Panalangin kay San Antonio de Padua
Patron ng mga Nawawalang Bagay
San Antonio, pinili ka ng Diyos na ipabatid sa
daigdig ang iyong kabanalan upang maakit ang
marami sa paggawa ng mga kabutihan. Hilingin
mo sa sanggol na si Hesus na hawak mo sa
iyong bisig ang mahigpit ko ngayong
pangangailangan. (Banggitin ang mga
kahilingan)
Samahan mo kami sa aming panalangin
sapagkat ang dasal ng isang banal na kagaya mo
ay dinirinig ng Diyos. Pagkalooban nawa kami
ng Panginoon ng tanda ng kanyang
pagmamahal, pagkalinga, at paggabay. Sa tulong
mo, nawa’y ipagkaloob niya sa amin ang
kaganapan ng buhay at ang pag-ibig na walang
hanggan. Amen.
San Antonio de Padua,
Ipanalangin mo kami.
Panalangin kay San Pedro Calungsod
Patron ng mga Kabataang Pilipino
O San Pedro Calungsod, batang manlalakbay,
mag-aaral, katekista, misyonero, tapat na
kaibigan at martir, loob nami’y iyong
pinalalakas sa iyong katapatan sa panahon ng
pag-uusig, sa iyong tapang na itinuro ang
pananampalataya sa gitna ng pagkamuhi; at sa
ngalan ng pag-ibig, dugo mo’y dumanak alang-
alang sa Mabuting Balita.
Angkinin mo ang aming alalahanin at agam-
agam (Banggitin ang mga kahilingan) at
ipamagitan kami sa harap ng luklukan ng awa at
biyaya upang sa aming pagkakamit ng tulong sa
langit ang Mabuting Balita’y lakas loob naming
ipahayag at isabuhay dito sa daigdig. Amen.
San Pedro Calungsod,
Ipanalangin mo kami.
Panalangin kay San Jose
Patron ng Unibersal na Simbahan
O Maluwalhating San Jose, kalinis-linisang
kabiyak ng Mahal na Birhen, uliran sa daan ng
kabanalan, nagpapaampon kami at dumudulog
na matagpuan ang landas ng kabanalan at
manatiling tapat sa aming katungkulan sa gitna
ng kasamaan ng mundo na nagbabadyang ibulid
ang lahat sa kapahamakan.
O Maluwalhating San Jose, tunghayan mo ang
pag-ibig at pamimintuho ng lahat ng dumudulog
at nagnanasang makatuklas ng aliw at tulong.
Hinirang ka at sa iyo’y ipinagkaloob ang biyaya
na maiduyan sa iyong bisig, maihimlay sa iyong
dibdib at pusong malinis, ang mabathalang
Sanggol. Hindi ipinagkait sa iyo ang lahat ng
mga biyayang kinakailangan. Kaya kaisa ng
buong simbahan, nawa kami’y laging
matulungan sa iyong pamamagitan. (Banggitin
ang mga kahilingan)
Habang sinisikap namin laging sundin ang
kalooban ng Diyos sa gitna ng sakit at tiisin sa
buhay na ito, nawa’y mapasaamin ang ligayang
iyong tinatamasa sa piling ng Diyos
magpasawalang hanggan. Amen.
San Jose,
Ipanalangin mo kami.