SIMEIKHU KARTIN CHHUAK THINGSULTHLIAH

Dt. 12 May 2012 (INRINNI) PHEK- 2

editorial : Sub-Town VC tenRATE & WAGES CONTROL COMMITTEE DIN SE Thingsulthliah sub-town chhunga thil chi hrang hrang zuar thin te leh Pawl/Association hrang hrang ten thil man(Rate) leh nitin inhlawhna(Wages) Rate an tisang thin hi ngaihtuahtu pawl awm ve se a tha khawp mai. Thil man tihsanah hian mipuite pawhin kan hriatthiam theih chin a awm theih laiin thenkhat erawh a lutuk deuh em aw a tih theih. Hotel Association ten chawei man an tisang a, Thingpui Dawr Association ten thingpui leh a hmeh, etc man an tisang bawk a. Saser Association ten Sa Rate an tisang a, chutiang bawkin Dawrkai thenkhat ten an thil zawrh thenkhat man an tihsan loh vek pawhin a buk emaw a zat(quantity) an titlem daih a. Mistiri Association hrang hrang heng Cement, thing(Carpentry) ten an nitin inhlawhna Rate an tisang mek zel bawk a. Tihsan loh tur tihna lam nilovin, tihsan a hun em tih te, an tihsan dan hi a dik em, a phu reng em, kan Pawisa hlutna nen a inrem thei em tih te hi ngaihtuah a ngai. Chuvangin, kan sub-town Joint VC te hian hetiang lam ngaihtuahna hmang thei leh hmang thiam tur Rate & Wages Control Committee hi din ve sela a duhawm ngawt mai. Mipui mamawh thil tam tak Rate hi a san lutuk chuan Control a ngai thin a, Control-tu an awm loh chuan mitlemte thunun leh kaihhruaina hnuaiah tam tak(mipui) kan awm reng thei a ni. Tunkar Ningani khan Tst UPC(NEI) chuan Bial huapin Tst-ah LAD Day an hmang. He ni hi North East India State hrang hrangah pawh hman vek a ni. Tstah chuan Chawhmain Bialtu Pastor-in LAD thuchah a sawi a. Mizoram Aids Control Society atangin AIDS chungchang Awareness Campaign neih nghal a ni bawk. Thu leh hlaa intihsiakna hrang hrang neiin chawhnuah intihhlimna neih a ni a, Tlaiah chawhlui an kilho nghal bawk. Tunkar nilaini khan MNF General Hqrs chuan Aizawl District huam chhunga an Party ticket a thlantin VC/LC member te Aizawl Vanapa Hall-ah kokhawmin Chawimawina Certificate(an hming inchhujtsa thlap) member tinte hnenah an hlan. Thingsulthliah sub-town atang pawhin an kal a, Thingsulthliah MNF VC 5, Tlangnuam MNF VC 2 leh Seling MNF VC 3 te pawh he hun hmang hian an kal a ni.

HMASAWN KAN TUM EM?

Kan sawi tum ber chu Khawtlang hmasawnna a ni. Mizoram chhung maiah pawh hian khawtlang hmasawn tak tak an tam a, thanthu mek pawh sawi tur an awm. A bik takin Kan sub-town hi hmasawn chaklo pawl tak kan ni ti ila kan sawi sual tam lo mai thei. Rambuai hruaikhawm atanga reilote chhung chu Thingsulthliah khua ngei pawh Mizoram-ah khaw lian ber pawl a sawi, Aizawl, Lunglei khawpui dawttu a sawi kan ni ve thin. Han vak vel ila, Saitual, Khawzawl, Kolasib etc. tunhmaa min tiat lo, kan chhuk en thin ten min len khalh nasat zia han hmuh hian tunhma chuan khaw lian ve tak kan ni tih sawi pawh zahthlak khawp a ni ta. Engvang nge ni ang? A chhan lian tak zawng a awm a ni. Kan nunzia hian mite a hip bet lo a ni, i ti phawt teh ang. Khawtlang hmasawn tur chuan a chhunga cheng kan tam a ngai a, Tam tur chuan khawtlang hruaitu an pawimawh a, An hruai mipuiten khawtlang hruaitu kan en dan leh kan zui dan a pawimawh bawk. Khawtlang, NGO leh Kohhran hruaituten hmasawnna tur kawng nasa takin dap thin mahse, tunhma atang tawh khan mahni leh mahni kan indang duh zel a. Thil reng reng a te ber thleng pawin kan ti politics zel a, Sorkar milian leh mite pawhin an ngaihdan leh duh dan an puak chhuahpui ngam lo fo a, Mite malsawmna dawn leh hmasawn ve tur kan dal hreh lova, midang chan ai kan hui hreh lova, eng kan anpui chuang hek lo. Sawrkar mi leh sa lo pemlut duh ngei ngei pawh kan hmu mikhual lui tlat fo a, an thu leh hla engah mah kan ngai lova, Neitu rilru puttir kan tum lova, tuman nuam an ti tak tak thei lova, changkan duhna rilru pu an pem chhuak zel a nih hi. Pawnlam lan danah kan tawngkam a nem ang ai hian kan thinlung chhungril a kha tlat si. Hawh teh u, i ngaihtuah chiang teh ang u, midang puh lovin, mahni inen ila. Kan khawtlang tana tha leh pawimawh a nih chuan eng party hmalakna pawh nise, eng NGO hmalakna pawh nise phur takin back-up ching ang u. Tun dinhmun ang ringawt hi chuan Kawngpuiin min hel tan deuh bawk nen ral lam kan pan tial tial ang tih a hlauhawm a nih hi.//

- Ramenga pa

LAD DAY HMANG

LOM- IN TANPUI Ni 6/5/2012(Sunday) tlai khan Pi Lalsiamliani W/o Lalnunnema, D/A, tuna Guwahati a inenkawl mek chu Khawngaihtu Pawl (LOM) Thingsulthliah ten an in D/A-ah kanin tanpuina Rs. 500 an pe. LOM te hian Damlo leh tanpui ngai ni a an hriatte hnenah Kohhran thliar lovin tanpuina an pe thin a, chhungkaw eng emaw zat an lo tanpui tawh a ni. FINANCIAL CAMPAIGN NEI Vawiin(Inrinni) hian Aizawl East Bial Seventh Day Adventist (SDA) Daniel Pawl Chhantu a hruaitu(OB) ten Seling SDA Kohhran-ah Daniel Pawl Thawhlawm Promote(Financial Campaign) hmangin hun an rawn hmang ang. INVERTER LEH SANA LEI BNRGSK Building(NREGS Building), Seling-a hman turin Seling VC ten Inverter tha tak leh Wall Clock 2 an lei thar. HNATLANG Ni 8/5/2012(Thawhlehni) zingkar khan H/A Branch YMA Pu Vanlalhlura Section te chuan Pu Dinanath te leitha thiarin inhlawh hnatlang an nei a, Zanah Hmunphiah siamin an hnatlang nghal bawk. SELING PRESBYTERIAN BIAK IN CHEI Kumin October 2012 a Tuirini Presbytery thleng tur Seling Presbyterian Kohhran chuan Biak In hmarlam Gate atanga Biak In panna step chei thain a vawn ban, a tawn tawnin an siamtha a, a sirah Side-drain tha tak an siam bawk. FIRST TERM EXAM Tunkar ni 8.5.2012 atang khan High School ten First Term Exam nei tanin karleh ni 14.5.2012-ah Exam hi an zo ang. A tuk ni 15.5.2012-ah Second Term an lut leh nghal ang.

MNF VC/LC CHAWIMAWI