Tamacahut

Iɣiden d Wuccen

Yiwen n wass, deg tegrest, sin yiɣiden uɣalen-d seg tkessawt, teddun s axxam. Deg ubrid nsen,
mlalen-d Mḥend Uccen. Akken kan i ten-iwala, yeqqim yettneṭṭig seg lferḥ. Dɣa yenna- asen :
« Γer wanida i tettɣawalem akka tikli a tarwa ? » Nnan-as : « S axxam n Dda Mḥend. » Yekker
Wuccen yezzi ɣer umezwaru yesteqsa-t : « D acu-tent tigi i d-tewwiḍ ɣef uqerruy-ik ?
- Tt…tt .. d tacciwin ! i s-yerra yiɣid s tergagayt d usqewqew.
- I tigi iɣef tbeddeḍ ?
- Tt… tt… d tiqejjirin.
- Acuɣer akka i tettergigiḍ ?
- U… u… uggadeɣ ad iyi-teččeḍ. »
Mḥend Uccen yefreḥ imi i t-yuggad yiɣid-nni. Yuɣal yezzi ɣer wis-sin, yenna- as : «  I kečč, d
acu-tent tigi i d-tewwiḍ ɣef uqerruy-ik ? » Iɣid icuff idmaren-is, yessuzer taɣect-is, yerra-yas s
ccxara : « D acciwen swayes ara k-fetkeɣ ma ur twexreḍ ara deg ubrid-nneɣ. » Yuɣal yerna-yas
Mḥend Uccen : « I tigi iɣef tbeddeḍ, d acu-tent ? »
- D tidebbuzin swayes ara k-debbzeɣ, ma tkemmleḍ akka !
- Ayɣer ihi i tettergigiḍ ?
Iɣid, akken ad d-yesken ur yuggad ara, yebda la yekkat s tqejjirin-is timenzwura ; yettcuffu deg
yiman-is amzun d azger yettheggin iman-is ad yeckeḍ. Yenna-yas i Wuccen : « Ḥareɣ, ḥareɣ
melmi ara k-fetkeɣ ; ttrajuɣ kan ad tekfuḍ ameslay ! »
Mi yeḥṣa Wuccen ur t-yugad ara yiɣid, yuɣal d netta i yuggaden ; icukk deg yiman-is ad t-yagar
Yiɣid. dɣa tekcem-it tergagayt. Imuqel akka d wakka, yebda yettaker taqejjirt ɣer deffir. Cwiṭ
kan, yezzerweḍ d tarewla.
Iɣiden, mi walan Uccen-nni yerwel, nnan-as : « I nekkni d acu ara nerju ? Ɛni alama ifaq-aɣ ? »
Ṭṭfen-tt d tarewla ula d nutni, ammer ad d-yezzi ɣur-sen.

Seg tgemmi-nneɣ
seg Adlis n tɣuri,
D tacemlit n yiselmaden, Tizi Uzzu