Vantlang Huapzo Pathian Thu (Public

Theology)

Thuhma

Myanmar rama Chin-Zofa ringtute khawsak dan enin kan rinna

hi mimal leh Pathian inkar thil chauh nia ngaiin kan rinna leh
sakhuana hian khawtlang thatna zawn kawngah nghawng nei
khawpin aw a chhuah ngai meuh lo niin a lang a. Kan Pathian
thu tuipui dan pawh hi kan Kristianna huang chhung bikah a
chang fuh bik, varpawh zual bik anga inhriat thuk siak vel a ni
rih deuh ber. Chu chuan Kristianna huangah leh kohhran hrang
hrang inkarah kak zau tak a siam a, inpumkhata rawngbawl
pawh a har tial tial niin a lang a. Chuti a nih chuan, Chin-Zofa
kohhrante hian kan ringtu nun leh Pathian thu pawmdanah
eng hi nge kan tlakchham ni ta ang le? Kan rinna hi ‘khawvel
hneha ngamna’ a ni tih engtin nge kan lan chhuahtir tak ang?
Heng zawhnate hi tunlai theology kalpui dan pawimawh tak
public theology hmangin chhan kan tum dawn a ni. Chutih
rualin Public Theology nihphung zawng zawng kan sawi seng
vek dawn lo tih hresa bawk ila, sawi hmawrhmuhna ang lek
fang a ni mah zawk awm e.

1. Public Theology Eng nge ni?

English thumal ‘public’ tih chu J.F. Laldailova chuan “mipui thil,
tlang hriat, thup loh (adj); vantlang mipui (n)” tiin a hrilhfiah a.
Theology tih hi chu hrilhfiah ngai lovah lum ta ila. Tichuan,
public theology tih chu ‘mipui vantlang huap theology’emaw,
‘tlang hriat leh thup theih loh theolgy’ tihna ang a ni ang. Hetia
a thumal awmzia atanga han lehlin maiah hian fiah vek lo mah
se la, public theology awmzia eng emaw chen chu a tarlang ve
awm e.
Kum zabi 20 laihawl (1950s) vel atang khan secularization
theory-in khawthlanglam mithiamte rilru a hneh hle a.
Secularization theory chuan mihring khawsak dan a changkan
chhoh ang zelin sakhuana chuan vantlang nunah hmun a hloh
tial tial ang a. Sakhua la vuantute pawhin an mimal nun tan
chauh an vuan tawh ang. Sakhuana hi mihringin kan thlauthla
tial tial ang a, sakhuain mihring nunhonaah awmzia a nei lo
tial tial ang an ti a ni deuh ber.

Amaherawhchu, kum zabi 21-na kan han chuang kai a,

tunhmaa mithiamten an ngaihzawn em em secularization
theory letling chiahin khawvelin ke a chhep ta thung a.
Khawvel hmasawnna leh changkannain vantlang nun ata
sakhuana a hnawl bo deuh deuh tur anga ngaih kha, sakhuana
zawkin mimal nunah mai inkhungbet lovin vantlang
nunhonaah thawm na tak tak a  rawn chhuah ta zawk a ni tih
chiang takin kan hmu chho zel a. Tunhmaa secularization
theory vuantu Peter Berger (1999:2) phei chuan, “Sakhaw tel
lo (secularized) khawvela khawsa tur anga kan inngaihna hi a
dik lo a ni. Khawvel hi tunhma aiin a ‘sakhua lo’ chuang hauh
lova, hmun tam takah phei chuan tunhma aiin a ‘sakhua’ deuh
deuh zawk a ni” a ti hial a. Tunlai khawvel hi ‘sakhaw sosan
hun’ (resurgence of religion) tia koh a ni nghe nghe a ni.

Tunlai khawvela sakhaw sosanna hian kan rinna hi mimal nun

tan chauh a ni mai lova, vantlang nun nghawng ngei thil a nih
zawk zia a tilang chiang hle awm e. Chuvangin, kan sakhuana
leh rinna hi mimal nun huang chhungah chauh up beh theih a
ni lova, tunlai khawvela mihringte nunhona khawtlanga 
thilthleng (issues) hrang hrangte nen an inkhawih tawn
(interact) a ngai a ni tih hriatnain ‘vantlang nghawng, tlang
hriat leh thup theih loh theology’ (public theology) hi a hring
chhuak lo thei lo a ni.

Public theology chuan vantlang tana Kristian thurin leh zirtirna

tangkaina leh pawimawhna phawrh chhuah a tum ber a.
Public theology chuan Kristianna hi sakhua leh kohhran huang
chhungah chauh a inkhurbing tur a ni lova, vantlang huap leh
zau zawkin hna leh mawhphurhna hlen chhuah tur a nei tih
nghet takin a pawm a ni. Myanmar-a Kristianten ram leh
khawtlang nghawng khawpa aw chhuah lo leh thiltih nei hlei si
lova, Pathian thu leh theology eng eng emaw kan buaipui ve
viau anga kan inngai hi public theology thlirna atang chuan
ringtuten mawhphurhna kan hlen lo tih a lang chiang hle. Ram
inrelbawlna leh khawtlang nunhona zau zawk nghawng
khawpa rah chhuah thei theology hi kan mamawh chu a lo ni.

1. ‘Huapzo Vantlang’ (Public Sphere) Awmzia

‘Public sphere’ hrilhfiahna siam hmasa bertu German

sociologist leh philosopher Jurgen Habermas-a chuan
‘huapzo vantlang’ (public sphere) chu ni tin nuna ram rorel
khawl (state) leh sumdawnna (market economy)-in
chungnung larha a fawng an vawnna tunlai khawthlang rama
an mamawh tak, ‘mi tu pawh tel theihna rorelna hmun’ (open
forum) angin a hrilhfiah a. Mimal leh chhungkaw tinte sorkar
inlulinna leh sumdawnna dik lo laka an himna hmun tur niin a
sawi. ‘Public sphere’ chu mi tin luh chhuah theih turin a
inhawng (principle of universal access) tur a ni a, zalen leh
inhawng taka inhnial leh thu inchuh a phal (principle of open
debate) bawk tur a ni. Chu inhawnna tel lo chuan ‘vantlang’ nih
a tling thei lo a ti a ni.

Chu huapzo vantlang chhunga che vel ber (main players)-te

chu khawtlang leh politics lama ram imhumhimna leh thatna
ngaihtuahtu pawl ram rorel khawl (State) te, rosum lama ram
himna leh hnianghnarna tur ngaihtuahtu pawl sumdawnna
(market) te, ram rorel khawl kalphung tiphuisuitu emaw a tul
anga chotu civil pawl (civil society)te, hriatna leh thiamna thar
zawng chhuaka thehdarhtu pawl zirna hmunpui (academies)
te, thlarau lam leh ni tin nun  dana kawng dik kawhhmuhtu
sakhaw pawl (religious communities) te leh chu huapzo
khawtlanga thilthlengte tarlang (report)-a a tul anga faksela
thurawn petu pawl media te an ni.
Tunlai khawtlang tinah he pawl parukte hi an khawsa deuh vek
a, an inzawmtawn dan leh an thuneih dan erawh khawtlang
hrang hrangah a inang hlawm lo. Entirnan, democracy
khawtlang ni lovah chuan ram rorel khawlin media a thunun
hle a, Islamic khawtlangah chuan sakhaw pawlten ram rorel
khawl chungah thuneihna an nei lian hle thung. Tunlai
postmodern khawtlang tam berah chuan state, market leh
media te hian vantlang nun an thunun thui hle awm e. Heng
tunlai khawtlang thununtu pawl lian deuh deuh pathumte hian
a bul lama kan sawi secular ideology an thehdarh nasa a,
sakhua nen inkaihhnawih thilte chu hnawl an tum lui tang tang
thin. Hemi chhanletna atan hian political scientist Bhikhu
Parekh chuan sakhua hian tlin tawk lohna eng emaw chu a nei
ve ngei ang, mahse ram rorel khawl tan tangkaina lian tham
tak a nei a, nun dan kawng dik leh thawhhona tha siamtu niin
mihringte hi ram pakhat khua leh tui (citizens) an ni satliah
mai lo va, chu aia thuk zawk leh ropui zawk awmze nei an ni
tih min hriattir a ni tiin a sawi.

Theology chuan zirna hmun academy (khawthlang ram tam

takah chuan university leh seminary)-ah leh sakhaw pawl
(Christian theology bikah chuan kohhran)-ah bu khuarin chu
hmun pahnihah chuan resource leh method atan chak a dap a.
A thil hmuhchhuah leh tangkaina pawh he pawl pahnih huang
chhung tan a ni deuh ber thin. Public theology erawh chu
sakhaw pawlte nen inzawmna nei reng chungin a aia zau
zawkah a inzar pharh a, player dang pali (state, media, civil
society, leh market)-te nen an inkhawih tawnin an thawktlang
a. A thil hmuhchhuah leh a tangkaina pawh khawtlang pum
huapa hman chhuah a ni thin a ni. Hetianga khawtlang
nghawng Pathian thu kalpui dan hi thil thar chu a ni hauh lo. A
bikin hetianglam hawi theology-ah chuan political theology leh
liberation theologies-te hi entirna tha tak an ni awm e.
Amaherawhchu, political theology chuan ram rorel khawl leh
thuneihna chungchang a thlur bing laiin liberation theology
chuan eibarzawnna/sumdawnnalam a bitum deuh bik a.
Public theology huangah erawh chuan heng thil bakah media
leh civil society lamte pawh tinzawn a tul thin a ni. Social
ethics pawh hi khawtlang nun luhchilh dan kawng khat a ni
bawk a, chuvangin public theologian tam tak hi Christian
ethics department lama mite pawh an ni chawk reng a ni.

1. Public Theology Thanchhoh Dan

Political theology chuan Germany ramah bul a tan a,

Liberation theology-in Latin America-ah. Public theology
erawh chuan US rama Kristianten an rinna chu mimal
chhandamna atan leh mimal nun tan ringawt anga an kalpui
nasa lutuk siamthatna a tan North America (USA)-ah bul a
rawn tan a, Europe leh Australia-lamah a inzar pharh thung.
Chutianga khawthlang democracy ram lian tak taka bul intan
leh darh zau ta a nih avangin Public theology hi democracy
rama mipui zalenna theology (a liberation theology for a
democratic society) an tih phah reng a ni.

Public Theology tih tawngkam hmang hmasa bertu chu

American scholar Martin Marty a ni a. Marty-a chuan heng
kohhran ziding pathum mainline Protestant, Evangelical leh
Catholic kohhrante hian public theology hmangin US
khawtlangah hnuhma an nei nasa hle niin a ngai a. A bikin
1960s chho velah khan Catholic Social Teaching, Ecumenical
movement thuchhuahte leh civil rights movement hmangin
public theology hian thawm a nei ring hle a. Kum 1980s chho
velah erawh chuan democracy huang chhunga sakhaw chanvo
te, kohhran kaihhnawih pawlte tangkaina leh theology leh
khawvel huap sumdawnna inkaihhnawih dan chungchangten
hmun an luah ber thung.

Kum 1990 hnu lamah US lamah public theology thawm a reh

deuh hnuin Europe, South Africa leh Australia lamah te thawm
a rawn chhuah ta thung a. US lama mimal-in public theology
an khawih deuh thin ang kha ni tawh lovin khawmual dangah
chuan university leh kohhran pawl hrang hrangah public
theology centre an lo ding chhuak thung a ni. Kum 2006 khan
khawvel hmun hrang hrang atanga centre 25 inzawmkhawm
chuan Edinburgh khawpuiah khawvel pum huap public
theologian pawl Global Network for Public Theology (GNTP)
an tih chu an din a. Kum 2007-ah Princeton-a intawhkhawmna
vawi hnihna an neihah International Journal of Public
Theology (IJTP) chanchinbu puitling leh chhiar manhla tak
mai an chhuah a. Tuna editor ni mek chu Korean-British
theologian Sebastian Kim a ni.

Global Network hnuaia cetre-te chuan anmahni hmun theuhah

khawtlang thil (public issue) an buaipui tlangpui a.
Amaherawhchu huang zauh zelin tunah chuan globalization,
climate change, retheihna, civil society, human rights, gender
leh hnam intluktlanna lamte an buaipui hle a ni. Khawtlang
nun peng hrang hrang, politics leh economics lam issue
thlengin an khawih tel zel a. A tlangpuiin kohhran leh khawtual
pawlho chi hrang hrang nen thawkhovin an thil zirchhuah leh
hmuhchhuahte chu heng an thawhpuite hmang hian an
thehdarh thin a ni.

Public Theology Centre thenkhat hna thawh dan chu area pali-
ah a tlangpui thuin an then a:

1. Engvangin nge Public Theology kan Mamawh?

Thawnthu pakhat an sawi ka hriat chu, thlawhna tla avangin

mi pakhat chu thingkung chungah a parachute-nen a inkhai
reng a. Leilamah chhuk thei si lo, chunglamah inhai chho thei
tawh si lovin laklawh takin a awm a. Ram ngaw pilril tak a nih
avangin a awmna hmun pawh a hre lo. Chutia tanpuitu
mamawha a awm reng lai chuan pa pakhat lo kal a hmu a, “Ka
pu, khawnge ka awm le?” tiin a lo zawt a. Chu pa chuan,
“Thingkung tangah inkhaiin lei dai lo, van dai lovin I awm a nih
kha” tiin a chhang a. Thingkunga mi chuan, “Ka pu chu
theologian I ni chiang mai” a ti a. A hnuaia mi chuan, “Engtin
nge theologian ka ni  tih I hriat theih? Kan la inhmu ngai pawh
a ni si lo va” a ti a. Thingkunga mi chuan, “Thu dik, tangkaina
nei lem lo I sawi thiam em a” tiin a chhang e an ti a. Hei hian
kan khawtlanga Pathian Thu kan tuipui dan leh theology kan
sawisak vel dan min phawrhsak tha viau nia ngaihna ka nei
tlat pek a. Kan ‘halleluia’ thawm a rin that leh kan sermon thuk
leh ril that ang huin mimal nun insiamthat phah leh mizia
inthlakthleng phah ta viau kan awm lem hlei lo niin a lang a.
Khawtlang huapa nun khawsaknaah leh ram pum huapah
Pathian Thu-in min zirtir anga dikna leh thianghlimna
chanchintha au chhuahpui kawngah phei chuan ‘piangsual
tawng thei lo’ ang hlauh kan ni lawi si. Kan Pathian Thu duh
dan leh sawisak vel dan hian eng emaw mamawh chu a nei a
ni.

A dik chauh chuan, theology hi a nihna hrim hrimah vantlang

huap a ni a. Kawng danga kan sawi dawn chuan theology
hlutna leh tangkaina hi Kristianna huang pawnlama mite tan
pawh a ni tel pha ngei tur a ni zawk. A chhan chu Pathian ram
hi kohhran huang chhungah chauh a khungbeh theih lova,
public theology chuan kohhran humhalh aiin Pathian Ram din
a ngai pawimawh zawk a ni. Mimal thil (private) leh vantlang
thil (public) tia thenhran hian public theology-ah chuan
awmzia a nei meuh lo. Public theology tih avanga mahni
mimal leh inchhungkhur pawimawh ngaihthah vek tur tihna
lam a kawk lova. Public tih hian a hmun (place) ai mahin a
inhawnna (openness) a kawk zawk a. Public tih chuan mi tin
leh pawl hrang hrangin zalen taka ngaih dan an vawrh chhuah
theihna leh sawihona zalen a awm theihna lam a kawk zawk.
Public theology felfai tak chher thei tur chuan theologian-ten
vantlang thila theology pawimawhna hrethiam tura vantlang
mipui rilru an hmin a ngai a, chutih rualin Kristiante rilruah
pawh theology hi vantlang tana tangkaina a neih loh chuan a
nih tur a ni pha lo tih hriatna an tuh a ngai bawk awm e.

Mahni kohhran leh Kristianna huang chhung zim te atanga

Pathian Thu insawifiah thiam siak ringawt hian Pathian Thu
thiltihtheihna a lantir tak tak meuh thin lo va. Dik tak leh felfai
taka Pathian thu sawi leh ziah chhuah mai pawh hi a tawk hek
lo. Thufingte 1:20,21-ah finna (chu chu Pathian nung ngei
sawina personification chi khat a ni a) chuan vantlang mipui
hriat ngei ngei tura aw a chhuahna hmunte kan en chuan
kawtthler leh mipui punkhawmna lun lai berah te, mi tin luh
chhuahna hmun leh hmanlaia khawtlang rorelna hmun
pawimawh ber kulh kawngkhar bulah te a ni a au ni. Kan
Pathian thu sawi leh theology buaipuite hian kawtthlerah te,
sumdawnna hmunah leh khawtlang rorelna hmunahte aw an
chhuah pha ve meuh em le? Vantlang nun nghawng leh tlang
hriat thama thiltih nei theology hi kan mamawh tak zet a lo ni
e.

1. Public Theology Ziarang Pawimawhte

A hmasa berah chuan, public theology chuan eng pawl pawh

ni rawh se khawtlang nunhonaa inlulinga thuneihna pum
hmawm tumtu chu a dodal zel a. Sorkar, sumdawnna, media
leh sakhaw pawl pawh ni rawh se, vantlang huap thatna
zawng lova mahni puala hamthatna leh thuneihna hman tum
apiang a bitum zel thin. Mi dang leh pawlho dang te chauh
siamthat a tum lova, public theology chuan sakhuana pawh a
hmansual theih a ni tih hriain amah leh amah a inbihlet a,
insiamtha turin a inhawng reng bawk a ni. Mi tinin zalen taka
aw an chhuah theihna tur ‘vantlang’ (public) siam a tum a, mi
thenkhat tel ve theih lohna emaw, ngaihthah leh rahbeha an
awmna khawtlang chu siamthat (reform) a tum zel a ni.

Chu a thiltum chuan public theology ziarang dang pawimawh

tak khawtlang siamthatna thiltih (social action) a neihtir ngei
ngei thin. Kan rama Kristianten khawtlang tana kan thiltih kan
chhuan ve deuh ber thin chu zangna dawmna leh tanpuina
thilpek thawhkhawma pek tih ang chi (social service) hi a ni
deuh mai a. Hei hian retheihna leh harsatna tobul chhuia a
zung kar chhuah leh siamthat tumna thiltih (social action) a
thleng pha lo a ni. Hetianga chhawmdawlna eng emaw mai
mai inpek hi public theology chuan tawk a ti lova, harsatna
thlentirtu kalphung leh inrelbawlna dik lo hmachhawna
tihdanglam a tum thin a ni.

Chu chuan public theology ziarang dang a hring a, chu chu

huaisen taka tawrh ngamna a ni. Sorkar emaw, sumdawnna
company lian leh thiltithei tak emaw pawh ni rawh se, vantlang
mipui huap thatna (common good) ngaihtuah lova, mahni tan
chauhva thiltihtheihna leh hamthatna pumbil tumtu reng reng
chu public theologian chuan a dodal tlat avangin mirethei leh
rahbehtuarte lamah a tang a. A tul chuan chung mi chak lo
zawkte zingah chuan telin an ruala tawrh mai bakah an
aiawha tawrh pawh a inhuam thin a ni.

Public theology chuan khawtlanga thilthleng chi hrang hrang a

bitum vek avangin a taka chet chhuah a phut rualin displines
hrang hrang hriatna neih a phut tel bawk. Entirnan, mi tlem te
chauhvin an hlawkpui tur chi sumdawnna dik lo leh fel lo
bitum tur chuan sumdawnna chungchang hriatna eng emaw
chen neih ve a ngai a. Ram rorelna dik lo bituma siamtha tur
pawhin politics hriatna thuk tak neih loh chuan tih mai theih a
ni lo. Chuvangin, public theology chuan academic displines
hrang hrang hriatna a ngaihthah a thiang lo a ni.

Public theology chuan Pathian thu hi Kristiante tan chauh a ni

lova, mi zawng zawng tan a tangkai a ni tih nghet takin a
pawm. Chuvangin, Kristiante zirtirna bakah hriatna leh zirtirna
dang hlutna pawh a hmuhsak thiam thin. Entirnan, thilsiam
chungchanga Kristian thurin chu mihring nunhona pumpui tan
a dah pawimawh hle a. Pathian chu Siamtu a ni kan tih hian
inkhawm kal thinte chauh siamtu a ni lova, mi zawng zawng
Siamtu a ni tih a lang nghal. Chutiang bawkin, Kristianna leh
kohhran huang pawna mite hmalakna leh thiltih pawhin
mihring khawsakna atan thathnemna leh tangkaina an neih
chuan chungte pawh chu theology chherna hmanrua leh
Pathian hnathawh lanchhuahna hmanrua an ni ve thei a ni tih
a pawm. Chuvangin, public theology chuan mi dang
tihpianthara ‘Kristian’-a siam kher chauh hi thupui berah a neih
lem lova, hnam leh sakhaw hrang hrang huapzo vantlang
mipuite thatna tur zawn kawngah thahnem a ngai em em
thung a ni.

Hnam hrang leh sakhaw hrang, mi lian leh mi te, mi hausa leh
mi rethei, mithiam leh mimawl thlei dang lova vantlang huap
thatna (common good) a zawn avangin public theology hian
Kristianna leh Chanchintha a thlauthla tihna a ni kher lo.
Public theology chuan rinna leh Chanchintha a thlauthla lo
mai ni lovin chutah chuan zung kai zawk siin mimal nun leh
kohhran huang pelin rinna leh Chanchintha ralthuam hmang
ngei zawk chuan vantlang nun a luh chilh zawk a. Chuvangin,
public theology chu mithiam (theologian)te chauhvin an
khawih leh buaipui bik a ni lova, Kristian zawng zawng emaw
vantlang mipui thiltih leh chetchhuahna (public activity) a ni
zawk a ni kan ti thei ang.

Tlipna

Kan ramah a rampum hriatthamin Kristianna-in aw a chhuah

ngai meuh lova, dikna (justice) leh thianghlimna (holiness)
chungchang sawi ve fo mah ila, dikna leh thianghlimna
tungding tura tawrh huama diklohna leh hlemhletna dodal
ngam Kristian hruaitu erawh kan la awm meuh lo niin a lang.
“Kristiante chu thu an awi a, ram chhungah harsatna an siam
ve lo” tia lo sawi tawk ram hruaitu an awm a ni awm e. Hei hi
Kristiante tan lawmna tur a ni meuh em aw ka ti ve fo thin.
“Thil dik a ni lo” tih leh “Pathian duh dan a ni lo” tih kan hriat
ngei ngeiah pawh dodala aw chhuah ngam lovin kan rinna hi
thih hnua Vanram kaina ticket atan chauh kan thukru bo thin a
ni zawk lo maw? Ram leh khawtlangah dik lo taka inrahbehna
leh inthleidanna a awm pawhin Pathian Thutak hmanga sual
thiltihtheihna hmachhawn ngam ringtu kan awm mang lo a lo
ni zawk mai lo maw?
Ringtu mi tlem te chauh kan nihna hmanga insawi fihlim kan
tum fo thin. Eng emaw chen chu inphatmarna atan a tlak ve
mahna. Amaherawhchu, Kristian zirtirna leh Chanchintha-in
khawtlang nghawng khawpa thiltihtheihna a neih hi mihring
tlem leh tamah a innghat ber kher lo tih phat rual a awm lo.
Khawvel hmun tam takah Kristian mi tlem tein an ram
inrelbawlna sawi nghing khawpin an rinna an dinchhuah pui fo
tho a ni. Rorelna dik lo puhmawhin mahni thiam kan inchan
fova, ram dang leh hnam dang hnen atanga khawngaihna
thilthlawnpek beiseiin kan insawi khawngaihthlak fo thin.
Public theology chuan mahniah bultanin ram leh khawtlanga
sualna chi hrang hrang chu huaisen taka bituma siam tha turin
min phut thung a ni. Chu chu kan hril Chanchintha min zirtir
dan pawh a ni e.

1 Johana 5:4 ah chuan, “Pathian hrin tawh phawt chuan

khawvel a ngam zel si a; hei hi a ni, khawvel hneha ngamna
chu, kan rinna hi” tiin kan rinna hi khawvel hneha ngamna tura
thiltihtheihna nei a ni tih kan hmu a. Chutiang rinna neitu ni si
a, kan tlem avanga kan ram leh khawtlang siamthat hna thawk
ve thei lo leh thawktlak lo anga kan inngaihna hi kan rin
Pathian ngaihnepna leh hmuhsitna mai a lo ni zawk. Vantlang
nun luh chilha vantlang mipui huap thatna zawng ngai lo kan
nih chuan ‘Pathian hrin’ kan lo ni tak tak lo tihna em ni zawk
dawn le?

Chuvangin, kan ram dinhmun inlumlet mekah hian democracy

kalphung pawh thangchho leh hmasawn zel turah beisei ila.
Ringtuten kan rinna leh sakhaw zirtirna tangkaina leh hlutna hi
vantlang hriattham leh thup rual lohva a lo lan chhuah zel
theihnan sual leh  thil tha lo dona kawngah ke I pen sauh sauh
ang u. Mahni kohhran leh sakhuana huang chhunga hre thuk
leh ril zawk, sawi dik leh sawi thiam zawk nih inchuha
inchirhtheh tawn mai mai lovin kan chenna ram leh khawtlang
huapa dikna leh thianghlimna tundinna kawngah leh vantlang
huap thatna zawn kawngah hian kan rinna hmachhuanin i
tangho zawk ang u. Kan ram leh hnam hian chutiang kawnga
huaisen taka hmalatu rinnaa mi hrat khawkheng public
theologian kan mamawh deuh deuh zel dawn a ni.

References:

1. Kim, Sebastian, Theology in the Public Sphere: Public

Theology as a Catalyst for Open Debate (London: SCM Press,
2011).

Sponsored Content