Septiembre 5- Viernes | Page 1

SEPTIEMBRE 5 VIERNES

NING KADUANG PULU AT ADUANG DOMINGO
NING KARANIUAN A PANAUN

Aldo Ferial. Berdi


LITURGIA DA RING ORAS: Psalter wk II.
MISA: any choice




ING LITURGIA NING AMANU

MUMUNANG PAMAMASA

Pamamasang ibat king mumuna nang sulat San Pablo
king kapulungan karin Corinto 4:1-5


Kapatad: sukat yu keng lauan antimong talasuyu nang Cristo, at katiualang mipanibalan karing
lihim nang katutuan ning Dios. Ing metung a bage panenayan karing mipagkatiualan ya pin ing
mayakit lang karapatdapat ketang mipanuala karela. Nung king bage, para kanaku, alang
maragul a ulaga nung ikayu atulan yu ku o atulan na ku ning isanu pa mang piukuman keti king
yatu. Agiang aku e ku ayatulan ing sarili ku, uling bista man ing konsiensya ku e na ku bitasang
liliga-ligan, ita e mangabaldugan king ala kung pamikasala. Ing Ginu ya mung kabud makayatul
kanaku. Inia e kayu mamatul king nanu pa man anggang e miras ing mituldung panaun. Panayan
yu ing paniatang ning Ginu; Ya ing milage king masala king sablang bage makasalikut king
dalum at Ya ing milantad karing lihim dang kapagnasan ding tau. King pinandit a ita ing balang
metung tanggapan na king Dios ing kapurian a pangaintuliran na.


Ing Amanu ning Ginu.
Salamat king Dios




Septiembre 5- Viernes | Page 2

DALIT A PAKIBAT Dalit 37:3-4, 5-6, 27-28, 39-40

Pakibat [39a] ING KALIGTASAN DING BANAL,
KING GINU MANIBATAN.


Manalig ko king Ginu at dapat ko king mayap,
Ban mie kong payapa at mangabiayan king labuad.
Magdulap kong tula bukud mung king Ginu
At Ya ipagkalub na ing pagnasan da ring kekong pusu.


Pakibat ING KALIGTASAN DING BANAL,
KING GINU MANIBATAN.


Ipanibala yu ing bie yu king Ginu, manalig ko kaya at Ya lingapan na kayu:
Gauan nang maslag anting sulu ing kekong kabanalan,
At ing kekng katuliran maslag
Anti ing aldo neng kaugtuan.


Pakibat ING KALIGTASAN DING BANAL,
KING GINU MANIBATAN.


Inia e ko babie dalan king marok, nune gawa kong mayap,
Magkamit kong tuknangan a alang kapupusan,
Uling ing Ginu kaluguran na ing katuliran
At ding sablang tapat kaya kapilan man e no tikusan.


Pakibat ING KALIGTASAN DING BANAL,
KING GINU MANIBATAN.


Ing kaligtasan ding banal, king Ginu manibatan,
Ya ing karelang santungan king oras ning kaligaligan.
Ing Ginu sasaupan na la at liligtas na la,
Kakabus at liligtas na la karing makasalanan
Uling king Ginu la magsantungan.


Pakibat ING KALIGTASAN DING BANAL,
KING GINU MANIBATAN.

Septiembre 5- Viernes | Page 3

ALLELUIA

Alleluia, Alleluia!

Aku ing sulu na ning yatu.
Ninu man ing tutuki kanaku
E ya lumakad kapilan man king karalumduman,
Nune kamtan ne ing sulung magkalub bie,

Alleluia, Alleluia!



EVANGELIO

Ing Ginu mantabe ya kekayu.
At keka antimurin.

Pamamasang ibat king Mayap a Balita
agpang kang San Lucas 5:33-39

King panaun a ita: sinabi da ring escriba at Pariseo kang Jesus:
Ding alagad nang Juan a Maminiag parati lang magayunu at mangadi, antimurin, ding alagad da
ring Pariseo, dapot ding alagad mu ala lang pamangauat king pamangan at pamaninum.
Mekibat ya I Jesus, Malyari yo uaring baualan mangan at minum ding kumbiradu king kasal
kabang kayabe re pa ing lalaking kakasal? Agiang makananu ali yu la! Dapot miras ing oras a
mirayu ne busal da ing lalaking kakasal, at kanita, pihung makapagayunu na la. Selita nia
namang Jesus karela ing talimhaga, Ninu man e ya tatabas kapirasu king bayung imalan ba nia
mung tagpian ing imalan a laun na. Nung daptan na ing anti kaniti, siran ne ing bayung imalan at
ing kapirasung tinabas na e ya mibage king laun. Ni e na lululan ning ninu man ing bayung alak
karing lulanan a megaua king balat animal, lulanan a megamit na. uling nung iti ing daptan na,
mangatdas la ring laun a lulanan king bayung alak, miyugse ing alak at mangasira la pa ring
lulanan. Ali! Ing bayung alak lululan karing bayung lulanan. At alang bisang minum king
bayung alak kaibat nang mekatakman king matuang alak. Nganang sinabi, Mas maniaman para
kanaku ing matuang alak.

Ing Mayap a Balita ning Ginu.
Kapurian keka, O Cristo.
Septiembre 5- Viernes | Page 4

PANALAGIN NING BALEN

Ginung Jesus, e mu binang pagnasan ing kekeng panlual a pamanupad. Matutula ka king
kalinisan da ring pusu ring tau. Ngami ngang manalangin:


GINU, PAKIRAMDAMAN MU ING PANALANGIN MI.


Para karing sablang Cristiano: mibayu la sana kapamilatan ning bayu nang turu ning Kaduang
Konseho Vaticano a inagyag ning Banal a Espiritu, ipanalagin ta king Ginu.


Para karing sablang kailangan manaral karing aliua: kapilan man sana e la mamilosopu o babie
oratorical a obra maestro a bukud mung para king palakpakan ding tau, nune munie lang patutu
kang Cristo king kapaniualan a mitmung kabanalan, ipanalangin ta king Ginu.


Para karing anggang e makaramdam king amanu ning Dios: agad la sanang mirinan at tanggapan
da no man sanang mitnung tula ding misyunerong miatad karela kang Cristo at king keyang
mensahi ning kalayan, ipanalangin ta king Ginu.


Para karing sablang meangu na bie, mipainaua no ngan sana king kapayapan, ipanalangin ta king
Ginu.



Ginung Jesus, e mu kailangan ing panlual ming pamanupad dapot e mo buring ilako uling
balu mu, ing pauli ning tau kami kailangan mi la ban apapanatilyan mi ing kekaming
kasalpantayanan at debosyun. Agampanan mi no man sana kambe ring malino at pusung
mitnung lugud keka at karing kapara ming tau. Ikang mabibie mangga ma king alang
angga.