pelikulang
Seklusyon taong 2016 sa 42nd Metro Manila Film Festival. Siya ngayon ay isa sa nagpundar ng
production company na Reality Entertainment kasama si Ronald Stephen Monteverde na naging
tanyag dahil sa ilang pelikulang kanilang ginawa.

C. Producer

Reality Entertainment
D.Tauhan

d1.Pangunahing Tauhan

Si Rhed Bustamante ang gumanap bilang Anghela Sta. Ana na nagsilbing pangunahing
tauhan sa pelikula. Ipinakita niya ang kanyang galing sa pag-arte kahit na siya ay bata pa lamang.
Siya ang anak ni Miguel na nagsilbing katauhan ng demonyo. Siya rin ang batang manggagamot
na hinihinala ng mga taong simbahan na nabubuhay na Santa dahil sa kanyang kakayahan. Si
Anghela ang batang inialay ng kanyang ina sa demonyo. Si Anghela ang susi upang matapos ang
panggugulo ng kasamaan o ng mga demonyo sa mga tao at sa mga nasa seklusyon. Siya ang
naging dahilan upang matapos ang panggugulo ng mga demonyo sa loob ng seklusyon.

Si Ronnie Alonte ang gumanap bilang Miguel na ipinakita ang kahusayan hindi lang sa
pagsasayaw, pinakita rin niya ang talento sa pag-arte sa katauhan ni Miguel. Binigyan niyang
buhay ang kanyang karakter na ginampanan sa pelikula. Gumanap siya bilang isang diakono na
nagnanais na maglingkod sa diyos. Siya rin ang naging kasintahan ni Erina na ina ni Angela.
Ipinagpalit niya ang pagiging pari upang maitama ang mali at ginawa ang makabubuti sa
nakararami. Kaniyang tinapos ang kadiliman na kumakatawan sa kaniyang anak na si Angela.

Si John Vic De Guzman ang gumanap bilang Marco, isa sa diakono na kasama ni Miguel
sa pitong araw na seklusyon. Ginamit ang kaniyang karakter bilang binata na nag hahangad
maging pari na isa sa mga ginulo ng demonyo habang siya ay nasa seklusyon.
 Si Dominic Roque ang gumanap bilang Fabian, isa sa mga diakono na kasama ni Miguel
sa pitong araw na seklusyon. Isa sa mga diakonong naniwala na si Angela ay sugo ng Panginoon

D2.Pansuportang Tauhan

Si Niel Ryan Sese ang gumanap bilang Padre Ricardo, dating mahusay sa pag-arte at isa
na sa batikan sa industriya. Muli niyang pinatunayan ang galing sa pagganap bilang isang pari na
naatasang pag-aralan ang tungkol sa pagpapagaling at himala ng bata upang ito ay maikunsidera
bilang isang nabubuhay na Santa. Isa rin sa kaniyang binigyang pansin ang isang madre na
naging tagapangalaga ng bata. Siya ang pari na kailanman ay hindi naniwala sa taglay na himala
ni Angela.

Si Phoebe Walker ang gumanap bilang Madre Cecilia na nagsisilbing tagapangalaga ni

Angela. Ang kaniyang pagkatao ay hindi nalalaman ng kahit sino dahil sa misteryosong pag
kilos at ugali nito. Si Madre Cecila ay isang maruming babae katulad ng kanyang ina, ayon sa
sinabi ni Anghela kaya’t siya ay naging tagasunod ni Anghela sa mahabang panahon.

Si Elora Espano gumanap bilang Erina, ipinakita niya ang kahusayan sa kaniyang
karakter bilang isang ina ni Anghela na naging kasintahan ni Miguel bago siya pumasok sa
tawag ng pagpapari. Siya ang nag-alay kay Angela sa pagiging katauhan ng demonyo.
 Si Lou Veloso gumanap bilang Sandoval, isang matanda na nagsilbi bilang tagapamahala
ng bahay seklusyon, siya rin ang namumuno ng kanilang pag-aayuno sa bawat araw.

Si Jerry O’Hara ang gumanap bilang Obispo sa pelikulang seklusyon. Siya ang dahilan
kung bakit si Anghela ay nakarating sa loob ng bahay seklusyon. Siya rin ang na- atas na suriin
ni Padre Ricardo ang himala na mayroon si Anghela.
Si Teroy Guzman ang gumanap bilang Padre Francisco. Siya ang kasamahan ni Padre Ricardo
sa sibahan na kanyang kinabibilangan. Si Padre Francisco ang katuwang ng obispo sa lahat ng
bagay sa loob ng simbahan.

Si Sherry Lara ang gumanap bilang Mother Superior, siya ang namumuno sa
isang lugar ng mga madreng katulad niya at siya ang nakakaalam ng tungkol kay Madre Cecilia.
Siya ang nagbigay ng mga dokumento kay Padre Ricacdo.

E. Banghay

BUOD:

Ang pelikulang seklusyon ay tumatalakay sa mga seminarista o diakono na nagnanais na

maging isang pari na tagapaglingkod ng simbahang Katoliko. Matapos ang pangungumpisal ng
mga seminarista o diakono, sila ay magtutungo sa bahay seklusyon upang masukat ang kanilang
pananampalataya sa Diyos. Ito ay tumatagal ng pitong araw na pag-aayuno at sila ay hindi
nararapat na lumabas o makarinig man lang ng kahit anong ingay, sapagkat iyon ang simula ng
panggugulo sa kanila ng kampon ng demonyo sa panahon ng kanilang seklusyon.

Mayroong isang batang manggagamot na si Anghela at hinihinala ng mga taong simbahan

bilang isang nabubuhay na santa, kaya’t inatasan ang isang pari na si Padre Ricardo na pag-
aralan ang bawat detalye ng panggagamot ng bata upang malaman kung karapat-dapat ba itong
ituring na isang nabubuhay na santa. Patuloy pa rin ang panggugulo ng mga demonyo sa mga
diakono sa pamamagitan ng kani-kanilang nakaraan na nagawang kasalanan.

Habang pinag-aaralan ng pari ang himalang dala ng bata nalaman ng mg taong simbahan
na ang magulang ng batang nasabi ay pumanaw at hindi nila alam kung sino ang may gawa no’n.
Napagdesisyunan ng obispo na ipadala ang bata sa isang lugar na hindi siya mapapahamak at
kasama ang isang Madre na si Madre Cecillia na matagal na nitong kilala at kasama. Ang lugar
na kanilang patutunguhan ay ang bahay seklusyon na kung saan naroroon ang mga diakono na
nag-aayuno.

Sa pagdating ni Anghela sa bahay seklusyon, muling nangibabaw ang panggugulo ng mga

demonyo sa mga diakono na nag-aayuno. Hindi sila tinigilang guluhin ng mga demonyo. Sa
pananatili ni Anghela sa bahay seklusyon, kanyang kinausap ang isang matandang lalaki na
nagngangalang Sandoval na tagapamahala ng bahay seklusyon at kanyang sinabi rito na “hindi
ito nararapat sa loob ng bahay seklusyon” kaya’t ang matanda ay nagdesisyon na umalis sa loob
ng seklusyon.

Sa pag-alis ng matanda sa bahay seklusyon si Anghela ang nagsilbing tagapamahala at

namumuno sa loob ng seklusyon. Kanyang ipinakita ang kanyang himala sa pamamagitang ng
isang tinapay para sa mga nag-aayuno. Sina Marco, Carlo at Fabian ay tuluyan ng naniwala kay
Anghela na sinasabing isang sugo ng Diyos sa sanlibutan, ngunit si Miguel ay hindi naniniwala
rito. Si Miguel ay nagdesisyon na ipaalam sa obispo ang nangyayari sa loob ng seklusyon ngunit
siya ay hindi nagtagumpay sa kanyang pakay sapagkat siya ay pinigilan ni Anghela sa tulong ng
katauhan na meron ang bata. Muling naibalik si Miguel sa loob ng bahay seklusyon at kanyang
pinanindigan ang hindi pagtitiwala at hindi paniniwala sa taglay na himala ng bata.

Sa pagtatapos ng pelikula, nalaman ni Miguel na ang batang si Anghela ay kaniyang anak

sa kanyang dating kasintahan na si Erina, ngunit ang batang ito ay nasa katauhan ng isang
demonyo. Si Miguel ay gumawa ng paraan upang matapos na ang panggugulo ng mga demonyo
sa kanila. Kaniyang isinakripisyo ang pagiging pari upang itama ang mali sa katauhan ng
kanyang anak para sa nakararami. Kanyang tinapos ang buhay ng batang si Anghela upang
matapos na ang panggugulo ng mga demonyo sa loob ng at labas ng simbahan.

e. 1 Panimula

Sinimulan ang pelikula sa pangungumpisal ng mga kasalanan ng isang dyakuno bago siya
magpunta sa bahay seklusyon upang makaiwas sa malakas na tawag ng mga demonyo bago siya
maging ganap na pari. Sa umpisa rin ipinakita ang kakayahang manggamot ng isang batang
babae na sinasabing sugo ng panginoon at isang pari na nag-iimbistiga sa mga himalang
ginagawa ng bata upang mapatunayan na siya ay sugo nga ng panginoon. Sa simula pa lamang
ng pelikula ay mapapaisip ang mga manonood na ang pelikulang ito ay iikot sa isang dyakuno at
sa batang babae na naghihimala.

e. 2 Suliranin

Ang mga diakono ay pumasok sa bahay seklusyon upang ilayo ang kanilang mga sarili sa
tensyon at tawag ng mga demonyo dahil sinasabing mas malakas ang tawag ng demonyo sa mga
huling araw bago sila maging ganap na pari. Gagawin nila ito sa loob ng pitong araw kung saan
wala dapat makita, bawal nakipag-usap, wala silang ibang gagawin kundi magdasal sa Diyos.
Ngunit loob ng pitong araw ng kanilang seklusyon ay nakaranas sila ng panggagambala at
panggugulo ng mga demonyo tungkol sa kanya-kanyang mga nakaraang kasalanan bago nila
maisaipang pumasok sa pagpapari. Sa tagpong ito nabuo ang tunggalian: tao laban sa sarili.

e.3 Saglit na kasiglahan

Sa bahaging ito ng pelikula ay nakitang patay na ang mga magulang ng batang si Anghela at
ang bata na nagpunta sa simbahan na natagpuan ni Padre Ricardo. Ang paring si Parde Ricardo
naman na nag-iimbistiga kay Anghela ay malaki ang pagtutol na mapunta sa pangangalaga ni
Madre Cecilia si Angela ngunit wala siyang nagawa sa desisyon ng Obispo dahil ito ay walang
kinalaman sa kaniyang pag iimbistiga. Sina Anghela at Madre Cecilia naman ay ipinadala ng
Obispo sa bahay seklusyon upang walang makagalaw sa kanila. Sa bahagi ring ito ay umalis si
Mang Sandoval sa bahay seklusyon dahil siya ay kinausap ni Anghela na hindi siya nababagay
rito. Dahil dito si Angela ang namuno at tumulong sa mga diakonong nagseseklusyon. Mabubuo
sa isip ng mga manonood na ito ay bahagi ng plano ni Anghela.

e. 4 Kasukdulan

“Pagiging mulat sa panahon ng kadiliman at sa kung ano ang tunay na huwad ” ang
seklusyon ay kuwento patungkol sa moralidad, pananampalataya, paniniwala, pagkilala sa kung
ano ang dapat tama sa mali. Umiikot din ito sa kuwento ng isang diakono na si Miguel kasama
ang tatlo pang ibang diakono na pumasok sa seklusyon upang ilayo ang kanilang mga sarili sa
mga pagsubok at tawag ng mga demonyo.

Sa bahaging ito ng pelikula, tinangka ni Miguel na lumabas ng bahay seklusyon upang

ipabatid sa Obispo. Ang kanyang natuklasan sa batang si Anghela. Tinangkang makipag-usap ni
Miguel sa isa niyang kapwa diakono tungkol sa bata ngunit siya'y hindi nag-tagumpay sa
kanyang pakay sapagkat ang kanyang kausap pala ay ang batang si Anghela.

Sa puntong ito nagawa niyang makalabas ng bahay seklusyon upang pumunta sa Obispo
ngunit ang batang si Anghela ay hindi padadaig. Gumawa ng paraan si Anghela upang hindi
makarating si Miguel sa Obispo. Dumating sa punto na Ang mabigat na kasalanan ni Miguel ay
nagbalik sa kanyang isipan. Ipinakita na kanyang pinabayaan ang kanyang mahina kaya't Ang
Bata at naging isang tao na binibigay ng demonyo.

Naibalik si Miguel sa bahay seklusyon sapagkat siya ay nabigo sa kanyang pakay na

paglalahad ng totoong pagkatao ng batang si Anghela.

Sa bahaging ito ay nagsisimula na silang guluhin ng mga demonyo dahil hindi pa nila
inaamin ang mga pagkakasala na kanilang nagawa. Sinusubukan nilang takasan ang mga
kasalanang kanilang nagawa bago pa nila naising pumasok sa pagiging pari. Si Miguel na mas
pinili ang pagpasok sa seminaryo kaysa sa kanyang kasintahan na nagdadalang tao, si Marco na
mahilig makipaglaro sa mga bata si Carlo na makasarili, at si Fabian na sinasaktan ang kanyang
ina at tinatakasan ang pag-aalaga rito kaya siya pumasok sa seminaryo.
 Ang mensahe ng pelikulang ito ay tumatalakay sa kung paano ang kasamaan ay
nangingibabaw sa kabutihan. Pinipili ng tao ang mga desisyon na tingin nila ay makabubuti sa
kanila ngunit hindi namamalayan na may mga desisyon na mas mabuti pa kaysa roon.

e. 5 Wakas

Ipinakita sa wakas ng pelikula na ang tunay na mithiin ni Angela ay gusto niya na maging
pari ang apat na nagseseklusyon upang dumami ang sumasamba sa kaniayang Diyos at darating
ang araw na hindi na nila matutukoy kung sino ba talaga ang tunay at hindi sa pananampalataya
sa Diyos.

Isinakripisyo ni Miguel ang kanyang pagpapari upang mapigilan ang paglaganap ng maling
paniniwala sa pamamagitan ng pagkitil sa buhay ni Anghela na kaniyang anak at tumakbo siya
paalis ng seklusyon. Ang tatlong diakono na sina Marco, Fabian at Carlo ay naging ganap na pari
at natapos na ang panggugulo ng kampon ng demonyo sa kanila.

F. Mga Aspektong Teknikal

f.1 Sinematograpiya

Akma ang naging tagpuan na ginamit sa pelikula. Ito ay nakadagdag sa kabuuang kahusayan
ng pelikula. Ang luma at liblib na bahay seklusyon ay ang nagsilbing pinakasentro ng lahat ng
tagpuan sa lahat ng naganap na pangyayari sa buong pelikula. Sa bahay seklusyon nagsimulang
lumabas ang lahat ng mga natatagong kasalanan ng apat na diakonong nagseseklusyon.. Sa
bahay seklusyon din nakitil ang buhay ni Anghela sa tulong ng kanyang ama na si Miguel.

f.2 Musika
 Nakatulong ang mga musika na ginamit sa pelikula upang mas mabigyang emosyon ang
bawat eksena. Ang bawat eksena ay nilapatan ng mga tunog na nakakatulong upang mas
bigyang-diin ang bawat importanteng eksena.

f.3 Visual Effects

Naging maganda ang pagkakalagay ng kanilang “effect” na ginamit sa pageedit ng pelikula.

Nakadagdag ito sa mas nakakatakot na pangyayari ng kwento. Maganda ang pagpasok ng mga
“Visual Effect” upang mas maging kapana-panabik ang palikula.

G. Bisang Pampanitikan

g.1 Bisang Pangkaisipan

Pagkatapos mapanood ng mga manunuri ang pelikula may unting nabago sa kaisipan at
paniniwala ng mga manunuri tulad na lamang ng pananampalataya sa mga nakikita o
pinaniniwalaan tulad na lamang ng mga diyos-diyosan, propeta, santo atbp. Napagtanto na hindi
lang sa labas naghahasik ng kasamaan ang demonyo kundi maging ang loob ng simbahan ay
napasok na nito, sinubok ang malalim na kaisipan kung tama pa ba ang ating pinaniniwaan o
kung sino pa nga ba ang dapat nating paniniwalaan.

g.2 Bisang Pandamdamin

Pagdududa, Takot, Pangangamba, Saya, at Galit ang naramdaman sa Pelikulang Seklusyon,

Pagdududa noong matagal sumagot si Miguel sa tanong ng pari kung mayroon pa siyang gustong
idagdag na sabihin sa kanyang mga kasalanan, kung paano pinagagaling ni Anghela ang mga
nagpapagamot sa kanya, at sa mga bagay na di kapanipaniwala na kaya niyang gawin ,Takot,
noong magsimulang magparamdam ang mga demonyong nangggulo sa kanilang Seklusyon at sa
pag iiba ng boses ni Anghela na tila mong boses ng demonyo, Pangangamba noong namatay ang
mga tumatayong magulang ni Anghela, at sa totoong pagkakakilanlan ni Anghela at Madre
Cecilia, Saya noong nalaman ni Miguel na anak niya si Anghela at sa kanilang pagkikita at sa
kinahinatnan ng pelikula, at galit noong sumapi ang tatlong diyakuno na sina Marco, Miguel at
Fabian at sa pagkakaroon ng sama ng loob ni Erina kay Miguel dahil sa pang-iiwan nito sa kanya

at sa kanyang anak na si Anghela.

g.3 Bisang Pangkaasalan

Maraming matutuhan sa pelikulang ito. Bawat tauhan ay nag-iwan ng kaniya-kaniyang

kakintalan sa mga manonood.

Pero hindi tayo nakakasiguro kung mapagkakatiwalaan yung madre”“At darating ang araw
na hindi mo na malalaman kung sino ang peke at kung sino ang totoo” Mula sa sinabing ito ni
Anghela masasabing ito ay nangyayari naman talaga sa reyalidad hindi mo na alam kung sino
nga ba ang mapagkakatiawaaan mo sa mga taong nakapaligid sa iyo.

“Manampalataya kayo sa kanya at hindi kayo magugutom o mauuhaw” Ang sinambit na ito ni
Mang Sandoval ay may katotohanan sapagkat kung may pananalig ka sa Diyos ay hindi ka nya
pababayaan at ilalayo ka nya sa kahit ano pa mang kapahamakan o hirap.

H.Implikasyon sa Lipunan ng Pelikula

Ang pelikulang Seklusyon ay nagsilbing sukatan ng paniniwala sa Diyos at sa sugong

pinadala nito sa kalupaan upang magsilbing propeta na maglilingkod sa sangkatauhan, Nagsilbi
itong aral na hindi lahat ng sinugo ng diyos ay may kabutihan minsan ito ay ginagawa para
mapadami pa ang kasamaan sa lipunan, ang iba ay nagpapanggap upang ituring sila bilang banal
at dadating ang araw na hindi na natin malalaman ang mabuti sa masama. Magiging aral din dito
na hindi lahat naglilingkod sa simbahan ay totoong Diyos ang sinasamba, hindi na natin alam
kung kung ano ang dapat paniwalaan o kung sino ang totoo sa hindi.

Teoryang Pampanitikan

Teoryang Sikolohikal - Nakita sa pelikulang ito ang pagbabago sa pag-uugali ng mga taong
sumasamba na sa sinasabing Diyos ni anghela.

Teoryang Historikal - Ang pelikulang ito ay ginanap noong unang panahon sa taong 1947.
Ipinakita ito sa simula ng pelikula noong may nakasalubong si Miguel na sundalo at sinabing
parating na ang mga Hapon.

Teoryang Realismo - naitatala nito ang realidad na kung saan sa panahon ngayon madaming
mga nagsusulputang tao na itinituring ang kanilang sarili na Diyos o napapantay sa Diyos.