Kabanata 17: Paalam, Bayan ng Atenas

Pagkaraan ng dalawang buwan ng matinding kalungkutan para kay Florante ay

dumating ang ikalawang sulat ng kaniyang ama, kasama ang sasakyang sumundo
sa kaniya. Bago umalis pinagbilinan si Florante ng gurong si Antenor na pakaingatan
si Adolfo sapagkat tiyak na siya ay maghihiganti. Idinagdag pang huwag padadala si
Florante sa magiliw na pakikiharap. Pinayuhan siyang lihim na maghanda nang hindi
nagpapahalata. Pinayagan ni Antenor si Menandro na sumama kay Florante. Ang
magkaibigan ay inihatid ng kanilang mga kamag-aral hanggang sa daungan.

Kabanata 18: Paghingi ng Tulong ng Krotona

Hindi nagtagal, nakarating sa Albanya ang magkaibigan. Pagkakita sa ama ay
napaluha si Florante at muling nanariwa ang sakit ng loob sa pagkamatay ng ina.
Nang mga sandaling iyon ay dumating ang sugo ni Haring Linceo, dala ang sulat ng
Hari ng Krotona na humihingi ng tulong sapagkat sila ay nilusob ni Heneral Osmalik
ng Persiya, ang pangalawa sa bantog na si Prinsipe Alladin na hinahangaan ni
Florante, at ayon sa balita ay kilabot sa buong mundo. Sa narinig, napangiti ang
Moro at nagsabing bihirang magkatotoo ang mga balita at karaniwang may dagdag
na. Nagtungo sa palasyo ng Albanya ang mag-ama. Doon masakit man sa loob,
pumayag din si Duke Briseo nang hirangin ng hari si Florante bilang heneral ng
hukbo.

Kabanata 19: Kagandahang Walang Kawangis

Nakilala ni Florante ang anak ng hari na si Laura, isang dalagang kaagaw ni Venus
sa kagandahan, isang kagandahang mahirap isiping makapagtataksil. Sa harap ng
kagandahan ni Laura, laging nagkakamali ng sasabihin si Florante sapagkat
natatakot siyang baka hindi maging marapat sa dalaga.

Kabanata 20: Pangarap na Pag-ibig

Tatlong araw ang piging ng hari para kay Florante. Sa loob ng panahong ito ay di
man lamang nakausap ni Florante nang sarilinan si Laura. Sa kabutihang-palad,
isang araw bago umalis sina Florante upang makidigma, nakausap niya ang dalaga
at nagtapat siya ng pag-ibig. Hindi sumagot ng “oo” ang dalaga ngunit lumuha siya
nang umalis si Florante patungong digmaan.

Kabanata 21: Sa Krotona

Dahil sa luhang pabaon ni Laura, natiis ni Florante ang kalungkutang bunga ng
pagkawalay sa minamahal. Pagdating sa digmaan, naabutan ng hukbo nina Florante
na halos mawasak na ng kaaway ang kuta ng Krotona. Ngunit magiting na
nagtanggol si Florante at ang kaniyang mga kawal hanggang sa hamunin ni Heneral
Osmalik si Florante na silang dalawa ang magharap. Limang oras silang naglaban
hanggang sa mapatay ni Florante si Osmalik.