MUMULI

1. Kekatamung Kristiyano – ing kamatayan e

ya mu kabud papupusan ning bie. E ka mu
kabud mapatlud a inawa. E ka mu kabud
mawawala. E ka mu kabud mayayari.
2. Masala iting katutwan kekatamung
Kapampangan. E tamu mu kabud
mamamate: mayayangu tamu bie. Potang
sasabyan tamung meyangu ya bie –
kikilalanan tamung atin manangu, atin
kakwa, atin dadakit, AT ATIN KANG
PUNTALAN. At paniwalan tamu, anti ning
sasabyan nang Jesus – mumuli tamu king
bale ning Ibpa.

Nanung buri nang sabyan ning mumuli?

3. Mumuna, mumuli ka mu king lugal nu ka

menibatan. E ka muli king emu bale. Nung
inya potang sasabyan tamung ing
meyangu bie mumuli ya – kikilalanan tamu
nu ya menibat. Nung sasabyan tamung
 mumuli ya king bale ning Ibpa, kikilalanan
tamu munaman king karin ya menibatan.
4. Kadwa, mumuli ka mu king lugal nu ka
mesesese. Neng kayi agyang pang eme
tutung bale, kikilalanan meng uliyan mu
ing metung a lugal uling karin
penamdaman mung mesese ka. Neng kayi,
agyang sarili muneng bale, e mu
panamdaman ing ulian me uling matsuri
ing kekang denasan king lugal a ita.
Mumuli ka nu ka mesese.
5. Potang sasabyan tamung mumuli ya king
Ibpa ing kapatad tamung meyangu bie,
kikilalanan tamu at panwalan tamu king
ing Ibpa sinese ne ing kapatad tamu kaba
ning bie na. Sidsad ne, lingapan na, kambe
da ring anggang keyang kaluguran.
6. Katatawliyan, mumuli ka king lugal nu ka
maging tutung ika – at nung nu ra ka
tanggapan king kekakang panga-ika. E mo
king bale, malyari kang maging tutung ika:
agyang eka makagayak a piblas, ding
babayi agyang ela makakolorete, e la
 mangile, ampong lipistik. Neng kayi
agyang eka mandilu o manimu mu man –
o manyupilyu! Malyari ka. Tanggap ka.
Uling king kekang uliyan, kilala ra ka anti
ing ika. Alang kailangan pisala-salikut.
7. Potang sasabyan tamung ing meyangu bie
minuli ne – kikilalanan tamung king uliyan
na tanggapan de. King ulian na maging
yang tutu king sarili na. King ulian na
maging ganap ing tutung iya. Alang
pamagpanggap, lubus a pamanggap.
8. Ing kamatayan tamu: mapalyaring akakit
tayang kapupusan keti king yatu. Dapot
king sala ning kasalpantayanan balu tamu,
ing bie e mapupupus nune maging ganap
at mibabayu uling king Ibpa mumuli tamu.
9. Muli naka, kapatad mi. Muli ka king
penibatan mu. Muli ka king minyese keka.
Muli ka king tatanggap keka, dusing at
sintingan, king kekang kabilugan. Amen.