Ang alamat (legend o folklore) ay mahalagang bahagi ng kulturang Pilipino. Ito ay
isang uri ng panitikang nagkukuwento o tumatalakay sa pinagmulan ng mga bagay, lugar, pangyayari, o katawagan. Karaniwang ito ay nagtataglay ng kababalaghan o mga hindi pangkaraniwang pangyayari. Ang alamat ay tumatalakay rin sa mga katutubong kultura, kaugalian, o kapaligiran. Ito ay isang kuwentong maaaring paghanguan ng mga aral para sa ikabubuti ng tao at sumasalamin sa kultura ng bayang pinagmulan.
Ilan pa sa mga halimbawa ng alamat:
• Alamat ng Ampalaya • Alamat ng Bulkang Mayon • Alamat ng Daigdig
Mga Elemento ng Alamat:
1. Tauhan: a. Pangunahin (bida) - Siya ang pinakamahalagang tauhan dahil sa kaniya umiikot ang kuwento mula sa simula hanggang sa wakas. b. Pantulong (suporta) - Siya ay karaniwang kasama ng pangunahing tauhan. Tungkulin niyang suportahan ang pangunahing tauhan. c. Katunggali (kontrabida) - Siya ang sumasalungat o kalaban ng pangunahing tauhan. Mahalaga ang papel niya dahil siya ang nagdaragdag ng kulay sa mga pangyayari sa akda.
2. Tagpuan: Nakapaloob dito ang pook o lugar, panahon, at kondisyon kung saan nangyari ang kabuuan ng alamat.
3. Banghay: Nakikita sa banghay ang maayos na pagkasunod-sunod ng mga
pangyayari, maaaring balangkasin sa pamamagtian ng isang dayagram. a. Panimula - Ipinakikilala rito ang tauhan, tagpuan, at suliraning kakaharapin. b. Pataas na Pangyayari - Nagkakaroon dito ng pagtatangkang malutasang suliraning magpapatindi sa interes o kapanabikan. – Kasukdulan - Pinakamatinding bahagi kung saan ay haharapin ng pangunahing tauhan ang kaniyang suliranin. c. Pababang Pangyayari - Malulutas ang suliranin. Matatamo ng pangunahing tauhan ang layunin. d. Resolusyon - Magkakaroon ang kuwento ng isang makabuluhang wakas.
4. Aral sa Buhay: Nakapaloob sa elementong ito ang makabuluhang mensahe o
magagandang kaisipang taglay ng alamat. Isa ito sa mahahalagang dahilan kung bakit kinagigiliwan ng mambabasa na tutukan ito mula noon hanggang ngayon.