mahigpit na nauugnay sa gramatika. Kung tutuusin, hindi
maaaring paghiwalayin ang dalawa. Ang isang retorikal na diskurso kasi ay kailangang magtaglay ng kahit dalawang salalayang katangian: pagkamasining at kawastuhang gramatikal. Gaano man kasining ang isang pahayag, kung mali naman ang gramatika nito, maaari itong maging hindi katanggap-tanggap lalo na sa mga iskolar, edukado at kritiko. Bukod pa rito, maaari rin itong maging di-kapani- paniwala at maging katawa-tawa. Kung tutuusin, ang gramatika ay isa ring ispesyalisadong disiplina. Ang masusing pag-aaral nito ay komplikado at nangangailangan ng mahabang panahon. Kung pakaisipin, hindi kailangang maging dalubhasa sa larangang ito upang maging mapanghikayat ang ispiker at manunulat Ngunit anumang kaalaman at kasanayang panggramatika na ating nailalapat sa anumang diskurso, pasalita man o pasulat, ay malaking tulong sa ating pagpapahayag. Sabihin pa, ang kawalan o kakulangan ng kaalaman at kasanayang panggramatika ay may negatibo namang epekto sa ating pagpapahayag sa alinmang paraan. Dahil sa imposibling talakayin pa rito ang lahat ng mga tuntuning panggramatika, ang pagtutuunan ng pagtalakay ay ang mga salalayang tuntuning madalas na katisuran o pagkakamali ng marami.
(Bernales, R.A. et al., Retorika: Ang sining ng pagpapahayag.)