Mekanisno & Krayterya para sa patimpalak ng Buwan ng Wika 2018

AUGUST 25, 2018 · PUBLIC

Patimpalak : “Spoken Word Poetry”

Paghango

Ang patimpalak na ito’y hinango sa salin na Spoken Word Poetry. Ito ay isa pasalitang uri ng sining at
nakapokus ito sa aestetiko o arte ng mga piyesa, mga pagbigkas ng salita, mga punto, at boses. Ito ay
tulang pabigkas at maaari ring samahan ng komedya o mga prosang monologo.

Layunin

Layon nitong paganahin ang kasanayan sa pagbigkas at matalinong paghahabi ng mga ideya sa isang
paksa.

Tuntunin

1. Ang paligsahan ay bukas para sa lahat ng mga estudyante ng Urdaneta City University, anuman
ang kurso at taon ay maaaring sumali sa patimpalak na ito.

2. Ang kasali sa paligsahan ay isahan lamang. Ang pagpapatala ng kalahok ay sa mga komite.

3. Ang paksa ay "Ako Bilang Isang Milenyal". Maari itong iugnay sa anumang bagay o larangan at
haluan ng ibang timpla.

4. Wikang Filipino ang opisyal na lenggwahe na gagamitin sa naturang patimpalak, maaaring haluan
ng wikang banyaga dahil sa milenyal ang binibigayang-diin ngunit limitado lamang.

5. Ang kalahok ay maaaring sumulat at bumigkas ng malayang taludturan (free verse) o may tugma
(rhyme).

6. Sariling akda ang dapat itanghal. Bawal kumuha sa elektronikong referensya o internet.

7. Ang oras ng pagtatanghal ay hindi dapat kukulang sa tatlong (3) minuto at sosobra sa limang (5)
minuto kung hindi ay ibabawas sa puntos ng mga hurado at kailangang isaulo ang ginawa. Bawal basahin
sa oras ng patimpalak.

8. Ang akdang naisulat ay dapat ipasa sa mga komite bago isagawa ang patimpalak.

9. Ang mga kasali na nagpatala bago ang aktwal na paligsahan at hindi ito dumating sa takdang oras
ay hindi na mabibigyan ng pagkakataon upang ipamalas ang kanyang kakayahan.
10. Nasa ibaba ang krayterya na magiging sanligan ng kalahok:

KRAYTERYA

Pamantayan Puntos

Pagsasaulo 10%

Ekspresyon ng Mukha at Galaw 15%

Atikulasyon 25%

Prodyeksyon ng boses 25%

Nilalaman 25%

Kabuoan 100%

11. Ang magwawagi ay nasa:

Unang Pwesto

Ikalawang Pwesto

Ikatlong Pwesto

12. Anumang pasya o resulta na napagkasunduan ng mga hurado ay rerespetuhin at hindi na

maaring mabago pa.

Patimpalak : “Pautakan at husay sa Filipino”

Paghango

Ang patimpalak na ito’y hinango sa karaniwang tawag sa Tagisan ng Talino. Maaasahang ang patimpalak
na ito’y mangangailangan ng matinding pagsasaliksik sa mundo ng wika at panitikan.

Layunin

Sa pamamagitan ng kaisahan ng isipan ng bawat pangkat na lalahok, maipapamalas ang angking husay at
talas ng memorya sa mga sinaliksik na mga paksa.

Tuntunin
1. Ang patimpalak na ito’y bukas para sa pangkatang paglahok. Ang pangkat na kakatawan sa bawat
Kolehiyo o Departamento ng Universidad ay bubuuin ng mga kalahok na may bilang na lima.

2. Ang mga paksang pagkukunan ng mga katanungan na nangangailangan ng masidhing

pananaliksik ay ang mga sumusunod;

• Batas Pangwika

• Panitikan at Kasaysayan

• Mga tanyag na ngalan

• Retorika at Gramatika

• Pagsasaling-Wika

• Palaisipan o Bugtungan

3. Ang uri ng pagsusulit sa patimpalak na Digmaan sa Pautakan ay maramihang pagpipilian o

multiple choice.

4. Pagkatapos basahin ng tagapangasiwa ng patimpalak ang katanungan at mga pagpipilian ng

dalawang beses doon lamang mag-uupisa ang hudyat para magbreynstorming ang bawat pangkat. Bawat
pangkat ay bibigyan ng sampung segundo para mapagdesisyunan ang isasagot. Isusulat lamang ang letra
o titik ng tamang sagot sa isang piraso ng kardbord.

5. Lahat ng katanungan ay manggagaling sa iba’t ibang kategoryang nakahanay sa itaas at mahahati

sa tatlong lebel o antas;

• Unang lebel: Haruhay - isang salitang galing sa dayalektong Cebuano na ang salin sa wikang
Filipino ay “madali.”

• Ikalawang lebel: Promedyo - isang salitang galing sa dayalektong Pangasinan na ang salin sa
wikang Filipino ay “katamtaman.”

• Ikatlong lebel: Narigat - isang salitang galing sa dayalektong Ilokano na ang salin sa wikang
Filipino ay “mahirap.”

6. Para naman sa paglikom ng puntos;

Antas o Lebel Aytems Puntos

Haruhay sampu Isa

Promedyo labinlima dalawa

Narigat dalawampu tatlo

Kabuuan animnapu sandaan

7. Sa pagkakataong magkaroon man ng pagkakapatas ng puntos ang pangkat na nakakuha ng

pinakamataas na puntos na nalikom, mayroong nakahandang sampung katanungan na ang uri ay
pagkilala o aydentifikasyon upang baliin ang pagkakapatas o tie breaker.

8. Sa mga magwawagi sa patimpalak; ikatlo, ikalawa at ang pinakamaraming nalikom na puntos ang
gagawaran.

Patimpalak : “Dikit-Diwa”

Paghango

Ang patimpalak na ito ay galing sa pansilid na gawain na kung tawagin ay collage-making o sa wikang
Filipino ay paglikha ng kolahe. Sa pagkakataong ito, hindi lamang simpleng pagdidikit ang hinihingi sa
gawaing ito kundi malalimang pagbuo ng konsepto ang magiging batayan sa paglikha nito.

Layunin

Sa bisa ng saliksik at sining maipaparating ang kakaibang uri ng obra-maestra na magpapagalaw ng

malaya at malikhaing imahinasyon. Isa rin itong paraan ng pagsulong at pag-ambag sa muling paggamit
ng mga patapong materyales na ikabubuti ng mamamayang Pilipino.

Tuntunin

1. Ang patimpalak na ito’y bukas para sa indibidwal na paglahok. Ito’y walang limitasyon sa bilang
ng kakatawan sa bawat Kolehiyo o Departamento ng Universidad.

2. Para sa gagamiting materyales, maghanda o magdala ng mga sumusunod;

• Panulat katulad ng bolpen, lapis, marker at iba pa.

• Panukat o ruler

• Pandikit o glue

• Pangkulay (Opsyunal)

• Pira-pirasong materyales

• Kalahating sukat ng Illustration Board

3. Ang patimpalak na ito ay isasagawa lamang sa naitalagang lugar, araw at oras.

4. Anumang bagay, uri, kulay, at hugis ng mga pira-pirasong materyales na gagamitin sa gagawing
kolahe o collage ay pinahihintulutan.

5. Upang lubusang maibigay ang konsepto sa gagawing obra, sa ibabang bahagi ng Illustration
board kailangang maglahad ng isang maikling talata para sa magiging caption o paliwanag nito. Bubuuin
ang maikling talata ng tatlo hanggang limang pangungusap.

6. Bawat kalahok ay bibigyan lamang ng isa’t kalahating oras para matapos ang kabuoan ng kolahe
o collage.

7. Ang tema para sa gagawing kolahe o collage alinsunod sa tema ng Buwan ng Wika 2018 ay,
“Sariling wika’y duyan ng karunungan, ating pagningasin tungo sa Kaunlaran.”

8. Sa mga magwawagi sa patimpalak; ikatlo, ikalawa at ang una ay gagawaran.

9. Ang magiging desisyon ng mga hurado ay pinal at hindi mapapalitan o mababawi.

Krayterya Pormat

Pamantayan Puntos

Kaugnayan sa tema 20%

Kalinisan sa paggawa 10%

Kaangkupan sa maikling paliwanag 10%

Orihinalidad at kakaibang materyales 25%

Malikhaing konsepto 35%

Kabuuan 100%

Patimpalak : “LitraTula”

Paghango

Ang patimpalak na ito’y hinango sa dalawang salitang Litrato at Tula. Sa gawaing ito, pagsasamahin ang
isang tradisyunal na paraan ng pagpapahayag na kung tawagin ay tula at isang modernong paraan sa
pagkuha ng mga iba’t ibang anggulo o sitwasyon ng buhay na kung tawagin ay potograpiya o
photography. Sa pagkakataong mapagsama sa iisang midyum ang dalawang masining na pagpapahayag
ay makakabuo ng isang LitraTula.
Layunin

Maipapahayag ang makabagong paraan ng katha na pinagtibay ng pagsasaliksik sa mga ideolohiya ng

potograpiya at pagsulat ng tula.

Tuntunin

1. Ang patimpalak na ito’y bukas para sa indibidwal na paglahok. Ito’y walang limitasyon sa bilang
ng kakatawan sa bawat Kolehiyo o Departamento ng Universidad.

2. Para sa gagamiting materyales, maghanda o magdala ng mga sumusunod;

• Bolpen (itim lamang)

• Litrato o Larawan

• Pandikit o glue

• Isang kapat (1/4) na sukat ng Ilustration Board

3. Ang patimpalak na ito ay isasagawa lamang sa naitalagang lugar, araw at oras. Liban lamang sa
larawan o litrato na dadalhing naka-imprinta sa sukat na 4r sa araw ng kompetisyon.

4. Sa araw ng paggawa ng nasabing kompetisyon, ididikit na lamang ang larawan sa itaas na bahagi
ng Ilustration Board at ang natirang blankong bahagi sa ibaba ay ang espasyo naman para sa isusulat na
tula.

5. Ipinagbabawal ang kinopyang piyesa at larawan sa internet o anumang sanggunian.

6. Pinapahintulutan ang anumang istilo ng pagsulat (cursive o print).

7. Ang susulating tula ay bubuuin lamang sumusunod;

• Pamagat

• Ngalan ng may-akda sa ibaba ng Pamagat

• Anim na saknong na binubuo ng tig-aapat na taludtod

8. Bawat kalahok ay bibigyan lamang ng isang oras para matapos ang kabuuan ng LitraTula.

9. Sa mga magwawagi sa patimpalak; ikatlo, ikalawa at ang una ay gagawaran.

10. Ang magiging desisyon ng mga hurado ay pinal at hindi mapapalitan o mababawi.

Krayterya Pormat

Pamantayan Puntos
Kagalingan sa pagkuha ng larawan 20%

Kalinisan ng buong paggawa 10%

Orihinalidad at konsepto 15%

Nilalaman ng tula 25%

Kaugnayan ng larawan sa tula 30%

Kabuuan 100%

Patimpalak : “Eh ‘di toryal”

Paghango

Ang patimpalak na ito’y hinango sa editorial o pangulong tudling sa wikang Filipino. Ito ay isang
mapanuring pagpapakahulugan ng isang napapanahong pangyayari na matatagpuan sa bahagi ng isang
pahayagan o diyaryo.

Layunin

Bunga ng pananaliksik sa mga isyu o usapin, layon nitong magpabatid, magpakahulugan, magbigay-puna,
magbigay-puri, manlibang at magpahalaga sa mga opinyon.

Tuntunin

1. Ang patimpalak na ito’y bukas para sa indibidwal na paglahok. Ito’y walang limitasyon sa bilang
ng kakatawan sa bawat Kolehiyo o Departamento ng Universidad.

2. Para sa gagamiting materyales, maghanda o magdala ng mga sumusunod;

• Bolpen (itim lamang) , lapis at pambura

• Panukat o ruler

• Pangmarka o Marker

• Kalahating sukat ng Ilustration Board

3. Ang patimpalak na ito ay isasagawa lamang sa naitalagang lugar, araw at oras. Gayundin ang
pagbibigay ng paksa o isyung panggagalingan ng nasabing patimpalak.

4. Hindi pinapahintulutan ang pagdadala ng sariling kodigo ng susulating editoryal sa araw ng

kompetisyon.
5. Sa gagawing editoryal, kailangang isaalang-alang ang dalawa nitong paraan.

• Una ay ang pasulat na kapapalooban ng simula, katawan at wakas o ang kabuuan ng bubuuing
pahayag.

• Ikalawa ay ang pagguhit sa paraang karikatura o tinatawag ding drawing o sketch.

Ang dalawang paraan ay dapat na magkaugnay upang maipabatid ang diwa ng editoryal.

6. Pinapahintulutan ang anumang istilo ng pagsulat (cursive o print). Para naman sa pormat, ang
karikatura ay nakapuwesto sa itaas na kanang bahagi ng Illustration board samantalang ang bubuuing
pahayag ay isusulat sa natitirang blankong bahagi na kapapalooban ng mga pangungusap na hindi
bababa sa isang-daang bilang.

7. Bawat kalahok ay bibigyan lamang ng isa’t kalahating oras para matapos ang kabuuan ng
editoryal.

8. Ipinagbabawal ang kinopyang piyesa at karikatura sa internet o anumang sanggunian.

9. Sa mga magwawagi sa patimpalak; ikatlo, ikalawa at ang una ay gagawaran.

10. Ang magiging desisyon ng mga hurado ay pinal at hindi mapapalitan o mababawi.

Krayterya Pormat

Pamantayan Puntos

Kagalingan sa paghanay ng kaisipan 15%

Kaalaman sa wika at paksa 25%

Kahusayan sa pagguhit 20%

Kawastuhan sa pagsulat at kalinisan 10%

Kaugnayan ng karikatura sa pahayag 30%

Kabuuan 100%

Patimpalak : “Sabayang Pagbigkas”

Paghango

Ang patimpalak na ito ay isang masining na pagpapakahulugan o interpretasyon sa anumang anyo ng

panitikan sa pamamagitan ng sabayang pagbabasa nang malakas ng isang koro o pangkat.
Layunin

Layon ng patimpalak na ito ay ang mapalawak ang pagiging malikhain nang may kaisahan sa pagbibigkas
at epektibong paghahatid ng mensahe ng piyesa sa mga manonood.

Tuntunin

1. Bukas ang paligsahan para sa mga may asignaturang Filipino lamang..

2. Ang magkaibang klase ay pwedeng pagsamahin upang maging kalahok ng kanilang

departamento.

3. Ang bawat grupo ay binubuo ng 25-30 na miyembro kasama na ang mga props menn

4. Isang piyesa lamang ang gagamitin sa sabayang pagbigkas ang “DIPLOMANG MAY PAKPAK” ni Dr.
Gerdalitz G. Mingarine.

5. Pinahihintulutan ang paglalapat ng himig, tunog, o awitin at ang pagkakaroon ng koryograpi.

6. Maglapat ng sariling sining.

7. Pito (7) hanggang sampung (10) minuto lamang ang nakalaang oras para sa presentasyon at
tatlong (3) minuto para sa paghahanda.

KRAYTERYA

I. Interpretasyon 60%

• Organisasyon ng tinig 15%

• Koryograpiya 15%

• Kaangkupan ng ekspresyon ng mukha o galaw at kumpas 20%

• Pagpapalutang ng damdamin 10%

II. Pagbigkas 20%

• Hikayat sa madla o dating sa manonood 10%

• Kaangkupan ng piyesa sa okasyon, kalahok, kasuotan, at props 10%

III. Pagsasatao 15%

• Pagganap 5%

• Personalidad 5%
• Tindig 5%

IV. Sangkap Teknikal 5%

• Kaangkupan ng tunog, musika, at ilaw 5%

KABUOAN 100%

Ang piyesang ito ay eksklusibong sinulat para sa patimpalak na sabayang pagbigkas. Ito ay kinatha nang
may tusok sa puso at may makabuluhang mensahe na nais iparating.

“DIPLOMANG MAY PAKPAK”

Orihinal na katha ni:

Dr Gerdalitz G. Mingarine

Hmm hmm hmmm (iyak)

May naririnig ba kayong mga ingay?

Hmm hmm hmm (iyak)

Oh kayo ay nagbibingihan?

Paghihignapis bakit tila kayo ay nakapikit?

Nagbubulag-bulagan!!!

Aaaahhhhhhh!!!!!

Aming mga daing.... bakit tila di maramdaman???

Edukasyon ay talagang susi nga ba?

Sa nararanasang karalitaan.

Paano ko makakamtan?

Sabihin mo sa akin , anong dapat gawin???

Oh kami'y sadyang hibang lamang.

Bunga ng guniguning di mawariy pagtantuin

Pagtakas sa tunay na buhay na di maiwalay!

Kayo ba minsan ay sinabihan? Totoy ikaw ay mag-aral? Wika ni Itay

Anak….. , Gagawin ko ang lahat !! makapagtapos ka lamang ...

Kayo ba ay nangako?

Opo. pangako kayo ay diko kayo bibiguin.

At pangako niyo rin ba ay napako?

Paano ko bibiguin???

Pangarap nila sa akin?? Edukasyon kayhirap ko yatang tuparin;

Oh, Ano ang ang aking gagawin?

Sakripisyo, ng magulang ay di dapat biguin !!!

Pag aaral !! Sadyang mahalaga sa akin.

Ngunit ginawa ko ang lahat???

Pagod...Luha....Pawis... pakiusap at sakripisyo..

Edukasyon!!!!

Makuha ka lamang!!!

Upang diploma ay maialay kay Inay at Itay.

At ngayon ikaw ay abot kamay na

aking hihigpitan sayo'y pagkahawak

Di kita susukuan sapagkat dugo at pawis ng

Magulang sayo'y pinuhunan..

Pangako!!! Edukasyon aming makakamit!!!

Edukasyong !!! magbibigay hugis ng buhay.

Kay inay at itay ,pangarap niyong Edukasyon!!

Ngayon! ay Akin nang inaalay

Patimpalak : “Binibeking Tatas-Dunong”

Paghango

Ang patimpalak na ito’y hinango sa sikat na “Miss Q and A” ng It’s Showtime. Bilang pagsunod sa Tema
ng Buwan ng Wika 2018, ito ay isasalin sa Wikang Filipino at maging ang mga tanong at sagot ay
masusing sasaliksin.

Layunin

Layon ng patimpalak na ito ay mabigyang boses ang mga nasa ikatlong kasarian tungkol sa mga
katanungang susukat sa kanilang intelektwal na aspeto. Layunin ding maglatag ng advokasiya ang mga
kalahok kaugnay sa ipinagdiriwang na Buwan ng wikang Filipino.

Tuntunin

9. Ang patimpalak na ito ay bukas para sa lahat ng mga mag-aaral na nasa ikatlong kasarian o third
sex (GBTQ). Inaasahan na ang lahat ng Kolehiyo o Departamento ng Universidad ay magkakaroon ng
kani-kaniyang kinatawan.

10. Ang mga kalahok ay kinakailangang mahusay sa pagsagot sa mga katanungang nangangailangan
ng malaman at matalinong sagutan. Sapagkat ang patimapalak na ito’y iikot lamang sa tanong at sagot.

11. Alinsunod sa pagdiriwang ng Buwan ng Wikang Filipino, ang midyum ng pagpapahayag at

komunikasyon ay nasasalita sa Filipino.

12. Upang magkaroon ng tulong-pinansiyal ang mga lalahok, napagdesisyunan ng pangasiwaan na

magsasagawa ng canvassing. Bawat kalahok ay gagawa ng isang kahon na magsisilbing paglalagyan ng
suportang-pinansiyal. Uumpisahan ang pag-iikot ng kahon, isang linggo bago ang araw ng canvassing.
Ang malilikom ng mga kalahok sa kani-kanilang kahon ay hahatiin sa kalahati. Limampung porsyento ang
mapupunta sa kalahok bilang pangsuporta para sa mga guguguling bagay sa kompetiyon at ang natitirang
limampung porsyento ay mapupunta sa pangasiwaan ng programa para sa mga panghinaharap na
aktibidad.

13. Maliban sa haylayt ng patimpalak na Tanungan at Sagutan, sa araw ng kompetisyon ang mga
kalahok ay magbibihis ng kasuutang yari sa recycled materials na angkop sa pamumuhay o kultura ng
mga lalawigan at probinsya ng bansa. Ang distribyusyon o desiminasyon ng kani-kaniyang probinsiya o
lalawigan ay isasagawa sa pamamagitan ng pagbubunutan. Ang layon nito ay upang saliksikin ng bawat
kalahok ang mayamang kultura at pamumuhay ng pilipino sa iba’t ibang panig ng bansa.

14. Ang mga katanungang sasagutin ng mga kalahok sa araw ng kompetisyon ay masusing sinaliksik
at pinag-aralan.

15. Ang patimpalak ay bubuuin ng tatlong set.

• Una - Dugtungan mo! : Lahat ng kalahok ay sasagot sa paraang dudugtungan ang mabubunot na
parirala. Dito magsisimula ang eliminasyon at ang mapipili ng mga hurado ay walo para umabante sa
susunod na rawnd. (Walang limitasyon sa oras ng pagsagot)

• Ikalawa - Piliin mo, Patunayan mo! : Papipiliin ang mga kalahok kung ano ang mabubunot na
katanungan at kanila itong papatunayan. Dito isasagawa ang ikalawang eliminasyon at ang mapipili ng
hurado ay lima para umabante sa panghuling rawnd. (Tatlumpung segundo ang limitasyon sa pagsagot)

• Ikatlo - Ipaglaban mo! : Ito na ang panghuling pagsagot ng mga kalahok kung saan bibigyan ng
mapaghamong mga katanungan na susukat sa talas ng isipan at kakayahang ipaglaban ang kanilang
kasagutan. (Animnapung segundo ang limitasyon sa oras ng pagsagot)

Sa huling rawnd na ito, pipiliin na ng hurado ang mga sumusunod:

Ikalawang gantimpala - “Binibeking Talino”

Unang gantimpala - “Binibeking Talas-Isip”

Pinakamataas na gantimpala - “Binibeking Tatas-Dunong”

16. Bukod sa pangunahing gantimpala, ang mga kalahok ay maaaring mag-uwi ng maynor na
gantimpala, ito ay ang mga sumusunod:

• Binibeking Ibig ng Madla - Para sa kalahok na sinuportahan ng madla sa canvassing.

• Binibeking Kutis-Marikit - Para sa kalahok na kaakit-akit ang ganda sa larawan.

• Binibeking Tanggol-Wika - Para sa kalahok na may pinakamakabuluhang adbokasiya.

• Binibeking Sulyap-Kultura - Para sa kalahok na nagsuot ng makakalikasan at kakikitaan ng kultura

ng kaniyang lalawigan o probinsya.

• Binibeking Sikap-Agap - Para sa kalahok na nagpakita ng kawilihan at kasipagan na

mapagtagumpayan ang mga gawain sa patimpalak.

17. Ang magiging desisyon ng mga hurado ay pinal at hindi mapapalitan o mababawi.

Ang mga Krayterya

Tanungan at Sagutan (Para sa tatlong set o rawnd)

Pamantayan Puntos

Kagalingan sa pagsasalita 20%

Dating sa manonood 10%

Kaugnayan ng kasagutan sa katanungan 30%

Katalinuhan sa pagsagot40%

Kabuuan 100%

Binibeking Sulyap-Kultura

Pamantayan Puntos

Kaugnayan sa Kultura ng Lalawigan o Probinsiya 35%

Husay sa pagdadala ng kasuutan15%

Orihinalidad at konsepto 20%

Kakaibang ni-risaykel na materyales 30%

Kabuuan 100%

Binibeking Tanggol-Wika

Pamantayan Puntos

Kahusayan sa pananalita 15%

Dating sa manonood 20%

Kaugnayan ng adbokasiya sa tema 35%

Kahalagahan ng adbokasiya 30%

Kabuuan 100%