KINUWA, KIWICHA, KAÑIWA KUTAWAN WIÑAPU MIKUY

Qichwa suyunchikqa imaymana rikchayniyuq hatu hatun allpam. Quñi allpakunaraq,

chiri allpakunaraqmi tarikun.
Allpanchikkunapiqa amaruhinaraqmi kayman wakman mayukuna chutarikuchkan.
Wayqukuna, pampakuna, urqukuna, quchakuna, ritikuna, wakrikuna, wayrakuna,
puyukuna, qasakuna imam allpapi tarikun.
Yana, puka, yuraq, qillu llinki, aqu aqu, ranra ranra allpakunatam purispapas
qawanchik. Kay allpakunapim imaymana kawsaykuna sumaqllaña wiñan.
Allpanmanhinam kawsaykunaqa sumaqta qispin. Quñi allpapim kiwichaqa sumaqta
wayun, chiriniraq allpakunapiñataqmi kinuwa rurusaparaq qispin, nisyu chirinan
allpakunapiñataqmi kañiwa umaqta rurun.
Ñawpa qichwa runakunaqa, kay kallpasapa kawsaykunata mikuspankum, hawka, qaliy
qaliy kawsakurqaku. Hina kaqllatapas mana chayqa kutaspankupas imaymana
mikuykunata yanukuspankum aylluntin mikuqku. Wakin llaqtakunaqa muhukunata
wiñachispankum mikuqku.
Chupipipas saqtapipas apipipas aqapipas wiñapupipas kamchapipas mikuqkum. Lliw
runakunam anchata munaqku. Allin chaninchasqam karqanku.
Qipa runakunaqa, qipa wiñaykunaqa, imaynanpich manaña kay kawsaykunamanta
mikuykuna rurasqankutaqa mikuyta pakunku.
Kañiwamanta machka rurasqatapas manañam ancha mikukuyta munankuñachu.
Aswanmi, upa kayninchikpi unquchikuq mikuyllataña llaqwapakusparaqmi mikunchik.
Llaqtapi kawsaq runakunaqa aswanmi kinuwa, achita, kañiwa kawsaykunataqa
riqsiyllapas riqsinkuñachu. Chutukunapa, sallqakunapa, qichwa runakunapa mikunanmi
niptinkum llaqtapi yachaq runakunaqa munachkaspapas mana mikuyta munankuchu.
Wakcha runakunapa mikunanmi niptinkum niñutukuqkunaqa mikuyta munankuchu.
Hawa runakunam ichaqa, chinukuna, rinhukunam ichaqa llumpayta chaninchanku
chaymi llaqtanchikkunaman hamuspanku rantinku hinaspa apakunku.
Qatukunapi kaptinpas sasa sasatam rantikuqkuna rantikunku. Rantiyta munaptinkupas
achka qullqipa chaninmi rikurikurqun. Kayraykum tarpukuqkunapas pisillataña
tarpukunku. Hatun allpakunapi tarpuqkunaqa hawa hatun llaqtakunaman
apachinallankupaqñam, hawa runakuna mikunallankupaqñam tarpukuchkanku.
Qullqillapaqñam kay rikchaq kawsaykunata tarpunku. Chaymi llaqta qatukunapiqa
achka qullqillapaqña maskaspapas tarinchik. Pisi qullqiyuq ayllukunaqa manañam
mikuyta munaspankupas rantiyta atinkuñachu.
Ñawpaq tayta mamanchikkunaqa mana unquchikuq mikuykuna kasqanraykum sapa
kutilla mikuqku, chayraykum paykunaqa wiksa unquywanpas mana hapichikuqkuchu.
Kay qipa watakunañam kayman wakman karu purinanpaq hatun ñan kichasqankuwan
millay mikuykuna llaqtakunaman yaykurqamuspa runakunapa qallunta miskirqachin.
Chaynaqa llaqtanchikpi kawsaykunawan ñuqanchikpas kawsakunanchik. Kikinchikpa
kaqtam mikunanchik. Qaliyachikuq mikuykunatam, unquchikuq mikuykunamantaqa,
mikunanchik.