Si Pedro, nakatindog kaiba an Once, naghagad na himateon siya asin
nagtaram sainda: Mga Judio asin gabos na mga taga-Jerusalem, himatea nindo an sakong mga tataramon asin pakasaboton nindo. Mga Israelita, dangoga nindo ako. Ako nagtataram saindo dapit ki Jesus na taga-Nazareth, tawong pinatunayan nin Dios sa atubang nindo: naggibo nin mga milagro, mga tanda asin mga ngangalasan na aram nindo. Susog sa dati nang plano nin Dios, itinao siya saindo, asin saindong ipinagadan sa kamot nin mga masiwawa kan ipako siya sa cruz. Alagad siya binuhay liwat nin Dios, asin hinale an mga sakit nin kagadanan; huli ta dai mahihimo na siya masakopan kan kagadanan, siring sa sinabi ni David dapit saiya: “Danay na uya sako an Kagurangnan, siya sa too ko dai ako mag-aalangalang. Kaya ikinaogma kan sakuyang puso, nagaawit an sakuyang dila, asin an sakuyang pagkatawo nabubuhay sa paglaom. Huli ta dai mo ako itatao sa kagadanan, dai ka man matogot na an saimong Banal malapa. Itinotukdo mo sako an dalan nin buhay, papanoon mo ako nin kaogmahan sa saimong atubang. Mga tugang tugoti akong magtaram saindo kan katotoohan. An patriarkang si David nagadan asin ilinobong asin an saiyang lubongan uya sato sagkod ngonian. Alagad siya profeta asin aram niya na tinugaan siya nin Dios asin sinumpaan na saro sa saiyang kapagarakian papatukawon sa saiyang trono; kan sinabi na “dai siya itatao sa kagadanan asin sa saiyang laman dai makakamidbid nin kalapaan”. Sinabi ini na dapit sa pagkabuhay liwat kan Mesias. Iyo ini si Jesus na binuhay liwat nin Dios. Kami an mga saksi kaini.
Ini an tataramon nin Kagurangnan.
Salmo-Responsorio Salmo 16:1-2.5.7-8.9-10.11
S. Suroga ako, O Dios, Ika an sakong paglaom
Ampona ako, O Dios,
ta sa saimo ako nagpapaalaw. Masabi ako: “Ika an sakong Kagurangnan.” Ika, Kagurangnan, an sakong kahirasan asin sakong caliz; Ika an magpapadanay kan sakong pamana.
S. Suroga ako, O Dios, Ika an sakong paglaom
Inoomaw ko an kagurangnan na naghuhulit sako; minsan banggi pinapatanidan ako kan sakong puso. Danay kong ginigiromdom an Kagurangnan; kun siya nasa too ko, dai nin makakapurisaw sako.
S. Suroga ako, O Dios, Ika an sakong paglaom
Itukdo mo sako an dalan nin buhay,
yaon sa atubang mo an bilog kong kaogmahan, an kagayagayahan makukua sa too mo sagkod pa man.
S. Suroga ako, O Dios, Ika an sakong paglaom
Enot na Babasahon Mga Gibo 2:36-41
Pagbasa sa Mga Gibo kan mga Apostoles
Si Pedro nagtaram sa mga Judio: Dapat na masabotan nin bilog na Israel
na an Dios ginibong Kagurangnan asin Mesias si Jesus na saindong ipinako sa cruz. An mga tataramon na ini nakatadom sa saindong puso; nagharapot ki Pedro asin sa mga apostoles: Ano an dapat niamong gibohon, mga tugang? Si Pedro nagsimbag: Magsolsol kamo asin magpabonyag an lambang saro sa ngaran ni Jesus na Mesias, tanganing mapatawad an saindong mga kasalan asin akoon nindo an balaog kan Espiritu Santo. Huli ta an panuga para sa saindong mga aki asin man para sa gabos na inaaapod nin Dios na satong Kagurangnan. Sa iba pang dakul na paliwanag hinulitan niya sinda asin sinadol: Maglikay kamo sa mga masombikal na tawong ini. An mga nag-ako kan saiyang mga tataramon nagpabonyag, asin kan aldaw na idto may tolong ribo na nkaayon sa sainda.
Ini an Tataramon nin Kagurangnan.
Salmo-Responsorio Salmo 33:4-5.18-19.20.22
S. An daga pano kan pagkamarahayon nin Kagurangnan.
Matanos an tataramon nin Kagurangnan,
asin an saiyang mga gibo masasarigan. Karahayan asin katanosan saiyang namomotan: an daga pano kan pagkaherak nin Kagurangnan.
S. An daga pano kan pagkamarahayon nin Kagurangnan.
Binabantayan nin Kagurangnan
an mga natatakot saiya, an mga naglalaom sa saiyang pagkaherak. Ililigtas niya sinda sa kagadanan, asin aatamanon sa panahon nin gutom.
S. An daga pano kan pagkamarahayon nin Kagurangnan.
An satuyang kalag naglalaom sa Kagurangnan:
Siya an satuyang tabang asin kalasag. Mapasamuya lugod, Kagurangnan, an saimong pagkaherak: mapasamuya na mga naglalaom saimo.
S. An daga pano kan pagkamarahayon nin Kagurangnan.
Enot na Babasahon Mga Gibo 3:11-26
Pagbasa sa Mga Gibo kan mga Apostoles
Mantang an lopog na narahay nakakabit ki Pedro asin Juan, an mga tawo,
pano nin pagngalas, nagdaralagan sa sainda duman sa portiko ni Solomon. Si Pedro, pagkahiling sa mga tawo, nagtaram: Mga Israelita, tadaw ta ini ipinagngangalas nindo? Tadaw ta kami hinihiling nindo sa garo baga kami an nagpalakaw kan lalaking ini sa samuyang sadiring kapangyarihan? An Dios ni Abraham, ni Isaac, asin ni Jacob, an Dios nin satong mga magurang iyo an nagpamuraway sa saiyang surugoon na si Jesus. Siya saindong pinasaluiban asin isinikwal sa atubang ni Pilato, kan pinagmarhay kaini na siya pabutasan. Pinaghaboan nindo an Santo, an Banal: asin hinagad lugod nindo an pabutasan an paragadan-tawo. Ginadan nindo an Kagtao nin buhay, alagad binuhay siya liwat nin Dios: kami mga saksi kaini. An saiyang ngaran, asin an pagsarig sa ngaran na ini nkapakusog sa lalaking ini na saindong midbid asin saindong nahihiling. An pagtubod niya ki Jesus iyo nagpaomay saiya siring sa nahihiling nindo gabos. Alagad, mga tugang aram ko na iyan ginibo nindo huli ta dai kamo nin pakasabot; siring man an saindong mga poon. Sa siring na paagi inutob nin Dios an saiyang sinabi sa mga Profeta, na an saiyang Mesias dapat na magtios. Kaya, magsolsol kamo asin magbakle tanganing mapara an saindong mga kasalan; asin tanganing itao nin Kagurangnan an panahon nin karangahan dangan isubol an Mesias na itinuga saindo, si Jesucristo. Kaipohan na siya magdanay sa langit sagkod na umabot an panahon na mapakarhay an gabos na bagay, siring sa ipinahayag nin Dios sa nguso kan mga banal na profeta kaidtong panahon. Si Moises nagsabi: Papatuboon nin Dios na Kagurangnan sa tahaw nin mga tugang an sarong profeta na siring sako: hihinanyogon nindo an gabos na sabihon niya saindo; asin an dai maghinanyog sa profeta hahaleon sa banwaan”. An gabos na profeta, magpoon ki Samuel, nagtaram man dapit kan mga aldaw na ini. Kamo mga aki kan mga profeta asin nagmana kan tipan na ginibo nin Dios sa saindong mga magurang, kan sinabi ki Abraham: Huli sa saimong kapag- arakian magiging paladan an gabos na banwaan sa kinaban”. Enot huli saindo binuhay liwat nin Dios an saiyang surugoon, tanganing darahon saindo an bendicion na iyan; alagad kaipuhan na lambang saro sa saindo rumayo sa kasalan.
Ini an Tataramon nin Kagurangnan.
Salmo-Responsorio Salmo 8:2.5.6-7.8-9
S. Dios na Kagurangnan, mkangangalas an saimong ngaran sa bilog na
Kinaban.
Dios na samong Kagurangnan,
mamurawayon an saimong ngaran sa bilog na kinaban. Ano an tawo ta ginigiromdom mo, o an aki nin tawo ta ginigiromdom mo?
S. Dios na Kagurangnan, mkangangalas an saimong ngaran sa bilog na
Kinaban.
Ginibo mo siyang hababa sanang kadikit
sa mga angeles, asin kinoronahan mo nin kamurawayan asin kaomawan. Pinasakopan mo saiya an gabos na lalang nin saimong kamot; gabos na bagay ibinugtak mo sa irarom nin saiyang mga bitis.
S. Dios na Kagurangnan, mkangangalas an saimong ngaran sa bilog na
Kinaban.
An mga karnero asin baka,
an gabos na hayop sa daga, siring man an mga gamgam sa kalangitan; an mga sira sa dagat, asin gabos na naglalangoy sa kadagatan.
S. Dios na Kagurangnan, mkangangalas an saimong ngaran sa bilog na