De Galicia BSED 1-2 Readings in Philippine History
Tahol, Goyo, Tahol!
( Idolo o Prinsipyo?)
Hindi maitatanggi na kabilang sa isa sa mga namayagpag at gumawa ng ingay ngayong
taon ang pelikulang Goyo: Ang Batang Heneral. Ito ay sa direksyon ni Jerold Tarog na siya ring gumawa ng Heneral Luna. Bagama’t ang pelikulang ito ay pagpapatuloy lamang ng Heneral Luna, binigyan naman tayo nito ng kakaibang emosyon na hindi natin nadama sa naunang pelikula. Pinausbong ng pelikulang Heneral Luna ang ating damdaming makabayan at ang masidhing pagkapoot sa mga nanakop sa ating bayan ngunit iba ang naging dating ng pelikulang Goyo, naghatid sa atin ito ng isang tanong na bayani nga bang maituturing ito? Pinag dudahan natin at binigyang pansin ang mga pangyayaring magpapatunay na bayani nga bang talaga si Goyo. Halo-halong emosyon ang madarama sa panood ng pelikula. Una ay ang pagkapoot sa mga naging desisyon ni Aguinaldo, kung sana’y pinakinggan niya si Luna ay hindi mangyayari ang lahat ng iyon. Pangalawa, pagka awa sa mga taong namatay dahil sila ay tapat sa prinsipyo at tumataliwas sa utos ng idolo. Pangatlo, masidhing pagkamuhi sa mga Pilipino na tinraydor ang mga kapwa Pilipino. Panghuli, kilig at panghihinayang sa hindi natuloy na pagmamahalan ni Goyo at Remedios. Ang pelikulang Goyo ay may malaking ambag sa kasaysayan natin ngayon. Makikita natin na hindi lahat ng ating bayani ay perpektong maituturing na tila’y walang nagawang kamalian. Taliwas sa inaasahan, binigyang diin sa pelikula kung paanong ang isang batang heneral ay tila isang asong masunurin sa pinag uutos ng kaniyang amo na si Aguinaldo. “Tahol, Goyo, Tahol” ang isa sa mga linyang tumatak sa puso ng mga manonood. Umusbong ang ilang mga katanungang ano nga bang talaga ang pinaglalaban natin? Para kanino ba tayo nakikipaglaban? Para nga ba sa bayan o para sa isang taong iniidolo natin? Tapat nga ba si Goyo sa bayan o tapat siya kay Aguinaldo? Kung susuriin natin, si Goyo ay tapat sa idolo na kaniyang ikipinahamak at si Luna naman ay tapat sa prinsipyo. Prinsipyo na ipaglaban at bigyang kasarinlan ang ating bansa ngunit sa huli ay nabigo rin siya. Minsan ay mapapaisip na lamang tayo na saan nga ba tayo lulugar dahil kung susumahin ay pareho lamang ang kinahinatnatan ng ating mga bidang bayani. Patuloy ba tayong makikibaka at sasaliwa sa alam nating mali o susundin na lamang ang utos ng mga naghahari? Sinasabing kaya mahalaga ang kasaysayan upang hindi na maulit pang muli ang mga kamalian sa kinabukasan. Subalit meron talagang mga pangyayari na kahit anong pilit mong ipaglaban o iwasan na hindi mangyari ay mangyayari pa rin. Isa ang pelikulang ito na nagbigay inspirasyon upang hanapin natin ang kasagutan sa ating mga tanong. Tanong kung paano tayo napunta sa hawlang kinsasadlakan natin ngayon at kung papaanong ang nakaraan ay umuulit na sa ngayon. Napakahalaga ng papel na ginampanan ng mga bayaning ito sa ating kasaysayan. Isa sa mga aral na mapupulot natin dito ay “tandaan mo kung sino ka”. Alalahanin mo ang mga nagawa mo dahil ang iyong sarili ang sariling sandata laban sa mga gumagapi sa sarili mong espada.