Nagmistulang ‘demarcation line’ ang harang na lubid na inilagay ng lokal na
pamahalaan sa ‘pedestrian lane’ sa tapat ng Pambansang Mataas na Paaralan ng
Quezon. Ito raw ay para masolusyonan ang trapikong dala ng pagpasok ng mga estudyante ng paaralan tuwing ‘rush hours’. Marami ang umalma maging sa ‘social media’ sa naging hakbang ng lokal na pamahalaan, ngunit mahalaga ring malaman natin kung tunay bang makakabuti ito para sa mga estudyante at komyuter ng ating lungsod. Ang ‘pedestrian lane’ ay isang simbulong kinikilala maging sa ibang mga bansa. Sa pormal na pagkakakilala nito, ang pedestrian lane ay espasyo sa kalsada para sa mga pedestrian, maging tawiran man ito o lugar lakaran. Ngunit ayon sa ‘World Health Organization’, mahigit 22% ng mga aksidenteng pantrapiko ay dahil sa mga ‘pedestrian’. Kung susuriin, ang bahagdang nabanggit ay dulot ng ‘jaywalking’ o ang basta-bastang pagtawid sa mga lugar na hindi dapat tawiran. Kung titignan ang sitwasyon ng hinarangang ‘pedestrian lane’, mapapansing mas lumala pa ang mga kaso ng ‘jaywalking’. Hindi lamang estudyante ang apektado ng pagsasara ng ‘pedestrian lane’ na ito, ngunit pati na rin ang mga naninirahan sa karatig barangay, at maging ang mga motoristang imbis na masmapadali ang biyahe, ay nagdodoble-ingat sa mga nagsisitawid sa hindi na dapat tawiran. Dati nang pinagagamit sa mga estudyanteng tatawid ang naturang ‘overpass’ sa labas ng eskuwelahan, ngunit hindi ito nasusunod, at ang estilo pa ng karamihan ng mga estudyante, ay tumawid sa lugar na hindi kita ng mga pulis trapiko. Kaya naman isa ring dahilan kung bakit hinarangan ang ‘pedestrian lane’ ay upang magamit ang naturang ‘overpass’. Mabuti naman ang hanggad ng lokal na pamahalaan—ang mapakinabangan ang mga pampublikong proyekto kagaya nito. Maayos nang solusyon ang pagdidirekta sa mga estudyante papunta sa overpass upang magamit ito, lalo na kung ‘rush hour’, para mabawasan ang dami ng tao at sasakyan na lalo lamang makakasama sa daloy ng trapiko sa kalsada. Kung titignan, masligtas ang ganitong aksyon kumpara sa nangyayari ngayong ‘jaywalking’ at tila nakikipagpatintero pa sa mga sasakyan. Sa totoo lang naman, ang problema sa trapiko ng kalsadang kinatatayuan ng PMPQ, ay bunsod na rin sa kawalan ng disiplina ng mga mag-aaral, at pati na rin ang mga nagamit nito. Tunay ngang mahirap disiplinahin ang mahigit kumulang 9,000 estudyante, ngunit dapat matuto ang lahat na sumunod sa batas trapiko, lalo na kung ang mga ito ay para rin sa ikagiginhawa ng lahat. Ngunit may punto rin naman ang mga panawagan laban sa pagharang ng tawirang ito. Kung ang ‘overpass’ ay itinayo para sa kapakanan ng taong bayan, ganoon din naman ang pedestrian lane. Dapat ibigay sa taong bayan ang kung anong nararapat sa kaniya. Ngunit dapat ding malaman ng taong bayan ang mga responsibilidad na nakaatang sa kanila sa paggamit ng mga pampublikong pasilyo. Sa kabuoan, ang anggulong dapat tignan ng lokal na pamahalaan ay ang kaligtasan ng mga tao. Ang pagsasara ng lugar tawiran ay nagpapataas lamang sa kaso ng ‘jaywalking’, at dumadagdag pa sa posibilidad ng pagkakaroon ng mga aksidente. Kung tunay na nais ng lokal na pamahalaan ang pagpapaginhawa ng biyahe para sa mga motorista at komyuter, ugaliin nilang disiplinahin ang mga gumagamit ng kalsada. Kung ang nais naman ng taong bayan ay ang ibigay ang dapat sa kanila, ugaliin nilang sumunod sa mga batas trapiko na ginawa upang matugunan ang mga problemang ito. Kalian may hindi magiging solusyon ang tila pakikipagmataasan ng taong bayan at ng lokal na pamahalaan. Ang solusyon sa problemang trapiko ay ang pagbibigayan sa paggamit mga pasilyong wala namang tunay na nagmamay-ari.