A Deputación de Pontevedra, a través do departamento de Lingua, e en colaboración
coa Fundación Rosalía de Castro, vén de poñer en marcha un programa de visitas escolares á Casa-Museo de Rosalía para achegar a figura e o legado da autora á rapazada de toda a provincia. Baixo o nome de ‘Rosalía, a súa casiña, o meu lar’ queremos que alomenos 30 centros de ensino se acheguen este ano á Casa da Matanza.
Consideramos fundamental que o alumnado dos centros de Primaria e Secundaria da
provincia coñeza a Rosalía como autora nuclear das letras galegas modernas, a voz poética de Galicia por excelencia, unha icona popular e un referente indispensable do panorama literario do século XIX.
Na cita, as persoas participantes realizarán un percorrido polos acontecementos que
marcaron a vida e a obra da autora. Na Casa-Museo poderán coñecer a contorna que a rodeou e a súa relación do pobo galego, vivirán unha recreación da casa rural da época -entre labrega e fidalga-, e asistirán a unha proxección audiovisual sobre a figura da escritora, rematando coa entrega ao centro de varias das súas pezas literarias.
As visitas escolares levaranse a cargo polo persoal do Departamento de Educación da
Casa-Museo de Rosalía de Castro e estarán apoiadas polo material didáctico adaptado a cada idade (Primaria, ESO e Bacharelato), que se enviará previamente aos centros para a preparación dos grupos. A Deputación farase cargo dos custes da entrada e do transporte do alumnado dende os centros de ensino ata a Casa, resultando a iniciativa totalmente de balde para os centros beneficiarios.
Inicialmente será necesario concertar a visita co departamento de Educación da Casa-
Museo a través do correo fundacion@rosaliadecastro.gal ou do teléfono 981 811 204. Unha vez acordada a cita, os centros educativos deberán presentar a súa solicitude á Deputación (por vía electrónica) a través do formulario dispoñible na sede electrónica provincial ata o 1 de decembro. As solicitudes deberán presentarse no formulario cunha antelación mínima de 20 días naturais antes da súa realización, concedéndose por orde de entrada.