Во изгледот на рељефот во РМ можат да се издвојат три рељефни типови како што
се: Планинско-ридски, рамничарско-котлински и долински рељеф. - Планинско-ридскиот тип рељеф во РМ го карактеризираат сите видови планини, ридови и возвишенија, а тој е последица на дејството на внатрешните сили – тектонски движења кои предизвикале издигнување на земјиштето низ долгото геолошко минато на земјата. Планинскиот рељеф зафаќа 3/4 од површината на РМ и е представен со млади верижни планини и стари грамадни планини. - Рамничарско-котлинскиот тип рељеф го сочинуваат сите котлини и полиња, а тој е последица од спуштањето на земјиштето долж раседните линии во внатрешноста на земјината кора. Овој тип на рељеф е застапен во сите делови на РМ претставен со котлините и полињата кои веќе ги изучивме во источниот и западниот дел на државата. - Долинскиот тип рељеф е застапен во долините на поголемите реки кои низ долгото геолошко минато со силата на водата ги формирале речните долини во помеките земјини слоеви на планините создвајќи клисури, кањони и алувијални рамнини. Најкарактеристична долина во РМ има реката Вардар која изградила композитна долина каде наизменично се сменуваат клисури и котлини прекриени со речен материјал остаток на високиот водостој при обилни врнежи и поплави. Композитната долина на реката Вардар почнува со котлината Полог, Дервенска клисура, Скопска котлина, Таорска клисура, Велешка котлина , Велешка клисура, Тиквешка котлина, Демиркаписка клисура и завршува со Гевгелиско-Валандовска котлина. Од кањоните во РМ познат е кањонот што го изградила реката Треска во близина на градот Скопје пред вливот во реката Вардар, а тоа е кањонот Матка.
Прашања за домашна работа:
1. Кои типови рељеф се застапени во РМ?
2. Кој тип на рељеф е најзастапен во РМ? 3. Како е создаден рамничарско-котлинскиот рељеф во РМ? 4. Опиши ја долината на реката Вардар?