WIKANG FILIPINO

Ang ilaw sa madilim na kasaysayan ng Perlas ng Silangan

Iyong liwanag ang naging gabay sa pagtahak tungong kasarinlan
Ika’y aking mamahalin, gagamitin bilang lakas
At gagawing panangga para sa darating na mga bukas

Sandigan ng katapatan, kaluluwa ng mahal kong bayan

Amin kang nabawi’t nakamtan sa tulong ng mga magigiting na lumaban
Wikang may alab ng apoy at lakas ng bato
Hanggang sa huling hininga, ipagsisigawan ka sa mundo

Naglalagablab kong wika, ika’y aking tatangkilikin

Sapagkat naipapahayag mo ang mga saloobin at damdamin namin
Magmula nung ako’y may gatas pa sa labi, ikaw na ay nakapiling
Kaya’t asahang lagi kang makikilala, gamitan man ako ng piring

Sa nakaraa’t sa ngayo’y patuloy ka naming hinahasa

Ibabahagi ka sa iba nang gamitin ka pa ng mas maraming dila
Wikang maihahalintulad sa punyal na kay tagal na nating sinasalita
Hindi hahayaang mabakasan ng kalawang at dagta

Atin lamang buksan ang kanya- kanya nating kamalayan

Agad na bubungad sa’tin wika nating makulay kung pagmasdan
Ito’y may kapangyarihang magbuklod ng mga mamamayan
Mga mamamayang niyayakap nitong Pilipinas na ating bayan