RITUWAL NG PAGPAPANIBAGO AT PAGTANGGAP AT PAGKAKALOOB NG

KASUOTAN SA PAGLILINGKOD NG MGA TAGAPAGLINGKOD SA DAMBANA.

TAGAPAMUNO: Magsiupo po ang lahat. Ngayon ay gaganapin natin ang pagpapanibago at
pagtatalaga ng mga Lingkod ng Dambana na nagnanais paglingkuran si Kristo at isabuhay
ang mga utos niya.
TAGAPAMUNO: Tumayo ang mga kandidato na tatanggap at pagkakalooban ng kasuotan
sa Paglilingkod sa Dambana at mga magpapanibago. Reberendo Padre Dexter Fabie, Kura
Paroko at mga kapatid sa pananampalataya dito sa Parokya ni San Nicolas de Tolentino,
ang mga kabataang ito ay niloob na tumulong at maging Lingkod sa Dambana tuwing
mayroong liturhiyang pagdiriwang. Inihanda nila ang kanilang mga sarili sa pamamagitan
ng pag-aaral at pagsasanay itong mga buwan na nakalipas. Sila ay nakahanda nang tawagin
upang maglingkod sa hapag ng Panginoong Hesukristo. Kaya ikinagagalak naming iharap
ang mga kabataang ito sa iyo at sa sambayanan ni San Nicolas de Tolentino.
TAGAPAMUNO: Lumapit ang bawat tatawaging Lingkod sa Dambana.

(Lalapit ang mga tatanggaping Tagapaglingkod sa Dambana sa may gawi ng santuwaryo.)

Pari: Mga tagapaglingkod, ano ang nais ninyo?

Kandidato: Nais po naming makapaglingkod sa Dambana ng Panginoon.

Pari: Tinawag kayo ng Panginoon upang sumunod sa kanya.

Kayo ba ay nakahandang tumugon sa tawag Niya?

Kandidato: Opo, nakahanda kami.

Pari: Ang Banal na Espiritu ang siyang gumagabay sa atin sa pagtahak sa tamang landas.
Handa ba kayong sumunod sa gabay ng Espiritu Santo sa buhay ninyo?

Kandidato: Opo, nakahanda kami.

Pari: Bilang mga Lingkod ng Dambana nakahanda ba kayong tuparin ang mga tungkuling
inaatas sa inyo?

Kandidato: Opo, nakahanda kami.

Pari: Sa ngalan ng mga bumubuo ng ating parokya, ikinalulugod kong tanggapin

sila upang maglingkod sa Altar.

Pari: Maisakatuparan nawa ninyo ang mga gawaing iniatang sa inyo sa tulong ni
Kristo ngayon at magpasawalang hanggan.

Kandidato: Amen.
 PAGBABASBAS SA MGA KASUOTAN AT SAGISAG NG PAGLILINGKOD.

PARI: Ama naming makapangyarihan, sa pamamagitan ng Sakramento ng Binyag, nilinis

Mo kami sa aming karumihan at sinuotan kami ng damit ng kadalisayan. Bilang pag-
aala-ala sa biyaya ng Binyag, at bilang pagpapalalim pa sa pananampalatayang aming
pinananaligan at ipinamumuhay, hinihiling naming basbasan Mo ang mga kasuotang
ito ng mga Tagapaglingkod mo sa Dambana ng iyong Kabanalan. Nawa, sa pagsusuot
ng mga ito, mabatid nila ang dakilang karangalang dapat nilang pangalagaan, at
matanto nila ang dakilang pagtawag na dapat nilang tugunan nang buong katapatan.
Hinihiling namin ito sa pamamagitan ni Hesukristong aming Dakilang Pari.
Kandidato at Bayan: Amen.

Wiwisikan ng banal na tubig ang mga kasuotan at simbulo na isusuot ng mga

Lingkod ng Dambana.
Tagapamuno: Maaari na pong lumapit ang mga magulang sa kanilang anak.
Pari: Tanggapin ninyo ang kasuotang ito at pakatandaan na hindi ito isang simpleng
kasuotan lamang, kundi sumasagisag ng inyong taos-pusong paglilingkod kay Kristo.
Pagkatapos, isa-isang iaabot ng kura-paroko ang mga kasuotan sa mga itatalaga . Ang
mga magulang ay susuotan ang mga kandidato.
Pagkatapos suotan ang mga bata, sila ay haharap muli sa dambana.
Pari: Tanggapin ninyo ang krus na ito na s’yang magiging tanda ng inyong
paglilingkod kay Kristo at sa inyong sinumpaang tungkulin bilang Lingkod ng
Dambana.
Isa-isang susuotan ng kura-paroko ang mga bata ng krus

PAGTATALAGA AT PAGPAPANIBAGO
luluhod ang mga itatalaga at magpapanibago

Kandidato: Panginoon/ narito po ako/ hindi man karapat-dapat/ ay tinawag mo/ upang
maglingkod sa iyo./ Sisikapin ko pong maging tapat/ sa mga Gawain/ sa paglilingkod sa
banal na Misa/ at sa pagtulong sa simbahan;/ at maging mabuting halimbawa sa aking
kapwa./ Nawa’y tanggapin ninyo / ang munti kong alay na makapaglingkod ng tapat sa
iyo./ Kaawaan mo nawa ako Panginoon.
Pari: Tumayo po ang mga magulang at sabay-sabay na mangangako.
Magulang: Panginoon, bilang mga magulang ng mga batang ito ay buong puso naming
tinatanggap ang kanilang pagnanais na makapaglingkod sa pamamagitan ng aming
panalangin at paggabay upang maging matatag ang kanilang sarili at pananampalataya sa
Panginoon.
Tagapamuno: Magsitayo po ang lahat.
Pari: (Para sa Sambayanan)

Mga kapatid, narinig ninyo ang kanilang mga ipinangako. Ito ay hindi nila magagawa kung
wala ang inyong suporta at tulong. Nakahanda ba kayo na sila ay ipagdasal at tulungan sa
kanilang mga pangangailangan?

Sambayanan: OPO, kami ay nangangako na tutulungan sila sa abot ng aming

makakaya at sa tulong ng Diyos.

Pari: (Manalangin Tayo)

Diyos na maawain, ibinigay mo sa amin si Kristong Anak Mo hindi upang paglingkuran

kundi upang maglingkod. Sa ngalan ng pag-ibig, ibinuwis niya ang kanyang buhay sa krus
upang iligtas ang sanlibutan. Hinihiling namin na basbasan + mo ang mga kabataang ito
na tinawag mo upang maging lingkod ng inyong banal na Dambana. Pagpalain mo rin ang
mga magulang at buong pamilya na katuwang nila sa kanilang paglilingkod. Hinihiling
namin ito sa pamamagitan ni Kristong aming Panginoon.

Lahat: Amen.

Tatayo ang mga itinalaga at haharap sa sambayanan.

PAGKILALA SA MGA ITINALAGA

PARI: Bilang pagtanggap at pagbati sa kanila, pasalubungan natin sila ng masigabong
palakpakan.

ang mga itinalaga pupunta sa likod para sa pag-aalay, (itutuloy ang misa) para sa
Panalangin ng Bayan.